மெழுகு பொம்மைகள்

 

சென்ற வாரம் யாரும் எங்களை கேள்விகள் கேட்கவில்லை. 

எனவே நாங்கள் சில கேள்விகள் கேட்கிறோம். 

பதில் பதியுங்கள் 

1) உங்கள் வீட்டில் இன்னமும் மின்சார இஸ்திரிப் பெட்டி உள்ளதா? பயன்படுத்துகிறீர்களா? 

2) தபால் அலுவலக பொருட்களை / சேவைகளை இப்பொழுதும் பயன்படுத்திக் கொள்கிறீர்களா? 

3) நீங்கள் மிகவும் விரும்பி வாங்கி, பயன்படுத்தாமல் இருக்கும் பொருட்கள் எவை? 

= = = = = = = =

KGG பக்கம்: 

JTS படித்த காலத்தில் என்னுடைய படைப்பாற்றல் திறன் மேம்படுத்தப்பட்டது என்று சென்ற வாரம் எழுதியிருந்தேன். 

எப்படி என்று இந்த வாரம் பார்ப்போம். 

அங்கு தொழிற்கல்வி சொல்லித் தரப்பட்டது. Carpentry, Moulding/Foundry, Smithy, Fitting, Welding - இவை  முதல் ஆண்டில். 

அடுத்த இரண்டு ஆண்டுகளில் Machineshop & one elective practical. 

முதல் ஆண்டில் முப்பது பேர் படித்தோம். அடுத்த ஆண்டில் 5 பேர் fail ஆனதால், 25 பேர் படித்தோம். அதற்கும் அடுத்த இறுதி ஆண்டில் 18 பேர் படித்தோம். 

மாணவர்கள் குறைவாக இருந்ததால் - வெவ்வேறு elective என்று இல்லாமல், எல்லோருக்கும் ஒரே elective கொடுக்க வகுப்பு ஆசிரியர் பரிந்துரைத்தார். அதிக risk இல்லாத Moulding & Foundryயை எங்களுக்காக அவர் பரிந்துரை செய்தார். 

அதுவரை படம் வரைவதில் இருந்த என் ஆர்வம், moulding & foundry பக்கம் திரும்பியது. 

உடனே ஒரு பிரமாதமான யோசனை உதித்தது. 

விநாயகர் சதுர்த்திக்கு பூஜை செய்த களிமண் பிம்பத்தை மறுநாள் நீரூற்றி பக்குவமாக சப்பாத்தி மாவு பதத்திற்குக் கொண்டு வந்தேன். வீட்டில் அப்பா பூஜை செய்யும் உலோக விக்கிரகங்களில்  இருந்து அச்சு தயார் செய்து, அதில் மெழுகை காய்ச்சி ஊற்றி, மெழுகு சிலை செய்தேன். அழகான விநாயகர் மெழுகு பொம்மைகள் பல செய்தேன். சூப்பர் சக்ஸஸ் ! 

ஐந்து பைசாவுக்கு வாங்கிய மெழுகுவர்த்தியை உருக்கி, மூன்று பிள்ளையார் பொம்மைகள் உருவாக்கினேன். ஒவ்வொன்றையும் பத்து பைசாவுக்கு விற்று, ஐந்து பைசாவை முப்பது பைசா ஆக்கினேன்! 

நான் தயாரித்த மெழுகு சிலைகளைப் பார்த்த என் வகுப்பு நண்பன் தண்டபாணி, அதனால் உந்தப்பட்டு, என்னிடம் டெக்னாலஜி தெரிந்துகொண்டு, அவனுடைய வீட்டில், சீதாப்பழம், மாவடு எல்லாம் அச்சாகப் பயன்படுத்தி, மெழுகு பொம்மைகள் உருவாக்கினான். 

வீட்டில் இருந்த night lamp transformer லிருந்து இணைப்பு கொடுத்து, ஒரு லாட காந்தம், அதன் மீது சுற்றப்பட்ட காப்பிட்ட கம்பிச் சுருள் மூலம், எளிய மின்சாரமணி தயார் செய்தேன். 

