நான் வியந்த ஓவியர் :: மாருதி :: பகுதி 3 :: நெல்லைத்தமிழன்

 

ஓவியர் மாருதி அவர்களைச் சந்திக்க வாய்ப்பு கிடைத்திருந்தால்  நான் கேட்க ஆசைப்பட்ட கேள்வி: "பெண்கள் முகத்திற்கு யாரேனும் pose கொடுக்கிறார்களா, இல்லை நீங்கள் பார்க்கும் பெண்களின் முகத்தைச் சிறிது வித்தியாசங்கள் கொடுத்து வரைகிறீர்களா, இல்லை அந்தப் பெண்ணின் புருவம், இந்தப் பெண்ணின் கண்கள், இன்னொரு பெண்ணின் உதடுகள் என்று பலவித combinationsஉடன் உங்களின் கற்பனைத் திறனும் சேர்ந்துகொண்டு வரைகிறீர்களா" என்று.

7 வயதிலேயே சிறு சிறு ஓவியங்கள் வரைய ஆரம்பித்தவர் மாருதி. அவர் அப்பா இதனை ஆதரிக்கவில்லை, எல்லா அப்பாக்களையும் போல. ஒரு நல்ல வேலையைப் பார்த்துக்கொண்டு, ஓவியம் வரைவதை side வேலையாக, பொழுதுபோக்காக வைத்துக்கொள்ளச் சொல்லி அவருக்கு இன்னொரு உறவினரை விட்டு ஆலோசனை சொல்லச்சொன்னாராம். பையனை என்ன சொல்லியிரும் திருத்த முடியாது, அவனுக்கு ஓவியர் ஆவதில்தான் ஆசை என்றதும், 20 வயதில் சென்னைக்குச் செல்ல அனுமதி கொடுத்திருக்கிறார்.  வந்தாரை வாழவைக்கும் சென்னை, ஓவியர் மாருதிக்கு கஷ்த்தைக் கொடுக்காமல் வெற்றி பெற வைக்குமா? சோறு தண்ணியில்லாமல் சென்னைத் தெருக்களில் சுற்றியிருக்கிறார். அவருக்கு முதல் வாய்ப்பு அளித்தவர் குமுதம் எஸ்.ஏ.பி அவர்கள்.  எஸ்.ஏ.பி அவர்களைப் பற்றி மாருதி கூறும்போது, ஒவ்வொரு ஓவியத்திலும் சின்னச் சின்னத் திருத்தங்கள் சொல்லுவாராம், அவைகள் எல்லாமே மிகச் சரியாகவும் கற்றுக்கொள்ளும்படியாகவும் இருக்குமாம். ஆரம்பத்தில் “நாதன்” என்ற பெயரில் அவரது ஓவியங்கள் வெளியாயினவாம். பிறகு ஒரு நாள் தன் புனைபெயராக ‘மாருதி’ என்பதை வைத்துக்கொண்டாராம்.

(ஓவியர் லோகநாதன் அவர்கள் வரைந்த ஓவியர் மாருதி படம்..இணையத்திலிருந்து)

ஓவியருக்கு நிலையான வருமானம் என்பது அப்போது கிடையாது. அதனால் திருமணம் செய்துகொள்வது சரியல்ல என்று நினைத்தாராம். எப்படியோ அவரது அம்மா, அவரை வற்புறுத்தி, அரசு வேலையில் இருந்த விமலா என்ற பெண்ணை, மாருதியின் 41வயதில் திருமணம் முடித்தாராம். ஓவியர் மாருதிக்கு இரண்டு மகள்கள். அதன் பிறகுதான் வாழ்க்கை என்பது அனுபவித்து ரசிப்பதற்கு என்று அவருக்குப் புரிந்ததாம்.

ஓவியர் மாருதியின் வேலை, வீட்டிலிருந்துதான் என்பதால், அவர் மனைவிக்கு மிக்க மகிழ்ச்சியாம். இரண்டு பேரும் வேலைக்குச் சென்றால் குழந்தைகளை யார் பார்த்துக்கொள்வது என்ற பிரச்சனை வந்திருக்கும். மாருதியின் நல்ல குணத்தைப் பற்றி மிகப் பெருமிதம் கொள்கிறார் அவர் மனைவி. மாருதிக்கு கடவுள் நம்பிக்கை குறைவு. ஜாதகம் பார்க்காமல் (மாருதியின் ஜாதகம் இல்லை என்பதால்) நடந்த திருமணம். மனைவிக்கோ இராமர் மீது அளவற்ற பக்தி. அதற்கேற்றார்ப்போல், திருமணத்தின்போது கணவனின் தாய், விமலாவிற்கு இராம, லக்ஷ்மண, சீதா விக்ரஹங்களைக் கொடுத்தாராம்.  ஓவியர் மாருதி, கண்மணி என்ற பத்திரிகையின் அட்டைப் பத்தை 22 வருடங்களாக வரைந்து கொடுக்கிறாராம். அந்தப் பத்திரிகையின் முதலாளி, ராமசந்திர ஆதித்தன் அவர்கள். கணவனின் புனைபெயரோ மாருதி. இப்படி வாழ்க்கையின் ஒவ்வொரு கட்டத்திலும் ராமர் சம்பந்தப்பட்டவர்கள் (பெயருடையவர்கள்) இருந்ததில் அவருக்கு மிக்க மகிழ்ச்சியாம். 

= = = = = = = = = = = = = =