​வெள்ளி வீடியோ : எங்கிருந்த போதிலும் நீ வந்து விடு தேவி...

சிறுவயதில் தஞ்சாவூர் மருத்துவக் கல்லூரி குடியிருப்பில்

இருந்தபோது பக்கத்து வீட்டில் வேதம் மாமி என்று ஒருவர் இருந்தார்.  விதவை.  அவருக்கு  ஒரே மகன்.  சுமார் முப்பது வயது.  ராஜகோபால் என்று பெயர்.  அவர் TB யால் அவஸ்தைப் பட்டுக் கொண்டிருந்தார்.  நாங்கள் அங்கு இருந்தபோதே இறந்தும் போனார்.  அப்போது அதற்கு சரியான மருத்துவம் இல்லையா, இல்லை இவர்கள் காலம் கடந்து பார்த்தார்களா, தெரியாது.

அந்த வீட்டில் அவ்வப்போது பஜனைகள், பூஜை என்று அமர்க்களப்படும்.  விபூதிபாபா என்ற ஒருவர்  வருவார்.  அவர் தலையிலிருந்து விபூதியாக கொட்டும்!  அவ்வப்போது சாய்பஜன் செய்வார் மாமி.  அதில் இந்தப் பாடலும் வரும்.. 

"சுப்ரமண்யம்..  சுப்ரமண்யம்.. ஷண்முகநாதா சுப்ரமண்யம்..."  அப்போது அடிக்கடி கேட்டு மனதில் நின்ற பஜன்.  பெரிய வரிகள் எல்லாம் கிடையாது.

அந்தப் பாடலை சமீபத்தில் இந்த பாம்பே சாரதா குரலில் கேட்டபோது பழைய நினைவுகள் வந்து போயின.

இன்றைய தனிப்பாடலாய் சுப்ரமண்யம்..  சுப்ரமண்யம்... 

சுப்ரமணியம் சுப்ரமணியம்

சண்முக நாத சுப்ரமணியம்

சுப்ரமணியம் சுப்ரமணியம்

சண்முக நாத சுப்ரமணியம்

சிவ சிவ சிவ சிவ சுப்ரமணியம்

ஹர ஹர ஹர ஹர சுப்ரமணியம்

சிவ சிவ ஹர ஹர சுப்பிரமணியம்

ஹர ஹர சிவ சிவ சிவ சுப்ரமணியம்

சிவ சரவணபவ சுப்பிரமணியம்

குரு சரவணபவ சுப்பிரமணியம்

சிவ சிவ ஹர ஹர சுப்பிரமணியம்

ஹர ஹர சிவ சிவ சுப்ரமணியம்

=================================================================================================

1992 ல் வெளியான படம் கோவைத்தம்பியின் 'உன்னை வாழ்த்திப் பாடுகிறேன்'.  கோவைத்தம்பி படம் என்பதாலேயே இளையராஜாதான் இசை!  கோவைத்தம்பி படங்களில் பெரும்பாலும் எல்லா பாடல்களும் ஹிட்டாகி விடும்.  இந்தப் படத்தில் இரண்டு மூன்று பாடல்கள் மட்டுமே தேறுகின்றன.

பார்த்திபன், சுமா ரெங்கநாத், மோகினி ஆகியோர் நடித்துள்ள படம்.

இன்றைய பாடல் நா காமராஜன் எழுதிய பாடல்.  S P பாலசுப்ரமணியம், மின்மினி குரலில் வரும் பாடல்.  

இந்தப் பாடலில் ஒரு புதுமை பாடலின் பல்லவியை SPB பாடவே மாட்டார்.  தொகையறாவும் சரணங்களும் மட்டும்தான் பாடுவார்.  அதேபோல பெண் குரல் பல்லவி மட்டும்தான் பாடும்!  சரணங்களில் SPB தன் குரல் மூலம் பாடலுக்கான உணர்வை மிக அருமையாய் தந்திருப்பார்.  எங்கிருந்த போதிலும் நீ வந்துவிடு தேவி என்பது பாடலின் ஸ்பெஷல் வரி..

பால் நிலவு சூரியன் போல் சுட்டதென்ன நியாயம்

பச்சக் கிளி தோளக் கொத்தி வந்ததிந்த காயம்

ஓடி வந்த வைகை நதி காஞ்சதென்ன மாயம்

கூட வழி இல்லை என்றே ஆனது பெண் பாவம்

ஒரு மாலைச் சந்திரன் மலரைத் தேடுது

மலையடிவாரத்திலே

இளமானைக் கண்டிட கானம் பாடுது

மன்மத ராகத்திலே

குளிர் வீசும் மாசியிலே ஒரு ஆசை மேகமடி

அது பேசும் பாஷையிலே ஒரு காதல் விரகமடி

ஒரு தேகம் வெந்தது மோகத் தீயினிலே ஆ..ஆ.. [ ஒரு மாலைச் சந்திரன்]

வெண்ணிலவில் தேடுகிறேன் கன்னி முகம் காணோம்

புன்னகையும் நான் இழந்தேன் என் மனதில் சோகம்

சித்திரத்தை பார்க்க வந்தேன் கற்குவியல் கண்டேன்

தென் மலையை போல் இருந்தேன் தென்னிலங்கை ஆனேன்

செல்லக் குயில் கூவ மெல்ல வரும் மேகம்

சொல்லில் வரும் சோகம் கங்கை நதி ஆகும்

எங்கிருந்த போதிலும் நீ வந்து விடு தேவி  [மாலைச் சந்திரன்]

நித்திரையில் பூவெடுத்தேன் நெஞ்சில் ஒரு காயம்

காயம் கொண்ட போதினிலும் பூவில் எந்தன் மோகம்

தெற்குக் கடல் ஆழத்திலே முத்தெடுக்கப் போனேன்

மூச்சடங்கிப் போனதடி முத்தை இன்னும் காணேன்

உந்தன் முகம் தேடி உள்ளம் அலைபாயும்

தென்றல் இன்றிப் போனால் தேகம் அனலாகும்

எங்கிருந்த போதிலும் நீ வந்து விடு தேவி [மாலைச் சந்திரன்]