பணம், புகழ், பெயர்... எதுவுமே நிரந்தரம் இல்லை.

1)  எத்தனையோ ஆண்டுகளாக தொழுநோயாளிகளுக்கு சிகிச்சை அளித்து வருகிறேன். எனக்கு எந்த பாதிப்பும் வந்ததில்லை. பணம், புகழ், பெயர் என எதுவுமே நிரந்தரம் இல்லை.  

தொழுநோயாளிகளுக்கு சிகிச்சை அளிப்பதை, தன் வாழ்நாள் சேவையாக செய்து வரும் தோல் நோய் சிகிச்சை மருத்துவர், டாக்டர் ரேணுகா ராமகிருஷ்ணன்.   

அவரின் பேட்டியை இங்கே பார்க்கலாம்.

2)  கொரோனா சம்பந்தமாக சில பாஸிட்டிவ் செய்திகள்...  ஒரு மாத வாடகை வேண்டாம் என்று சொல்லும் வீட்டு உரிமையாளர்கள்,  30 பங்களாக்களை கொரோனா மருத்துவமனைக்காக தானம் செய்த தொழிலதிபர்...  கொரோனா சமூக பரவலைத் தடுக்க ஒரு செயலியை உருவாக்கிய இளைஞர்கள்...  

============================================================================================

மல்லை நீர்நிலைகளும் மக்களின் பங்கும்

ரமா ஸ்ரீநிவாசன் 

“துப்பார்க்குத் துப்பாய துப்பாக்கித் துப்பார்க்குத்

துப்பாய தூஉம் மழை.” - திருவள்ளுவர்.

உண்பவர்க்குத் தக்க உணவுப் பொருட்களை விளைவித்துத் தருவதோடு, பருகுவோர்க்குத் தானும் ஓர் உணவாக இருப்பது மழையாகும் என்பதே இக்குறளின் பொருளாகும்.

மாமல்லபுரம் நம் தமிழ் நாட்டில் மட்டுமல்ல, இந்திய நாட்டிலேயே மிக முக்கியமான காணக் கிடைக்காத சுற்றுலாத்தலமாகும். உலகின் எல்லா மூலை முடுக்குகளிலிருந்தும் சுற்றுலா பயணிகள் இங்கு படை எடுக்கின்றார்கள் என்றால் அது மிகை ஆகாது.

ஆயினும், இச் சுற்றுலா தலத்திற்கும் கண் பட்டது போல், நீர்ப் பற்றாக்குறை மணி ஒலித்து விட்டது. இதை அடுத்து அங்குள்ள மக்கள் நகராட்சி அலுவலகத்திற்கும், அரசு அலுவலகத்திற்கும் நடையாய் நடந்தும் மனு கொடுத்தும் ஒன்றும் நடப்பது போல் புலப்படவில்லை.

அப்பொழுதுதான், அங்குள்ள ஒரு 10-15 மனிதர்கள் சேர்ந்து “மல்லை வாட்டர் பாடீஸ் ப்ரொடெக்க்ஷன் அண்ட் ப்ரிசர்வேஷன் அசோசியேஷன்” என்ற குழுவை அமைத்து, அந்த கடலோர நகரத்தின் 11 ஏக்கர் நீளமுள்ள குடிநீர் நிலையான சோழிப்பொய்கையை புதுப்பிக்க முடிவெடுத்தனர்.

முடிவெடுத்தாகி விட்டது. காசுக்கெங்கே செல்வது ? சென்றார்கள்.

“திக்கற்றவருக்கு தெய்வமே துணை” என்பது பழமொழி. “பணம் வேண்டுபவருக்கு வங்கியே துணை” என்பது புதுமொழி. 

மாமல்லபுரத்தில் உள்ள இந்தியன் வங்கியை அணுகி, அங்குள்ள காசாளரிடம் தாங்கள் வந்ததின் நோக்கத்தை கூறினார்கள். சீதாலஷ்மி என்னும் அந்த காசாளர் அசந்து அதே நேரம் நிமிர்ந்து அமர்ந்தார். “அந்தக் குழுவின் ஆவணங்களை ஆராய்ந்தபோது, முறைப்படி நான் என்னால் முடிந்த உதவியை அக்குழுவுக்குச் செய்ய முடிவெடுத்தேன்” என்று கூறினார். தன்னால் அந்த திட்டத்திற்கு முடிந்த உழைப்பையும் தருவதாகக் கூறி தன் பங்கிற்கு ரூ.10,000/- நன்கொடையாக அளித்து அவ்வேலையை இனிதே ஆரம்பித்து வைத்தார். 