அண்ணன் எனக்குக் கொடுத்த விளையாட்டு எலெக்ட்ரிக் மோட்டார் ( கார் அல்ல மின்சார மோட்டார்) கொண்டு, விளையாட்டு வண்டியின் மரச்சக்கரத்தை அதில் பொருத்தி, வண்டிச்சக்கரத்தின் சுற்றிலும் உப்புத்தாள் ஒட்டி, grinding machine model உருவாக்கினேன். 

அண்ணன் சொல்லிக்கொடுத்த, + கொடுத்த germanium டயோடு, transistor (triode ) tuning condenser எல்லாம் உபயோகித்து, சிறிய ரேடியோ உருவாக்கினேன். (ஆனால் இது நாகையில் வேலை செய்யவில்லை; சென்னை வந்து சேரந்தபின் இதே ரேடியோவை மீண்டும் செய்து - ஒரு ரூம் முழுவதும் கேட்கும் அளவுக்கு ஒரு ரேடியோ செய்தேன்) 

எதற்கு எல்லாவற்றையும் இங்கே சொல்கிறேன் என்றால், தொழிற்கல்வி படிப்பு & Engineering படிப்பு எந்த அளவுக்கு என் படைப்பாற்றல் திறனுக்கு தீனி போட்டது என்பதை பதிவு செய்வதற்குத்தான். 

= = = = = = = = = = =

அப்பாதுரை பக்கம் : 

அப்பப்பா!

ஜான் மஸ்டின்.

1969. ஜூன் 28. கொனிடா  நகர ஒலிம்பியா தியேடரில் ஞாயிறு மேட்னி காட்சியில் தன் அபிமான நாயகன் ஸ்டீவ் மக்வீனின் தாமஸ் க்ரௌன் படம் இரண்டாவது முறையாக உள்ளார்ந்து அனுபவித்துப் பார்க்கையில் ஒரு தீர்மானத்துக்கு வந்திருந்தான் ஜான் மஸ்டின். தானும் அதே போல் ஒரு கொள்ளை அடித்து சாதுர்யமாகத் தப்பிவிட வேண்டுமென்று. முப்பதாம் தேதி திங்கட்கிழமையன்று வழக்கம் போல் தன் வங்கி வேலைக்குச் சென்ற ஜான், வேலை முடியும் நேரம்,  ஜூலை முதல் வாரச் சம்பளக் காசோலை மாற்ற வரும் வாடிக்கைக்காக வைத்திருந்த பணத்திலிருந்து ஒரு லட்சம் டாலரை இதற்காகவே கொண்டு வந்திருந்த உள்சட்டை போன்ற பையில்  சுருட்டிக் கொண்டான்.  மேல் சட்டையை அணிந்து ஓசைப்படாமல் வங்கியை விட்டு வெளியே வந்தான்.  காணாமல் போனான். 

ஹென்ரி லாரன்ஸ்.

1969. ஜூலை 2. அன்று  காலை வேலைக்குச் சேர்ந்திருந்தான் ஹென்ரி. போலீஸ் அகாடெமியில் அதிக மதிப்பெண் பெற்றதால் சமீபத்தில் நாடளாவ வளரத் தொடங்கியிருந்த FBI நிறுவனத்தின் கொனிடா நகரக் கிளைக்கு முதல் சிஐடியாக வந்திருந்த இருபத்து மூன்று வயது ஹென்றியை அழைத்தார் உயரதிகாரி சார்ல்ஸ். உள்ளூர் கோவாபரெடிவ் வங்கியில் ஒரு லட்சம் டாலர் கொள்ளை போன விவரத்தைச் சொல்லி "ஜான் மஸ்டினைக் கண்டுபிடி" என்றார்.  எழுந்து போலீஸ் கான்டீனில் புதிதாக வாங்கியிருந்த கலர் டிவியின் அதிசயத்தைப் பார்க்கப் போனார். 

நீல் ஆர்ம்ஸ்ட்ராங்.

1969. ஜூலை 11.  சந்திரனில் காலடி பதித்தான் மனிதன் என்ற பெருமையை அமெரிக்காவுக்குத் தந்தார் கொனிடா நகர மைந்தன். எங்க வீட்டுப் பிள்ளை என்று ஒரு வருடத்துக்கு மேல் நீல் ஆர்ம்ஸ்ட்ராங்கைக் கொண்டாடிய ஊரும் நாடும் ஜான் மஸ்டினை ஒரே வாரத்தில் மறந்து போனது.

