புதன் 190828:: உணவுக்கு போடுங்க ஓ(ட்டு!)

சென்ற வாரத்தில் non fiction வகைப் புத்தகங்களில் கவர்ந்த புத்தகம் குறித்து எழுதிய எல்லோருக்கும் எங்கள் நன்றி!


கீதா சாம்பசிவம் :

தொலைக்காட்சியில் வரும் இப்போதைய பட்டிமன்றங்களைப் பற்றி உங்கள் கருத்து என்ன? பார்க்கும் வழக்கம் உண்டா?


& ஒரு காலத்தில் சன் டி வி பட்டிமன்றங்கள் பார்த்தது உண்டு. இப்போது என் டாடா ஸ்கை பட்டியலில் மாதாந்திர கட்டணம் செலுத்தவேண்டிய எந்த சானலையும் சேர்க்கவில்லை. ஓ சி சானல்களில் வரும் பட்டிமன்றங்களைப் பார்க்கும் அளவுக்கு பொறுமையும் இல்லை. 

அவற்றில் ஆக்கபூர்வமான சிந்தனைகளை ஏற்படுத்தும் வண்ணம் தலைப்புக்களில் வாதாடுகிறார்களா?

$ பட்டிமன்றங்களுக்கு எப்படி தலைப்பு வைக்கலாம் என்பது பற்றி ஒரு பட்டிமன்றம் வைக்கலாம்.

பொழுபோக்கு என்பதற்கு மேல் அதில் ஒன்றுமில்லாமல் செய்துவிட்டார்கள்.

& நல்ல பட்டிமன்றம் என்று எனக்கு இதுவரை தோன்றிய சிலவற்றைப் பட்டியலிட்டால், டாக்டர் அறிவொளி ஷண்முகம் வாதிட்ட வழக்காடு மன்றம் நினைவுக்கு வருகின்றது. ரேடியோ நாட்களில், கம்பராமாயண பட்டிமன்றங்கள் நன்றாக இருந்தன. 

பட்டிமன்றங்களில் சொல்லும் ஹாஸ்யங்கள் உங்களுக்குச் சிரிப்பை ஏற்படுத்துமா? எரிச்சலை ஏற்படுத்துமா?

$ ஒரு பட்டிமன்ற பேச்சாளர் இதுதான் பேசுவார் என்று நமக்குப் பழகி விடுவதால் ஹாஸ்யங்கள் ரசிப்பதில்லை என்பதுடன் ரசனைக்குறைவான விவரணங்களும் ஒரு காரணம்.

தொலைக்காட்சி நெடுந்தொடர்கள் பார்க்கும் வழக்கம் உண்டா?
அவற்றைப் பற்றிய உங்கள் கருத்து என்ன?

$ நெடுந்தொடர்களோ இல்லையோ பார்ப்பதுண்டு.

& எந்தக் கொடுந்தொடர்களும் பார்ப்பதில்லை. குடும்ப சீரியல்கள் என்று போடப்படும் சில கண்றாவிகளின் கிளிப்புகள் அவ்வப்போது கண்ணில் படும். ஒரு மூஞ்சியாவது சிரித்தபடி இருக்குமா என்று பார்த்தால் --- ஊஹூம் எல்லாமே இஞ்சி தின்ன குரங்கு மூஞ்சிகள். 

தொடர்கள் எல்லாமே தற்கால மனிதர்களின் வாழ்க்கையைப் பிரதிபலிக்கிறதா?
$ வாழ்க்கையைப் பிரதிபலிக்கும் தொடர்கள் சில சேனல்களால் கைவிடப்பட்டு.....

& இல்லை, இல்லை, இல்லை. 

