நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 15

 

வைரமுடி யாத்திரை – ஹொசஹொலாலு, மாண்ட்யா – பகுதி 15

 

ஹொசஹொலாலு கோவிலின் வெளிப்புற அழகில் மயங்கிக்கிடந்த நாம் இப்போது கோவிலின் உள்ளே செல்வோம். வெளிப்புறத்தில், நல்ல சூரிய வெளிச்சத்தில் கோபுரம் மற்றும் சுற்றுச் சுவர்களில் செதுக்கப்பட்டிருக்கும் சிற்பங்கள் நம் மனதைக் கொள்ளைகொள்ளும் அளவில் இருக்கின்றன. ஆனால் கோவிலின் உட்புறம் செல்லும்போது வெளிச்சமின்மை மற்றும் LED வெளிச்சத்தில் உட்புறச் சிற்பங்களின் அழகு அவ்வளவு தெளிவாகத் தெரிவதில்லை. புகைப்படம் எடுத்தாலும் மசமசவென்றே இருக்கிறது. இருந்தபோதும் முடிந்த அளவு நன்றாகப் படமெடுக்க முயன்றிருக்கிறேன்.

 

(இன்னொன்று…கோவிலின் உட்புறம் இப்படி இருப்பதுதான் பக்தியை வெளிக்கொணரும். கோவில் என்ன, சிற்பங்களை வெளிச்சம்போட்டுக் காண்பிப்பதற்கான இடமா?)

ஸ்ரீவேணுகோபாலர் சந்நிதி. இதன் வெளியே மேற்புறம் சிறிய அளவில் வேணுகோபாலர் சிற்பம் உண்டு. அதை வைத்து, வேணுகோபாலர் மாத்திரம் 17ம் நூற்றாண்டில் பழைய சிலை இருந்த இடத்தில் பிரதிஷ்டை வைத்திருக்கிறார்கள் என்று அர்ச்சகர் சொன்னார்.

மூலவர் நம்பிநாராயணர் சந்நிதிக்கு (இதுதான் கோவிலின் பிரதான தெய்வம்) வெளியே வலதுபுறம் கணபதி சந்நிதியும், இடது புறம் மஹிஷாசுர மர்த்தனி சந்நிதியும் இருக்கின்றன.

மஹிஷாசுர மர்த்தனி. இந்தச் சிற்பம் (கடவுள் சந்நிதி) 1 ½ அடி உயரமுடையது. ஆச்சர்யகரமாக, கோவிலின் உள் உள்ள ஸ்வாமி சந்நிதியில் உள்ள சிற்பங்கள் எல்லாமே, கோவிலின் வெளிப்புறத்திலும் சிற்பமாகச் செதுக்கப்பட்டுள்ளது.

லக்ஷ்மி நரசிம்மர். இதில் நரசிம்மரின் கால் பகுதியில் பிரகலாதன் சிற்பம் இருக்கிறது. நரசிம்மரின் மடியில் அமர்ந்திருக்கும் லக்ஷ்மி, பிரகலாதனை அன்போடு பார்ப்பதுபோலவே சிற்பம் அமைக்கப்பட்டிருக்கிறது.

லக்ஷ்மி நரசிம்மர் சந்நிதியின் வாயிலில் மேல் பகுதியில் சிறிய லக்ஷ்மி நரசிம்மர் சிற்பத்தைக் காணலாம்.

விதானத்தில் அமைக்கப்பட்டுள்ள அழகிய வடிவமைப்பு. முதல் படத்தில் நடுவில் உள்ள இட த்தில் மிகச் சிறியதான சிற்பம் உள்ளது. அடுத்த படத்தில் தர்ப்பைக் கூர்ச்சம் போன்ற டிசைன்.

 

கோவிலின் உள் உள்ள தூண்கள் வழ வழ என பாலிஷ் செய்யப்பட்டுள்ளன. இது எந்த வித அறிவியல் உபகரணங்கள் இல்லாத காலத்தில் செய்திருக்கிறார்கள். 

(இணையத்திலிருந்து எடுத்த படம். கோவிலின் முழுப் பரிமாணம்)

சந்நிதி/கோயிலின் நுழைவாயிலில், அங்கு இருக்கும் தெய்வ உருவம் சிறிய அளவில் சிறப்பாக வடிக்கப்பட்டு உள்ளது. இதை வைத்துத்தான், ஸ்ரீவேணுகோபாலர் சந்நிதியில் உள்ள மூலவர், 17ம் நூற்றாண்டைச் சார்ந்தது,  கோவிலில் ஆரம்பத்தில் வைத்திருந்த சிலை இல்லை என்று அர்ச்சகர் காண்பித்தார்.

விட்டுப்போன ஒரு சில படங்கள் கீழே (தனிப் படங்களாகக் கொடுக்கணும் என்பதற்காக இணைத்துள்ளேன்)

மூன்று சந்நிதிகளில் உள்ள தெய்வங்கள். சென்றமுறை அர்ச்சகர் ஒரு புகைப்படம் கொடுத்தார். அதனை இங்கு பகிர்ந்துள்ளேன். 

இந்தக் கோவிலில் 10 ரூபாய்க்கு ரவா லட்டு பிரசாதம் கிடைத்தது. (ரவா லட்டு, போளி, சொஜ்ஜியப்பம் போன்றவை கர்நாடகாவில் பிரசித்தம். கோவில்களில் கர்நாடக பாணி புளியோதரை பிரசாதமாகக் கொடுப்பார்கள்).  மதியம் நல்ல வெயில். பலரும் கோவிலுக்கு வெளியே சென்று அக்ரஹாரத் தெருவைத் தாண்டி, கடைகளில் ஜூஸ் மற்றும் மினரல் வாட்டர் வாங்கினார்கள். இப்படியாக ஹொசஹொலாலு கோவில் தரிசனம் முடிந்தது.   

அந்தக் கோவிலிலிருந்து எங்கு சென்றோம் என்பதை பிறகு  காண்போம்.