டாம் க்ரேடில்.

1970. ஆகஸ்டு பதினாறு. கலிபோர்னியாவின் பெர்க்லி பல்கலையில் எம்பிஏ படிக்க வந்த டாம் அமைதியான மாணவன் என்ற பெயரெடுத்திருந்தான். இரண்டு அடுக்கு தள்ளி அமர்ந்திருந்த விக்டோரியாவுக்கு அமைதியான மாணவர்களும் அல்வாவும் மிகவும் பிடிக்கும் என்பது தெரியாமல்.

விக்டர் ஆஸ்வால்ட்.

1971. டிசம்பர் 12. ஒஹயோ மாகாண fbi அதிகாரி. சிகாகோவுக்கு கார் கடத்தும் கும்பலைப் பிடிக்கும் முயற்சியில் தன் இரண்டு துணை அதிகாரிகளையும் துப்பாக்கிச் சூட்டில் பலி கொடுத்தார்.  கொனிடாவிலிருந்து  உதவிக்கு வந்திருந்த ஹென்ரி லாரன்ஸ் என்ற ஏஜன்டை உடனடியாக பதவி உயர்த்தி துணை அதிகாரியாக நியமித்து தன்னுடன் டேடன் நகரத்துக்கு மாற்றலாகி வரச் சொன்னார். "வங்கிக் கொள்ளை..." என்று தயங்கிய ஹென்ரியை தோள் தட்டி  "இது பெரிய பதவி.. ரெண்டு வருசத்துல ஒரு பல்லியைக் கூட உன்னால பிடிக்க முடியல.. அப்படியும் உனக்கு ப்ரமோஷன்.. சாமர்த்தியமாக இரு.. வங்கிக் கொள்ளையை வங்கியே மறந்துபோச்சு கண்ணா" என்று அடக்கினார். 

"என் ஓய்வு நேரத்தில் வங்கிக் கொள்ளையை விசாரிக்க அனுமதி கொடுத்தால் இந்த பதவி உயர்வை ஏற்கிறேன்" என்ற ஹென்ரியை ஏற இறங்க பார்த்த விக்டர் இணங்கினார். "அசடுகள் ஆயிரம் ரகம்" என்றார்.

விக்டோரியா க்ரேடில்.

1974. பிப்ரவரி 14. வேலன்டைன் (காதலர்) தினத்தன்று கல்யாணம் செய்த களிப்பில் கணவனைக் கட்டிக் கொண்டிருந்தாள் விக்டோரியா.  "க்ரேடில் என்ற பெயர் எனக்குப் பிடித்திருக்கிறது. சீக்கிரம் தொட்டில் போடுவோமா?" என்றாள். சிரித்த டாம் தாடியைத் தடவியபடி தொப்பியை சரி செய்து கொண்டான். 

"கிட்டத்தட்ட அஞ்சு வருசமா பழகறோம்.. நீ எப்பவுமே தாடியும்  தொப்பியுமா இருக்கியே? கழட்ட மாட்டியா?" என்றாள். 

இடவலமாகத் தலையாட்டிச் சிரித்தான் டாம். 

"தொட்டில் போடுற சமாசாரத்துக்குத் தொப்பியை எடுப்பே இல்லே?" என்று நெருக்கினாள் வி.

மேலும் கீழும் தலையாட்டிச் சிரித்த டாம் "தொப்பி மட்டும் கழட்டுனா போதுமா?" என்றான்.

"இந்தச் சிரிப்பும் தாடியும் எனக்குப் பிடிச்சிருக்கு. ஐ லவ் யூ டாம்" என்று மேலும்  நெருக்கினாள்.

ஏஞ்சல் லாரன்ஸ்.

