தூக்கம் வரும் முன்னே.. குறட்டை வரும் பின்னே...

​பரிமாறுவது ஒரு கலை.   

பிங்க் படத்தில் அமிதாப் ஒரு கருத்தை வலியுறுத்திச் சொல்வார்.  

வேண்டாம் என்பதற்கு வேண்டாம் என்றுதான் அர்த்தம்!  அவர் படத்தில் சொல்லும் காரணம் வேறு என்றாலும்.  வேண்டாம் என்னும் வார்த்தைக்கு வேண்டாம் என்றுதான் அர்த்தம்.  போதும் என்றால் போதும்தான்!  ஹிஹிஹி...  புரியவில்லையா?

ஆனால் பரிமாறுபவர்கள் என்ன நினைக்கிறார்கள்?  போதும் என்று சொன்னபிறகு இன்னும் கொஞ்சம் பரிமாறுவதுதான் மரியாதை, அன்பு என்று நினைத்துக்கொண்டு தடுக்கத்தடுக்க இன்னும் கொஞ்சம்...  இன்னும் கொஞ்சம்.. இன்னும் கொஞ்சம் போடுவார்கள். 

எல்லோரும் அன்பு என்று நினைப்பார்களோ என்னவோ, சிலருக்கு, குறிப்பாக எனக்கு அது முகத்தில் அடிப்பது போல போடுகிறார்களே, எப்படி இவ்வளவு சாப்பிடுவது என்று தோன்றும்.  என் பாட்டி ஒருவர் இரவு எதுவும் மிஞ்சக் கூடாது என்று நினைத்து விட்டால், போதும் என்கிற வார்த்தையை காதிலேயே போட்டுக்கொள்ள மாட்டார்..  பிடிக்குமாவது..   பிடிக்காதாவது!  சாப்பிடவே தோன்றாத அளவில் தட்டில் விழுந்து விடும்.

ரொம்பச் சிலர் இன்னும் கொஞ்சம் போடமாட்டார்களா என்று நினைக்குமளவு பரிமாறுவார்கள்.  ஆனால் நினைத்துப் பார்த்தால் இது பரவாயில்லை என்றே தோன்றும்.

முன்னரே சொல்லி இருக்கிறேன்.  விருந்துகளில் சாப்பிடும்போது பெரும்பாலும் எதையும் வீண் செய்ய மாட்டேன். சாப்பிடும் பண்டங்களை மட்டும்தான் பரிமாற அனுமதிப்பேன்.  ​பிடித்த விஷயங்களை இறுதியாகச் சாப்பிட்டு, மற்றவற்றை முதலில் முடிக்கும் பழக்கம் எனக்கு உண்டு.   முடிக்க முடிக்க சில சமயங்களில் அவை மீண்டும் மீண்டும் பரிமாறப்படும்.  தடுத்து விடுவேன்.  

நான் பரிமாறும் நேரங்களில் போதும் என்றால் நாகரீகமாக ஓரிரு முறை வலியுறுத்திப் பார்ப்பேன்.  அவர்கள் முகக்குறிப்பிலிருந்து போடுவதா வேண்டாமா என்று புரிந்து விடும்.  

என்னவோ போங்க..  ஏதோ சொல்லணும்னு தோணிச்சு...!  

=================================================================================================

=======================================================================================================

என் பாஸின் அத்தையின் பேரன்கள் இருவர் மாநில அளவில் சதுரங்க சேம்பியன்கள்.  இரண்டு மூன்று பேர்களுடன் விளையாடுவார்கள்.  திரும்பி உட்கார்ந்துகொண்டு விளையாடுவார்கள்.  இணையத்தில் ஒருவருடன் ஆடிக்கொண்டே இங்கு என் மகன்களுடன் விளையாடுவார்கள்.

தான் ஒரு ராஜாவை மட்டும் வைத்துக்கொண்டு என் மகனிடம் ராஜா, ராணியை வைத்து, எத்தனை மூவ்களில் மேட் செய்கிறாய் என்று பார்ப்போம் என்று பயிற்சி கொடுப்பார்கள்.

எப்பொழுது கேட்டாலும் என் இளைய மகன் கருப்பு காய்தான் தேர்வு செய்வான்.  "ஏண்டா வெள்ளை செலெக்ட் செய்ய மாட்டேங்கிறே?" என்பான் அவன்.

"நான் முடிவு எடுக்க வேண்டாம் பாரு..  நீ மூவ் செய்வதை ஒட்டி நான் மூவ் செய்தால் போதும்" என்பான் என் மகன்.

விளையாட்டுதான் என்றாலும் மனோதத்துவரீதியாக இது கொஞ்சம் அவன் கேரக்டரைச் சொல்கிறதோ...!  தலைமைப்பண்பு குறைவு என்று சொல்லலாமா?  அல்லது ஜாக்கிரதையானவன் என்று சொல்லலாமா?

