வெள்ளி வீடியோ : நிலை மயங்கி மயங்கி காலமெல்லாம் கானம் பாடுவோம்

சென்ற வாரம் விட்டுப்போன (கொஞ்சம் தாமதமாக எங்களுக்கு அனுப்பப்பட்ட) 'ஹாப்பி பர்த்டே எங்கள் ப்ளாக்' வீடியோ முதலில் ...

   (திரு துளசிதரன் அவர்கள் )

இந்த வார, இன்றைய பிறந்தநாள் வாழ்த்து வீடியோ அடுத்தது! 

  

============== X  ==============

சென்ற வாரத்தின் தொடர்ச்சியாக இந்த வாரமும் தேன் நிலவு பாடல்கள்.

சுசீலாம்மாவுடன் ஏ எம் ராஜா பாடி இருக்கும் பாடல்.  மிகவும் உற்சாகமாக ஆரம்பிக்கும் இசையுடன் பாடல் துவங்குகிறது.  அதிலேயே இளமையின் துள்ளல் இருப்பது போல தோன்றும்.  கொஞ்சும் குரலில் ஏ எம் ராஜாவும், இனிய குரலில் சுசீலாம்மாவும்...

ஜெமினிக்கு மிகவும் பொருத்தமான குரலாக அறியப்பட்டவர் ஏ எம் ராஜா.  பின்னர் பி பி ஸ்ரீனிவாஸ் குரலும் ஜெமினிக்குப் பொருந்தியது.

இன்று பகிர்ந்திருக்கும் இரண்டு பாடல்களுமே என் மாமா ஒருவருக்கு மிகவும் பிடித்த பாடல்கள்.  அவர் அடிக்கடி பாடிக்கொண்டே இருக்கும் பாடல்கள்.  

சின்னச்சின்ன கண்ணிலே வண்ண வண்ண ஓவியம் 

அங்குமிங்கும் யார் வரவைத் தேடுது - துணை 

இங்கிருக்க யாரை எண்ணிப் பாடுது?

அல்லித்தண்டு போலவே  

துள்ளி ஆடும் மேனியை 

வெள்ளி நிலா 

அள்ளிக்கொண்டதோ...அதில் 

புள்ளி மயில் பள்ளிக்கொண்டதோ

புள்ளி போடும் தோகையை  

வெள்ளி வண்ண பாவையை 

அள்ளிக்கொண்டு போகலாகுமோ..நீயும் 

கள்வனாக மாறலாகுமா

பின்னி வைத்த கூந்தலில்  

முல்லை பூவை சூடினால் 

கன்னி நடை பின்னல் போடுமா....சிறு 

மின்னலிடை பூவை தாங்குமா

கன்னி உந்தன் கையிலே 

அன்னம் போல சாய்ந்து கொள்ளுவேன்....அதில் 

அந்தி பகல் பள்ளிக்கொள்ளுவேன்

ஸ்ரீதர் தான் படமெடுக்கும்போது ஏ எம் ராஜாவுக்கு வாய்ப்பளிப்பதாய் சொல்லி இருந்தார்.  கல்யாணப் பரிசு படத்தில் அந்த வாக்கை நிறைவேற்றவும் செய்தார்.  பின்னர் விடிவெள்ளியில் இணைந்து பணியாற்றினாலும், இந்தப் படத்தில் இருவருக்குள்ளும் பிளவு/பிரிவு ஏற்பட்டது.  பின்னணி இசை சேர்க்காமல் கொஞ்சகாலம் முரண்டு பிடித்தாராம் ராஜா.   அப்புறம் ஒரு சிறு பிரிவுக்குப் பின் நெஞ்சில் ஓர் ஆலயம் படத்தில் இசை அமைக்க மீண்டும் ராஜாவை ஸ்ரீதர் அழைத்தும் அவர் வர மறுத்து விட்டாராம்.  மெல்லிசை மன்னர்கள் அந்தப் அப்படத்துக்கு இசை அமைத்தார்கள்.

மிகவும் திறமை பெற்றிருந்த ஏ எம் ராஜா தனது குண நலன்களால் அதிகப் படங்களுக்கு இசை அமைக்க முடியாமல் போனது ரசிகர்களுக்கு நிச்சயம் இழப்புதான்.

படகு துழா/ளாவும் ஓசையுடன் இசை ஆரம்பிக்கிறது.  பாடல் முழுவதும் அது தொடர்கிறது.  முடியும்போதும்...!  

படகில் போய்க்கொண்டே பாடும் பாடல்கள்தான் எத்தனை பார்த்திருக்கிறோம்?  கிட்டத்தட்ட அத்தனையுமே ஹிட் பாடல்கள்.  

இந்தப் பாடலில் சுசீலாம்மாவின் குரல் சிறு பிள்ளையின் குரல் போல கொஞ்சுகிறது.   பல்லவி, சரண முடிவுகளில் ஒரு இணைக்கும் இசை!

நிலவும் மலரும் பாடுது 

என் நினைவில் தென்றல் வீசுது 

கண் மயங்கி மயங்கி காதலினால் ஜாடை பேசுது

சிரித்து சிரித்து உறவு வந்தால் நிலைத்து வாழுமா 

தந்தை பிரித்து பிரித்து வைப்பதனால் காதல் மாறுமா 

மனதினிலே பிரிவுமில்லை மாற்றுவாரில்லை 

நிலை மயங்கி மயங்கி காலமெல்லாம் கானம் பாடுவோம்

முகத்தை முகத்தை மறைத்துக்கொண்டால் பார்க்க முடியுமா 

கணை தொடுத்து தொடுத்து மிரட்டும் கண்ணால் பார்க்கலாகுமா மலர்முடிப்போம் மணம் பெறுவோம் மாலை சூடுவோம்

  நிலை மயங்கி மயங்கி காலமெல்லாம் கானம் பாடுவோம்