1976. மார்ச் 20.  அப்பொழுது தான் தாயிடமிருந்து வெளிவந்து  சுத்தபடுத்தப்பட்டு அழகாக அழுதாள் ஏஞ்சல். "என்னைப் பிடிக்கலே போல" என்றபடி நீட்டிய மருத்துவரிடமிருந்து கவனமாக வாங்கிக் கொண்ட ஹென்ரி தன் குழந்தையின் முதல் தொடலில் சிலிர்த்தான். கடவுளே, இது எப்பேற்பட்ட அனுபவம்!  கட்டிலில் சோர்ந்து கிடந்த மனைவியை எழுப்பி சிறு நடனமாடத் துடித்தான்.

பவர் க்ரேடில்.

1977. டிசம்பர் 25.  வீடெங்கும் தன் முதல் பிறந்த நாளுக்காக அலங்காரம் செய்திருப்பது புரியாமல் அங்கேயும் இங்கேயும் தவழ்ந்து கையில் சிக்கிய எல்லாவற்றையும் பிடித்து இழுத்துக் கொண்டிருந்தாள் குழந்தை பவர். இதைப் பார்த்துச் சிரித்துக் கொண்டிருந்த  கணவனை அதட்டினாள் விக்டோரியா. "குழந்தையைக் கவனிங்க புரபசர் டாம்" என்றாள்.  லின்பர்க் நகர கலைக்கல்லூரியில் புதிதாக சீனியர் லெக்சரர் வேலைக்குச் சேர்ந்திருந்த கணவனை செல்லமாக இடித்தாள். "இனியாவது தொப்பியைக் கழட்டி ஷேவ் பண்ணுங்க புரபசர்" என்றாள்.  "நெவர்" என்று சிரித்தான் டாம்.

விக்டர் ஆஸ்வால்ட்.

1989. அக்டோபர் 31. துணை அதிகாரியை  அழைத்த விக்டர், "ஹென்ரி, இருபது வருடங்களாகத் தீர்க்க முடியாத குற்றப் பட்டியல் இது. விவரம் சரி பார்த்துச் சொல். விசாரணையை நிறுத்தி கோப்புகளை சேமிப்புக்கு அனுப்பும் உத்தரவைப் படித்துக் கையெழுத்திடு" என்றார். "நானும் கையெழுத்திட்டு அனுப்ப வேண்டும்".  

கொனிடா வங்கிக் கொள்ளை அந்தப் பட்டியலின் முதல் ஐந்தில் இருப்பதைப் பார்த்த ஹென்ரி மனதுள் வெதும்பி கையெழுத்திட்டுக் கொடுத்தான். 

ஏஞ்சல் லாரன்ஸ்.

1992. மார்ச் 20. பதினாறாவது பிறந்த நாள் கொண்டாட்டத்தில் மும்முரமாக இருந்தாள் ஏஞ்சல்.  ஆட்டம் பாட்டு இடையே கேக் வெட்டினார்கள்.  ஹென்ரியைப் பேச அழைத்தார்கள்.  "உன் பெண் உன்னைப் போலில்லாமல் அழகாகவும் அறிவோடும் இருக்கிறாள்" என்ற விருந்தினர்களை முறைத்தான் ஹென்ரி.  நமக்குத் தெரிந்த இன்னொரு போலீஸ் அதிகாரி சவுத்திரி போலவே கம்பீரமாக நின்ற ஹென்ரி, அனாவசியமாக அலட்டாமல் இயல்பாக, "என்னைப் பார்த்து என்னை வெல்ல என் பெண் வளர்ந்திருக்கிறாள்" என்றான். "பூ" என்றனர் அனேகர். "வீட்டில் இன்னொரு போலீஸ் அதிகாரியா? சோதனை மேல் சோதனையா? போதுமடா சாமி" என்றனர்.

"சின்ன வயசுலயே அம்மாவை இழந்த எனக்கு எல்லாமே என் அப்பா தான்" என்று ஹென்ரியின் கை கோர்த்த ஏஞ்சல், "நான் படித்து பட்டம் பெற்று நிச்சயம் fbi தான் சேருவேன். வெற்றி பெரும் அதிகாரியாக வருவேன்" என்றாள் தன் தந்தையின் கைகளை அழுத்தி. அடிக்கடி அவளுக்குச் சொன்ன கொனிடா கதையின் விளைவைப் புரிந்து கொண்டான் ஹென்ரி.