====================================================================================================

ஓரிரு பாடல்களை  ஒரு தளத்தில் நான் தேடி எடுக்கக் கேட்டுக்கொண்டிருந்ததை அதிரா சென்ற வாரம் லிங்க் கொடுத்திருந்தார்.

நான் ரொம்ப நாட்களாய் தேடிக்கொண்டிருந்தேன் என்பதற்கு இன்னொரு சான்று!  (அதுக்கு இப்போ என்னங்கறீங்களா?)  

இதில் சில பாடல்கள் அப்புறம் கிடைத்தன.

========================================================================================================

2014 இல் முகநூலில் பகிர்ந்தது...  2020 இல் சென்னையில் நிலத்தடி நீரே இருக்காது என்று செய்தி படித்தேன்.  அப்படி ஆனால் அதற்கு நாமேதான் காரணம்.

நம் முன்னோர்களிடம் ஒரு வழக்கம் இருந்து வந்தது. அவர்கள் தினமும் குளத்தில் குளிக்கும் போதும் குளித்து முடித்த பின்னும், ஒரு கைப்பிடி மண்ணை எடுத்து கரைக்கு வெளியே போட்டு விடுவார்கள். 

இப்படி செய்வது, குளத்தினை தினமும் தூர்வாருவதற்கு சமம். குளிக்கும் ஒவ்வொருவரும் தினமும் ஒரு கைப்பிடி மண்ணை அள்ளி வெளியேற்றும் போது, குளம் எப்போதும் ஆழமாகவே இருக்கும். நீர் எப்போதும் நிறைந்திருக்கும். அந்தளவிற்கு அப்போது பொறுப்பான சமூகம் இருந்தது. 

அதேபோல் ஆற்றிலோ, குளத்திலோ சிறுநீர் கழிப்பதோ, மலம் கழிப்பதோ, மலம் கழித்து விட்டு சுத்தம் செய்வது போன்ற செயல்களையும் செய்ய மாட்டார்கள். அது குடிநீர், குளிக்கும் நீர் என்பது எல்லோருக்கும் தெரியும். 

நீர் நிலைகளை தெய்வமாக மதித்து அருகில் கோயில் கட்டினார்கள். 'மரங்களுக்கு சந்தனம் பூசி, ஆடை கட்டி அதனை வழிபட்டு, அது தெய்வம், வெட்டாதே,' என அறிவுறுத்தினார்கள். எல்லாவற்றையும் நாம் தவறாக புரிந்து கொண்டோம். இன்று ஆறுகள், குளங்கள் எல்லாமே கழிவுகளின் சங்கமம் ஆகி விட்டன. பிளாஸ்டிக் குப்பை அடைத்து பூமித்தாய் பிளாஸ்டிக் போர்வையால் போர்த்தப்பட்டு விட்டாள். ஒரு சொட்டு தண்ணீர் கூட பூமிக்குள் இறங்காதோ என்ற நிலைதான் இன்றைய சூழ்நிலை. ஆற்றிலோ, வாய்க்காலிலோ, குளத்திலோ தண்ணீர் தேங்க முடியாத அளவிற்கு நாம் சுற்றுச்சூழலை மாசுபடுத்தி விட்டோம்.

இப்படி ஒரு பொறுப்பற்ற சமூகத்திலும், பொறுப்பான சிலர் வாழ்ந்து வழிகாட்டிக் கொண்டுதான் உள்ளனர். தேனி அருகே மதுராபுரியில் ஏ.சி.வி., மில்ஸ் நடத்தி வருபவர் சந்திரசேகர். இவர் 2004ம் ஆண்டே தனது மில்லில் மழைநீர் சேகரிப்பு கட்டமைப்பை உருவாக்கி விட்டார். 

இவரது மில்லின் பரப்பளவு இரண்டே முக்கால் ஏக்கர். இவ்வளவு நிலத்திலும் விழும் ஒரு சொட்டு நீர் கூட வீணாக வெளியேறாது. 9,200 சதுர மீட்டர் பரப்புள்ள இந்த மில்லில், கட்டடம் மட்டும் 5,200 சதுர மீட்டர். அதேபோல் மற்றொரு இடத்திலும் மில் வைத்துள்ளார். இதன் பரப்பளவு 40 ஆயிரம் சதுர அடிக்கு மேல் உள்ளது. 

