வெந்நீரில் மருந்திருக்கு தெரியுமா? அதை தினம் குடித்தால் குணமிருக்கு தெரியுமா...

ஒவ்வொரு வருஷமும் கல்யாண நாளுக்கு ஏதாவது ஒரு கோவில் போறதுல தீர்மானமா இருப்பா பாஸ்...   ஒரு வருஷம் நங்கநல்லூர் ஆஞ்சி கோவில்.  ஒரு வருஷம் குன்றத்தூர் முருகன் கோவில்.  இன்னொரு வருஷம் மயிலாப்பூர் பாபா, கபாலீஸ்வரர், மற்றும் அங்கிருக்கும்  கேசவ மாதவ பெருமாள் கோவில்கள்...

அப்படிப் போகும் ஓரிரு சந்தர்ப்பங்களில் வல்லிம்மாவையும் பார்த்தும் வந்திருக்கிறோம்!  ஒருதரம் சிங்கம் கிட்ட ஆசீர்வாதம் வாங்கியிருக்கோம்.  

இந்த வருஷம் கல்யாண நாளுக்கு ஒப்பிலியப்பன் கோவில் என்று போனமாசமே சொல்லிட்டார் பாஸ்.  ஏன்னா, 97இல் போயிட்டு வந்ததற்கப்புறம் குலதெய்வம் கோவில் போகாமலே இருந்தோமா...   அப்படிலாம் இருக்காதீங்கன்னு ஆளாளுக்கு சொன்னாங்க ...  எங்களுக்கு ஏற்பட்ட சில தடங்கல்களுக்கு காரணம் களைய குலதெய்வம் கோவில் போகச் சொன்னாங்களா...   நாங்களும் போயிட்டு வந்தோமா...  அப்பவே இனிமே வருஷாவருஷம் வந்துடணும்னு தீர்மானம் போட்டுக்கிட்டோம்.

அந்த வகையில இந்த வருஷம் கல்யாண நாளுக்கு ஒப்பிலிபியப்பன் கோவிலும் - அங்கதான் எங்க கல்யாணம் நடந்துச்சுன்னு முன்னாடியே சொல்லிருக்கேன் - குலதெய்வம் கோவிலும் போயிட்டு வந்துடலாம்னு மனசுக்குள் நெனச்சுக்கிட்டோம்.  முடிவும் பண்ணிக்கிட்டோம்.  அப்புறம் இரண்டாவது குலதெய்வமான சுவாமிமலைமுருகன் கோவில்..   இதுதான் திட்டம்.

போனவாட்டி போனமாதிரி கோவில் கோவிலா சுத்தக்கூடாதுன்னு பசங்க ஸ்ட்ரிக்ட்டா சொல்லிட்டானுங்க...    இந்த மூணோட சரின்னு தீர்மானமா சொல்லச் சொன்னாங்க...

எங்க தங்கறதுங்கறதை பத்தியெல்லாம் பேசிக்காம நாள் போயிட்டு இருந்தது.  அவங்கவங்களுக்கு ஆபீஸ் டென்ஷன், உடம்பு சரியில்லாமை, வரலக்ஷ்மி பூஜை, நாகசதுர்த்தி, கருடபஞ்சமி...  

எங்களுக்கு வரதா சொல்லி இருந்த வண்டிக்காரர் திடீரென காலை வாரி, வேறொருவரை அனுப்பினார்.  அந்த வேறொருவரும் எங்களுக்கு ஏற்கெனவே அறிமுகமானவர்ங்கறதால பிரச்னை இல்லை.

பயப்படாதீங்க...      காசிப்பயணக்கட்டுரை மாதிரி ரொம்ப பெரிசா எல்லாம் வராது...  ஆனாலும் பாருங்க...   இட்டு நிரப்ப ஒரு விஷயம் கிடைச்சுடுது நமக்கு...

பசங்களுக்கு சனிக்கிழமை ஆபீஸ் லீவுதான்.  எனவே வெள்ளிக்கிழமை ராத்திரி கிளம்பறதுல பிரச்னை இல்ல...ஒருத்தனுக்கு மட்டும் வெள்ளிக்கிழமை நைட் டியூட்டி.  அவனை மட்டும் ஏற்கெனவே இருந்த ஒரு காம்பன்சேட்டரி ஆஃப்  எடுக்க சொன்னோம்.

பயண நாளும் வந்தது.  இரவு ஒன்பது மணிக்கு கிளம்புவதாய் இருந்தது.  ஏழு மணிக்கு ஆரம்பிச்சுது பாருங்க மழை..   செம மழை..   எட்டு மணிக்கு வந்துடறதா சொன்ன வண்டி எட்டரைக்கு வர,  ஒருவழியாய்க்கிளம்பினோம்.  பெருங்களத்தூர்க் கோவிலில் தேங்காய், எலுமிச்சைப்பழம், சாங்கியம் செய்தபின்னே வண்டி விரைந்தது.. மழை பெய்தாலும் ஜன்னலைத் திறந்து வச்சுக்கிட்டாலும் உள்ளே தண்ணி வராம சில்லுனு இருந்தது பாருங்க...   பயணம் ரொம்ப இனிமையா அமைய அதுவும் ஒரு காரணம்ங்க...  திண்டிவனம் வரைக்கும் சல்லுனு போயிட்டோம்...   அப்புறம் கும்பகோணம் பாதைல திரும்பினப்புறம்தான் சோதனை...  அதுவரை நாலு டோல்...

