கணக்கு வழக்கில்லாத அளவுல குழந்தைங்க... - இரவல் தர விரும்பாத இயற்கை

1)  குஜராத்தில், வெள்ளத்தில் சிக்கிய இரண்டு குழந்தைகளை தோளில் சுமந்தபடி, இடுப்பளவு தண்ணீரில், 1.5 கி.மீ., நடந்து சென்று காப்பாற்றிய போலீஸ்காரர். 

2)  கடையத்தில், பண்ணை வீட்டிற்குள் புகுந்த கொள்ளையர் இருவரை, அங்கிருந்த, வயதான தம்பதி, சேர்களை துாக்கிய அடித்து விரட்டினார்கள். கொள்ளையருக்கு எதிராக வீரமுடன் போராடிய முதிய தம்பதிக்கு பாராட்டுகள் குவிகின்றன.

3)  'ஒண்ணோ, ரெண்டோ குழந்தைங்க பெத்துக்கிட்டா, அதுகளுக்கு மட்டும்தான் நாம தாயி, தகப்பன். இப்போ நம்ம கடைக்குச் சாப்புட வர்ற பிள்ளைங்களெல்லாம் நமக்கு குழந்தைங்கதான்'னு நாங்க ரெண்டு பேரும் மனசை தேத்திக்கிட்டோம். இப்போ எங்களுக்குக் கணக்கு வழக்கில்லாத அளவுல குழந்தைங்க இருக்காங்க" என்று சொல்லும் பாண்டித்தேவர், ஆறுமுகத்தம்மாள் தம்பதி உதிர்த்த வார்த்தைகளின் அடியில் உறைந்திருக்கிறது அன்பு.  (நன்றி ஏகாந்தன் ஸார்)

4)  சர்வதேச பாஸிட்டிவ்....    விமானத்தை பத்திரமாக தரையிறக்கி, 233 பேரின் உயிரை காப்பாற்றிய விமானி டாமிர் யுசுபோவிற்கு பாராட்டுகள் குவிந்து வருகின்றன. அவரை, அந்நாட்டு மீடியாக்கள் 'ஹீரோ' எனவும், இன்ஜீன் செயலிழந்த நிலையில், தரையிறக்கும் கியர் இல்லாமல், விமானத்தை பத்திரமாக தரையிறக்கி, 233 பேரின் உயிரை காப்பாற்றிவிட்டார் என புகழ்ந்துள்ளன.

==================================================================================================


--------------------------------------------------------------------------------------------------------------------------

சென்ற வார எங்கள் பிளாக் பதிவுகளின் விமர்சனம் 10-8-19முதல் 16-8-19 வரை...

- திருமதி பானுமதி வெங்கடேஸ்வரன் -
--------------------------------------------------------------------------------------------------------------------------


சனிக்கிழமை பாசிட்டிவ் செய்திகள்:

இந்த வாரம் ஏனோ பாசிட்டிவ் செய்திகள் இரண்டு மட்டுமே. 

தன் வீட்டு கிணற்றை மழை நீர் சேகரிப்பு தொட்டியாக மாற்றி, தண்ணீர் கஷ்டத்தினால் பாதிக்கப்படாமல் இருக்கும் கொத்தமங்கலத்தை சேர்ந்த வீரமணி மற்றும் ஐந்து ஆண்டுகளில் பன்னிரெண்டாயிரம் மரக்கன்றுகளை நட்டு அதை பராமரிக்கும் ஓய்வு பெற்ற வன அலுவலர் மணி என்ற இரண்டு பேர்களின் செயல்களும் இடம் பெற்றிருக்கின்றன. 