விக்டோரியா & பவர் க்ரேடில்.

1999. டிசம்பர் 25. சிகாகோ விமான நிலையத்தில் பாரிஸ் போக விடைபெற்றார்கள் தாயும் மகளும்.  "நீ ஏன் வரலேனு புரியவே மாட்டேங்குது" என்று சிணுங்கிய மகளைத் தட்டிக் கொடுத்தான் டாம். "விமானம் என்றால் எனக்கு பயம் என்று உனக்குத் தெரியாதா? அதனால் தானே நாம உள்நாட்டுல ஆயிரம் மைலானாலும் கார்ல சுத்தினோம்? அம்மாவோட போய் பாரிஸ் பாரு.  நல்லா சுத்திட்டு வா" என்றான் டாம்.  

"பிஸினஸ் க்லாஸ் டிகெட், ரிட்ஸ் ஹோட்டல்.. எங்களுக்காக இத்தனை செலவு செய்து.. உன் துணையில்லாம.." என்ற மனைவியை அணைத்துக் கொண்டான் டாம். "மெரி க்ரிஸ்மஸ்" என்றான்.

ரூடி ஜூலியானி.

2001. செப்டம்பர் 11. ந்யூயார்க் நகரத் தாக்குதல் தொடர்ந்த அவசர நிலைக்கு அமலாக்கத் தலைவராக யாரை அழைப்பது என்று கவர்னர் ஜூலியானி தேடிய போது பெரும்பான்மையானோர் சிபாரிசு செய்த பெயர் ஹென்ரி லாரன்ஸ். தேடிப் பிடித்து வரவழைக்கப்பட்ட  ஹென்ரி, கவர்னர்  ஜூலியானிக்கு வலதுகரமாகச் செயல்பட்டு இரண்டே மாதங்களில் தீவிரவாதத் தடுப்பு இலாகாவிற்கு மாற்றலாகி வாஷிங்டன் வாசியானான். மனதின் ஓரத்தில் வலி இருப்பதை மறக்க முடியவில்லை அவனால். எத்தனை சாதனை எத்தனை வெற்றி என்றாலும் முதல் கேஸ் முடியாத கேஸாகி நிற்கிறதே?!  

பவர் க்ரேடில்.

2012. மே 6. டென்வர் பல்கலை பட்டமளிப்பு விழா முடிந்ததும் ஓடி வந்து  பெற்றோரை அணைத்துக் கொண்டாள் பவர். "Doctorate in Criminal Justice" என்ற பட்டத்தைக் காட்டினாள். பெருமையுடன் வளாகத்தில் உடன் இருந்த பத்து பதினைந்து பேரை ஒவ்வொருவராகத்  தன் பெற்றோருக்கு அறிமுகப்படுத்தினாள்.  "அப்பா.. இவங்க பேரு ஏஞ்சல் லாரன்ஸ். FBI ஜூனியர் field agent. இவங்க கூடத்தான் என் post doctoral ஆய்வு வேலை" என்றாள். 

ஹென்ரி லாரன்ஸ்.

2014. நவம்பர் 24. "Happy thanksgiving dad. Thank you for everything you have done for me" என்ற மகளைப் பெருமையுடன் பார்த்தான் ஹென்ரி. அவளுடன் வந்திருந்த அழகான பெண், "என் பெயர் பவர் க்ரேடில். க்ரிமினல் ஜஸ்டிஸ்ல பிஎச்டி  படிச்சுட்டு உங்க பெண் துணையோட post doctoral ஆய்வு பண்ணிட்டிருக்கேன்" என்றாள். 

"உங்க பெற்றோர் என்ன பண்றாங்க?"

"அம்மா இறந்து ஆறு மாசமாகுது. அப்பா ரிடையர்ட் புரபசர். இந்த மாசம் தான் ரிடையர் ஆனாரு"

"அப்படியா? நானும் டிசம்பர்ல ரிடையர் ஆறேன்"

."ஓ டேடி.. சொல்லவே இல்லையே.." 

"அறுபத்தெட்டு வயசாயிடுச்சேமா ஏஞ்சல்.. ஹூ நீட்ஸ் மி?" 

