"திங்க"க்கிழமை : சோஹன் ஹல்வா - நெல்லைத்தமிழன் ரெஸிப்பி

திங்கக்கிழமை.பதிவு – சோஹன் ஹல்வா - நெல்லைத்தமிழன்

 

எனக்கு மிகவும் பிடித்தது சோஹன் ஹல்வா. இதை நான் இந்தியாவில் பெரும்பாலும் பார்த்தில்லை. (நான் தமிழகத்தைவிட்டு ரொம்ப தூரம் சென்றதும் இல்லை). பஹ்ரைனில் இருக்கும்போது இந்த ஹல்வாவை பாகிஸ்தானி கடைகளில் பார்த்திருக்கிறேன். ரொம்பவே நெய் ஒட்டிக்கொண்டு, சாப்பிடுவதற்குக் கொஞ்சம் கடினமாக இருக்கும். ரொம்பவே ருசியானது.  நான் அவ்வப்போது இதனை வாங்குவேன். இந்த இனிப்பில் பிரச்சனை என்னன்னா, பற்களுக்கிடையில் ஒட்டிக்கொள்ளும். சாப்பிட்ட பிறகு பல் துலக்கவில்லை என்றால், பற்கள் கெட்டுப்போகும்.

எனக்கு இரண்டு வகையான அல்வாக்கள் பிடிக்கும். ஒன்று கராச்சி அல்வா. அது ரப்பர் போல இழுவையாக இருக்கும். அதனை மும்பையில் டி.மார்ட்டில் பல முறை வாங்கியிருக்கிறேன். கராச்சி அல்வா என்று நம்பி சில முறை வாங்கியதில் இழுவையாக இல்லாமல் இருந்து என்னை ஏமாற்றியிருக்கிறது.  அடுத்தது இந்த சோஹன் ஹல்வா.  

கராச்சி அல்வாவிற்கு ரொம்பவே மெனெக்கிடனும். பத்து நிமிடங்களில் கராச்சி அல்வா, அரைமணி நேரத்தில் அதி ருசி கராச்சி அல்வான்னு போட்ட யூடியூப் பக்கமே போயிடாதீங்க. அதெல்லாம் கராச்சி அல்வா கிடையாது. பல்லுபோன பெருசுகளுக்குக் கொடுக்கும் அல்வா அது.

சரி வந்த வேலையைக் கவனிப்போம்.  இந்த இனிப்பு செய்ய மிகக் குறைந்த அளவு நேரமே போதும். ஆனால் கொஞ்சம் கவனமுடன் செய்யணும்.

தேவையான பொருட்கள்

வித விதமான நட்ஸ் (முந்திரி, பாதாம் உடைத்தது, கசகசா, பிஸ்தா…)

பேப்பர் கப் 15-20.  இதுதான் சரியா வரும்.

பால் பவுடர் ½ கப்

மைதா ½ கப்

ஜீனி 2 கப்

நெய் ½ கப்

செய்முறை

எல்லா நட்ஸையும் கொஞ்சம் பொடியா, அரையா கட் பண்ணி வச்சுக்கோங்க.

பேப்பர் கப்  எல்லாத்துலயும் உள்ளே நெய் தடவிக்கோங்க.

அதில் இந்த பொடித்த நட்ஸ், பாதம் முந்திரி எல்லாம் சிறிதளவு போட்டுக்கோங்க. இதில் எவ்வளவு போடறீங்களோ அவ்வளவு நட்ஸ் ஒவ்வொரு சோஹன் அல்வாவிலும் இருக்கும். அதுவும் தவிர சோஹன் அல்வாவின் மேல்புறம் இந்த நட்ஸ்கள் தெரிந்து அழகா இருக்கும்.

நல்ல கடாய்ல, ஜீனி 2 கப் போடுங்க. அதில் நெய் ½ கப் சேர்த்துக்கோங்க.

இப்போ அடுப்பை SIMல வைத்து நல்லா கிளறணும். தண்ணீர் கொஞ்சம்கூட சேர்க்கவில்லை என்பதைக் கவனிச்சுக்கோங்க.

அடுப்பு சிம்ல தான் இருக்கணும். தொடர்ந்து இதைக் கிளறணும். கொஞ்ச நேரம் ஆனபிறகு நெய் ஜீனி கலந்து, ஜீனி முழுவதுமாய் நெய்ல உருகும். நிறமும் மாறும்.

கைவிடாம கலக்கணும். (பெரிய வேலை இல்லை. அதிகபட்சம் 7-10 நிமிடங்கள்). இப்போ நல்லா கலந்து நிறம் மாற ஆரம்பிக்கும். (கேரமலைஸ் பதம்).  

இப்போ அடுப்பை அணைத்துவிட்டு, மைதா+பால் பவுடர் கலவையை இதில் சேர்த்து கைவிடாம கிளறணும்.  இதை ரொம்ப வேகமாச் செய்யணும். தொடர்ந்து கிளறும்போது அல்வா பதத்திற்கு வருவது போல இருக்கும். கடாய்ல ஒட்டாம வரும்.

இந்தக் கலவையை உடனே ஸ்பூனில் எடுத்து ஒவ்வொரு கப்பிலும் 2 ஸ்பூன்கள் விடவும். விடும்போதே உங்களுக்குத் தெரியும், சோஹன் அல்வா எவ்வளவு உயரத்துக்கு வரும் என்று. அரை இஞ்சுக்கும் குறைவா இருந்தாலே போதும்.

நேரம் கடத்தாமல் எல்லா பேப்பர் கப்பிலும் விடவும்.  உங்களுக்கு பிடிபடுவதற்காகச் சொல்கிறேன். கடைசில கொஞ்சம் பாக்கி இருந்தால், சின்ன தட்டில் நெய் தடவிட்டு அதில் விட்டுவிடலாம்.  ஸ்பூனால லைட்டா சரிப்படுத்தவும் (மேற்பகுதி தட்டையாக இருப்பதற்காக)

அப்படியே கொஞ்ச நேரம் ஆறவிட்டுடுங்க. விரைவில் ஆறிடும்.

பிறகு ஒவ்வொரு பேப்பர் கப்பையும் எடுத்து, கட் பண்ணி எடுத்துவிட்டால், சோஹன் அல்வா தயார்.

கவனம் தேவை

ரொம்ப கிளறிக்கிட்டே இருந்தால், கலவையில் கசப்புச் சுவை ஏறிடும்,, கேரமலைஸ் ஆவதால்.

ஜீனியையும் நெய்யையும் தொடர்ந்து கலக்கலைனா ஜீனி முழுவதும் நெய்யில் கரையாது. கேரமலைஸ் ஆகாது.

அடுப்பை சிம்மில் வைக்காமல் அதிக சூடு வைத்தால், ஜீனி கடாயில் ஒட்டிக்கொண்டு கருகிவிடும்.  

அதனால அடுப்பை சிம்மில் வைத்துவிட்டு, இந்த இனிப்பு தயார் செய்வதில் கவனம் செலுத்தவும். அடுத்தவங்கள்ட பேசிக்கொண்டே இந்த வேலையைச் செய்ய முடியாது. 

 

சரி, எப்படி இருந்தது என்று கேட்கிறீர்களா? நன்றாகத்தான் இருந்தது. இன்னும் கொஞ்சம் முன்னாலேயே எடுத்திருந்தால் இன்னும் சாஃப்டா இருக்குமா என்று இன்னொரு தடவை செய்து பார்க்கலாம் என்று நினைக்கிறேன்.