யூ டியூபிலோ அல்லது இணையத்திலோ செய்முறைகளைப் படிக்கும் பார்க்கும் வழக்கம் உண்டா?

 

நெல்லைத்தமிழன் : 

1.  ஒரு பாம்பு தவளையைப் பிடிக்கப் போகிறது. நீங்கள் தவளையைக் காப்பாற்றுவீர்களா இல்லை அதனதன் வாழ்க்கை அதனதுக்கு என்று சென்றுவிடுவீர்களா?   (இந்தக் கேள்விக்கு பதில் கிடைத்த பிறகுதான் அடுத்த கேள்வியை பகிரணும்)   

*பாம்பு நவளையைப் பிடிக்கும் முன் தவளை தப்பிவிட வாய்ப்பிருக்கிறதே..  பிடிக்கட்டும்....  அப்புறம் பார்க்கலாம்.

$ கடைசியாக பாம்பையும் தவளையையும் ஒரு சேரப்பார்த்து வெகுநாட்களாயிற்று நகர வாழ்க்கையில் நடக்கின்ற விஷயமாகத் தெரியவில்லை.

# முன்பு தவளையைக் காக்க பாம்பைக் கொல்லப் போயிருப்பேன்.

& " ஒரு பாம்பு தவளையைப் பிடிக்கப் போகிறது." - பழைய தமிழ்ப்படங்கள் வரிசையில்  'ஒரு  ஊதாப்பூ  கண் சிமிட்டுகிறது', 'ஒரு புல்லாங்குழல் அடுப்பு ஊதுகிறது' போல - இந்தத் தலைப்பு நன்றாக இருக்கிறதே! 

2. ஒரு குழந்தை நடக்கிறது, பெரிய பள்ளம் முன்னால் இருக்கிறது. நீங்கள் உடனே போய் குழந்தையைத் தூக்குவீர்களா இல்லை அதனதன் விதி அதனதனுக்கு என்று சென்றுவிடுவீர்களா?  

*பாம்புக்கு சர்வைவல் பிரச்னை.  பள்ளத்துக்கு அந்தப் பிரச்னை இல்லை!! குழந்தையின் வாழ்க்கைப் பிரச்னை.

$ குழந்தையைக் காப்பாற்ற முயல்வேன்.

# குழந்தையைத் தூக்குவேன். இதில் முரண் எதுவும் இல்லை.

3. இரண்டு நண்பர்கள் அத்துவான இடத்தில் நடந்துகொண்டிருக்கிறீர்கள். வெறிநாய் துரத்த ஆரம்பித்தால், நண்பனையும் காப்பாற்ற முயல்வீர்களா இல்லை வேகவேகமாக ஓடித் தப்பிக்கப் பார்ப்பீர்களா?

*புலி துரத்தியபோது ஷூக்களை சரிசெய்து கொண்டவனிடம் நண்பன் கேட்டானாம் "புலியைவிட வேகமாக ஓடுவியா?". நண்பன் சொன்னானாம் " தேவையில்லை, உன்னைவிட வேகமாக ஓடினால் போதும்"

$ நீங்கள் ஒரே திகில் காட்சிகளாக விவரிக்கிறீர்களே இரவில் நன்றாகத் தூங்குகிறீர்களோ?

# தப்பிக்கத்தான் பார்ப்பேன். 

4. உங்களுக்கு மிகவும் பிடித்த பழம் என்றால் எதனைச் சொல்வீர்கள்?  

*வாழைப்பழம்.

$ வாழை.

# அன்றாடம் பயன்படும் மிளகாப்பழம் புளியம்பழம்.

& சிவப்பழம். 

5.  யூ டியூபிலோ அல்லது இணையத்திலோ செய்முறைகளைப் படிக்கும் பார்க்கும் வழக்கம் உண்டா? நீங்கள் செய்ய முயற்சிப்பீர்களா?

*இல்லை.  வழக்கமில்லை.

$ பார்த்து செய்வோரிடமே சொல்வதுண்டு.

# பார்ப்பது மட்டுமே உண்டு.

& இணையத்தில் படித்து, செய்துள்ளேன். 

6. காமராஜரால், இந்திய அரசியலுக்கு நேர்ந்த விபத்து என்று எதைச் சொல்வீர்கள்?

# நீங்கள் எதைச் சொல்கிறீர்கள் என்று புரிகிறது என்கிறேன்.

$ படிக்காதவர்கள் அரசியலுக்குத்தான் லாயக்கு என்னும் மனப்பான்மை.