ரோடாங்க அது?  சும்மாவே சுத்தம்...   அதிலும் மழைபெய்த நேரம்..  

சொல்ல மறந்துட்டேனே...  கிளம்பறதுக்கு முன்னால அதிகாலை இறங்கி குளிக்கக் கொள்ள என்று   இடம்னு தேடிப் பார்த்தா ஆச்சரியம்...  எங்கேயுமே இடம் இல்லை.

ஒண்ணு பண்ணினோம்...   போன வருஷம் ஜூன் மாசம் போனப்போ தங்கினோமே,  பாபுராஜபுரம் அக்ரஹாரம் திருமலா ஹோம் ஸ்டே நினைவு வந்துச்சா...  அட்ரஸ் எங்க பிடிக்கலாம்னு கூகிள் பண்ணினா...  இதுமாதிரி இதுமாதிரி நீங்க போன வருஷம் ஜுன்மாசம் ஆறாம் தேதி இங்க போனீங்க...    இது உங்க கண்ணுக்கு மட்டும்தான் தெரியும்..  பயப்படாதீங்க...   மார்க் போடறீங்களா? ன்னு கேட்டுச்சு.  அலண்டு போனாலும் காட்டிக்கலை.  வாட்ச் பண்றாங்கடா...

அங்கிருந்து போன் நம்பர் எடுத்து பேசி ரூம் புக் பண்ணிக்கிட்டோம்.  எனவே கவலை இல்லை. காலை மூணரை மணிக்கு கூகிள் மேப் உதவியோடு அந்த இடத்தை அடைந்தோம்.  இரண்டு நான் ஏஸி ஒரு பெட் ரூம் அறைகள் கிடைத்தன.  (கிச்சனும் உண்டு)  

பசங்க கிட்ட காலை ஆறரை மணிக்கு கிளம்பிடுவோம்னு சொன்னா முறைக்கறாங்க...  அதிலும் பெரியவன் முன்னால டிரைவர் பக்கத்துல  உட்கார்ந்து கம்பெனி கொடுத்தானா, தூங்கவே இல்லையாம்.  ஆனாலும் கண்டிப்பாகச் சொல்லிட்டு  படுத்தோம். 

அடுத்த வாரம் பார்ப்போமா...   வர வர ரொம்ப பக்தி மயமா ஆயிட்டுதோ...

இந்த வீடு ஞாபகம் இருக்கா?  இந்த வீட்டை இப்பவும் ஒரு போட்டோ எடுத்துக்கிட்டேன்...   இன்னும்  சிதிலமடைஞ்சிருக்கோ...

=============================================================================================

லலித் மோடிக்கு மதனைத் தெரியும்னு நினைக்கறேன்!  T 20ல சீர் கர்ல்ஸ் டான்ஸ் ஐடியா இங்கிருந்துதான் பிடிச்சுருக்கார்!

=================================================================================================

இதுவும் பேஸ்புக்கில் சமீபத்தில் பகிர்ந்த கவிதை...  இங்கு பின்னூட்டமிட்டிருந்த கீதா அக்கா, வாசுதேவன் திருமூர்த்தி அண்ணா சுவாரஸ்யமாய் இட்டிருந்தார்கள்.

எழுத்துகளை 

மாற்றி மாற்றி 

அமைத்துப்பார்க்கிறேன்.

எதை எதிர்பார்க்கிறேன் 

என்று தெரியவில்லை 

பக்கம் பக்கமாய் படிக்கிறேன் 

எதைத் தேடுகிறேன் 

என்று தெரியவில்லை.

எதிரில் நிற்பவரைத் 

தாண்டிப் 

பார்வையை அலைய விடுகிறேன் 

யாரைத் தேடுகிறேன் என்று தெரியவில்லை.

பதிலைத் தேடவில்லை இப்போது 

கேள்வியைத்தான் தேடுகிறேன் 

விருப்பங்களே தெரியாதபோது 

விடைகள் எப்படிக் கிடைக்கும்?

=============================================================================================

ஒருவர் புதிதாய் அறிமுகம் ஆகிறார் என்றால், அவரை அடுத்த தரம் பார்க்கும்போது சரியாய் நினைவில் வைத்திருக்கும் ஞாபகக்காரன் இல்லை நான்.  நேர்மார்!  அவர்கள் சிரித்துப் பேசும்போது தடுமாறிப்போகும் ரகம்...   வெட்கப்படவேண்டிய விஷயம்தான்...   