இதுவரை பாசிட்டிவ் செய்திகளில் மழை நீர் சேகரிப்பு, குளம், குட்டைகளை தூர் வாருதல் போன்ற செயல்களை பற்றி செய்திகள் இடம் பெற்றால் அது சிறு நகரங்கள், அல்லது கிராமத்தில் வசிக்கும் இளைஞர்கள் செய்வதாகத்தான் இருக்கிறது. நகரவாசிகளுக்கு இம்மாதிரி செயல்களில் எந்தவித ஈடுபாடும் இல்லை. சென்னையில் தண்ணீர் கஷ்டம் எப்படி இருக்கிறது என்று கேட்டால், "எங்கள் காலனியில் தண்ணீர் லாரியில் வாங்கி ஊற்றுகிறார்கள், தண்ணீர் வந்து கொண்டிருக்கிறது, எங்களுக்கு கவலை இல்லை" என்றுதான் பலரும் சொன்னார்கள். அவர்கள் வீட்டு பாத்ரூமில் தண்ணீர் வரவில்லையென்றால்தான் வெளியே வருவார்கள் போலிருக்கிறது. 

"நாடென்ன செய்தது நமக்கு என கேள்விகள் கேட்பது எதற்கு? நீ என்ன செய்தாய் அதற்கு என நினைத்தால் நன்மை உனக்கு"

ஐநூறு வீடுகள், ஆயிரம் வீடுகள் என்று தொகுப்பு வீடுகளை கொண்டிருக்கும் காலனிகள் எல்லாம் மழைநீரை சேமித்தால், நிலத்தடி நீர்மட்டம் கணிசமாக உயரும், தண்ணீர் கஷ்டம் தீரும். அரசாங்கமும் இதில் இன்னும் கொஞ்சம் அக்கறையும், கண்டிப்பும் காட்ட வேண்டியது அவசியம். 

இந்த வாரம் விமர்சனம் செய்ய யாரும் முன்வராததாலோ என்னவோ, வாராந்திர விமர்சனம் இடம்பெறவில்லை. விமர்சனம் இல்லாதது பலருக்கு குறையாக இருந்திருக்கிறது. ஜி.வி. சார் விமர்சனத்தை விடாமல் தொடர்வதற்கு யோசனைகளும் சொல்லியிருக்கிறார். விமர்சனம் செய்ய விருப்பமுள்ளவர்கள் கை தூக்குங்கள் என்று ஸ்ரீராம் கேட்டும் யாரும் பெயர் கொடுக்கவில்லை. 

ஞாயிறு புகைப்படங்கள்: இந்த வாரமும் ஷில்லாங் பயணத்தின் படங்கள்தான்.  படங்கள் மட்டுமல்ல அந்த இடங்களைப்பற்றிய குறிப்புகளும் சிறப்பாக இருக்கின்றன.   

'காலை எழுந்தவுடன் காஃபி என்று பழகியவர்களுக்கு மீன் சமைக்கும் வாசனை வரவேற்கிறது'.

மூன்றாவது மாடியில் இருக்கும் விளம்பரங்களை படிக்க வேண்டுமென்றால், எதிரே இருக்கும் விடுதியில் ரூம் எடுத்து தங்க வேண்டுமாக்கும்' என்று புன்னகைக்க வைக்கும் கேப்ஷன்களை ஆசிரியர் கொடுத்தால், வாசகர்கள் சோடை போவார்களா? 

"பனோரமாங்கிறது யாரு? மனோரமாவிற்கு உறவினரா?" என்று துரை செல்வராஜ் சார் அப்பாவி போல் கேட்டு வாய் விட்டு சிரிக்க வைக்கிறார். 

ஜி.வி.சாரோ, false இல்லாத நிஜ fallsகள் அருமை என்று வார்த்தையில் விளையாடுகிறார். 

யானையின் வீழ்ச்சியைப் பார்க்க அடுத்த வாரம் வரை காத்திருக்க வேண்டும். 

திங்கற கிழமையில் நான் செய்து அனுப்பிய மன்னிக்கவும் எழுதி அனுப்பிய பால் கொழுக்கட்டை ரெசிபி. சென்ற முறை நான் விமர்சனம் எழுதிய பொழுது நேர்ந்த அதே அசந்தர்ப்பம். இதற்கு மற்றவர்கள் எழுதிய பின்னூட்டங்களை படித்துக் கொள்ளுங்கள். 