அவர் கூறுவதாவது “இந்த நீர்நிலையிலிருந்து நாங்கள் ஆண்டாண்டு காலமாக நீர் அருந்தி வருகிறோம். இப்போது நான் திரும்பி கொடுக்க வேண்டிய தருணம். 30 வருடங்களாக மாமல்லபுரத்திலேயே அலுவலராக இருந்ததால், இந்நீர்நிலை எப்படி சிறிது சிறிதாக மோசமடைந்தது என்பதை கண்ணால் கண்டவள் நான். இத்திட்டம் நம் வருங்கால சந்ததியினரின் நலனுக்காக ஆரம்பிக்கப் பட்டது. நாம் இதை ஆதரிப்பது மிக முக்கியமானது” என்றும் மறுசீரமைப்பிற்கு பின் பல நேர்மறை திருத்தங்களை கண்ட சீதாலஷ்மி “நீர்நிலை இப்பொழுது மிக சுத்தமாக இருக்கின்றது. இவ்வளவு உழைப்பின் முடிவில் நாங்கள் இந்நீர்நிலையில் நீரை கண்டுள்ளோம். நீர்நிலை ஆரோக்கியமாகவும் இருக்கின்றது” என்றும் கூறுகின்றார்.

சீதாலஷ்மியைப் போல் இன்னும் பல பேர் (மாமல்லபுரத்தைச் சேர்ந்தவர்கள்) முன் வந்து தங்கள் வசதிக்கேற்ப பங்களித்து இத்திட்டத்தின் ஆரம்ப வைப்பு நிதியான ரூ.23 லட்சத்தை சேர்த்திருக்கின்றார்கள் என்பதைக் கூறப் பெருமை படுகின்றேன்.

இம்முயற்சியின் முதல் கல்லை டி.கிருஷ்னராஜூ என்னும் ஹோட்டல் நிறுவனர் வீசினார். அவர்தான் முதல் முதலாக 2018இல் இந்நீர்நிலையின் மறுசீரமைப்பிற்கு ஆதரவு சேர்க்கத் தொடங்கினார். 2019 வருட ஆரம்ப காலத்திலேயே 20 உறுப்பினர் மற்றும் 3 நிர்வாகிகள் கொண்ட இந்த குழு தயாரானது. வி.கிட்டு, செயலாளர் எல்லோரையும் ஒன்றாக இணைக்கும் கருவியானார்.  இந்த சோழிப்பொய்கை 30 வருடங்களுக்கு முன்வரை 15,000 குடியிருப்புகளுக்கும் 60 ஏக்கர் விவசாய மண்ணிற்கும் நீர் வழங்கிக் கொண்டிருந்தது என்று கிருஷ்ணராஜ் கூறினார். 

மேலும் அவர் கூறியது : “மாமல்லபுரத்தில் பெரும்பாண்மையான விவசாய செயல்பாடுகள் 1990லேயே நின்று போயின. என் தந்தையும் ஒரு விவசாயிதான். நான் இந்நீர்நிலை என் கண் முன்னே சுருங்குவதைப் பார்த்தேன். 30 வருடங்களுக்கு மேல் இந்நீர்நிலையானது சுத்தம் செய்யப் படவும் இல்லை. அதிலிருந்து யாரும் நீரும் இரைக்கவில்லை”.

“அந்நீர்நிலை மெல்ல மெல்ல புதர்களும் கள்ளிச் செடிகளும் மண்டிய சதுப்பு நிலமாக மாறியது” என்று மாமல்லா பீச் ரிசார்ட்டின் உரிமையாளர் கூறினார்.

