"திங்க"க்கிழமை : பஞ்ச வர்ண மாலாடு - கமலா ஹரிஹரன் ரெஸிப்பி ​

  பஞ்ச வர்ண மாலாடு

இதில் பஞ்ச (பாஞ்ச்) என்பதற்கு பொருள் இதிலுள்ளது ஐந்து பொருட்கள்.

வர்ணம் என்பது கலரைக் குறிப்பது. ஆனாலும் கலர் கலராக இதுவும்  இருக்குமென நினைக்க கூடாது. சற்று மாறுபட்ட ஒரே கலர்தான்.

மாலாடு என்பது இனிப்பின் ஒரு வகை பெயரை( லட்டு, பூந்தி மாதிரி) சார்ந்தது. மா+ லாடு.. மா-என்றால் மாவு, லாடு-என்றால் உருண்டைகள் எனவும் பொருள் கொள்ளலாம்.

அப்பாடா... ! பெயர் விளக்கம்  ஒரு மாதிரியாக தந்து விட்டேன்.

இனி ஒரு கப் அளவுபடி ரவை, உடைத்த கடலை, (பொட்டுகடலை எனவும் இதை சொல்வோம். ) பாசிப்பருப்பு, அவல், கடலைப் பருப்பு  இந்த ஐந்தையும் எடுத்துக் கொண்டேன்.

 தனித்தனியாக எடுத்து வைத்துள்ள பஞ்ச பொருட்கள். (இதனுடன் ஒரு "ம்"என்ற ஒரு எழுத்து சேர்ந்தால் அதன் அர்த்தமே மாறிப் போய் எதுவும் இல்லாதது என்று போகும். அர்த்தம் மட்டுமல்ல.! அந்த பொருட்களின் தலையெழுத்தும்....ஹா. ஹா.) கூடவே வறுத்துப் போட கொஞ்சம் முந்திரிபருப்பும். இந்த முந்திரி பருப்பு அவரவர் விருப்பபடி (கூடக் குறைய) போட்டுக் கொள்ளலாம்.

பொதுவாக இந்த முந்திரி பருப்பு நம்முடன் எந்த ரீதியிலாவது ஒத்து வர பிரியபட்டு விடும். ஆனால், நாம்தான் நமக்கு ஒத்து வராதது என நிறையவே பிகு செய்து அதை  ஒதுக்குவோம். "அதை மனதில் வைத்துக் கொண்டு,  எப்பவாவது நமக்கு  அதை சாப்பிடலாம் என்ற ஆசை மனதில் வரும் போது,  (அதுவும் எதிராளி வீட்டு விஷேடங்களிலேயோ, அல்லது திருமண வைபவங்களிலேயோ  ஒரு பாயாசத்திலேயோ, கேசரி போன்ற இனிப்புகளிலேயோ அதை நாம் பார்க்கும் போது ) நம் அதிர்ஷ்டத்தின் துணைக்கரம் பற்றிக் கொண்டு அது நம் கண்ணில் படாமலேயே நம்மை பதிலுக்கு ஒதுக்கி, ஒதுங்கியும் போகும்." அது வேறு  விஷயம்.   ஹா.... ஹா...... ஹா........

இனிப்புககு ஜினி இரண்டு டம்ளர் என்ற கணக்கில் எடுத்துக் கொள்ளவும். நான் முதலில் எடுத்த கப் இந்த டம்ளரில் பாதி அளவு. ஆகவே அனைத்துக்கும் சேர்த்து (ஐந்து பொருட்களுக்கும் சேர்த்து) இரண்டு டம்ளராக ஜீனி எடுத்துக் கொள்ளவும்.

பொட்டுக் கடலை, பாசிப்பருப்பு, அவல் இந்த மூன்றிலும் ஒரளவு இனிப்பு உள்ளதால் நான் இரண்டு டம்ளர் மட்டும் எடுத்தேன். இனிப்பு தேவைபடுகிறவர்கள் இன்னமும் ஒரு அரை கப் கூட எடுத்து இரண்டரை டம்ளராக சேர்த்துக் கொள்ளலாம்.

கொஞ்சம் ஏலக்காய் சூடான கடாயில் வறுத்து கடலைப்பருப்புடன் போட்டுக் கொள்ளவும். ஏனெனில், கடலைப் பருப்புடன் தோலுடன் சேர்ந்த ஏலக்காய் நன்றாக பொடியாகி விடும். பொதுவாக இந்த ஏலக்காய் வாங்கியவுடனேயே வெறும் சூடான கடாயில் கொஞ்சம் வறுத்து ஆறியவுடன் ஒரு ஸ்பூன் ஜீனியுடன் சேர்த்து பொடி செய்து வைத்துக் கொண்டால், அவ்வப்போது பாயாசம், கேசரி போன்ற இனிப்புகளுக்கு கடைசியில் போடுவதற்கு உபயோகமாக இருக்கும்.

