மொய்ப்பணம் யாருக்கு? & நான் படிச்ச கதை

 சென்னை,:ஆட்டோ ஓட்டுனரின் நேர்மையை பாராட்டி, போலீஸ் கமிஷனர் சங்கர் ஜிவால் வெகுமதி வழங்கினார்.

சென்னை காவல்துறையில் சிறப்பாக பணியாற்றும் போலீசாருக்கு, ஒவ்வொரு மாதமும் நட்சத்திர காவலர் விருதுடன், 5,000 ரூபாய் பண வெகுமதி வழங்கப்படும். சமூக வலைதள நிறுவனங்களின் தகவல்களை சேகரித்து போலியான ஆவணங்கள் வாயிலாக 2.2 கோடி ரூபாய் வீட்டு கடன் பெற்று மோசடி செய்த மதுரையை சேர்ந்த கமலக்கண்ணன் என்பவரை, மத்திய குற்றப்பிரிவு எஸ்.ஐ., தியாகராஜன் கைது செய்தார்.

இந்த செயலை பாராட்டி, அவருக்கு நட்சத்திர காவலர் விருதை போலீஸ் கமிஷனர் சங்கர் ஜிவால் நேற்று வழங்கினார்.கொளத்துார், பூம்புகார் நகர் நான்காவது தெருவைச் சேர்ந்த ஆட்டோ ஓட்டுனர் நசீர், 44. கடந்த 10ம் தேதி இரவு 9:30 மணியளவில், ஆட்டோவில் புழல் - கதிர்வேடு பைபாஸ் மேம்பாலத்தின் கீழ் சென்று கொண்டிருந்தார்.அப்போது ஆட்டோவிற்கு முன்னால் சென்ற இருசக்கர வாகனத்தில் இருந்து, சாலையில் தவறி விழுந்த பையை, புழல் காவல் நிலையத்தில் ஒப்படைத்தார். அந்த பையில், 6,133 ரூபாய் இருந்தது.

பையை தவற விட்ட நபர் குறித்து போலீசார் விசாரிக்கின்றனர்.ஆந்திராவில் இருந்து 'மெத்தம்பெடமைன்' போதை பொருட்கள் வாங்கி பதுக்கி வைத்து விற்பனை செய்த, எட்டு பேரை, மாதவரம் துணை கமிஷனர் சுந்தரவதனம் தலைமையிலான போலீசார் கைது செய்தனர். அவர்களிடமிருந்து 2 கிலோ கஞ்சா, 860 கிராம், 'மெத்தம்பெடமைன்' போதை பொருட்கள் பறிமுதல் செய்யப்பட்டன.மேற்படி சம்பவங்களில் சிறப்பாக செயல்பட்ட ஆட்டோ ஓட்டுனர் மற்றும் போலீசாரை, போலீஸ் கமிஷனர் சங்கர் ஜிவால் பாராட்டி வெகுமதி வழங்கினார்.

======================================================================================================

கொச்சி-கேரளாவில், சாலையோரம் டீக்கடை நடத்துபவரின் மகள் மருத்துவக் கல்லுாரியில் சேர பணமின்றி தவித்தார். அவருக்கு ஏராளமானோர் உதவி செய்துள்ளனர்.

கேரளாவில், மார்க்சிஸ்ட் கம்யூ., கட்சியை சேர்ந்த முதல்வர் பினராயி விஜயன் தலைமையிலான இடது ஜனநாயக முன்னணி ஆட்சி நடக்கிறது.கொச்சியை சேர்ந்த ஜாசன், வேன் டிரைவராக பணியாற்றினார். இவரது முதுகு தண்டுவடம் 2019ல் பாதிக்கப்பட்டது. இதனால் வேன் ஓட்ட முடியவில்லை. குடும்ப வருமானத்திற்காக, இவரது மனைவி பிந்து ஆட்டோ ஓட்டினார்.

