நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 13 : நெல்லைத்தமிழன்

 

நான் தரிசனம் செய்த கோயில்கள் – நெல்லைத்தமிழன்

ஐந்து துவாரகைகள் யாத்திரை – பகுதி 13

சோம்நாத்தில் இருக்கும் கோவில்களைத் தரிசித்த பிறகு, சோம்நாத் ஜ்யோதிர் லிங்கத்தையும் தரிசித்த பிறகு, பேருந்தில் ஏறி, சுமார் 7 கிமீ தூரத்தில் உள்ள விராவல் என்ற இடத்தை மதியம் 4 மணி வாக்கில் அடைந்தோம்.  இங்குதான் ஸ்ரீகிருஷ்ணர், ஜரா என்ற பெயருடைய வேடனால் அம்பு எய்யப்பட்டு உயிர் நீத்த இடம்.  இந்த இடம் ஒரு காலத்தில் காட்டுப் பகுதி. ஸ்ரீகிருஷ்ணர் அமர்ந்திருந்தது ஆலமரத்தின் அடியில் என்று சொல்கிறார்கள். கோவில் அழகாக வடிவமைக்கப்பட்டிருந்தது. சன்னிதியிலேயே பட்டுப்போன மரத்தின் அடிப்பகுதி இருந்தது. கோவில் சமீபத்தில் அமைக்கப்பட்டிருந்தாலும், இடம் தொன்மையானது. அவ்வப்போது கட்டப்பட்ட சிறு கோவில்கள் மறைந்து பிறகு சமீபத்தில் நன்றாகக் கட்டப்பட்டிருக்கலாம்.

இந்த இடத்தை BHபால்க தீர்த்தம் என்கிறார்கள். 

பால்கா தீர்த்தத்தில் அமைந்துள்ள கோவில் நுழைவாயில்.

பால்கா தீர்த்தம் – விராவல் – ஸ்ரீகிருஷ்ணர் வேடனால் அம்பெய்யப்பட்டு உயிர் துறந்த இடம்.

கோவில் விமானம்.

மிகச் சுத்தமாக இருக்கும் வளாகம்.

ஸ்ரீகிருஷ்ணர் வேடனால் கொல்லப்பட்டதைச் சித்தரிக்கும் கோவில் கர்பக்ரஹம். அருகில் ஆலமர அடிப்பாகத்தைக் காணலாம். 

ஸ்ரீகிருஷ்ணர் வேடன் செலுத்திய அம்பால் உயிர் பிரிந்த காட்சியை சன்னிதானத்தில் காணலாம்.

இது என்னடா புது வேடம் என்று நினைக்காதீர்கள்.  ஆங்காங்கே கீழே அமரவேண்டும் என்றால், வேஷ்டி அழுக்காகிவிடுகிறதே என்ற கவலை வந்துவிடுகிறது. அதனால் உட்காருவதற்கு முன்பு தயாராக வைத்திருக்கும் துண்டைக் கட்டிக்கொண்டுவிடுவேன். தனியாக துண்டை கீழே விரித்தால், எழுந்திருக்கும்போது எடுத்துக்கொள்ள மறந்துவிடும் என்பதால். தரிசனம் செய்யப் போகும்போது, துண்டைக் கழற்ற சில நேரங்களில் மறந்துவிடும். அவ்ளோதான் விஷயம். 

சன்னிதியின் நுழைவாயில் சிற்பம் மற்றும் அழகிய மேல் விதானம்.

படங்களின் மூலம் கோவிலின் விஸ்தீரணம் தெரிகிறதா?

கோவில் அருகில் இருந்த குளம். அடுத்த பகுதியில் வாழை மரங்களுடன் கூடிய சிறு தோட்டம்.

கோவிலின் வெளியே பலவித கற்களும், கடல் சம்பந்தப்பட்ட பொருட்களும் விற்கிறார்கள். கோமதி துவாரகையை விட விலை மிக அதிகம்.

கோவிலில் தரிசனம் செய்த பிறகு, அருகிலிருந்த இடத்திலேயே மாலை காபி கொடுத்தார்கள். என்ன இனிப்பு, காரம் வழங்கினார்கள் என்பது நினைவுக்கு வரவில்லை. அங்கிருந்து 6 மணி வாக்கில், அஹமதாபாத்தை நோக்கிப் பிரயாணிக்க ஆரம்பித்தோம்.

