வெள்ளி வீடியோ : வீடுகள் தோறும் ஒளியே வருக இருளே வர வேண்டாம்

முதலில் நேயர் விருப்பம்!  துரை செல்வராஜூ ஸார் கேட்டிருந்த "பூமாலையில்... " பாடல்.

1967இல் வெளிவந்த ஊட்டி வரை உறவு.  ஸ்ரீதர் இயக்கத்தில் வந்த நகைச்சுவைத் திரைப்படம்.  டி எஸ் பாலையா, சிவாஜி கணேசன், கே ஆர் விஜயா, முத்துராமன் நடித்து 1967இல் வந்த இந்த திரைப்படத்தை 1983 இல் நாகேஸ்வரராவும் ஸ்ரீதேவியும் நடிக்க தெலுங்கில் வேறு எடுக்கப்பட்டு வெற்றி அடைந்தது தெரியுமோ?  விக்கி சொல்கிறது! இந்தப்படத்தில் நடித்தபின் எல் விஜயலக்ஷ்மி திருமணம் செய்து கொண்டு படவுலகுக்கு முழுக்குப் போட்டு விட்டார் என்றும் தகவல் சொல்கிறது விக்கி!

கண்ணதாசன் பாடல்களுக்கு எம் எஸ் விஸ்வநாதன் இசை.  இந்தப்படமும் கோபு ஸார் வசனத்தில் நகைச்சுவையில் மிளிர்ந்த படங்களில் ஒன்று.

புது நாடகத்தில் ஒரு நாயகி, தேடினேன் வந்தது, ஹேப்பி இன்று முதல் ஹாப்பி.., அங்கே மாலை மயக்கம் யாருக்காக, ராஜராஜஸ்ரீ, யாரோடும் பேசக்கூடாது என்று  இதில் அனைத்துப் பாடல்களும் ஹிட்தான். 

இந்தப் பாடல் டி எம் எஸ் அவர்களும், சுசீலாம்மாவும் பாடியிருக்கிறார்கள். இன்று இரண்டு பாடல்களிலும் சுசீலாம்மா குரல் இருக்கிறது.  

பூமாலையில் ஓர் மல்லிகை 

இங்கு நான் தான் தேன் என்றது 

உந்தன் வீடு தேடி வந்தது 

இன்னும் வேண்டுமா என்றது 

சிந்தும் தேன் துளி இதழ்களின் ஓரம் 

சென்றேன் ஆயிரம் நினைவுகள் ஓடும்  

சிந்தும் தேன் துளி இதழ்களின் ஓரம் 

சென்றேன் ஆயிரம் நினைவுகள் ஓடும் 

கரும்போ கனியோ கவிதைச் சுவையோ 

கரும்போ கனியோ கவிதைச் சுவையோ 

விருந்தோ கொடுத்தான் விழுந்தாள் மடியில் 

விருந்தோ கொடுத்தான் விழுந்தாள் மடியில்  

மஞ்சம் மலர்களைத் தூவிய கோலம் 

மங்கல தீபத்தின் பொன்னொளி சாரம் 

இளமை அழகின் இயற்கை வடிவம் 

இளமை அழகின் இயற்கை வடிவம் 

இரவைப் பகலாய் அறியும் பருவம் 

இரவைப் பகலாய் அறியும் பருவம்  

பூமாலையில் ஓர் மல்லிகை 

இங்கு நான் தான் தேன் என்றது 

உந்தன் வீடு தேடி வந்தது 

இன்னும் வேண்டுமா என்றது 

இன்னும் வேண்டுமா என்றது

அடுத்து வருவது என் பகிர்வு.

  

வெளி வந்த ஆண்டு 1966.  

ரஷ்யக் கதையை உரிமை வாங்கி எடுக்கப்பட்ட படம்.  கதையும் பாடல்களும் கண்ணதாசன்.  வசனம் ஏ எல் நாராயணன். 

சிவாஜி, எஸ் எஸ் ஆர், முத்துராமன், நாகேஷ், பத்மினி, விஜயகுமாரி, தேவிகா, ஜெயலலிதா, சாந்தகுமாரி எல்லோரும் 'கௌரவ நடிகர்கள்'!