15 வயதுப் பெண் தன் காதலனுடன் அலைபேசியில் பேசுவதைத் தந்தை தடை செய்ததால் அவருக்குத் தூக்க மருந்து கொடுத்துப் பின்னர் காதலனுடன் சேர்ந்து குத்திக் கொன்று பின்னர் உடலைக் குளியலறையில் எரித்திருக்கிறாள். இத்தகைய நிகழ்ச்சிகள் தற்காலங்களில் அதிகம் நடக்கின்றன. நேற்று ஒரு காவல்துறை அதிகாரி பேசும்போது இப்படியான நிகழ்வுகளுக்குத் தொலைக்காட்சிகளும், திரைப்படங்களும் காரணம் என்று சொல்லும்போதே அதை சம்பந்தப்பட்ட தொலைக்காட்சி சானல் பாதியில் நிறுத்திவிட்டது.

என் கேள்வி:  இத்தகைய நிகழ்ச்சிகளைப் பார்ப்பதால் உண்மையிலேயே மனித குணம் மாறுமா? அதுவும் பெற்ற தகப்பனையே கொல்லும் அளவுக்கு?

$ நேற்று சன் tv யில் சொல்லிட்டாங்க சார் என்று அதுதான் உண்மை என்று வாதிடும் நெல்லைக்காரர்கள் சிலரை நான் அறிவேன்.

& இப்படி நெருங்கிய சொந்தங்களைக் கொலை செய்து, கல்யாணம் செய்துகொள்ளும் தம்பதிகளுக்குப் பிறக்கும் குழந்தையின் ஜீன்ஸ் (பேண்ட் அல்ல) அதே போன்று அந்தத் தம்பதிகளைக் கொன்று குழி வெட்டிப் புதைத்துவிட்டு, காதலனுடன் எஸ்கேப் ஆகச் சொல்லாதா! 

முன்னெல்லாம் பெண்கள் வீட்டு வேலைகளைச் சரியாகச் செய்யவில்லை எனில் அவள் பெற்றோரைக் குறை சொல்வதோடு அவர்களிடம் புகாரும் சொல்லுவார்கள். இப்போ அதுவே மாறி விட்டது. கணவனைப் பற்றி மனைவி அவன் பெற்றோரிடம் குறை கூறும் அளவுக்கு மாறிவிட்டது. வீட்டு வேலையில் கட்டாயமாகக் கணவன் பங்கு எடுக்கவேண்டும் என்றே எல்லாப் பெண்களும் விரும்புகின்றனர். அதில் குறை கண்டால் கணவனின் பெற்றோரிடம் சண்டை போடுகின்றனர்.

இந்நிலை விரும்பத் தக்கதா? இது மாறுமா? முன்னெல்லாம் அங்கொன்றும் இங்கொன்றுமாகக் காணப்பட்டது இப்போது அநேகமாகப் பலரும் சொல்ல ஆரம்பித்து விட்டனர்! இது சரியா?
$ குறையோ நிறையோ சரி சமம் என்றெல்லாம் பேசாமல் வேலைகளைப்பங்கு போட்டுக்கொள்வது நல்லது.

& குறை கூறுபவர்கள் ஆணோ / பெண்ணோ, அந்தக்காலமோ / இந்தக்காலமோ - மாமியாரோ / மருமகளோ குறை கூறிக்கொண்டுதான் இருப்பார்கள். அது ஒரு டிசைன். அவ்வளவுதான். 
கோபம், பாபம், சண்டாளம் என்பார்கள். உங்களால் கோபத்தைக் கட்டுப்படுத்த முடியும் என்பது அறிந்ததே! ஆனாலும் சில அக்கிரமங்களைக் கண்டால் வரும் கோபத்தை (அறச்சீற்றம்னு சொல்லலாம்) எப்படிக் கட்டுப்படுத்துவது?

& கண்ணை மூடி தியானம் செய்யவேண்டியதுதான். மாறி வரும் விஞ்ஞான யுகத்தில் தனி மனித யத்தனங்கள் எவ்வளவு பிரயாசைப்பட்டாலும் சமூக மாற்றங்களைக் கொண்டுவர இயலாது என்கிறார் மேல் நாட்டு அறிஞர் சிலிவா மாக்கியாட்டா. 