ஜாசனின் மூத்த மகன் சாமுவேல் ஹோட்டல் நிர்வாகமும், இளைய மகன் ஒன்பதாம் வகுப்பும் படிக்கின்றனர். மகள் எட்னா, பிளஸ் 2 படித்து வந்தார். மனைவியின் வருமானம் போதாமல், வேனை விற்று சாலையோரம் டீக்கடை துவக்கினார் ஜாசன். வீடு இல்லாததால், குடும்பம் டீக்கடையிலேயே வசிக்கிறது. எட்னா, தந்தைக்கு உதவியாக டீக்கடையில் வேலைகளை பார்த்துக் கொண்டே படித்தார். டாக்டர் கனவு இருந்ததால், 'நீட்' தேர்வு எழுதி வெற்றி பெற்றார்.

ஆலப்புழா மருத்துவக் கல்லுாரியில் அவருக்கு இடம் ஒதுக்கப்பட்டது. ஆனால், கல்லுாரி மற்றும் விடுதி கட்டணம் செலுத்த பணம் இல்லாமல் தவித்தார். இதையறிந்த அப்பகுதி மக்கள், எட்னாவின் கல்விக் கனவை நிறைவேற்ற, 'வாட்ஸ் ஆப்' சமூக வலைதளத்தில் குழு அமைத்தனர். அதில் கிடைத்த தொகையை வைத்து, எட்னா கல்லுாரியில் சேர்ந்துள்ளார்.

=================================================================================================

மதுரை: மதுரை ஆத்மராவ், சுமதி தம்பதி மகள் அம்ரிதாவுக்கும், திருச்சி பாலகுமாருக்கும் நடந்த திருமணத்தில் உறவினர்கள், நண்பர்கள் கொடுத்த மொத்த மொய்ப்பணம் ஆதரவற்றோர் இல்லத்திற்கு வழங்கப்பட்டது நெகிழ்ச்சியை ஏற்படுத்தியது.

மணமகள் பெற்றோர் கூறியதாவது: திருமண அழைப்பிதழில் நீங்கள் வழங்கும் மொய்ப்பணம் அன்பு இல்ல ஆதரவற்ற குழந்தைகளுக்கு வழங்கப்படும்' என குறிப்பிடப்பட்டிருந்தது அனைவர் கவனத்தை ஈர்த்தது. அதற்கு ஏற்ப திருமண மண்டபத்தில் மொய்ப்பணம் வைக்கும் உறைகளையும் வைத்திருந்தோம்.

திருமணத்திற்கு வந்தவர்கள் உறையில் எவ்வளவு பணம் என குறிப்பிடாமல் உள்ளே பணம் வைத்து குடத்தில் போட்டு சென்றனர். எவ்வளவு மொய் எழுதினார்கள், அவர்கள் பெயர் என்ன என்பதை கூட நோட்டு புத்தகத்தில் நாங்கள் எழுதவில்லை. எங்கள் வாழ்வில் பெரியளவு யாருக்கும் உதவி செய்யும் வாய்ப்புஅமையவில்லை.

அதனால் தான் மகள் திருமண மொய்ப்பணத்தை ஆதரவற்றோர் குழந்தைகள் இல்லத்திற்கு வழங்க முடிவு செய்தோம். ஆதரவற்றோர் மீதான அக்கறை, மனதிருப்திக்காக செய்தோமே தவிர விளம்பரத்திற்காக அல்ல. இதை பார்த்து பலர் ஆதரவற்றோருக்குஉதவ முன்வர வேண்டும் என்பதே எங்கள்நோக்கம். மொத்த மொய்ப்பணத்தை செக், டி.டி.,யாக மாற்றி ஆதரவற்றோர் இல்லத்திற்கு கொடுத்து விடுவோம் என்றனர்.