"அப்படிச் சொல்லாதிங்க.." என்றாள் பவர். "உங்களைப் பத்தி ஏஞ்சல் நிறைய சொல்லியிருக்கா. நான் எடுத்துட்டிருக்குற ஆய்வில, சொல்லக்கூடாது ஆனாலும் சொல்றேன், நீங்க பாத்த முதல் கேஸும் அடக்கம். முழு ஆய்வுக்கான எல்லா அனுமதியும் கிடைக்க சில வருடங்களாகலாம்"

"ஆமாப்பா. பவர் நம்ம ப்ராக்ஸி. ஏதாவது கிடைச்சா விடமாட்டோம்" என்றாள் ஏஞ்சல்.

டாம் க்ரேடில்.

2017. ஜனவரி 2. விடுமுறைக்காக வந்த மகளை அழைத்துப் பேசினான் டாம். "பவர். உன்னிடம் இரண்டு அதிர்ச்சி தரும் செய்திகள் சொல்லப் போறேன்" என்றான்.

"என்னப்பா சொல்றிங்க?"

"எனக்கு நுரையீரல் கேன்சர் டெர்மினல் ஸ்டேஜ்" என்ற டாம் மருத்துவ சீட்டுக்களைக் காட்டினான். "இன்னும் சில வாரங்களோ மாதங்களோ தான் இருப்பேன்"

"அப்பா।"

"பரவாயில்லைமா. நான் நன்றாகவே வாழ்ந்தேன். என் வாழ்வை வளப்படுத்திய உனக்கும் விக்டோரியாவுக்கும் அந்த மேரிமகனுக்கும் எத்தனை நன்றி சொன்னாலும் போதாது. உன்னிடம் மறைச்சதுக்கு மன்னிச்சுடுமா.  அதற்குக் காரணம் உண்டு"

"என்னப்பா"

"என் பெயர் டாம் க்ரேடில் இல்லைமா. என் அசல் பெயர் ஜான் மஸ்டின். நான் பிறந்து வளர்ந்த ஊர் கொனிடா. விளையாட்டா ஒரு நாள் தாமஸ் க்ரௌன் படம் பார்த்துட்டு நான் வேலை பார்த்த கோவாபரெடிவ் வங்கியிலிருந்து.." என்று டாம் சொல்லச் சொல்ல பவருக்குத் தலை சுற்றியது.

[6:07 am, 04/12/2023] Appadhurai: வால்:

இதற்குப் பிறகு என்ன நிகழ்ந்தது என்பதும் டாம் எப்படியெல்லாம் தன்னை அடையாளம் காட்டாமல் ஐம்பது வருடங்களுக்கு மேல் வாழ்ந்தான் என்பதையும்.. டாமின் தாடியும் தொப்பியும் அவன் ஏன் பாரிஸ் வரவில்லை என்பதை பவரும் ஏஞ்சலும் அலசுவதும்..  குற்றவாளியும் அவனைத் தேடிய போலீசும் அவர்களுடைய பிள்ளைகளால் சேரும் விதி பற்றியும், ஓ.. டாம் என்ன ஆனான், கொள்ளைப் பணம் என்ன ஆனது என்பதும்...   படு சுவாரசியமென்றாலும் பதிவுக்கு அனாவசியம் என்பதால் உங்கள் கற்பனைக்கு விட்டு விடுகிறேன். 

வால் வால்:

கற்பனையாவது கழுதையாவது விவரத்தை சொல்லப்பா என்பவர்களுக்காக. இது உண்மைச் சம்பவத்தை ஒட்டி எழுதியது. பதிப்புரிமை தனியுரிமை கருதி அசல் podcast பெயர் சொல்லப் போவதில்லை.  "My Father, A Bank Robber" என்ற ரீதியில் தேடினால் அசல் apple podcast கிடைக்கும்.  செய்தி மட்டும் போதுமென்றால் "thomas readle jack conrad bank robber" என்று தேடுங்கள் கிடைக்கும். விவரங்கள் விறுவிறுப்பாக சுவாரசியமாகப் போகும், இப்போதே சொல்லி விடுகிறேன்.

== = = = = = =