துளசிதரன் :

கொசுக்கடியிலிருந்து தப்புவது எப்படி? (குட்நைட் போன்ற விரட்டிகள் இல்லாமல்) இயற்கை முறையில் ஏதேனும் இருக்கிறதா? 

& காந்தி உடம்பில் மண்ணெண்ணெய் பூசிக்கொண்டு கொசுக்கடியிலிருந்து தப்பித்தார் என்று காந்தி நூற்றாண்டு வெளியீடு ஒன்றில் படித்தேன். 
என்னைக் கேட்டால், கொசுவைப் பிடித்து, அதன் வாயை ஊசி நூல் கொண்டு தைத்துவிட்டால், அது வாயைத் திறந்து கடிக்க  இயலாமல் செய்யலாம். 
இன்னும் எவ்வளவோ சூப்பர் ஐடியாக்கள் உள்ளன. சந்தர்ப்பம் கிடைத்தால் பிறகு சொல்கிறேன்!  

கோயில்களில் பூசாரிகள் தட்டை நீட்டுவது (நாம் பணம் போடுவோம் என்ற எதிர்பார்ப்பில்), அல்லது முகத்தில் ஒருவித எதிர்பார்ப்புடன் நம்மைப் பார்ப்பது சரியா? 

& சரியோ தவறோ தெரியாது. அது அவர்களின் GST (God Service Toll) ஆனால் கொடுத்தே தீரவேண்டும் என்று நியதி இல்லை. கொடுப்பவருக்கு மனநிறைவு, கொடுக்கப்பட்டவருக்கு மகிழ்ச்சி. 

கோயில் வாசல்களில் யாசிப்பவர்கள் அதிகமாக இருப்பது ஏன்? காரணங்கள் ஏழ்மையா? உழைப்பின்மையா, அவர்களுக்கு ஏற்ற வேலை கிடைக்காமையா? கோயில் வாசல்களில் யாசித்தால் கண்டிப்பாக ஏதேனும் கிடைக்கும் என்ற எண்ணமா?

& கோயில் வாசல்களில் யாசித்தால் கண்டிப்பாக ஏதேனும் கிடைக்கும் என்ற எண்ணம்தான் அதிகம் இருக்கும். 
கோயில் வாசலில் பிச்சை எடுப்பவர்கள் பெரும்பாலும் சுத்தமாகக் குளித்து, திருநீறு குங்குமம் இட்டு சாந்தமாக அமர்ந்து இருப்பதைப் பார்த்திருக்கிறேன். அது அவர்களுடைய தொழில்.
'தர்மம் பண்ணுங்க சாமி' என்று அவ்வப்போது உரத்த குரலில் கூவி, மனிதர்களை தர்மத்தைக் கடைபிடிக்கச் சொல்லும் பிச்சைக்காரர்கள் மனித குலத்துக்கு நன்மை செய்பவர்கள்தானே!  

கீதா ரெங்கன் :


பிச்சை புகினும் கற்கை நன்றே என்பதன் விளக்கம்? இங்கு பிச்சை எடுத்தேனும் கல்வி பயில வேண்டும் என்பது இப்படி யாசிப்பதா அல்லது கடன் வாங்கியேனும் அல்லது செல்வந்தர்களின் உதவி பெற்றேனும் கல்வி கற்க வேண்டும் என்பதான பொருளா?

& கற்கை நன்று என்று சொல்லவந்த அ வீ ரா பா அவர்கள், பிச்சை எடுக்கின்ற நிலை வந்தாலும் கல்வி கற்பதை நிறுத்தாமல் தொடரவேண்டும் என்ற அர்த்தத்தில்தான் அதைச் சொல்லியிருக்கிறார். பிச்சை எடுத்துதான் கல்வி கற்கவேண்டும் என்று சொல்லவில்லை! 
பல கல்லூரிகளில் இன்று படிக்க வரும் மாணவர்கள் பிச்சை கொடுத்துதான் கற்கிறார்கள். (பிச்சை = fees)

பொது இடங்களில் யாசிப்பவர்கள் யாரேனும் அப்படி யாசித்து அப்பணத்தைக் கொண்டு கல்வி பயின்றவர்கள் உள்ளனரா? அல்லது பெற்றோர் அப்படி யாசித்துத்தங்கள் குழந்தைகளைப் படிக்க வைத்தவர்கள் என்று அறிந்ததுண்டா?