எல்லா இடங்களிலும் மழைநீர் சேகரிப்பு அமைத்துள்ளார். கட்டடத்தின் மேல்தளத்தில் விழும் மழைநீர் வெளியேற மேலேயே கான்கிரீட் வடிகால் அமைத்துள்ளார். இந்த கான்கிரீட் வடிகாலில் இருந்து வரும் நீர் கான்கிரீட் வாய்க்கால் வழியாகவே செல்கிறது. தரைதளம் முழுவதும் பேவர் பிளாக் அமைத்து, இதில் விழும் மழைநீரும், கான்கிரீட் வாய்க்கால் வழியாகவே சென்று மிகப்பெரிய கிணற்றில் விழுவது போல் அமைத்துள்ளார். 

இந்த கிணறு மட்டும் 25 லட்சம் லிட்டருக்கும் மேல் கொள்ளவு கொண்டது. ஆண்டுக்கு இவரது மில்லில் மட்டும் சராசரியாக 2 கோடி லிட்டர் தண்ணீர் சேகரிக்க முடியும். அந்த அளவிற்கு மழைநீர் சேகரிப்பை வலுவாக அமைத்துள்ளார். 

இவரது மில்லில் 200 பேர் வேலை பார்க்கின்றனர். தினமும் இவர்களது தேவை மட்டும் 12 ஆயிரம் லிட்டர் தண்ணீர். இந்த கணக்குப்படி இவர் ஒவ்வொரு ஆண்டும் சேகரிக்கும் மழைநீர், இரண்டு ஆண்டிற்கும் மேல் போதுமானதாக உள்ளது. மழைநீர் சேகரிப்பு அமைத்தது முதல் தற்போது வரை, மில்லில் தண்ணீர் பற்றாக்குறை ஏற்பட்டதே இல்லை. 

இதனால் மில்லிலேயே பால்பண்ணை அமைத்துள்ளார். சொட்டுநீர் பாசனம் மூலம் விவசாயம் செய்து வருகிறார்.

சந்திரசேகர் கூறியதாவது:

"என்னை மழைநீர் சேகரிப்பு அமைப்பு அமைக்குமாறு யாரும் அறிவுறுத்தவில்லை. மாறாக நான் அமைத்த போது, எதற்கு வீண் வேலை செய்கிறாய் என கிண்டல் செய்தனர். 

நான் அதைப் பற்றி கவலைப்படாமல் மில் வளாகம் முழுவதும் சேரும் தண்ணீரை கடந்த 10 ஆண்டுகளாக சேகரித்து வருகிறேன். இதனால் இப்பகுதி முழுவதுமே நிலத்தடி நீர் வளம் பாதுகாக்கப்பட்டு வருகிறது. 

கடந்த மூன்றாண்டுகளாக மழையே இல்லாத நிலையிலம், எங்கள் மில் வளாகத்தில் உள்ள ஆழ்குழாய்களில் தண்ணீர் நன்றாக கிடைக்கிறது. நான் ஏற்றுமதி நிறுவனம் நடத்தி வந்தாலும், அடிப்படையில் விவசாயக்குடும்பத்தை சேர்ந்தவன் என்பதால், எனக்கு நிலத்தடி நீரின் முக்கியத்துவமும், விவசாயத்தின் மகத்துவமும் முழுமையாக தெரியும். 

இயற்கையை மதிக்கத் தெரியும். எனவே இயற்கைக்கு எந்த பாதிப்பும் இல்லாத வகையில் இயற்கை வளங்களை முழுமையாக பாதுகாத்து வருகிறேன். ஆரம்பத்திலேயே கான்கிரீட்டால் வலுவான முறையில் அமைத்து விட்டதால், ஒவ்வொரு முறையும் பராமரிப்பிற்காக நான் சிரமப்பட வேண்டிய அவசியம் ஏதும் ஏற்படவில்லை." 

இவ்வாறு கூறினார். 

மழைநீர் சேகரிப்பு தொழில்நுட்பம் அறிய 98422 71975 ஹலோ சொல்லுங்க.

- தினமலர் -

=================================================================================================

நான் பயங்கர குறட்டை மன்னன்.  என் வீட்டார் என் இந்த குறட்டை சத்தத்துக்குப் பழகி விட்டனர்.  இப்போது அவர்கள் என் குறட்டைச்சத்தம் இல்லாவிட்டால்தான் தூக்கம் இன்றி கஷ்டப்படுவார்கள்!!!  நான் வெளியூர் சென்றாலோ, அல்லது உறவினர் எங்கள் வீட்டுக்கு வந்தாலோ... என்னுடன் ஒரே அறையில் படுபவர்கள் தொலைந்தார்கள்!  தூங்க முடியாது.  அவர்களைச் சொன்னேன்.  ஆனால் பெரும்பாலும் அவர்களும் என்னுடன் குறட்டையில் போட்டி போடுபவர்களாகவே இருப்பார்கள்.  இது மாதிரி தருணங்களில் யார் முதலில் தூக்கத்தில் ஆழ்கிறார்களோ அவர்கள் பாக்கியவான்கள்!  நான் எப்போதும் முந்திக்கொண்டு விடுவேன்!!