===========================================================================================================================================================================================================================

 நான் படிச்ச கதை

 ஜெயகுமார் சந்திரகேகரன் 

==============================================

காவேரி மடத்துக் கிழவர் – க நா சுப்ரமணியம் 

 

க நா சுப்ரமணியம் (1912-1988) வலங்கை மானில்  1912 இல் பிறந்து 1965 முதல் டெல்லியில் வாழ்ந்து 1988இல் சென்னையில் இறந்தார். முதலில் ஆங்கிலப் பத்திரிகைகளில் கட்டுரைகள் எழுதினார். பின்னர் புதுக்கவிதை, நாவல், சிறுகதை, விமர்சன நூல், மொழிபெயர்ப்பு என்று இவரது இலக்கியக் களம் விரிந்தது. மயன் என்ற புனைப்பெயரில் புதுக்கவிதைகள் எழுதினார். ‘சூறாவளி’, ‘சந்திரோதயம்’, ‘எழுத்து’ உள்ளிட்ட இதழ்கள், ‘ராமபாணம்’, ‘இலக்கிய வட்டம்’, ‘முன்றில்’ உள்ளிட்ட சிற்றிதழ்களை நடத்தினார். 1986-ல் இவர் எழுதிய ‘இலக்கியத்துக்கு ஒரு இயக்கம்’ என்ற இலக்கியத் திறனாய்வு நூலுக்கு சாகித்ய அகாடமி விருது கிடைத்தது. 

இவர் நடிகர் பாரதி மணியின் மாமனார்.

இவரைப்பற்றிய மேலும் விவரங்கள்

https://ta.wikipedia.org/s/bed

https://azhiyasudargal.blogspot.com/2012/10/blog-post_12.html 

தளங்களில் காணலாம்.

“கதை என்பது பொதுவானது. கவிதை கட்டுரை நாடகம் ஓவியம் இவற்றிற்கு ஆதாரமாக இயங்குகிற ஒரு அடிப்படைக் கோப்பு. சிறுகதை என்பது தனித்துறை. பத்திரிகைகள் யுகமும் அவசர யுகமும் தோன்றிய பின், கதை, சிறுகதை என்கிற இலக்கிய உருவம் பெற்றுப் பின்னர் பத்திரிகைக் கதை என்று ஒரு தேய்வும் பெற்றது.“ இவ்வாறு செல்கிறது இவரது சிறுகதை  ஆராய்ச்சி. “சிறுகதைக்கு ஒரு ஆரம்பம், நடு, முடிவு  என்பது கட்டாயம் தேவை. அவ்வாறு இல்லையேல் அவை சிறுகதைகள் அல்ல.”  என்றும் கூறுகிறார்.

இன்று நாம் காணப்போவது இவரது “காவேரி மடத்துக் கிழவர்” என்ற சிறுகதை பற்றிய அறிமுக விமரிசனம்.

https://drive.google.com/file/d/1UVyaA0Ak1SNDAHY4cPn5NBEtvuuTQAIh/view?usp=sharing

கதை என்னவோ கிசுகிசு கள்ளக்காதல் தான். கதையை சொல்பவர் ஒரு இளைஞர். பெயர் இல்லை. அவருடைய பாட்டி அவருக்கு ஒரு கதை சொல்கிறார்.

முப்பத்திரண்டு வருஷங்களுக்கு முந்திய கதை அது. எதிர்வீட்டு சாமாவின் தாயார் பெயர் தர்மி. அவள் பணக்கார வீட்டுப் பெண். ஸ்த்ரீதனமாக நிறைய பணமும் நிலமும் கொண்டு வந்தாள். அவள் கணவன் அப்போது கிராம முன்சீப். பெயர், சீனுவாசய்யர். தீவட்டி தடியன் மாதிரி இருப்பான். …எப்போதும் சிடுசிடுத்த முகம். போதாதற்கு அவன் தொழில் சதா மூச்சு நுழைவது தான்……தர்மி அழகாக இருப்பாள். ….

பக்கத்து  வீட்டிலே நாணு நாணு என்று ஒர் தடி பிரமச்சாரி இருந்தான். அவனுக்கு ஒரு விதவைத் தாயாரும் மூத்த சகோதரியும் தான் உறவினர்கள். ஆள் ஜோராக இருப்பான்…..அவன் குடியிருந்த வீட்டைத்தவிர அவனுக்கு வேறு சொத்தில்லை.  பலே கைகாரன் பேச்சுக்காரன்.