$ கடலூரில் பஸ் ஸ்டாண்ட் சமீபம் ஒரு பையன் குடும்பத்தின் ஏழ்மை நிலையைக் கூறி முறுக்கு விற்றுப் படிப்பதாகக் கூறுவதைக் கேட்டு ஒரு சபாஷ் போட்டு பணத்தைக் கொடுத்து முறுக்கு கேட்டதும், பின் அவன் கை அழுக்கு பார்த்து முறுக்கு வேண்டாம் என்று சொன்னதும் நினைவுக்கு வருகிறது.

மௌண்ட் ரோட்டில் பூ விற்பவர் வாங்குபவரிடம் உதவி கேட்டுப் பெற்று பீஸ் கட்டிய ரசீதின் xerox அனுப்பினார்

காலை எழுந்து 10 வீட்டுக்கு பாலூற்றிப் படித்த நண்பர் கான் பூர் iit யில் இன்று professor.

நெல்லைத்தமிழன்.

1. நாவல் எழுதறவங்க, கதை எழுதறவங்க - வாழ்க்கைல என்னதான் சாதிக்கிறார்கள்?          

# நாவல் எழுதுபவர்கள் அல்லது கதை எழுதுபவர்கள்எதுவும் சாதித்ததில்லை  அல்லது சாதிக்கவில்லை என்று சொல்வது தவறு என்று நான் நினைக்கிறேன்.   ஒரு நல்ல நாவல் அல்லது ஒரு நல்ல கதை படித்த பின் நம் மனதில் ஏற்படும் உணர்ச்சிகளை வைத்து பார்த்தால் - அட, தத்ரூபமாகச் சித்தரித்திருக்கிறார் - அட, நமக்கும் இப்படித்தானே நடந்தது-     ஆஹா என்ன ஒரு தமாஷ்  - என்று நினைப்பதில்லையா ? இப்படியான உணர்ச்சிகளைத் தூண்டுவது அந்த கதையின் சிறப்பு என்றுதானே சொல்லவேண்டும் .  வால்டேர் ரூசோ போன்றவர்களின் எழுத்தால் தான்  பிரெஞ்சு புரட்சியே ஏற்பட்டது என்று சொல்கிறார்கள்.  கல்கி பொன்னியின் செல்வன் எழுதாவிட்டால் தமிழ்நாட்டின் பண்டைய கால சிறப்பைப் பற்றி எத்தனை பேர் ஆர்வம் காட்டி அறிந்துகொள்ள போகிறார்கள்  ?

                                                                  

2.  எழுத்தாளர்கள் (நான் சொல்றது கதைகள் எழுதறவங்க) சமூகத்தில் கொண்டாடப்பட வேண்டியவர்களா? இதுல முற்போக்கு பிற்போக்குன்னு அவங்களே ஏதோ வாழ்க்கைல பெருசா சாதிச்ச மாதிரி சொல்லிக்கிறாங்களே. உங்கள் கருத்து என்ன?         

