வெள்ளி வீடியோ : வாழ்வில் நல்லவர் என்றும் கெடுவதில்லை- இது நான்குமறை தீர்ப்பு,.

 இரண்டு நாட்களுக்கு முன்னால் இந்தப் பதிவை எழுதி வைத்திருந்தேன். 

எனக்கு அப்போது தெரியாது, மார்ச் 24  TMS  அவர்களை பிறந்த நாள் என்று.  அதில் ஒரு விசேஷம் என்ன தெரியுமா?  நேற்று டி எம் எஸ் அவர்களின் நூற்றாண்டு விழா.  மார்ச் 24, 1922 ஆம் ஆண்டு பிறந்த TMS ஸுக்கு நேற்று நூறு வயது.

இனி பாடல்களுக்கு செல்வோம்.

சினிமா பாடல்கள் ஒருபுறம் இருக்க, சில தனிப்பாடல்களையும் அவ்வப்போது பகிர எண்ணம்.

அதில் இன்று எனக்கு மிகவும் பிடித்த 'கற்பகவல்லி நின் பொற்பதங்கள் பிடித்தேன்' எனும் ராகமாலிகைப் பாடல்.

எனக்கு மட்டுமா பிடிக்கும்?  அனைவருக்கும் பிடித்த பாடல்.

எத்தனை வருடங்களாகக் கேட்டு வரும் பாடல்...  டி எம் எஸ்ஸின் எவர்க்ரீன் பக்திப்பாடல்.  இந்தப் பாடலைப் பிடிக்காதவர்களோ, அதைவிட இந்தப் பாடலைப் பாடிப் பார்க்காதவர்களோ எவருமே இருக்க மாட்டார்கள்!

இந்தப் பாடலை இயற்றியவர் யார் தெரியுமோ?   எனக்கு இன்றுதான் தெரியும்.  யாழ்ப்பாணம் வீரமணி அய்யர் இயற்றிய பாடல் இது.  ஆனந்த பைரவி, கல்யாணி, பாகேஸ்ரீ, ரஞ்சனி ஆகிய ராகங்களில் ஒவ்வொரு சரணமும் இசைக்கப்பெற்றிருக்கும் இந்தப் பாடலுக்கு இசையமைத்தவர் யார் என்று எங்கும் சொல்லவில்லை.  ஒருவேளை டி எம் எஸ் தானே இசையமைத்துப் பாடினாரோ என்னவோ...  மேலும் இதில் இசையமைக்க என்று ஒன்றும் இல்லை.  அவரே அந்தந்த ராகங்களில் இயற்றியிருப்பார்.  அதை அதே ராகத்தில் பாடினால் போதும்!

 

கற்பக வல்லி நின் பொற்பதங்கள் பிடித்தேன்

நற்கதி அருள்வாய் அம்மா!(கற்பக வல்லி)

பற்பலரும் போற்றும் பதி மயிலாபுரியில்

சிற்பம் நிறைந்த உயர் சிங்காரக் கோயில் கொண்ட

(கற்பக வல்லி)

நீ இந்த வேளைதன்னில் சேயன் எனை மறந்தால்

நான் இந்த நாநிலத்தில் நாடுதல் யாரிடமோ

ஏன் இந்த மௌனம் அம்மா ஏழை எனக்கருள

ஆனந்த பைரவியே ஆதரித்தாளும் அம்மா!

(கற்பக வல்லி)

எல்லோர்க்கும் இன்பங்கள் எழிலாய் இரங்கி என்றும்

நல்லாசி வைத்திடும் நாயகியே நித்ய

கல்யாணியே கபாலி காதல் புரியும் அந்த

உல்லாசியே உமாஉனை நம்பினேன் அம்மா!

(கற்பக வல்லி)

நாகேஸ்வரி நீயே நம்பிடும் எனைக் காப்பாய்

வாகீஸ்வரி மாயே வாராய் இது தருணம்

பாகேஸ்ரீ தாயே பார்வதியே இந்த

லோகேஸ்வரி நீயே உலகினில் துணையம்மா!

(கற்பக வல்லி)

அஞ்சன மை இடும் அம்பிகை எம்பிரான்

கொஞ்சிக் குலாவிடும் வஞ்சியே உன்னிடம் – அருள்

தஞ்சம் என அடைந்தேன் தாயே உன் சேய் நான்

ரஞ்சனியே ரட்சிப்பாய் கெஞ்சுகிறேன் அம்மா!

அடுத்து TMS பாடிய ஒரு திரைப்பாடலுக்கு வருகிறேன்.​

1963ல் வெளிவந்த  திரைப்படம் தர்மம் தலைகாக்கும்.  கண்ணதாசனுக்கும் எம் ஜி ஆருக்கும் பனிப்போர் நிகழும் முன்னர் வந்த படம் போலும்.  எல்லாப் பாடல்களையும் கண்ணதாசன்தான் எழுதி இருக்கிறார்.

சில வருடங்களுக்கு முன்னர் எனது அலுவலகத்தில் எனக்கும் சிலருக்கும் ஒரு பனிப்போர் நடந்தது.  சில காரணங்களால் நான் டார்கெட் செய்யப்பட்டேன்.  மிகவும் மன உளைச்சல் அடைந்தேன்.  அப்போது இந்தப் பாடல், குறிப்பாக 'மலைபோலே வரும் சோதனை யாவும்' வரிகள் எனக்கு தைரியத்தையும் ஆறுதலையும் கொடுத்தன.  இந்த வரிகள் மனதில் வந்தததும் எனக்குள் ஒரு தைரியம் வரும்.  பிரச்னையை பொறுமையாகவும் துணிச்சலாகவும் எதிர்கொண்டேன்.  சில நாட்களில் அடுத்த வரியும் நிகழ்ந்தது.  எனவே எனக்கு மறக்க முடியாத பாடல் இது.

தேவர் தயாரிப்பில் எம் ஏ திருமுகம் இயக்கத்தில் எம் ஜி ஆர், சரோஜாதேவி, அசோகன் நடித்த படத்துக்கு இசை கே வி மகாதேவன்.

இந்தப் படத்தில் எனக்குப் பிடித்த ஒரே பாடலும் இதுதான்!

தர்மம் தலை காக்கும்

தக்க சமயத்தில் உயிர் காக்கும்

கூட இருந்தே குழி பறித்தாலும்

கூட இருந்தே குழி பறித்தாலும்

கொடுத்தது காத்து நிக்கும்...

செய்த தர்மம் தலை காக்கும்

தக்க சமயத்தில் உயிர் காக்கும்

மலை போலே வரும் சோதனை யாவும்

பனி போல் நீங்கி விடும்

மலை போலே வரும் சோதனை யாவும்

பனி போல் நீங்கி விடும்

நம்மை வாழவிடாதவர் வந்து நம் வாசலில்

வணங்கிட வைத்து விடும்

நம்மை வாழவிடாதவர் வந்து நம் வாசலில்

வணங்கிட வைத்து விடும்

செய்த தர்மம் தலை காக்கும்

தக்க சமயத்தில் உயிர் காக்கும்

அள்ளிக்கொடுத்து வாழ்பவன் நெஞ்சம்

ஆனந்த பூந்தோப்பு..

அள்ளிக்கொடுத்து வாழ்பவன் நெஞ்சம்

ஆனந்த பூந்தோப்பு வாழ்வில்

நல்லவர் என்றும் கெடுவதில்லை-

இது நான்குமறை தீர்ப்பு,..

வாழ்வில் நல்லவர் என்றும் கெடுவதில்லை-

இது நான்குமறை தீர்ப்பு