சுருங்கச் சொன்னால் நாணு வீசிய வலையில் விழுந்து விட்டாள் தர்மி. இது பல மாதங்களுக்கு அப்புறம் தான் சீனுவாசய்யருக்குத் தெரிய வந்தது….. கிடைத்த அடி எல்லாம் வாங்கிக்கொண்டு சொல்லிக் கொள்ளாமல் இரவோடு இரவாக ஊரை விட்டு ஓடி விட்டான் நாணு..

 நாணு ஊரை விட்டு ஓடியதற்கு எட்டு மாதங்களுக்கு அப்புறம் சாமா பிறந்தான்.

 மேலே கூறியது கதையின் நடுப்பகுதி.

 கதையின் துவக்கம் கீழே.

எங்கிருந்தோ வந்தார். வயது அறுபது அறுபத்தைந்து இருக்கும். காவேரி மடத்தில் பத்திருபது நாள் தங்கப் போகிறேன் என்றார். மஹாதேவ அய்யரிடம் மடத்தின் சாவியை வாங்கிக்கொண்டு மடிசஞ்சியும் தானுமாக ஒரு நாள் மடத்தில் குடிபுகுந்தார்.

அவர் அப்படிக் குடிபுகுந்ததில் சாமா ஒருவனுக்குத்தான் அதிருப்தி. சாமாவுக்கு பிறர் படுகை, வாழைத்தார்களில் மோகம் அதிகம். அவை தான் ருசியானது என்பது அவன் கொள்கை.

இவ்வாறு கதை தொடங்குகிறது.  இதிலிருந்து நீங்கள் பாதிக்கதையை ஊகித்திருக்கலாம். வந்த கிழவர் நாணு. சாமா, தர்மி வழி பிறந்த அவரது மகன். இது எல்லாம் சரியே. ஆனால் இக்கதைக்கு இரண்டு முடிச்சுகள் முடிவுகள் உண்டு. இரண்டும் உண்மையே.

மடத்தில் ஸ்நானம் பண்ணி விட்டு காயத்ரி ஜபம் பண்ணிக்கொண்டு உட்கார்ந்திருந்தார் கிழவர். …. பத்து நிமிசத்தில் …காலி செம்புடன் வெளியே வந்து ஆற்றைப் பார்த்துக் கொண்டு என் பக்கத்தில் உட்கார்ந்தார் கிழவர்.

சந்தேகத்தை எப்படித் தீர்த்துக் கொள்வது என்று யோசித்தேன். அச்சமயம் சாமா தன் வேஷ்டியை இழுத்துக் கட்டிக்கொண்டு எருமை மாட்டைக் குளிப்பாட்ட ஆற்றில் இறங்குவது ஏன் கண்ணில் பட்டது.

திடீரென்று முன் பின் யோசியாமல் “அது உங்கள் பிள்ளை” என்றேன். ….

தனக்கு இரண்டு தலைமுறைகளுக்கப்புறம் பிறந்த வாலிபன் ஒருவன் தன்னைக் கண்டு கொண்டான்; ‘ஆனால் அவமதிக்கவில்லை’ என்ற பெருமை அவர் கண்களில்….

மறுநாள் காலை நான் பால் கொண்டு போனபோது காவேரி மடம் வெறிச்சோடியிருந்தது. கிழவர் விடியற்காலையிலேயே கிளம்பிப் போய் விட்டார். என் அசட்டுத்தனம் அது……பாட்டி விசயத்தை அறிந்து கொண்டு என்னைக் கோபித்தாள்.

கதையை சிறுகதையாக்குவது எப்படி என்பதை இக்கதை விளக்குகிறது. கதை என்னவோ சாதாரணம் தான். இந்தக் கதையை இப்படி சொல்லிப் பாருங்கள்.

நாணு ஒரு பிரம்மச்சாரி இளைஞன். அடுத்தவன் மனைவியை அபகரித்தான். பிடிபட்டான். ஊரை விட்டு ஓடினான். 32 வருடங்களுக்குப் பின் திரும்ப வந்து எதையோ தேடி அலைந்தான். தேடி வந்தது கதாசிரியர் மூலம் வெளிப்பட்டதும், ரகசியம் வெளிப்பட்டதும் திரும்பவும் ஊரை விட்டுப் போய் விட்டான்.