# எழுத்தாளர்கள் கதாசிரியர்கள் தங்களை தாங்களே பாராட்டி கொள்ளக்கூடாது. மாறாக , ரசிகர் என்ற தளத்திலிருந்து யார் வேண்டுமானாலும் வேறு யாரை வேண்டுமானாலும் பாராட்டலாம்  பிற்போக்கு புரட்சி இப்படி எழுத்தாளர்களுக்கு அடைமொழி கொடுத்துக் கொள்வது வருத்தமாகத்தான் இருக்கிறது.  அது பொருளற்றது கூட.  ஆனால் அதைக் குறித்து நாம் என்ன செய்ய முடியும் ? அரசு , வசதி படைத்த செல்வந்தர்கள் இவர்கள் எழுத்தாளர்களை - கலைஞர்களை - ஆதரிப்பது, பாராட்டுவது, ஊக்குவிப்பது, மேலும்  பரிசளிப்பது என்பது சமூகத்திற்கு மிகவும் நல்லது என்பது என் கருத்து.
                                                                                                       

3. ஜெனெரேஷன் போக போக, நம்ம ரசனை மலிந்துகொண்டே வருகிறதா?  1950கள்ல வந்த பத்திரிகைகளுக்கும் இப்போ அதே பத்திரிகைகளுக்கும் தரத்தில் ரொம்பவும் வேறுபாடு இருப்பதால் கேட்கிறேன்.

# தனிமனித அடிப்படையில் வயது ஏற ஏற ரசனை நுணுக்கமான மாறுதலுக்கு உட்படும் .

 ஆனால், ஒரு பத்து இருபது ஆண்டுகள் சென்றபின் மக்கள் ரசனை எப்படி  இருக்கிறது என்று பார்த்தால், அதன் அடிப்படையே மாறி இருப்பதைப் பார்க்கிறோம்.   இது தவிர்க்க இயலாதது. இதைப்பற்றி அபிப்ராயம் சொல்லலாம்- ஆனால் செய்வதற்கு ஏதுமில்லை.

4. வயது ஏற ஏற பக்தி அதிகமாவது, கோவில்களில் நம்பிக்கை ஏற்படுவது எதனால்?    

# வயது ஏற ஏற எல்லாருக்கும் பக்தி அதிகம் ஆகுமா என்று தெரியவில்லை பலருக்கு ஆகும் என்றே தோன்றுகிறது வாழ்க்கையில் ஒரு குறிப்பிட்ட இடைவெளியை கடந்த பின்னர் இறைவன், வாழ்வின் லட்சியம், மேலும் பல தத்துவங்கள் இவற்றில் ஆர்வம் ஏற்படுவது இயற்கை தான்.
                                                             

5. மறுபிறப்பு என்று ஒன்று இருந்தால் நீங்கள் எதுவாக, யாராக பிறக்க ஆசை?

# மறு பிறப்பு  என்பது  இருந்தால் ஒரு சுமாரான வசதியான குடும்பத்தில் பிறந்து சவால்களைத் திறம்பட சமாளித்து மேன்மையடைய வேண்டும் என்பதே என் ஆசை.    நடக்குமா ?

முன்னெல்லாம் 30 ரூபாய்குள்ள பிரேக்ஃபாஸ்ட் என்பதுபோல படிக்கறவங்க கலந்துகொள்வதுபோல ஏதேனும் டாஸ்க் கொடுப்பீங்க. இப்போ ஏன் அதுமாதிரி செய்வதில்லை? (இது புதன் கேள்வி இல்லை)

# படிக்கிறவர்கள் கலந்து கொள்வதற்கு ஏற்ற புதுப்புது அம்சங்களை  யார் சொன்னாலும் அதை ஏற்றுக்கொண்டு நடைமுறைப்படுத்தத் தயாராக  இருக்கிறோம். (இது கேள்விக்கான பதில்தான்!) 

& யோசிப்போம். புது ஐடியா கிடைத்தால் உடனே செய்வோம். 


====================================

எங்கள் கேள்வி :

உங்கள் வோட்டு எதற்கு ? ஏன்? 

1) வீட்டில் சமைத்த உணவுக்கு 

2) ***** ( 5 star) ஹோட்டல் உணவுக்கு 

3) அம்மா உணவக வகை உணவுகளுக்கு 

4) கையேந்தி பவன் உணவுகளுக்கு 

5) வீடு தேடி வரும் swiggy zomato வகை உணவுகளுக்கு 

6) இவை தவிர வேறு ஏதாவது? 

========================================