வெள்ளி வீடியோ 180720 : கன்னங் கருமுகில் குழல் குழல் குழல் என காதல் முகம் மதி நிழல் நிழல் நிழல் என ...

ஊரும் உறவும் -  1982 இல் வெளிவந்த சிவாஜி கணேசன் படம்.  இசை சங்கர் கணேஷ்.  ஏ வி எம் ராஜன் தயாரிப்பில் மேஜர் சுந்தரராஜன் இயக்கத்தில் வெளிவந்த படம். 

படம் விரைவில் தியேட்டரை விட்டு ஓடிவிட்டது என்று நினைவு.  சத்தியமாக நான் இந்தப் படம் பார்க்கவில்லை.  ஆனால் இந்தப் பாடல் ரசித்து ரசித்து பலமுறை கேட்டிருக்கிறேன்.  கேட்டுக்கொண்டிருக்கிறேன்.

சங்கர் கணேஷ் இசையில் எஸ் பி பி க்கு ஒரு அருமையான பாடல் இந்தப் படத்தில்.  இதைத்தவிர வேறு நல்ல பாடல்கள் இந்தப் படத்தில் உண்டா என்று தெரியவில்லை.

வாணி ஜெயராமுடன் இணைந்து தேன்மழை பொழிந்திருக்கிறார் பாலு.

(இந்தப் பாடல் என்னைக் கவரவில்லை - நெல்லைத்தமிழன் -  கிர்ர்ர்ர்ர்...!)

காட்சியில் நிழல்கள் ரவியும் யாரோ ஒரு நடிகையும்!  பாடல் புலமைப்பித்தன் அல்லது வாலி அல்லது வைரமுத்து.

இந்தப் படத்துக்கு விவரங்கள் அளிக்கக் கூட யாரும் மெனக்கெடவில்லை.

இப்படிப்பட்ட ஒரு படத்திலிருந்து பாட்டா என்று நினைக்காதீர்கள்.  பாடலை ரசிக்கலாம்.  கட்டாயம் ரசிப்பீர்கள்.

முதல் சரணம் முடிந்து மீண்டும் பல்லவி தொடங்கும் இடத்தில், இரண்டாவது சரணத்தில் குளு குளு குளு எனும் இடத்தில எல்லாம் மெல்லிய சிரிப்புடனும், பெரும்பாலும் குழைவான குரலுடனும் எஸ் பி பி க்கு இது ஒரு அருமையான பாடல்.

புல்லாங்குழல் மொழி தமிழ் தமிழ் தமிழ் என 

பூவை இதழ் முத்துச் சிமிழ் சிமிழ் சிமிழ் என 

வந்தாள் காவடிச் சிந்தாள்..

கன்னங் கருமுகில் குழல் குழல் குழல் என 

காதல் முகம் மதி  நிழல் நிழல் நிழல் என 

சொன்னான் காவியக் கண்ணான்..

பாவை இளமனம் சுகம் சுகம் சுகம் என 

நாளை ஒருதினம் வரும் வரும் வரும் என 

பார்த்தாள் கண் பூத்தாள் 

பார்த்தாள் பார்த்தகண் பூத்தாள்  

மோகம் எனும் கணை அணை அணை அணை என 

தியாகம் எனும் புனல் மழை மழை மழை என 

பொழிந்தான் தன்னை மறந்தான் 

பொழிந்தான் தியாகத்தில் நனைந்தான் 

வெள்ளை மல்லிகைகள் சிந்தும் புன்னகையில் 

விரகமும் தனிமையும் மறைத்திருந்தாள்  

வெள்ளை மல்லிகைகள் சிந்தும் புன்னகையில்  

இருவரும் உலகினை மறந்திருந்தார் 

தென்றல் நடந்தது சிலு சிலு சிலு என 

தேகம் குளிர்ந்தது குளு குளு குளு என 

மேகம் யாத்திரை போகும் 

கோடை கானலில் சிறு சிறு பனித்துளி 

பன்னீர் தெளித்தது குறு குறு எனும்படி 

கூவும் பஞ்சணை கூவும் 

அந்த வானிலவு இன்று தேனிலவு 

அழகிய ஒளி மழை அமுதங்களே 

அந்த வானிலவு இன்று தேனிலவு 

அழகிய ஒளி மழை அமுதங்களே