இப்படி எழுதினால் அது சிறுகதை அல்ல. பத்திரிகை ரிப்போர்ட் அல்லது செய்தி.

சிறுகதைக்கு ஒரு துவக்கம் வேண்டும். ஆகவே கிழவர் ஊருக்கு வருவதை ஒரு திரைக்காட்சியாக முன்னில் வைக்கிறார். கிழவர் ஊருக்குப் புதியவர் அல்லர் என்பதற்குச் சில துப்புகளை அங்கங்கே தூவுகிறார் கதாசிரியர். நாணுவின் கதை வாசகர்களுக்குத் தெரிய, பாட்டி வழியாக ஒரு flash back (பின்னோட்டம்). அப்போது வாசகர்களுக்கு அவர்கள் உத்தேசித்த முடிச்சு முடிவு அவிழ்கிறது. இப்படியாகத் துவக்கம், நடுப்பகுதி, முடிவு என்று அவர் உத்தேசித்த சிறுகதை இலக்கணத்தைப் படிப்பிக்கிறார்.

(இந்த உத்தியைத்தான் ஆ மாதவன் “பாச்சி” என்ற சிறுகதையில் கையாண்டதை நாம் முன்னரே பார்த்தோம். மேலும் அதிலும் நாணு கதாநாயகன். என்ன ஒரு ஒற்றுமை!)

இக்கதையின் முடிச்சு பல இடங்களில் சூசகமாகச் சொல்லப்பட்டாலும் கடைசி வரி படித்த பின்தான் “அப்படியா” என்று ஆச்சர்யப்பட வைத்தது.

கீழே உள்ள மலையாள வாக்கியத்தைப் படிக்க முடியுமானால் புரிந்து கொள்ளலாம். அல்லாமல் சுட்டியின் வழியாகக் கதையின் கடைசி பக்கத்திற்குச் சென்று வாசிக்கலாம். கதை முழுதும் வாசித்தீர்கள் என்றால் மிக நன்று. கதைப் போக்கு, ஒழுக்கு, அன்றைய வழக்கங்கள், போன்றவற்றையும் புரிந்து கொள்ளலாம். கதை 1961இல் வெளி வந்தது.

ரா கி ரங்கராஜன், சுஜாதா போன்றவர்களும் சிறுகதை எழுதுவது எப்படி என்ற தலைப்பில் தொடர்கள் வெளியிட்டுள்ளனர். அந்த வரிசையில் இதையும் கொள்ளலாம். இந்தக் கதை ஒரு கதை எப்படி சிறுகதையாகிறது என்பதற்கு நல்ல உதாரணம். வாசகர்கள் அவசியம் சுட்டிக்குள்  சென்று கதையை வாசிக்கக் கோருகிறேன்.

പോടാ ചെറുക്കാ എന്നോട് ഒന്ന്  ചോതിക്കാമായിരുന്നു, നാണു എന്റ്റെ അനിയൻ

 https://drive.google.com/file/d/1UVyaA0Ak1SNDAHY4cPn5NBEtvuuTQAIh/view?usp=sharing

என்ன வாசகர்களே. கதையை படித்தாயிற்றா? உங்களுக்குத் தோன்றிய எண்ணங்களைப் பின்னூட்டமாக எ பி யில் தெரிவித்தால் அது எல்லோருக்கும் சென்றடையும்.

எனது…….இலவச இணைப்பு.

எனக்கும் கேட்டது !!

“வெட்டு குத்து “

தொல்லைக் காட்சியில்

தொடர் நாடகம்.

மனைவி சமயலறையில்.

விளக்கம்: தொடர் நாடகங்களை விரும்பும் மனைவி எனக்கும் கேட்கும்படி சப்தம் கூட்டி சமைத்தபடி பார்க்கின்றார். (கேட்கின்றார்). தொடர் நாடகங்களில் வசனமே அதிகம் என்பதால்.