வறுத்த ஏலக்காய் என் பேச்சுக்கு மதிப்பு தந்து க. பருப்புடன் சேர்ந்து அமர்ந்து கொள்கிறது.

தனித்தனியே வறுக்கப்பட்டு பொடியாகிட தயார் நிலையில் இருக்கும் சாமான்கள்.

முதலில் மிக்ஸியில் கடலைப்பருப்புடன் ஏலக்காய் சேர்த்ததை போட்டு பொடித்துக் கொள்ளுங்கள்.

அதனுடன் அடுத்த கட்டமாக பாசிப்பருப்பு உடன் சேர்த்துப் பொடிக்கவும்.

அதன் பின் ரவையை சேர்க்கவும்.

அதனுடன் அவலும், நானும் ரெடி என்றபடி சேர்ந்து கொண்டது. 

ஐந்தாவதாக  பொட்டுக் கடலையையும் அந்த கலவையுடன் சேர்த்து பொடித்துக கொள்ளவும். நான் அவல், ரவைக்கு முன்னதாகவே மூன்றாவதாகவே பொ.க போட்டு விட்டதில் எனக்கு புகைப்பட சான்ஸ் கொடுக்கவில்லையே என வருத்தப்பட்டது. அதனால் பிரதியோகமாக அதைப்பற்றி எடுத்து எழுதுகிறேன்.

நான் எல்லாவறறையும் கலந்து பொடித்தவுடன், மிக்ஸியை கொஞ்ச நேரம் ஆற அமர செய்த பின் பொடியை இரண்டு பாகமாக பிரித்து ஒவ்வொன்றையும் கொஞ்சம் நேரம் நன்றாக பொடித்து எடுத்தேன். (ஒரளவு எல்லாமும் சேர்ந்து நைசாக வருமென்பதால்)

எல்லாம் கலந்து "அடுத்தது என்ன?" என விசாரிக்கும் மாவாகிய பஞ்ச ரத்தினங்கள்.

கடைசியாக ஒரு ஸ்பூன் நெய்யில் முந்திரியை வறுத்துப் போட்டு அதையும் சேர்த்து மொத்தமாக அரைத்து விடலாம். நான் வறுக்க மறந்து அப்படியே போட்டு விட்டேன். விருப்பமுள்ளவர்கள் (அதிர்ஷ்டம், அதன் எதிர்பதம் இவைகளின் மீது நம்பிக்கையில்லாதவர்கள்)  உடைத்து வறுத்து உருண்டைகளுடன் சேர்த்துக் கொள்ளலாம்.

பிறகு கொஞ்சம் மிக்ஸி "நான் சூடு ஆறி விட்டேன்" என்றதும், ஜீனியையும் அவ்விதம் பொடித்து, ஏற்கனவே மாவாக்கி இருக்கும் கலவையுடன் கலந்து கொள்ளவும்.

கொஞ்சம் உலர்ந்த திராட்சையை கடாயில்  ஒரு ஸ்பூன் நெய்யில் பொரித்தெடுத்து. அதனுடன் ஜீனி கலந்த மாவையும் பாதியளவு எடுத்துக் கொண்டு, ஒரு நாலைந்து( இல்லை அதற்கு சற்று மேலாக கொஞ்சம்) பெரிய ஸ்பூனில் நெய்யை விட்டு சூடாக்கியதும்,  கலந்த மாவில் விட்டு சிறு உருண்டைகளாக பிடித்தால், பஞ்ச வர்ண உருண்டை ரெடி.

சூடு ஆறிவிட்டால் உருண்டைபிடிக்க வராது என்பதினால், கொஞ்ச கொஞ்சமாக இப்படி சேர்த்து பிடித்து வைத்துக் கொள்ளலாம்.

இல்லை.. நெய்யும் முந்திரியும் இணை பிரியா தோழர்கள்தான்.! இந்த தோழமை நமக்கு இணையாத நட்பு என்பவர்கள் ஒரு ஸ்பூன் நெய்யோடு வாசனைக்காக நிறுத்தி "உருண்டை வேண்டாம்... அப்படியே சாப்பிடுவேன்.." என்ற விளம்பர பாணியிலும் சாப்பிடலாம்.

ஒரு மாறுதலுக்காக  இவை அனைத்தும் சத்து நிரம்பிய பொருள்கள் என நினைக்கிறேன். உங்களுக்கும் என் செய்முறைகள் பிடித்துள்ளதா என தெரிந்து கொள்ள ஆசைப்படுகிறேன்.  பொறுமையாக என் உரைகளை வாசித்த அனைவருக்கும் என் பணிவான நன்றிகள்.

 . நன்றி.