வெள்ளி வீடியோ : மலர் அள்ளிமுடிப்பான்... கன்னம் கிள்ளி எடுப்பான்

1971இல் வெளிவந்த திரைப்படம்.  ஆயி மிலன் கீ பேலா என்கிற ஹிந்திப் படத்தின் தழுவல்.

ஹிந்தியில் ராஜேந்திரகுமார், தர்மேந்திரா, சாயிரா பானு நடித்திருந்தார்கள்.  தர்மேந்திரா வில்லனாக நடித்திருந்த ஒரே படமாம்!  அசோகன் நடித்திருந்த பாத்திரத்தில் ஹிந்தியில் நடித்திருப்பது நஸிர் ஹுசைன் - பின்னால் யாதோங்கிபாராத் ஹம் கிஸிஸே கம் நஹீன், கேரவன் போன்ற படங்களின் தயாரிப்பில் பிரபலமானவர்.

ப. நீலகண்டன் இயக்கத்தில் எம் ஜி ஆர், ஜெயலலிதா(இரட்டை வேடம்) நடித்திருக்கும் திரைப்படத்திலிருந்து ஒருபாடல்.

எனக்குஇந்தப் படத்தில் இரண்டு பாடல்கள் ரொம்பப் பிடிக்கும்.  முதலிடத்தில் இந்த "ஆயிரம் கண்ணுக்கு விருந்தாகும்" பாடல்.  இரண்டாவது "பாடினாள் ஒரு பாட்டு...  பால் நிலாவினில் நேற்று..."  இந்த இரண்டாவது பாடலை எழுதியிருப்பவர் வாலி.

கண்ணதாசன் பாடலுக்கு இசை எம் எஸ் விஸ்வநாதன்.  எம் ஜி ஆருக்கும் கண்ணதாசனுக்கும் ஊடல் வராத காலம் போலும்.   டி எம் எஸ் பாடியிருக்கும் இந்தப் பாடலை பி சுசீலாவும் பாடியிருக்கிறார்.  எனக்கு டி எம் எஸ் பாடல்தான் அதிகம் பிடிக்கும்.

பணக்காரக் கதாநாயகி வந்து மேலே விழுந்து காதலைச் சொல்ல, வாத்தியார் நீதி நேர்மை எருமை..  - மன்னிக்கவும் அதிரா திரும்பி வந்து விட்டதால் அவர் சொல்வதுபோல சொல்லி விட்டேன் - நீதி நேர்மை நியாயம் மற்றும் கடமை கண்ணியம் கட்டுப்பாட்டுக்கு உட்பட்டு உணர்ச்சி வசப்படும் நாயகிக்கு உண்மை நிலையைச் சொல்லி அவள் காதலை மறுக்கிறார்.

அப்புறம் அவர் அம்மாவுக்கு ஓகே என்றதும் அவரும் காதலிக்க ஆரம்பித்து விடுவார்.

அந்தக் காலத்தில் படம் பார்த்தபோது எம் ஜி ஆரின் உடையும், கூலிங் க்ளாஸும், தோளில் மாட்டிக் கொண்டிருக்கும் பையும் கவர்ந்தன.  பாடலில் வரும் அந்தப் பாலம் நிறைய தமிழ்ப்பாடல்களில் இடம்பெற்றுள்ளது.  எந்தெந்த பாடல்களில் என்று நண்பர்கள் யோசிக்கலாம்!

இந்தப் பாடலில் டி எம் எஸ்ஸின் குரல் மிகவும் பிடிக்கும்.

ஆயிரம் கண்ணுக்கு விருந்தாகும் 

உன் அழகுக்கு ஒருவன் துணை வருவான் 

ஓஹோஹோஹோஹோஹோ  அது நானல்ல அது நானல்ல 

உன் பாதத்தில் தலைவைத்துப் படுத்திருப்பான் -கண் 

பாவத்தில் காவியம் படைத்திருப்பான் 

உன்னைச் சிரிக்க வைப்பான் - கொஞ்சம் 

தவிக்க வைப்பான் 

பின்பு  துடிக்க வைப்பான் நெஞ்சம் சுகமாக... 

ஓஹோஹோஹோஹோஹோ  அது நானல்ல அது நானல்ல  

நல் ஆரம்ப நேரத்தை வரவு வைப்பான் - தன் 

அனுபவ ஞானத்தைச் செலவழிப்பான் 

மலர் அள்ளிமுடிப்பான் கன்னம் கிள்ளி எடுப்பான்  

அள்ளிமுடிப்பான் கன்னம் கிள்ளி எடுப்பான்  

இன்னும் சொல்லிக் கொடுப்பான் இன்பம் சமமாக 

ஓஹோஹோஹோஹோஹோ  அது நானல்ல அது நானல்ல  

ஸ்ரீஜெயந்தி கோகுலாஷ்டமி அன்று கிருஷ்ணன் பாடலை எத்தனை பேர் எதிர்பார்த்தீர்கள்?!!