"திங்க"க்கிழமை : மெதுவடை, மசால்வடை - ஸ்ரீராம்

 நாக்கு நாலுமுழம்!

மாளயபட்சம் ஸ்பெஷல்!

வடை எப்படி செய்தேன் என்று சொல்லப் போகிறேன் என்று படிக்க உட்கார்ந்தவர்கள் உடனே உள்ளே சென்று ஒருமுறை முகத்தைக் கழுவிக்கொண்டு வந்து படிக்க ஆரம்பிக்கவும்.

வந்தாச்சா...   ம்ம்ம்....  அதாவதுங்க...

கடைகளில் சூடாக வடை போட்டுக் கொண்டிருந்தால் தாண்டிச் செல்வது  கஷ்டமாயிருக்கிறது.

யாருங்க அங்க...  'இதெல்லாம் உடம்புக்கு ஆகாது'ன்னு சொல்றது...  அது என் காதில் விழவில்லை!

அப்பாவிடமிருந்து எனக்கு வந்திருக்கும் குணங்களில் - பலவீனங்களில் - ஒன்று இந்த வடை மோகம்.  சூடாக  வாணலியிலிருந்து ஜாரணியில் எடுத்து, எண்ணெயை வடித்து, பேசினில் கொட்டி, அருகிலேயே நாக்கைத் தொங்கப் போட்டுக்கொண்டு காத்திருக்கும் நம்மிடம் சிறிய வாழைஇலை போர்த்திய  தட்டில் இரண்டு வடையை கொரகொர என்று வைத்து ஒரு பக்கமாக சட்னிகளை ஊற்றிக் கொடுத்தால்  பாதி வடையை மொறுமொறு என்றும் மீதியை சட்னியில் நனைத்தும் அடிக்கலாம்.  

வெள்ளிக்கிழமை காலை பாஸின் சுகவீனம் காரணமாக வெளியில் டிஃபன் வாங்க வேண்டிய நிலை.  ஒரு மாறுதலுக்கு பூரி வங்கச் சென்ற இடத்தில் ஆவிபறக்க இப்படி வடை கண்ணில் பட்டால் ஒரு மனுஷனால் என்ன செய்ய முடியும்?  சொல்லுங்கள்! பத்து ரூபாய்.  இது எங்கள் கேண்டீன்காரர் கையில் கிடைத்தால் ஒரு வடை இருபத்தைந்து ரூபாய்க்கு விற்பார். எனில் அவர் பத்து ரூபாய்க்கு தரும் வடை சைஸ் எப்படி இருக்கும் என்று நீங்களே பார்த்துக் கொள்ளுங்கள்!

மறுநாள் முதல் மாளயபட்சம்.  அடுத்த 15 நாட்களுக்கு இதெல்லாம் நினைத்துக் கூட பார்க்க முடியாது.  எனவே உடனடியாக வடை வாங்கி அங்கேயே நின்று சுவைத்து விட்டேன்.

பொன்னிறமான வடையின் மேற்புற மினுமினுப்பின் உள்ளே கிடைக்கும் மிளகும், சிறு வெங்காயத் துணுக்கும் எக்ஸ்டரா கவர்ச்சி.  அந்த எண்ணெய்க்கு பயந்து சிலர் அதை தினத்தந்தி பேப்பரில் வைத்து அமுக்கிப் பிழிந்து அழகான வடையை பாறையில் நசுங்கிய தேரை போல வைத்து சாப்பிடுவார்கள்.  நான் அதை விரும்புவதில்லை.

சோடா உப்பு போடுகிறார்கள் என்பார்கள்.  ரவை சேர்க்கிறார்கள் என்பார்கள்..  என்னவோ போங்க..  அதையெல்லாம் இந்தக் காதில் வாங்கி கொண்டே (பொது அறிவு முக்கியம்...  நாலு விஷயத்தைத் தெரிந்து கொள்வதில் தப்பு இல்லை பாருங்க..) வடையைப் பிய்த்து வாயில் போட்டு வழியும் புகையை வெளியில் விடுவது சுகம்.

