பழையவரே புதியவராய்....

விக்கிரமாதித்தக் கேள்வி!

நெருங்கியவர்களிடையே அல்லது நட்புகளிடையே உங்கள் அதிருப்தியை எப்படி காட்டுவீர்கள்?  எதிர்பாராமல் காலை வாரினார் என் ஆஸ்தான ஆட்டோக்காரர்!

உறவுகளிடையேயோ, நட்புகளிடையேயோ கருத்து வேறுபாடுகள் சகஜம்.  ஆனால் அவற்றை ஒன்று சகித்துக்கொள்ள வேண்டும்,  இல்லை மென்மையாகச் சொல்ல வேண்டும்.  அதே போல அவற்றை எதிர்கொள்பவர்களும் எதிராளியின் நிலையைப் புரிந்து கொள்ளவேண்டும்.  அவர் முற்றிலும் நம்மை வெறுப்பவரா?  நம் மீது எப்போதும் கோபமாகவே உள்ளவரா?  இதை எல்லாம் யோசித்தே அப்போதைய அவரின் வெளிப்பாடுகளை எதிர்கொள்ளவேண்டும்.  இது என் வ(ப)ழக்கம்.

குணம் நாடி குற்றமும் நாடி...

நெருங்கிய உறவுகளுக்குள்ளே கூட எனக்கு கருத்து வேறுபாடு ஏற்பட்டு சரி செய்து கொண்டிருக்கிறேன்.  அவர்களின் இது மாதிரியான தற்காலிக வெளிப்பாடுகளை விட, பொதுவான நிலையைத்தான் கருத்தில் கொள்வேன்.

என் ஆட்டோக்காரர் என்ன செய்தாரென்றால், 

இந்த லாக்டவுன் காலத்தில் செலவானாலும், பதட்டம் இன்றியும், பாதுகாப்பாகவும் அலுவலகம் சென்றுவர அவரை ஏற்பாடு செய்து கொண்டிருந்தேன்.  எவ்வளவு கொடுக்க வேண்டும் என்றும் அவரையே கேட்டு அதைக் கொடுத்து வந்தேன்.

இடையில் அவர் பேத்திக்கு திருமணம் வர, அவர் ஒரு பெரும் தொகை என்னிடம் கடன் எதிர்பார்த்திருந்தார் போல.  மறைமுகமாக சொல்லவும் செய்தார்.  ஏற்கெனவே  அவருக்கு நான் அவ்வப்போது உதவியது  வளர்ந்து ஓரளவு பெரிய தொகை ஒன்று , அவரால் அது தரப்படாமல் இருந்ததைச் சுட்டிக் காட்டினேன்.  மௌனமானார்.  காலை அலுவலகம் சென்று விட்டோம்.  

  

போச்!

பழையவரும் 

வீடு திரும்ப வேண்டும்.  திடீரென அவர் வரவில்லை.  போனை எடுப்பதையும் தவிர்த்து விட்டார்.  அவர் போனில்  கோளாறு என்று நான் மறுபடி மறுபடி முயற்சிக்க, (அப்படி முன்னர் நடந்திருக்கிறது)  அப்புறம் பணிக்குச் செல்லவேண்டிய நேரம் நெருங்கி,  வேறொரு தெரிந்த ஆட்டோக்காரரை அவசரம் அவசரமாக வரவழைத்து அதில் சென்றேன்.

புதியவரும்!

பின்னர் தெரிந்தது,  இவர்களிடம் அவர் நான் பணம் குறைவாய்த் தருவதாய்ச் சொல்லி இருக்கிறார் என்று.  இவர்களுக்கும் அவர் என்னிடம் கடன் பட்டிருப்பது தெரியும், அவரை நான் எப்படி நடத்துவேன் என்பதும் தெரியும் என்பதால் அவர்கள் இவருக்கு அறிவுரை கூறியதோடு, இவ்வளவு பழகி விட்டு இந்த மாதிரி நெருக்கடியான சமயங்களில் திடீரென காலை வாருவது சரியில்லை என்று எடுத்துச் சொல்லி இருக்கிறார்கள்.

ஒரு கதவு மூடினால் இன்னொரு கதவு திறக்குமே...   அன்று பார்த்து ஊபர், வோலா சேவைகள் திறந்துவிடப்பட, என் கஷ்டம் தீர்ந்ததோடு, செலவும் கம்மியாகவே ஆனது.

மறுபடி முதல்வர் கம்ப்ளீட் லாக்டவுன் என்றார்.  இந்த வாடகைக் கார்கள் வராது.  என்ன செய்ய?  

எங்கள் ஏரியாவிலிருந்து மூன்று பேர்கள், உறவு வட்டத்தின் ஏரியாவிலிருந்து ஒருவர், பழைய நட்பு வட்ட ஆட்டோக்காரர்களில் இருவர் என்று தெரிவு செய்தேன்.  கைவசம் ஆப்ஷன் நிறைய இருந்தது!

இப்போது நான் சென்றுவர என் ஐ டி யும்,  அலுவலகத்தில் கொடுத்த சான்றிதழும் கையில் வைத்திருக்க வேண்டும்.  ஆனால் அது ஆஸ்தானத்திடம் இருந்தது.  பிரிந்த கடைசி நாளில் அவர் ஆட்டோவில் விட்டிருந்தேன்.  ஓரிருமுறை நண்பர்கள் வாயிலாகக் கேட்டும் இதோ அதோ என்றிருந்தார்.