சிவகுமார் உள்ளிட்ட மற்றவர்கள் கௌரவமில்லாத நடிகர்கள் என்று நினைக்க வேண்டாம்!!!   அவர்கள்தான் முக்கிய நடிகர்கள்!

இசை கே வி மகாதேவன்.  படத்தில் ஒரே ஆண்குரல் சீர்காழி கோவிந்தராஜன் (கருநீல மலைமேலே)

ஆர் எம் கண்ணப்பன் தயாரிப்பு, பி. புல்லையா இயக்கம்.

சமீபத்தில் பி சுசீலாம்மா தனது 85 வது பிறந்தநாள் விழாவைக் கொண்டாடினார்.  அதைப்பற்றி இங்கு படிக்கலாம்.  இங்கும்.

​சென்னை: இசை அரசி என்று எல்லாராலும் பெருமையாக அழைக்கப்படும், பிரபல பின்னணி பாடகி பி.சுசீலா தன், 85 வது பிறந்த நாளை, நேற்று முன்தினம், ரசிகர்களுடன், 'கேக்' வெட்டி கொண்டாடினார்.

சென்னையில் நடந்த இந்த விழாவை, 'தினமலர்' நாளிதழ் முன்னெடுத்து, அவரது ரசிகர்களுடன் கொண்டாடியது. விழாவில், மதுரை, 'தினமலர்' வெளியீட்டாளர் எல்.ராமசுப்பு, கோவை, 'தின மலர்' வெளியீட்டாளர் எல்.ஆதிமூலம் ஆகியோர், பி.சுசீலாவிற்கு பரிசு கொடுத்து, பாராட்டி கவுரவித்தனர்.

இவர்களைத் தொடர்ந்து சுசீலாவின் ரசிகர்கள், அவருக்கு மலர் கொத்து கொடுத்து மகிழ்ந்தனர். கூடவே தங்களுக்கு சுசீலாவின் பாடல்கள் ஏற்படுத்திய தாக்கங்களை குறித்து, உணர்வு பூர்வமாக பேசினர்.விழாவில், ஆடிட்டர் ருத்ரகுமார், கண்ணதாசன் பதிப்பகம் காந்தி கண்ணதாசன், மதுரா டிராவல்ஸ் பாலன், நடிகை சத்யா உள்ளிட்டோர் கலந்து கொண்டனர். லஷ்மன் சுருதி அமைப்பாளர் லஷ்மன், தொகுத்து வழங்கினார்.நிகழ்ச்சியை முன்னிட்டு சுசீலா பற்றிய குறும் படம் திரையிடப்பட்டது; புகைப்பட கண்காட்சியும் நடத்தப்பட்டது.

இந்தப் பாடலை கேட்காதவர்கள் யாரும் இருக்க முடியாது. ரசிக்காதவர்களும் இருக்க முடியாது.  என்ன ஒருஅமைதியான பாடல்.  என்ன ஒரு குரல்...   என்ன வரிகள்...  என்ன இசை...

கே வி எம் பற்றி எஸ் பி பி சொன்ன ஒரு சம்பவம்...  அதாவது எஸ் பி பி யிடம் திரு புகழேந்தி சொன்னதாக எஸ்பி பி சொன்ன சம்பவம்.

