'திங்க'க்கிழமை - மோர்சாத்துமது - நெல்லைத்தமிழன் ரெஸிப்பி

 மோர் உபயோகித்துச் செய்யும் மோர்க்குழம்பு, புளிமோர்க்குழம்பு, புளிசேரி இவைகளுக்கு அடுத்தபடியாக எனக்குப் பிடித்தது மோர்ச்சாத்துமது.  இது 'ரசம்' என்று சொல்லப்பட்டாலும், குழம்புக்குப் பதிலாகத்தான் இதனைப் பண்ணுவோம். 

ரொம்ப சுலபமான ரசம் இது.  நல்ல கோஸ் வாங்கினேன்னா, உடனே இதனைப் பண்ணச் சொல்லுவேன். மோர்ச்சாத்துமது, கோஸ் மிளகூட்டு ரொம்பவே பிடித்த காம்பினேஷன்.

தேவையானவை

 

வற்றல் மிளகாய் 2

வெந்தயம் 1/2 தேக்கரண்டி

பெருங்காயம் ஒரு துண்டு

மஞ்சப்பொடி 1/4 தேக்கரண்டி

உப்பு

மோர் (புளித்தது நல்லது) 1/4 லிட்டர்

தாளிக்க கருவேப்பிலை, கடுகு

 

செய்முறை

 

துளி எண்ணெயில், பெருங்காயம், வற்றல் மிளகாய் தனித்தனியாக வறுக்கவும். பிறகு வெந்தயம். 

கொஞ்சம் ஆறின பிறகு, இதனை மிக்சியில் கரகரவென பொடி பண்ணவும்.

இதனுடன் உப்பு சேர்த்து மோரில் நன்கு கலக்கவும்.

இதனை மிக லைட்டாக சூடுபடுத்தவும். 

இதில் கடுகு, கருவேப்பிலை தாளித்து, அதில் மஞ்சள் பொடியைத் தூவிக் கலக்கிச் சேர்க்கவும். எண்ணெய்ச் சூட்டில் மஞ்சள் பொடி வறுபட்டுவிடும்.

அவ்ளோதான்... மோர்சாத்துமது  (மோர் ரசம்) ரெடி.

என் அம்மா, மோர் நிறைய மிஞ்சிவிட்டால் இதனைப் பண்ணுவார்.  மோரில் செய்யப்படும் அப்பக்கொடி மோர்க்குழம்பு (அதைச் சாப்பிட்டு குறைந்தபட்சம் 40 வருடங்களாகிவிட்டது. நெல்லையில் இருந்தபோது சாப்பிட்டது) மற்றும் மாங்காய் அரைத்துவிட்ட மோர்க்குழம்பும் எனக்கு ரொம்பவே பிடிக்கும்.  நெல்லைக்குச் சென்றிருந்தபோது அப்பக்கொடி எங்க கிடைக்கும் என்று தேடினால், நாட்டு மருந்துக்கடைக்குப் போங்க என்றார்கள். அதைத் தேடிக்கிட்டுப் போகமுடியலை. இந்த இரண்டு செய்முறையும் எப்படி என்று யாரேனும் எழுதுங்கள்.