முன்னர் தினகரனில் வந்த குறட்டைக் கட்டுரையை முகநூலில் பகிர்ந்திருந்தேன்.  அது...

குறட்டையை தவிர்க்க சில வழிமுறைகள் : [தினகரன் நாளிதழிலிருந்து...]

இன்றைய காலத்தில் நிறைய மக்கள் குறட்டையினால் பெரும் அவஸ்தைக்குள்ளாகின்றனர். இத்தகைய குறட்டையை நிறுத்த நினைத்தாலும், ஆழ்ந்த உறக்கத்தில் இருக்கும் போது நம்மை அறியாமலேயே குறட்டையானது வந்துவிடுகிறது. இதனால் நம்முடன் படுப்பவர்கள் பல நாட்கள் தூக்கத்தை தொலைத்துவிடுகின்றனர். பொதுவாக குறட்டை என்பது ஒரு கோளாறு. 

இது குரல் வளையில் காற்றானது அளவுக்கு அதிகமாக செல்லும் போது, அதிகப்படியான ஒலியை உண்டாக்குகிறது. அதிலும் காற்றானது வாய் மற்றும் மூக்கின் வழியாக இடையூறுடன் செல்லும் போது அது பலத்த ஒலியை உண்டாக்குகிறது. குறிப்பாக சளி அல்லது மூக்கடைப்பின் போது இந்த மாதிரியான சப்தம் ஒலிக்கப்படும். மேலும் குறட்டையானது வயது, சைனஸ், அதிகப்படியான உடல் எடை மற்றும் புகைப்பிடித்தல் ஆகிறவற்றின் காரணமாகவும் ஏற்படும். இப்படி குறட்டை விட்டால், அது உடல் நலத்தைப் பாதிப்பதோடு, உறவுகளில் தொல்லையை உண்டாக்கும். ஆகவே அந்த குறட்டையை நிறுத்துவதற்கு ஒருசில எளிய வழிகளை உங்களுக்காக கொடுத்துள்ளோம்.

· * தலையணை படுக்கும் போது தலையணை பயன்படுத்தாமல் சாதாரணமாக படுப்பதற்கு பதிலாக, சற்று அதிக அளவில் தலையணையைப் பயன்படுத்தி தூங்கினால், குறட்டையை தவிர்க்கலாம்.

· * பக்கவாட்டில் தூங்கவும் இப்படி இரவு முழுவதும் படுப்பது சாத்தியம் இல்லை தான். இருப்பினும் இப்படி பக்கவாட்டில் படுத்தால், அது குறட்டையை தடுக்கும்.

· * நீராவிப் பிடிப்பது ஆவிப் பிடித்தாலும், குறட்டை வருவதை தவிர்க்கலாம். ஏனெனில் இது மூக்கில் உள்ள அடைப்புக்களை நீக்கி, காற்று எளிதாக செல்ல வழிவகுக்கும்.

* புகைப்பிடிப்பதை தவிர்ப்பது புகைப்பிடித்தால் உடலுக்கு ஏற்படும் பல்வேறு பிரச்சனைகளில் ஒன்று தான் குறட்டை விடுவது. ஏனெனில் புகைப்பிடிக்கும் போது, அது தொண்டையில் புண் மற்றும் வீக்கங்களை உருவாக்குவதால், அது மூச்சுவிடுவதில் சிரமத்தை ஏற்படுத்திவிடும்.

* மது அருந்துதலை நிறுத்துவது மது அருந்துவது, தூக்க மாத்திரைகளை உட்கொள்வது போன்றவற்றை நிறுத்தினால், அது தசைகளை தளர்வடையச் செய்து, காற்றை எளிதாக செல்ல உதவும்.

* சளிக்கு நிவாரணம் அளித்தல் சளி அல்லது ஜலதோஷம் பிடித்தால், அதற்கு உடனே சரியாக சிகிச்சை அளித்து வந்தால், குறட்டை விடுவதைத் தவிர்க்கலாம்.

· * தூங்கும் நேரம் ஸ்நாக்ஸ் வேண்டாம் இரவில் தூங்கும் போது பிட்சா, பர்கர், சீஸ் பாப்கார்ன் போன்ற அதிக கொழுப்புள்ள உணவுப் பொருட்களை உட்கொண்டால், அது சளியின் உற்பத்தியை அதிகரித்து, குறட்டைக்கு வழிவகுக்கும். எனவே கொழுப்புச்சத்துள்ள உணவுப் பொருட்களை இரவில் தவிர்ப்பது நல்லது.

- தினகரன் நாளிதழிலிருந்து...  மே 30 2014

=========================================================================================================

ஓகே...  அடுத்த வாரம் பார்ப்போமா?