சமயங்களில் தொட்டுக்கொள்ள இல்லாமல் சும்மாவே சாப்பிடலாம் இந்த மெதுவடையை.  இதை உளுந்து வடை என்றும், ஓட்டை வடை என்றும் அழைப்பார்கள்.  எனக்கு மெதுவடை என்று சொல்வதில்தான் விருப்பம் - மொறுமொறு பகுதிகள் இருந்தாலும்!  இதனுடன் கொடுக்கும் சட்னியும் சுவையாக அமையவேண்டும்.  பெரும்பாலும் சிவப்பு நிறத்தில் சிரிக்கும் காரசட்னியைவிட, நல்ல தரமான தேங்காய் சட்னி மேல்.   நல்ல ஜோடி.  அது என்ன தரமான தேங்காய் சட்னி....?   அதை இன்னொரு நாள் தனியாகப் பார்ப்போம்.  

சாம்பார் அந்தக் கடையில் எப்படி இருக்கிறது என்று பார்த்து, பிறகு வடையை அதில் நனைப்பது உத்தமம்.  சமீபத்தில் இப்படிதான் பாருங்கள், VR மாலில் refrigerator  வாங்கச் சென்று (அது தனி கதைங்க...  அதை ஒரு வியாழனில் பார்க்கலாம்) நம்ம வீட்டு வசந்த பவனில் சாப்பிட்டேன்.  தோசை, இட்லி, சப்பாத்தி, எல்லாம் நல்லாத்தான் இருக்கு...  குருமாவும், சாம்பாரும், சட்னியும்தான் சுவையில்லை.  

ஏனோ இந்த மெதுவடை வீட்டில் செய்தால் கஞ்சி போட்டு அயன் செய்யப்பட்ட கர்ச்சீஃப் மாதிரி வரும்.  முன்னர் ஒருமுறை வடை செய்யும் மெஷின் மார்க்கெட்டுக்கு வந்துள்ளது என்றதும் எங்கே கிடைக்கும் என்று பாய்ந்தவர்களில் நானும் ஒருவன்.  குறையொன்றுமில்லை தளத்தில் என்று நினைவு.  எங்களுக்குத்தான் வடை சரியாக, நல்ல ஷேப்பில் வராது என்று நினைத்தால் இன்னும் சில நண்பர்களும் 'எனக்கும்' என்று சொல்லி இருந்தார்கள்!  ஊ..ஹூம்..  யார் யாரென்று நான் காட்டிக் கொடுக்க மாட்டேன்.  கடைசியில் நான் மெஷின் வாங்கவில்லை என்று வைத்துக் கொள்ளுங்கள்!

ஒரு நிமிஷமுங்க...   இன்னிக்கி அக்டோபர் ரெண்டுங்களா...  காந்தி ஜெயந்தி..  லால்பகதூர் சாஸ்திரி பிறந்த நாள் (இதை மட்டும் ஏன் ஜெயந்தின்னு சொல்றதில்லை?)  பெருந்தலைவர் நினைவுநாள்.

எபி ஒண்ணும் சொல்லலைன்னு யாராவது வருத்தப்பட  போறாங்க..  காந்தி நாமம் வாழ்க...  சாஸ்திரி போல ஒரு துணிவுள்ளவரை இனி நாம் காண்போமா?  பெருந்தலைவர் மாதிரி ஒரு தலைவரை தமிழகம் இனி காணுமா?

சரியா..   வாங்க வடைகிட்ட போவோம்..  அப்புறம் வடைபோச்சேன்னு வடிவேலு மாதிரி வருத்தப்பட வேண்டியிருக்கும்.  எங்க விட்டேன்...  ஆ..  முந்தின பாராவுக்கு முந்தின பாராவுக்கு படத்துக்கு மேலே முந்தின பாரா...

மெதுவடை சாப்பிடும்போது மசால் வடை சாப்பிட மாட்டேன்.  அது பிறிதொரு நாள்!  தனித்தனியாகத்தான் ரசிக்கணும்!  ஆனால் நல்ல கடையைக் கண்டு விட்டால் (அதுதானே சிரமம்!) விடக்கூடாது.  அந்த 'பிறிதொரு'நாளில் சுவைத்துவிட வேண்டும்!  நிச்சயமாக நம்ம ஏரியாவில் அமையாது.  கஷ்டகாலம்.  ஒரு வடைக்காக எவ்வளவு தூரம் போகமுடியும், சொல்லுங்கள்!  இதில் என்னென்ன சிரமங்கள் எல்லாம் இருக்கிறது என்பது உங்களுக்குத் புரிய வேண்டும் என்பதால் சொல்கிறேன்.