எனக்கு மிகவும் பிடித்தது டி.டி. அவர்களின் பின்னூட்டம். நான் சொல்லியிருந்த முறைப்படி அவர்கள் வீட்டில் செய்தார்களாம், மிருதுவாக, நன்றாக இருக்கிறது என்று கூறி விட்டார். அவர் மனைவி தொலைபேசியில் அழைத்து, பாராட்டி, நன்றி கூறினார். ஆஹா! "இது போதும் எனக்கு, இது போதுமே, வேறென்ன வேண்டும்? நீ போதுமே.." டி.டி. என்றவுடன் பாட்டு வருகிறது பாருங்கள். 

ஜி.வி.சார், தேங்காய் பால் கொலஸ்ட்ராலை அதிகமாக்கும் என்று கூறியிருக்கிறார். கொலஸ்ட்ராலைக்கண்டு நம் பயப்படுவதற்கு காரணம் மாரடைப்பு வருவதற்கு கொலஸ்ட்ரால்தான் காரணம் என்னும் நினைப்புதான் ஆனால் சமீபத்திய ஆய்வுகள் கொலஸ்ட்ராலக்கும் மாரடைப்பு வருவதற்கும் சம்பந்தம் கிடையாது என்கின்றன. மேலும் கடுகு என்னை, நல்லெண்ணெய், தேங்காய் எண்ணெய், கடலை எண்ணெய், சூரிய காந்தி எண்ணெய், ஆலிவ் ஆயில் போன்றவற்றில் அறவே கொலஸ்ட்ரால் கிடையாதாம். அப்புறம் என்ன? 'கல்யாண சமையல் சாதம், காய் கறிகளும் பிரமாதம், இந்த கௌரவப் பிரசாதம் இதுவே எனக்குப் போதும்.."

செவ்வாய் கேட்டு வாங்கி போட்ட கதையில் ஜி.வி.சாரின் 'தெளிவு'  என்னும் கதை இடம் பெற்றிருக்கிறது. தாயில்லாத, உடன்பிறந்தவர்களும் இல்லாத வெகுளிப் பெண் ஒருத்தி தன் கணவனை சகோதரனாக நினைத்து பழகுவதை தவறாக புரிந்து கொள்ளும் இளம் மனைவி, பின் தெளிந்து அந்தப் பெண்ணை தன்  சகோதரியாக ஏற்றுக் கொள்வதாக முடியும் கதை.  உரையாடல்கள், ராஜியின்(கதாநாயகி) எண்ண ஓட்டங்கள் எல்லாம் இயல்பாக இருந்தாலும், கண்டெம்ப்ரரியாக( contemporary)இல்லாதது ஒரு குறையாாக எனக்கு தோன்றியது.  

"புன்னகை மன்னன் பூவிழி கண்ணன் ருக்மணிக்காக, இந்த பாமா ருக்மணி இருவருமே அவன் ஒருவருக்காக.." என்பது போல தொடங்கிய கதையை, "கண்ணாடி அம்மா உன் இதயம் என் கண்ணே, நான் அதில் பார்த்தால் உன் முகம் காட்டும் தெய்வீக பந்தம் நம் உறவு எந்நாளும் தேயாத நிலவு.." என்று முடித்து விட்டார். முடிவில் ஒரு அவசரம் தெரிந்தது.

சிறுகதையாகத்தான் எழுத வேண்டும் என்ற பிடிவாதம் இல்லாமல் அதன் போக்கில் கொஞ்சம் நீட்டியிருந்தால் டி.டிக்கு வந்த சந்தேகம் தவிர்க்கப் பட்டிருக்கலாம்.

இதற்கு வந்த பின்னூட்டங்களில் கீதா அக்கா கூறியிருக்கும் கருத்துக்கள் அக்மார்க் ரகம். அதிலும் இந்தக்கால திருமணங்கள் குறித்து அவர் கூறியிருக்கும் விஷயங்கள் அசைக்க முடியாத உண்மை. 