& அப்படி எதுவும் அவரால் அரசியலில் விபத்து ஏற்படவில்லை என்று நினைக்கிறேன். 

கீதா சாம்பசிவம் : 

1.இந்தக் காலக் குழந்தைகள்/குறிப்பாய்க் கடந்த பத்து வருடங்களுக்குள்ளாகப் பிறந்த குழந்தைகள் செல்ஃபோன்/ஐ பாட் போன்றவற்றில் கார்ட்டூன்கள் பார்ப்பதில் நேரத்தைச் செலவு செய்வது சரியா? சொல்லப் போனால் தாய்மாரே குழந்தையின் கையில் செல்ஃபோனைக் கொடுப்பதும், அந்தக் குழந்தை அதுவாகவே விரும்பிய கார்ட்டூன் சானலைப் போட்டுப் பார்ப்பதையும் கண்டு வருகிறேன். இது சரியா? கண்கள் பாதிப்படையாதா?

*தவறு.  கண்கள் கெடுவதைவிட மனம் கெடும் வாய்ப்பு அதிகம்!

$ கண்கள் பாதிப்படைகிறதா என்பதையும் நீங்களே கண்டிருப்பீர்கள்தானே? உங்கள் அனுபவம் என்ன சொல்கிறது?

# சரியில்லை என நாம் சொல்லி யார் கேட்கப் போகிறார்கள் ?

2. இன்றைய குழந்தைகளுக்கு இந்த விஷயங்களில் ஆர்வமும், கையாளுவதில் இலகுவான தன்மையும் இருப்பதைப் போல் பாட விஷயங்களிலும் அவர்களுக்கு இது உதவுகிறதா?

*கொஞ்சம் உதவலாம்.  கொரானா காலத்தில் வேறு வழியுமில்லை.

$ நாம் படித்த 60 வருட காலத்து முந்திய பாடங்களையும் தற்கால பாடங்களையும் முறையையும் ஒப்பிடுவது சரியன்று.

# இந்தத் தலைமுறை குழந்தைகள் மிக புத்திசாலிகள். திறமைசாலிகள். 

3. குழந்தைக்கெனத் தனியாக ஐபாட், செல்ஃபோன் ஆகியவை வாங்கிக் கொடுப்பது சரியா?

*எனக்கு சம்மதமில்லை.  தவறு என்பதே என் கருத்து.

$ ஏன் கூடாது? 

# குறிப்பிட்ட வயது தாண்டியபின் சரியோ இல்லையோ தவிர்க்க இயலாதது.

4.வெளியில் போய் விளையாடும் சந்தர்ப்பங்கள்/இப்போதைய வாழ்க்கை முறையில் முற்றிலும் தொலைந்து போய்விட்டன/போய்க்கொண்டிருக்கின்றன. இது ஆரோக்கியமான சூழ்நிலையா?

*இல்லை.  ஆனால் வேறு வழியும் இல்லை.  

$ அடுத்த பதிலைப் பார்க்கவும்.  

# இல்லை . கொரோனா விளைவுகளில் இதுவும் ஒன்று.

5.அடுக்குமாடிக் குடியிருப்புக் குழந்தைகள் பொதுவான ஓர் இடத்தில் விளையாடிக் களிக்கவென அந்தக் குடியிருப்பில் ஏற்பாடுகள் செய்யலாம். ஆனால் பெரும்பாலானோர் இதை ஓர் இடைஞ்சலாகவே கருதுகிறார்கள். குழந்தைகள் விளையாடுவதை எதிர்ப்பவர்களே அதிகம். இது குழந்தையின் மன/உடல் வளர்ச்சியைப் பாதிக்காதா?

*பாதிக்கலாம்.  நாம்  பழைய காலங்களோடு ஒப்பிட்டுப் பார்த்து முடிவு செய்கிறோம்.  காலங்கள் மாறுகின்றன.  நடைமுறைகள் மாறலாம். மாற்று வழிகள் உண்டாகலாம்.  அதுவும் பழகிப் போகலாம். 

$ வாரம் ஒன்றிரண்டு நாட்கள் (கரோனாவுக்குப் பின் வரும் காலத்தில்) வெளியே போய் விளையாடலாம், ஆரோக்கியத்தை திரும்ப அடையலாம். 

 # பெரியவர்களின் மனவளர்ச்சி குன்றியதன் விளைவு ?

= = = =