கிட்டத்தட்ட 15 நாட்கள் கடந்துவிட்டிருந்த நிலையில் அவருக்கே போன் செய்தேன்.  இந்த முறை எடுத்தார்.  என் சான்றிதழ்களை உடனே தரச் சொல்லிக் கேட்டேன்.  மெதுவாய்ப் பேசினார்.  அவ்வளவு நாட்கள் பழகியவர் புதிதாய் பேசுபவர் போல தயங்கித் தயங்கிப் பேசினார்.

சான்றிதழை தருவதாக முதலில் சொன்னவர், இரண்டாவது வரியிலேயே தானே வருவதாகச் சொன்னார்.  'நீங்களா?  மறுபடி காலை வாரினால் என்ன செய்ய...  சான்றிதழை கொடுங்கள்.  நான் இரண்டு மூன்று ஆட்டோக்காரர்கள் ஏற்பாடு செய்திருக்கிறேன்' என்று சொன்னேன்.  'இல்லை, மறுபடி அப்படி நடக்காது' என்று சொன்னார்.  தானே வருவதாகச் சொன்னார்.

கொஞ்சம் யோசனைகளுக்குப் பின் கூட்டிக்கழித்துப் பார்த்து ஒப்புக்கொண்டேன்.  தெரியாத தேவதையை விட தெரிந்த டெவில் மேல்!  கொடுத்த பணத்தை முள்ளின் மீது விழுந்த சேலையாய் திருப்பி எடுக்க வேண்டும்!  போக்குவரத்துக் காவலர்களை சமாளிக்க புதிய ஓட்டுநர்களைவிட பழைய ஓட்டுநர் சிலாக்கியம்.  என் மற்ற பயணத் தேவைகளுக்கும் இவர் சரிப்பட்டு வருவார்.  குடும்பத்தில் ஒருவர் போல பழகியவராச்சே!

மறுபடி வந்து சவாரி செல்கையில் கடந்த அந்தப் பதினைந்து நாட்களில் அவர் சவாரி எதுவும் கிடைக்காமல் அன்றாடச் செலவுகளுக்குக் கஷ்டப்பட்டதையும் ஒளிக்காமல் என்னிடம் சொன்னார்.  

நான் ஏற்கெனவே சொன்னதுபோல அவரின் கடன் கிடைக்காத ஆத்திரத்தை புரிந்து கொண்டு, அவரின் இந்த அதீத நடவடிக்கையை மறந்து, மறுபடி அழைத்துக் கொண்டேன்.  சுயநலமும் கலந்துதான் இருக்கிறது என்பது மேற்சொன்ன குறிப்புகளிலும் புரிந்திருக்கும்...

என்ன நான் சொல்வது...

================================================================================================

இந்த லாக்டவுன் காலத்தில் சாயங்கால வேளைகளில் நாலு முழ நாக்கு ஓவர்டைம் பார்க்கிறது!  என் மகன்களும் அதில் ஆர்வமாய் இருப்பதால் பாஸ்-இளையவன் கூட்டுத் தயாரிப்பில் உருவான சில மாலை நேர நொறுக்ஸ்!  இன்னும் சில உண்டு..  கார போளி,  ப்ரெட் சில்லி ப்ரை, ப்ரெட் உப்புமா, சப்பாத்தி, பனீர் பட்டர் மசாலா...!!

==================================================================================================

சுஜாதாவின் வார்த்தைகளிலிருந்து நான் 'அபுரி' யைத் திருடி இருப்பது உங்களுக்கெல்லாம் தெரியும்.  கடந்த வெள்ளிக்கிழமை பதிவில் ஜீவி ஸார் கூடக் கேட்டிருந்தார்.  அது வந்த சுஜாதாவின் கதையின் பக்கங்களைக் கொடுத்திருக்கிறேன்.  எனக்கு மட்டுமல்லாமல் எங்கள் வீட்டுப் பூச்சிகளுக்குக் கூட சுஜாதாவின் விஞ்ஞானக் கதைகள் (கம்பியூட்டரே ஒரு கதை சொல்லு) பிடித்து விட்டது போல.  ரொம்ப "உள்வாங்கி" படித்திருக்கின்றன!  

அந்தப் புத்தகத்தின் சுஜாதா முன்னுரை 

ஒரு கதையில் அபுரி வரும் இடம்!  முக்கியக்குறிப்பு : வலது பக்கத்தை முதலிலும், இடது பக்கத்தை அடுத்தும் படிக்க வேண்டும்!

இதிலேயே பிற்காலத்தைய சிதிலடமடைந்த தமிழாய் சுஜாதா உருவகப் படுத்தி இருப்பது..!  அது சரி...   இந்தக் கதையைப் படித்த ஞாபகம் இருக்கிறதா?

=====================================================================================================

பேஸ்புக் பக்கம்...  அதற்கு வந்த கமெண்ட்ஸுடன்!

இந்த வாரம் கொஞ்சம் சுருக்கமாக முடித்திருப்பதாய் நினைத்துக் கொள்கிறேன்!