ஞாயிறு 180722 : ..மாறலாமா என்று யோசித்துக் கொண்டிருக்கிறேன்......

சில நாட்களாய் டிவியில் படங்கள் சரியாய்த் தெரியவில்லை.  அதற்குக் காரணம் இது மாதிரி உடைந்து போயிருப்பதுதானோ என்கிற சந்தேகம் உண்டு.  விடியோகான் டிடிஹெச்சிலிருந்து வேறு சர்வீஸ் மாறலாமா என்று யோசித்துக் கொண்டிருக்கிறேன். ஆனால் அதற்கு இது (மட்டுமே) காரணம் இல்லை.

அலைபேசியில் எப்போதுமே அதன் சார்ஜரில்தான் முதலில் பிரச்னை வரும்.  இப்போது நான் வைத்திருக்கும் அலைபேசி C type சார்ஜர்.  வேகமாக சார்ஜ் ஏறிவிடும்.  முன்னர் ஹெச் டி சி வைத்திருந்தபோது சார்ஜர் தொலைந்த நேரம் கேஜி இந்த சார்ஜர் பற்றிச் சொல்லிப் படம் அனுப்பி இருந்தார்.  ஜஸ்ட் 150 ரூபாயில் வேலை முடிந்து விடும்.  வேகமாக சார்ஜ் ஏறும் என்று சொன்னார். .. 

மற்ற சார்ஜர்கள் குறைந்தபட்ச விலையே 450 ரூபாய் என்றிருக்க, இது குறைந்த விலையில் வேகமான சார்ஜர் என்றதும் இந்தப் படத்தை வைத்துக் கொண்டு கடைகடையாக ஏறி இறங்கி...   அவர் சொன்ன இந்த சார்ஜர் என் கைக்குக் கிடைக்கும் முன் என் ஹெச் டி சியின் டிஸ்பிளே காணாமல் போக, அலைபேசியையே மாற்றியதில் இதன் தேவை தீர்ந்து போனது!

பாத்திரத்துக்குள்ளிருந்து எட்டிப்பார்க்கும் இட்லி போல...!  சூர்யோதயமோ, சந்திரோதயமோ..   பார்க்க எப்போதுமே ஆனந்தம்.  ஆமாம்,   இது உதயம்தானா?  

சென்னை மெட்ரோ டிரெயினிலிருந்து ஒரு க்ளிக்!

எங்கள் வீட்டு பச்சை மிளகாய் செடி.   இந்த மிளகாயில் அவ்வளவு காரமில்லை என்பதால் எனக்கு இதில் செய்யும் சமையல் ரு(ர)சிப்பதில்லை!  என் சித்தப்பா பையன், என் தம்பி,  சூரத்தில் வசிப்பவன், ஒருமுறை சென்னை வந்திருந்தபோது இரவு சப்பாத்திக்கு தொட்டுக்கொள்ள பச்சை மிளகாய் கேட்டான்.  கடையிலிருந்து வாங்கிய முரட்டு பச்சை மிளகாயிலிருந்து ஒன்றை வாங்கி கையில் வைத்துக் கொண்டவன், ஒவ்வொரு வாய் சப்பாத்திக்கு நடுவிலும்  பச்சையாய் மிளகாயை ஒரு கடி கடித்து எங்களை பரபரப்புக்குள்ளாக்கினான்.

எங்கள் வீட்டுக்கு ஒருசமயம் இரு பிரபல பதிவர்கள் வந்தார்கள்.....  அதில் ஒரு பதிவர் கொண்டு வந்த கேக் இது.   ஸ்பெஷல் கேக்.  மூலப்பொருட்கள் என்ன என்று அவரே சொல்வார்.

மெட்ரோ டிரெயினிலிருந்து க்ளிக் எடுத்த அதே இடம்...  கீழிருந்து...  மேலே தெரிவது நிலவா?  சூரியனா?!

ஃபிப்ரவரியில் கல்யாணமகாதேவி சென்ற சமயம்.  ஓடும் பஸ்சிலிருந்தே ஒரு க்ளிக்.  எனக்கு மிகவும் பிடித்த படங்களில் ஒன்று.  இந்த இடம் அழகாய் இருந்ததால் அடுத்தடுத்து க்ளிக்கியத்தில் வரிசையாய் சில படங்கள்... 

மேலே உள்ள படத்தில் கோவிலின் அருகில் குளமும், மாடுகளும் இருப்பது இயற்கையாய் ஒரு கிராமத்துத் தோற்றத்தைக் கொடுத்தது என்றால் இந்தப் படம் மரமறைவில் கோவில் என்று காட்சி சுந்தரமாய் தெரிந்தது.  அப்போது நான் எடுத்த என் படங்களில் இந்த இரு படங்களையும் (அலைபேசியில்) கூகுள் செலெக்ட் செய்து கொடுத்தது.  மேலே உள்ள படத்தை கருப்பு வெள்ளையில் காண்பித்து மகிழ்வித்தது!

இதுவும் அதே கோவில்தான்.  என்ன கோவில் என்று கேட்டு விடாதீர்கள்.  க்ளிக் செய்யும் அவசரத்தில் அதைப் பார்க்க மறந்தேன்.  கோவிலை விட குளம் அழகு!

நடுவில் காஃபி குடிக்க நிறுத்திய இடத்திலிருந்து மேற்கொண்டு செல்லவேண்டிய சாலையை ஒரு க்ளிக்... (ஃபிப்ரவரி - க ம தேவி ட்ரிப்) 

காஃபி குடிக்க நிறுத்திய இடம் என்று சொல்லி சாலையைக் காண்பித்தால்..?  எந்த ஹோட்டல்?  இதுதானே உங்கள் மனதில் உதிக்கும் கேள்வி?  இதுதான் அந்த மோட்டல் / ஹோட்டல்!