இது வேற மாதிரி...   படிங்களேன்...  உங்களுக்கே புரியும்..   "உக்கும்..   ஆமாம்"னு சொன்னாலும் சொல்வீங்க!

 ==================================================================================================

வெந்நீரின் மகத்துவம் தெரியுமோ....

கைகண்ட மருந்துவெந்நீர்!

மருத்துவர் எம்.மூர்த்தி:

"சிறுநீரகத்தை பாதுகாக்க, தினந்தோறும் குறைந்தபட்சம், 2 லிட்டர், அதிகபட்சம், 3 லிட்டர் தண்ணீர் குடியுங்கள் என்ற, தண்ணீரின் மகத்துவம் பற்றி, விழிப்புணர்வு பிரசாரம் நடக்காத இடம் இல்லை. அதற்கு இணையாக, வெந்நீரும் உடல் நலத்திற்கு உகந்தது.

வடை, பக்கோடா, பூரி என, எண்ணெயில் பொரித்த அயிட்டம் அல்லது இனிப்புகளை சாப்பிட்ட பின் நெஞ்செரிச்சல் தோன்றும். உடனே நாம் எடுப்பது, 'ஜெலுசில்' அல்லது 'டைஜின்' மாத்திரைகளைத் தான். அதைவிடுத்து, ஒரு டம்ளர் வெந்நீரை, மெதுவாகப் பருகுகினால் போதும். கொஞ்ச நேரத்தில் நெஞ்செரிச்சல் போன இடம் தெரியாது.

சாப்பிட்ட பின், சுடச்சுட வெந்நீர் குடித்தால், உடலில் அதிகப்படி சதை போடுவதை தடுக்கலாம்.

மலச்சிக்கல் உள்ளவர்களுக்கும், வெந்நீர் கைகண்ட மருந்து; உடனடி நிவாரணம் நிச்சயம்.

உடல் வலிக்கு, வெந்நீரில் குளித்து, வெந்நீரில் கொஞ்சம் சுக்குத்துாள், பனங்கற்கண்டு போட்டு குடித்து படுத்தால் நன்றாகத் துாக்கம் வருவதோடு, வலியும் பறந்துவிடும்.

கால் பாத வலியை போக்க, பெரிய வாளியில், சூடு தாங்கும் அளவுக்கு வெந்நீர் ஊற்றி, அதில் உப்புக் கல்லைப் போட்டு, கொஞ்ச நேரம் பாதத்தை வைத்தால் சிறந்த நிவாரணம் கிடைக்கும். 'டெட்டால்' ஊற்றினால், கால் வலி போவதுடன், அழுக்கும் நீங்கும்.

திடீரென்று தலை வலிக்கிறது என்றால், உடனே, டீ, காபியை தேடாமல், ஒரு டம்ளர் வெந்நீர் குடியுங்கள். அஜீரணக் கோளாறு, குடலில் போதிய அளவு தண்ணீர் இல்லாததால் கூட தலைவலி ஏற்படலாம்.

வீட்டில் பாத்திரம் தேய்த்து, துணி துவைக்கும் பெண்கள், வாரத்திற்கு ஒரு முறை, உங்கள் கைகளை வெந்நீரில் கொஞ்ச நேரம் வைப்பதால், நக இடுக்கில் இருக்கும் அழுக்கு போய், கைகள் ஆரோக்கியமாக இருக்கும்.

வெயிலில் திரிந்து வீடு திரும்பியதும் தாகத்தைப் போக்க, ஐஸ் வாட்டர் குடிக்காமல், சற்று வெதுவெதுப்பான வெந்நீர் அருந்துவது, தாகம் தீர்க்க நல்ல வழி.

விருந்துகளில், 'செமையாக கட்டி' முடித்ததும், கூல் டிரிங்ஸ், ஐஸ் கிரீம்ஸ் பக்கம் போகாமல், ஒரு டம்ளர் வெந்நீர் குடியுங்கள், உடம்புக்கு நல்லது.
ஆரோக்கியத்துக்கு மட்டுமல்ல, வீட்டு உபயோகத்திற்கும் வெந்நீரின் உதவி பெரிதாக உள்ளது.

நெய், எண்ணெய் இருந்த பாத்திரங்களை கழுவும்போது, வெந்நீரில் ஊற வைத்து கழுவினால், பிசுக்கு இருக்காது என்பது, பெண்மணிகளுக்கு தெரியாத விஷயம் அல்ல.

அதுபோலவே, தரையை துடைக்கும்போது, குறிப்பாக குழந்தைகள், நோயாளிகள் இருந்தால், வீட்டின் தரைகளை வெந்நீர் உபயோகப்படுத்தி துடைத்தால் கிருமிகள் மடியும்.

- தினமலர் - "சொல்கிறார்கள்"

===================================================================================