'திங்க'க்கிழமை - அசடு - கீதா ரங்கன் ரெஸிப்பி

 

அசடு

 

உணவுப் பிரியர்கள் அனைவருக்கும் சுவையான வணக்கம். இன்றைக்கு எபி அடுக்களையில் மெனுவின் பெயரைப் பார்த்ததுமே “ஆ! யார் அசடு” ன்னு ஜெர்க் ஆகறீங்களா!!!! 

என் மாமியார் செய்திருந்த போது, இது என்னது என்று கேட்டப்ப, அசடு! என்றார். ஒரு நிமிடம், ‘அசடு இது கூடத் தெரியலையா? என்று என்னைத்தான் சொல்றாங்க போல. நமக்குத்தான் தினப்படி சமையல் தெரியாதே! என்று நினைத்து, “எனக்கு இது புதுசு” என்று சொல்லி அவங்ககிட்ட கேட்க அப்ப அவங்க இதுக்குப் பெயர் அசடுன்னு சொல்வோம் என்று செய்முறை சொன்னதும், ஏன் இப்படி ஒரு பெயர்னு கேட்டேன்.  (எங்க ஊர்ப்பக்கங்களில் தனியாவின் பயன்பாடு எல்லா பதார்த்தங்களுக்கும் கிடையாது.)

“அசட்டுத் திதிப்பு திதிக்கும். திதிப்பும் காரமும், புளிப்பும் கலந்துகட்டி வரதுனால ரெண்டாங்கெட்டான். கைல கிடைச்ச அல்லது வீட்டிலிருந்த கத்தரியையும், சர்க்கரைவள்ளிக் கிழங்கையும் அவசரத்துக்குக் கூட்டு செஞ்சிருப்பாங்க. சாப்பிட்டவங்க இதென்ன, கத்தரி, சர்க்கரைவள்ளிக் கிழங்கு சேர்த்து புளிப்பு, காரம், இனிப்புன்னு “அசட்டுத்தனமான’ ஒரு கூட்டுன்னு கேட்கப் போய்….” என்று அதன் வரலாற்றைச் சொல்ல…

நான் “அட! என்ன பேரு வைக்கன்னு தெரியாம முழிச்சேன். பேரு கிடைச்சிருச்சே!” “அதான் அசடு” ன்னு புதுசா நாமகரணம் சூட்டியிருப்பாங்களோ” என்று நினைத்துக் கொண்டேன்.

மாமியார் செஞ்சு பெயர் வைத்ததா இல்லை அவங்க அம்மா செஞ்சு வைச்சதான்னு தெரியலை. ஆனால் நம் வீட்டில் எல்லோருக்கும் ரொம்பப் பிடிக்கும். (எங்க வீட்டுல எதுதான் பிடிக்காது!!!!)

படங்கள் அதிகம் எடுக்கவில்லை. எடுத்த படங்களுடன் சொல்கிறேன்.

செய்முறை:

கத்தரிக்காய் 3, சர்க்கரைவள்ளிக் கிழங்கு படத்தில் உள்ளதுபோல் அளவு. இரு காய்களும் நறுக்கியவை சம அளவில் எடுத்துக்கோங்க.

வறுத்து அரைக்க : இங்கு கொடுக்கப்பட்ட காய்கள் அளவிற்கு

கொத்தமல்லி விரை – 1 மேசைக்கரண்டி தூக்கலாகவே எடுத்துக் கொள்ள வேண்டும்

கடலைப்பருப்பு – ½ மேசைக்கரண்டி

மிளகாய் வற்றல் – 4 (காரம் தேவைப்படுபவர்கள் உங்கள் தேவைக்கேற்ப எடுத்துக் கொள்ளலாம்)

பெருங்காயம் பொடி – ½ தேக்கரண்டி. இங்கு படத்தில் ஒரு சின்ன தேக்கரண்டியில் paste போன்று காட்டியிருக்கிறேன். இது சம்பூர்ணா ஹோட்டல் பெருங்காயம். செம மணம். ஒரு துளி போட்டாலே போதும். பால் பெருங்காயம் அளவு வாசனை. அதான் இந்த அளவு போட்டதைக் காட்டியிருக்கிறேன். இப்போது இந்த சம்பூர்ணா ஹோட்டல் பெருங்காயம் கடைகளில் காண்பதில்லை.  என்னாச்சோ?

புளி – நெல்லிக்காய் அளவு. இரண்டு கோப்பைத் தண்ணீரில் கரைத்து வைத்துக் கொள்ளவும்.

துருவிய தேங்காய்ப்பூ – 1/3 கோப்பை

வெல்லம் பொடித்தது – ஒரு மேசைக்கரண்டி

உப்பு – தேவையான அளவு

வாணலியில் ஒரு மேசைக்கரண்டி நல்லெண்ணை விட்டுக் கொண்டு காய்களை சிறிது வதக்கிக் கொண்டு கரைத்து வைத்திருக்கும் புளித்தண்ணீரை விட்டு 1/4 தேக்கரண்டி மஞ்சள் பொடி போட்டுக் கொதிக்க விடவும். உப்பைப் போட்டுவிடவும். வேகும் போது கொஞ்சம் வெல்லம் சேர்ப்பதுண்டு. நான் மாமியாரின் செய்முறைப்படி செய்வதால் சேர்ப்பேன். சேர்ப்பதும் சேர்க்காததும் உங்கள் விருப்பம். கருகப்பிலையும் சில இலைகளைப் போடலாம். நான் போடுவதுண்டு. உங்கள் விருப்பம். காய்கள் வேகட்டும். அதற்குள்…

வறுக்கக் கொடுத்துள்ளவற்றை, வாணலியில் 2 தேக்கரண்டி எண்ணை விட்டுக் கொண்டு   தனித்தனியாக கொத்தமல்லி விரை, மிளகாய் வற்றல், கடலைப்பருப்பு எல்லாவற்றையும் வறுத்து எடுத்துக் கொண்டு தேங்காயுடன் சேர்த்து நன்றாக அரைத்ததை, காய்கள் வெந்ததும் போட்டுக் கலக்கவும். அப்போது பெருங்காயத்தைச் சேர்க்கவும். நான் பெருங்காயம் சேர்ப்பவற்றில் கடைசியில் சேர்ப்பதுதான் வழக்கம். பச்சையாகவொ அல்லது வறுத்துச் சேர்ப்பதாக இருந்தாலோ. கலந்து கொதித்ததும் அடுப்பை அணைத்துவிட்டு (2 நிமிடம் போதும்) ஒரு தேக்கரண்டி எண்ணை விட்டு கடுகு, உளுத்தம்பருப்பு, கருகப்பிலை தாளித்து அதில் போடவும்.

 

 

பார்வையாளர்கள், வாசிப்பவர்கள், கருத்து சொல்பவர்கள் மற்றும் எபி ஆசிரியர்கள் அனைவருக்கும் மிக்க நன்றி!