//எல்லாம் இப்போவும் இருக்கு ஜீவி சார். ஆனால் மணமகள் தலை கவிழ்ப்பு? மணமகனின் ஓரப்பார்வை? சுத்தம், அப்படி எல்லாம் நடக்கிறதா என்ன?  மேடையிலேயே கணவனைப் பெயர் சொல்லியோ அல்லது, "என்னடா இது?" என்றோ கேட்கும் மணமகளைப் பார்த்ததில்லை போலும்!// 

நான் பார்த்திருக்கிறேன். குருவாயூரில் ஒரு திருமணத்தில் மணமகனை,"என்ன, கல்யாணம் என்றதும் டென்ஷனாகி விட்டாயா?" என்று நிஜமாகவே உலுக்கிய மணப்பெண்ணைப் பார்த்து மிரண்டு போனேன். 

பின்னூட்டங்களோடு ஒட்டாத ஆறாவது விரலாக டி.டி., ஸ்ரீராமுக்கு இடையே இணைய பிரச்சனை குறித்து உரையாடல். 

எப்போதும் விரிவான பின்னூட்டம் அளிக்கும் கோமதி அரசு இன்று சுருக்கமாக முடித்து விட்டாரோ என்று தோன்றியது. விரிவாகத்தான் எழுதியிருக்கிறார் பிரித்து எழுதியிருப்பதால் அப்படி தோன்றியிருக்கிறது.

கடைசியாக வந்து சுருக்கமாக சொன்னாலும் சரியாக சொல்லியிருக்கிறார் ஜி.எம்.பி. ஐயா அவர்கள்.

புதன் கேள்வி பதில்கள் கழுதை தேய்ந்து கட்டெரும்பான கதையாகி விடுமோ என்று பயமாக இருக்கிறது. யார் கண் பட்டதோ?கேள்வியின் நாயகி மிகவும் பிசியாகி விட்டார். நெல்லையும் பயணத்தில். நான் மட்டும் நாலு கேள்விகள் கேட்டிருக்கிறேன். இத்தனை வாரங்களாக வந்து கொண்டிருந்த PACயும் இந்த வாரம் இடம்பெறவில்லை.எனவே, ஆசிரியர் களுள் ஒருவர் குண்டூரிலிருந்தும், ஒல்லியூரிலிருந்தும் முகமூடிகளை வரவழைக்க வேண்டியதாகி விட்டது.

இந்த பகுதியை ஸ்வாரஸ்யமாக்க மெனக்கெடும் ஆசிரியர்களுக்கு ஒரு 'ஓ' போடுவோம். கூடவே கேள்விகளும் கேட்போம் தோழர்களே. 

"ஏன் என்ற கேள்வி இங்கு கேட்காமல் வாழ்க்கை இல்லை"

வியாழன் ஶ்ரீராமின் பேட்டை. காசி பயணக் கட்டுரை முடிந்து விட்டது. 

மழை விட்டும் தூவானம் விடாதது போல் இன்றும் ஒரு கோவில்(குபேரன் கோவில்) விசிட் பற்றி எழுதியிருக்கிறார். அதில் பார்வதி தேவியின் அழகைக்கண்டு பிரமித்துப்போய் கண்ணை அசைத்ததாகவும், அதனால் கோபம் கொண்ட பார்வதி அவனை சபித்ததாகவும் குறிப்பிட்டிருக்கிறார். ஆனால் கதை அப்படி அல்ல. என்னவென்று தெரிந்து கொள்ள விரும்புகிறவர்கள் நவ திருப்பதிகளுள் ஒன்றான திருக்கோளூர் (வைத்த மாநிதி பெருமாள்) தல புராணம் படித்து தெரிந்து கொள்ளலாம்.

"கடவுளே வா, வந்தென்னை ஒரு தரம் சந்தி.." என்னும் ஶ்ரீராமின் கவிதை கொஞ்சம் புலம்பல் ரகம். இதைப்போன்ற நல்ல கவிதைகளை வரவழைக்கவே கடவுள் சோதனைகளை கொடுக்கிறார் போலிருக்கிறது. கண்ணதாசனின் மிகச்சிறந்த பாடல்கள் அவருடைய சோதனை காலங்களில் எழுதப்பட்டவைதான் என்று அவரே கூறியுள்ளார். பாரதியின் சக்தி வேட்டல் கவிதைகள் வெறும் புலம்பல்கள் என்பார் சிலர். 