அதிலும் மசால் வடை இரண்டாம் பட்சம்தான் எனக்கு.  அதற்கு தொட்டுக்கொள்ள தேவையே இல்லை.  மசால் வடையைப் பொறுத்தவரை சூடாகச் சாப்பிட்டாலும் ரசிக்கலாம், ஆறி சாப்பிட்டாலும் ரசிக்கலாம்.  ஆனா ஒண்ணுங்க...  என் செல்லம் மெதுவடையை ஆறிப்போய் மட்டும் சாப்பிடவே சாப்பிடாதீங்க...  அது ரொம்ப வருத்தப்படும்.  Insult ஆக நினைக்கும்!  நான் மாட்டேன்.   சூட்டில் இருக்கு சூட்சுமம்.  ஆனா நிறைய பேருக்கு ஏனோ மசால் வடைதான் முதலிடம்.

அலுவலகத்தில் தயிர்சாதம் அல்லது சாம்பார்சாதம் மதிய சாப்பாடு கொண்டு வருபவர்கள் மசால்வடையை வாங்கி ஆறிப்போயிருந்தாலும் பரவாயில்லை என்று கடிப்பார்கள்.  இதை ஆமைவடை என்று அழைப்பதில் எனக்கு விருப்பமில்லை!  ஆனால் வீட்டு விசேஷங்களில் செய்யும்போது இதை அப்படிதான் சொல்வார்கள்.  கைக்கு அடக்கமாக குட்டியாக ஒரு வடை கல்லு போல, பரிமாற ஆரம்பிக்கும்போதே மூன்றாவது அல்லது நான்காவது ஐட்டமாக இலையில் வந்து விழும்.  அதை கடமையே என்று சாப்பிட்டு விடவேண்டும்.  வேண்டுமானால் ஒன்று செய்யலாம்.  ரசத்தை ஒரு கப்பில் வாங்கி அதில் அதை ஊறப்போட்டு சாப்பிடலாம்.

நாம் எல்லோருமே நம் சுவைகளுக்கு ஒரு ஒரு... ஒரு...  ஏதோ ஒரு மார்க்.... என்ன சொல்ல..  சரியான வார்த்தை சிக்கவில்லை.  மனதில் இருக்கிறது வெளியே வரமாட்டேன் என்கிறது அந்த வார்த்ததை!  ஒரு ஒரு..  அடையாளச்சுவை வைத்திருப்போம்.  அந்த வகையில் நந்தம்பாக்கத்தில் கடை வைத்திருந்த நடராஜன் கைமணத்துக்கு ஈடாகாது..  அது மெதுவடையானாலும், மசால் வடையானாலும்.

அதுபோல புளிக்காய்ச்சலுக்கு நான் சுகுமாரைத்தான் சொல்வேன். 76 வயது சுகுமாரால் இப்போது அதே கைமணத்துடன் செய்ய முடியவில்லை என்பது என் மெகா சோகம்.

சிலர் மசால் வடையை காய்ந்து போன வரட்டி போல செய்திருப்பார்கள்.  லேசான ஈரப்பதத்துடன் வெங்காயம், மசால் வாசனையுடன் கிடைக்கும் மசால் வடையே மசால் வடை.  இதை பக்கோடாவுக்கும் சொல்லலாம்.  முன்பு மாதிரி தரமான ஆனியன் பகோடா எங்குமே கிடைப்பதில்லை.

ஆனா அடிக்கடி தோணும்ங்க..  யாருங்க இதை எல்லாம் கண்டு பிடிச்சது?  நேற்று கூட பாருங்கள்... மதுரையில் கொட்டாங்கச்சியில் இட்லி மாவு ஊற்றி சிரட்டை இட்லி என்று விற்கிறார்களாம்.  மதுரைக்காரர் சுவையைப் பற்றி தனியா நிறைய எழுதலாம்.

ஆமாம்...  கீரைவடை சாப்பிட்டிருக்கிறீர்களோ....