​கேவிஎம்மின் உதவியாளர் புகழேந்தி அவர்கள்.  உதவியாளர் என்றில்லாமல் ஒரு உறவினர் போல அவர்தான் கேவிஎம்முக்கு எல்லாமுமாய் இருந்திருக்கிறார்.    அவர்தான் கேவிஎம்மை ஸ்டுடியோவுக்கு காரில் அழைத்துத்துச்சென்று - காரை ஒட்டிக்கொண்டு- வருபவர்.   ஒரு நாள் ஸ்டுடியோவில் டி எம் எஸ் பாடவேண்டிய பாடல் ஒன்றின் ரிஹர்சல். அது முடிந்து  'டேக் போகலாம்' என்றதும் டி எம் எஸ் பாடினாராம்.  மாமாவைப் பொறுத்தவரை ஓரளவு திருப்தியாய் வந்து விட்டால் ஓகே சொல்லி விடுவாராம்.  முதல் முறை பாடும்போது வரும் உணர்ச்சி, பாவம்தான் உண்மையாக இருக்கும் என்று நம்புபவர் அவர்.  அவர் ஓகே சொல்லி விடப்போகிறாரே என்று அவசரமாக திரு புகழேந்தி  மைக்ரோபோனில் ''சௌந்தர்ராஜன்ஜி... கடைசி சரணத்தில் முடிவில் அந்த சங்கதி...." என்று ஞாபகப்படுத்தவும் "ஓ...   அதை மறந்து விட்டேனா?  நிறைய ரிஹர்சல் பார்த்தோம் இல்லை?" என்று கேட்டுவிட்டு டி எம் எஸ் 'ஒன்மோர் டேக்' போனாராம்.  இதுமாதிரி மூன்று நான்கு முறை நடந்ததாம்.  நான்காவது முறை புகழேந்தி பேசும் முன் மாமா ஓகே சொல்லி விட்டாராம்.   அதற்கு டி எம் ஸிடம் அவர் சொன்ன காரணம் 'நாங்கள் சொல்லிக் கொடுத்த முறை தவறாக இருக்கலாம்' என்றாராம்.  புகழேந்தி, மாமாவை வீட்டில் விட்டுவிட்டு கிளம்பும் முன் மாமா அவரிடம் "கோபமா?" என்று கேட்டாராம்.  புகழேந்தி அவர்கள் எப்போதும் அவர் கண்ணைப் பார்த்தே பேசமாட்டாராம்.  இப்போதும் அப்படியே தரையைப்பார்த்து "ஆமாம்.  அவர் பற்றி ஒன்றும் சொல்லவில்லை என்பது சரி...   ஆனால் நான் சொல்லிக் கொடுத்ததில் தவறு இருக்கும் என்று சொல்லி விட்டீர்களே"  என்றாராம்.  "அப்படி இல்லை...   எப்போது நான்குமுறை பாடியும் அவருக்கு அந்த சங்கதி வரவில்லையோ, அப்போது இதுதான் சரி என்று இருக்கவேண்டும்.  அல்லது அவரால் அது பாடமுடியவில்லை என்று கொள்ளவேண்டும்.  மறுபடி மறுபடி டேக் போனால் அவருக்கும் சங்கடம்.  அவர் நாளை வருகிறேன் என்று சொல்லி விட்டாரானால் தயாரிப்பாளருக்கும் நஷ்டம், கஷ்டம்.  அதுதான் அப்படிச் சொன்னேன்" என்றாராம்.  யாருக்கும் கஷ்டம் கொடுக்காதவர் அவர்.  இதை மறைந்த கேவிஎம் உடல் அருகே நின்று திரு புகழேந்தி எஸ் பி பி இடம் சொல்லி இருக்கிறார்.  

சரி...  இனி இன்றைய பாடல்.

அமைதிப்புறாவே அமைதிப்புறாவே அழைக்கின்றேன் உன்னை 

நிம்மதியே நிம்மதியே நான் நேசிக்கின்றேன் உன்னை 

காலங்களாலே தென்றல் வருக புயலே வரவேண்டாம் 

மேகங்களாலே மழையே வருக வெள்ளம் வரவேண்டாம் 

வீடுகள்தோறும் ஒளியே வருக இருளே வரவேண்டாம் 

நாடுகள்தோறும் உறவே வருக பகையே வரவேண்டாம் 

சமாதானமே சமாதானமே தழுவுகின்றேன் உன்னை 

தர்மதேவனே தர்மதேவனே சரணடைந்தேன் உன்னை 

புத்தன் வழியில் அசோகன் சேவை புரிந்தது எதற்காக 

புன்னகை முகமே தேவனின் வீடெனச் சொன்னது எதற்காக 

சத்திய நெறியைத் தாரணி எங்கும் தந்தது எதற்காக 

சமாதானமாம் சமாதானமாம் தாயே உனக்காக 

"அமைதிப்புறாவே அமைதிப்புறாவே என்று பாட்டு கேட்டு விட்டோம்.  புறா சம்பந்தமாக சில சுவாரஸ்யமான தகவல்கள் தினமலர் 'சொல்கிறார்கள்' பகுதியில் படித்தேன்.  அதை உங்களுடன் பகிர்ந்துகொள்கிறேன்.   பறக்க விடப்படும் அமைதிப்புறா பற்றியும் செய்தியில் இருக்கிறது...