எனக்கு எப்போதோ படித்த சவீதாவின் , 

இயற்கையை வெறுக்கிறேன்

தொட்டபெட்டாவுக்கு மேல்

பரவிக்கிடக்கும் மேகத்துணுக்குகளில் ஒன்றை

சஹாராவுக்கு இரவல் தர விரும்பாத

இயற்கையை வெறுக்கிறேன்

கடவுள் என்பவன் கண் முன்னால்

வந்தால்

காலரைப் பிடித்து நீதி கேட்பேன்'

என்னும் புதுக்கவிதை நினைவுக்கு வந்தது.

"கடவுள் இருக்கிறானா? மனிதன் கேட்கிறான், அவன் இருந்தால் உலகத்திலே எங்கே வாழ்கிறான்?"

திறந்திருக்கும் முதலையின் வாயில் சிறுநீர் அடிக்கும் சிறுவனின் இணயத்தில் பேட்ச் பண்ணப்பட்ட புகைப்படம் வெளியிட்டு அதைப்பற்றி இரண்டு வரி கவிதை அல்லது வாசகம் எழுதச் சொல்லி கேட்டிருக்கிறார். அதற்கு நெல்லை தமிழன்," "ஆணின்றி அமையாது உலகு" என்று கூறி தான் ஒரு மேல் ஷாவனிஸ்ட் என்பதை ஸ்தாபித்திருக்கிறார். கமலா ஹரிஹரன் அருமையான கவிதை தந்துள்ளார்.

அக்கால இந்தியர்களின் உடை பற்றி பாபர் கூறியுள்ளவற்றிர்க்கு காட்டமாகவும் கரெக்டாகவும் கருத்து கூறியிருக்கிறார் ஏகாந்தன் சார்.

வெள்ளி வீடியோவில் சிங்கார வேலன் படத்தில் இடம்பெற்ற "இன்னும் என்னை  என்ன செய்யப்போகிறாய் அன்பே அன்பே..." பாடல் மட்டும் இடம் பெற்றுள்ளது. 

சில பல வருடங்களுக்கு முன்பு மியூசிக் அப்ரிசேஷன் வகுப்புகள் நடத்துவதன் மூலம் இளைய தலைமுறையிடம் கர்நாடக சங்கீதத்தில் ஆர்வம் வரச்செய்யலாம் என்று சங்கீத வித்வத் சபையில் யாரோ பேச, "இசை ஆர்வம் என்பது இயல்பாக வர வேண்டும். அதை எப்படி பாடம் நடத்துவதன் மூலம் போதிக்க முடியும்?" என்று ஆனந்த விகடனில் எழுதியிருந்தார்கள்.  ஶ்ரீராம் மாதிரி ஒருவர் மியூசிக் அப்ரிசேஷன் வகுப்பு எடுக்கலாம். மனிதர் என்னமா ரசிக்கிறார்!!  

//இங்கு ஒரு வளைவு, அங்கு ஒரு நெளிவு, இங்கே கூடுதலாக ஒரு நெளிவு// (பாடியிருக்கும் விதத்தைதான் வர்ணிக்கிறார், நீங்கள் எதையாவது நினைத்துக் கொள்ளாதீர்கள்) என்றெல்லாம் இவர் எழுதியிருப்பதை படித்து விட்டு பாடலை கேளுங்கள், முன்பு தெரியாத விஷயங்கள் தெரியும். பக்க வாத்தியமாக கீதா ரங்கன் வேறு, என்ன ராகம்? என்ன தாளம்? என்று விவரிக்க. சரியான ஜுகல் பந்திதான்.

"நாதமென்னும் கோவிலிலே

ஞான விளக்கேற்றி வைத்தேன்

ஏற்றி வைத்த விளக்கினிலே

எண்ணெய் விட நீ கிடைத்தாய்."

அடடா! நீ....ண்....ட.... நாட்களுக்கு ப்பிறகு அதிரா விஜயம். வருக வருக என வரவேற்கிறேன். இனி கச்சேரி களை கட்டும். 

விமர்சிக்க மீண்டும் வாய்ப்பளித்த எ.பி.க்கு நன்றி.