அஹமதாபாத் சுமார் 400 கிமீ தூரம். வழியில் சுமார் 9 மணிக்கு ஒரு பெட்ரோல் பங்கில் நிறுத்தி (அங்குதான் ரெஸ்ட் ரூமும், தண்ணீரும் கிடைக்கும்), கோதுமை ரவை உப்புமா, தக்காளி தொக்கு, தயிர்சாதம் சாப்பிட்டோம்.  பயணம் தொடர்ந்து, அதிகாலை 3 ¼   மணிக்கு அஹமதாபாத் ஸ்வாமிநாராயணன் கோவிலை அடைந்தோம்.  இது மிகப் பெரிய வளாகம். கோவில், தங்குமிடம், தங்குபவர்களுக்கான சமையல் செய்யும் மிகப் பெரிய இடம் மற்றும் நடுவே பெரிய மைதானம் போன்றவற்றைக் கொண்டது. அவரவர்களுக்கு அறை கொடுத்தார்கள். நல்ல சௌகரியமான இடம்.

யாத்திரையில் கலந்துகொள்பவர்களுக்கு இரவு தங்குவதற்கு பொதுவாக ஹால் இருக்கும். அறை (separate room, suitable for a family of two) தரும் வாய்ப்பு இருந்தால், தேவைப்பட்டவர்களுக்கு ரூம் தருவார்கள். அதற்கான வாடகை நாம் கொடுக்கவேண்டும். நாங்கள் எப்போதுமே, தனி அறை கிடைக்கும் வாய்ப்பு இருந்தால் தரச்சொல்லிவிடுவோம். காரணம் நிம்மதியான தூக்கம், நல்ல ரெஸ்ட் ரூம். அறை வாடகையும் பொதுவாக ஒருவருக்கு 500 ரூபாய்க்கு அதிகமாக எங்குமே இருப்பதில்லை.

யாத்திரையில் தங்குமிடம் கொடுத்தாலும், பொதுவாக அகால நேரமாக அமைந்துவிடும். ரூம் அலாட் செய்து, சாவி வாங்கி, நம் உடமைகளைக் கொண்டுபோய் வைத்துவிட்டு, அடுத்த நாள் எத்தனை மணிக்குத் தயாராக இருக்கவேண்டும் என்பதைக் கேட்டுக்கொண்டு, நம் அறைக்குச் சென்று படுப்பதற்குள் வெகுநேரமாகிவிடும். இங்கும் நாங்கள் படுத்துக்கொள்ள 4 மணி ஆகிவிட்டது. 

இரவில் தங்க நிறமாகப் பளபளத்த ஸ்வாமி நாராயணன் கோவில் வளாக வாயில்.

எங்களுக்குக் கொடுத்த வசதியான அறை. 500 ரூபாய் என்று நினைவு.

காலை 6 ½ மணிக்கெல்லாம் குளித்துத் தயாராகிவிட்டோம். காபி குடித்த பிறகு, வளாகத்திலிருந்த அழகிய கோவிலுக்குச் சென்று தரிசித்தோம்.

ஸ்வாமி நாராயணர் கோவில்

கோவில் கோபுரமும், வளாகத்தின் தோற்றமும்

மெல்லிய ரோஸ் நிறக் கற்களாலான கோவில்

கோவிலின் உள் இருந்த அழகிய தூண்கள்

அழகுபடுத்தப்பட்ட விதானம்

ஆயிரக்கணக்கானவர்கள் வந்தாலும் தாங்கக்கூடிய பெரிய வளாகம்.

இந்தக் கோவிலிலிருந்து (தங்குமிடத்திலிருந்து) எல்லா சன்னிதிகள், வளாகம் முழுமையும் சுற்றிப் பார்த்துக்கொண்டிருந்தோம். 10 மணி வாக்கில் காலை உணவுக்குப் பிறகுதான் மற்றக் கோவில்களுக்குப் பிரயாணிக்கப் போகிறோம்.

10 மணிக்குத்தான் சாப்பாடு, அதனால் இன்னும் கொஞ்ச நேரம் தூங்கிவிட்டு 9 மணிக்கு கோவிலுக்குப் போனால் போதும் என்று இருந்துவிட முடியாது. பொதுவா காலை காபி 6 மணிக்கு (அல்லது 5 ½ க்கு) இருக்கும் என்பதாலும், அந்தச் சமயத்தில்தான் அன்றைய ப்ரோக்ராம் சொல்லப்படும் என்பதாலும், காபி வேண்டுமோ இல்லை வேண்டாமோ, அந்த நேரத்தில் நாம் அங்கு சென்றுவிட வேண்டும்.

கோவிலின் மற்றும் வளாகத்தின் அழகிய புகைப்படங்களை அடுத்த வாரமும் தொடர்வோம். அதன் பிறகு எங்கெல்லாம் சென்றோம் என்பதையும் பார்ப்போம்.

(தொடரும்)