புறாக்களின் காதல் அலாதியானது!

பந்தயப் புறாக்களை வளர்க்கும், வேலுார் மாவட்டம், குடியாத்தம், காட்பாடி ரோடு, முனிசிபல் லைன், 'அலைகள்' பெண்கள் குழுவின் தலைவர் ரூபாவதி: 

"புறாக்களில் பல வகை உண்டு. கோவில் புறா, மாடப்புறா, ரோமர் புறா, மணிப்புறா என, பல வகை உள்ளன. இவற்றில், ரோமர் புறா தான், பந்தயப் புறாக்கள். இந்தப் புறாக்கள், பிற புறாக்களை விட, உருவத்தில் கம்பீரமாக இருக்கும். 

இந்த வகை ஆண் புறா, ஒரு பெண் புறா மீது மட்டும் தான் காதல் கொள்ளும்; இறுதி வரை அந்தப் புறாவுடன் தான் காதல் கொண்டிருக்கும்; பிற பெண் புறாக்களை நாடாது. இவற்றிற்கு காதல் வந்து விட்டால், பிற புறாக்களிடம் இருந்து தனியாக பிரித்து, தனிக் கூட்டில், இரண்டையும் விட்டு விடுவோம். அவற்றின் காதல், அலாதியானது. பெண் புறாக்கள் இரண்டு முட்டையிடும்; அடை காத்து, குஞ்சு பொரிக்கும். முட்டையை, பெண் புறா மட்டுமின்றி, ஆண் புறாவும் அடை காக்கும்.

அடை காக்கும் பெண் புறாவின் வாயில், ஆண் புறா உணவு ஊட்டும். அவ்வளவு காதல், அந்த பறவைகளுக்கு!

முக்கிய நிகழ்ச்சிகளின் போது, அமைதி புறாக்களை பறக்க விடுவது வழக்கம். அந்தப் புறாக்கள், அங்குள்ள பிற புறாக்களுடன் கலந்து விடும் என, நினைப்போம்; அது தவறு.  எங்கிருந்து வாங்கி வந்தனரோ,அந்த ஊருக்கு அவை பறந்து சென்று விடும்.

பந்தயப் புறாக்களை பறக்க விடுவதற்கு என, வேலுார் ஆம்பூர், திருச்சி, சேலம், கோவை போன்ற நகரங்களில், 'கிளப்'கள் உள்ளன. பந்தயப் புறாக்களை வளர்க்கும் விபரத்தை, அந்த கிளப் உறுப்பினர்களுக்கு தெரிவித்தால், அவர்களே எடுத்துச் சென்று, பயிற்சி அளித்து, பந்தயத்தில் பங்கேற்க செய்வர்.

பயிற்சியின் போது, முதலில், 50 கி.மீ.,க்கு எடுத்துச் சென்று, புறாவை பறக்க விடுவர். வானத்திற்கு பறந்து செல்லும் புறா, தன் இருப்பிடம் சென்று சேர்ந்து விடும். இப்படியே, 100, 200, 500 என, துாரத்தை அதிகரிப்பர். பந்தயம் என்பது, புறாவை விடும் இடத்திலிருந்து, அந்த நொடியிலிருந்து துவங்கும். வெயில், மழை போன்ற அனைத்தையும் சமாளித்து, பருந்துகளின் பிடியிலிருந்து தப்பி, நம் இருப்பிடம் வந்து சேர்ந்து விடும்.

இப்படி வரும் புறாக்களுக்கு, சில ஆயிரங்கள் முதல், 1 லட்ச ரூபாய் வரை விலை கிடைக்கும். பந்தய வளர்ப்பு புறாக்களின் கால்களில் வளையம் இருக்கும். அதில், புறா வளர்ப்பவர் பெயர், மொபைல் எண், கிளப் பெயர் போன்ற விபரங்கள் இருக்கும். எப்போதாவது வழி தவறி சென்று விடும் புறாக்கள், அடிபடும் புறாக்களை மீட்போர், அதன் காலில் உள்ள வளையத்தில் இருக்கும் விபரத்தை பார்த்து, உரிமையாளருக்கு தகவல் தெரிவிப்பர்!