நேரத்திற்கேற்ற தலையீடு :

இத்திட்டமானது சென்னை மாநகரமே நீர்ப் பற்றாக்குறையால் அல்லாடிக் கொண்டிருக்கும்போது வந்ததுதான் இதன் சிறப்பு. பருவ மழையின்போது உபரியாக விழும் நீரானது சோழிப்பொய்கையுள் விழும்.

மாவட்டக் கலெக்டரின் அனுமதியை வாங்கிய பின்னர்தான், கடினமான
வேலையான காசு புரட்டுவது தொடங்கியது. “நாங்கள் பல தனியார் நிறுவனங்களை அணுகினோம். ஆயின் பயன் இல்லை. நாங்கள் யாவரும் (மாமல்லபுரம் குடிவாசிகள்) எங்கள் சுய சம்பாத்தியத்திலிருந்து கொடையளித்து ரூ.23 லட்சம் சேர்த்தோம். உடனே ஜூலை 2019லேயே வேலையையும் தொடங்கினோம்” என்று கூறுகிறார் கிருஷ்ணராஜ்.

சதுப்பு நிலங்களை சுத்தம் செய்வதிலிருந்து அவர்கள் வேலையைத்
துவங்கினார்கள். இயந்திரங்களை வாடகைக்கு எடுத்து, நீர்நிலையை தூர்வாரி, எட்டு அடிக்கு ஆழமாக்கினார்கள்.  ஜூலை முதல் நவம்பர் வரை கரைகளை வலுவாக்கி, 200க்கும் மேற்பட்ட நாவல் பழம், அத்தி, புளி மற்றும் வேப்ப மரங்களை நட்டார்கள்.

மறுசீரமைப்பின் நெடும்பார்வை இதோ :

1. உள் வரவு பாதைகள், வெளி செல்லும் பாதைகள் அமைத்தல்,
2. கால் சுவர் கட்டி கரையறித்தலை தடுத்தல்,
3. ஒரு சமமாக்கப் பட்ட நடைபாதை அமைத்தல்,
4. நடு நடுவே சிறிய செயற்கை தீவுகள் அமைத்தல்,
5. மீன்களை நீர்நிலையில் விட்டு நிரந்தர சுத்தத்தை பாதுகாத்தல்
போன்றவையாகும்.

“நாங்கள் ஒரு இயற்கையான சுற்று சூழலை அமைக்க பாடுபடுகின்றோம். இப்பொழுதே பல மாறுதல்கள் கண்களுக்கு தென்படுகின்றன. காணாமற் போன பறவைகள் திரும்பி வர தொடங்கி விட்டன.” என்கிறார் கிருஷ்ணராஜ்.

நிதி வேண்டுகோள் : இத்திட்டம் இனிதாக நிறைவேற, இன்னும் ரூ.2.70 கோடி தேவைப் படுகின்றது. முதல் கட்டப் பணிகள் முடிந்து விட்ட நிலையில், முழு திட்டமும் நிறைவு பெற்று இதுவும் ஒரு மாமல்லபுரத்து சுற்றுலா ஈர்ப்பாக மாற அரசாங்கம் மற்றும் மக்கள் அரவணைப்பு மிக மிக அவசியம்.

முதலில் நன்கொடை அளித்தவர்கள் இந்நீர் குடிநீர் என்றறியாமல் 
முகம் சுளித்தார்கள். ஆனால், இது குடிநீர் என்று அறிந்த பின்னர் அத்தியாவசியத்தை புரிந்து கொண்டுள்ளனர்.

சோழிபொய்கையைத் தவிர,  இங்கு மேலும் 8 அல்லது 9 நீர்நிலைகள் மறுசீரமைப்பு வேண்டி காத்துக் கிடக்கின்றன. இதே போல், வேலை நடந்ததென்றால், மாமல்லபுரம் நீர்வளத்தில் தன்னிறைவு பெற்ற நகரமாகத் திகழும் என்பதில் ஐயமில்லை.

' நீரின்றி அமையாது உலகு ' என்னும் உண்மையை நினைவில் கொண்டு நம் அரசு அதற்கு வேண்டிய ஆவணங்களை பிறப்பித்து ஆவன செய்தால் யாவருக்கும் ஒரு ஏறுமுனையாக இருக்கும் என்று நம்புகிறேன்.