"திங்க"க்கிழமை : "என்ன மெனு?"

 வீட்டில்தான் திடீரென விருந்தினர் வந்தால் ரவா உப்புமா செய்வோம் என்றால், முந்தா நாள் சனிக்கிழமை கும்பகோணம் செல்ல காரில் அதிகாலை கிளம்பினால், ரோடெல்லாம் வாகன வெள்ளம்.  கிறிஸ்துமஸ், புத்தாண்டு விடுமுறை மற்றும் கொண்டாட்டங்களுக்காக மக்கள் சென்னையை விட்டு அவரவர் ஊருக்கு உற்சாகமாக சென்று கொண்டிருந்தார்கள். 

டிஃபன் சாப்பிடும் நேரம் ஹோட்டலெல்லாம் வெயிட்டிங் லிஸ்ட்.  நாங்கள் சென்ற ஓட்டலில் சரக்குகள் தீர்ந்து விட்டன போலும்.  இருக்கும் மாவில் காசு பார்க்க, தோசை மட்டும் போட்டு, அதனுடன் ரவா கிச்சடி - அதாங்க ரவா உப்புமா - போட்டு காசு பார்த்துக் கொண்டிருந்தார்கள்!

எங்கள் வீட்டுக்கு விருந்தினர் வரும் சமயம் நாங்கள் வித்தியாசமாய் செய்ய முயற்சிப்போம்.  அவ்வப்போது ஹோட்டலில் கொடுக்கும் 'தாலி' உணவு வகை போல மதிய சாப்பாடு தயார் செய்திருக்கிறோம்.

மாமனாரின் தம்பி குடும்பம் வந்த ஒரு நாளில் இரவு சிற்றுண்டியாக நாங்கள் செய்தது இன்று பதிவாக...   

இது புதிது, நீங்கள் செய்து பாருங்கள் என்று சொல்லவில்லை.  நாங்கள் இதைச் செய்தோம் என்று பகிர்கிறேன்.  அவ்வளவுதான்.  செய்த ஐட்டங்கள் வழக்கமானவை என்றாலும் தீம் (ஓரளவு அல்லது எங்களுக்கு) புதிது என்று நினைக்கிறேன்!!!

ஹோட்டலுக்கு சென்று வெவ்வேறு ஐட்டங்கள் ஆர்டர் செய்வது போல...

முதலில் பாஸ் ஸ்விக்கியில் போட்டு விடலாம் என்றுதான் சொன்னார்.  மாவு கொஞ்சம் இருப்பதாக சொன்னார்.  காலை அவர்கள் வருவதற்கு முன் நாங்கள் செய்த சப்பாத்தி மாவு மிச்சம் இருந்தது.

மெனு தயார் செய்தேன், சொன்னேன்.  ஆளுக்கு இரண்டு இட்லி, இரண்டு ஊத்தப்பம் - ஒன்று ஆனியன், ஒன்று பிளெயின் - இரண்டு சப்பாத்தி என்று!

- இதில் இட்லியை வித்தியாசமாக்க முடிவு செய்தேன்.  இட்லியில் கலர் வேண்டுமென்றால் ஒரே வழிதான்.  பீட்ரூட்!  மாவு அளந்து எடுத்துக் கொண்டு அதில் ஒரு தோல் சீவிய பீட்ரூட்டையும் மூன்று பச்சை மிளகாயையும் மிக்சியில் அடித்து சேர்த்துக் கலந்தோம்.  பீட்ரூட்டின் தித்திப்பை சமாளிக்க பச்சை மிளகாய்.

இரண்டு குடை மிளகாய், இரண்டு வெங்காயம், ஒரு கேரட் எடுத்து பொடியாக நறுக்கி அளவாக உப்பு சேர்த்து அரை வதக்கல் வதக்கி கலந்த கலர் மாவில் போட்டுக் கலந்தோம்.  இட்லியாக ஊற்றினோம்.  ஒரு தேங்காய் சட்னி துணை அதற்கு.

- இரண்டு கரண்டி மாவு மிஞ்ச, அதை தோசையாய் ஊற்றி மகிழ்ந்தோம்!!

- சப்பாத்தி சதுரம், முக்கோணம் என்று (வரும்) டிசைன்களில் இட்டு  பரிமாறினோம்.  குருமா துணை அதற்கு.  அதில், அதாவது சப்பாத்தியில்  ஸ்டப்ட் முயற்சிக்கவில்லை. வேலை லொள்ளு.

- வெங்காயம், பச்சை  மிளகாய், கொத்துமல்லி பொடியாய் நறுக்கிவைத்துக்கொண்டு,  மாவை தோசைக் கல்லில் கனமாக ஊற்றி, அளவாகப் பரப்பி, வெங்காயத்தை மேலே தூவி, எண்ணெய் விட்டு, தட்டால் மூடி, அடுப்பை சிம்மில் வைத்து, போதுமான நேரம் கழித்து, தட்டை எடுத்து, ஊத்தப்பத்தைத் திருப்பாமல் அப்படியே எடுத்து தட்டில் விட்டோம்!  அதே போல அடுத்த ஊத்தப்பத்திற்கு வெங்காயம் போடாமல்!  இப்படி தட்டு போட்டு மூடி தோசையோ, ஊத்தப்பமோ ஊற்றுவது நான் என் அம்மாவிடம் கற்றுக் கொண்டது.  அம்மா எண்ணெய் செலவில்லாமல் இருக்க இந்த வழியைக் கையாளுவார்.  நான் அப்படியும் எண்ணெய் விடுவதில் குறை வைக்கவில்லை!

"ஏன் அத்திம்பேர் நடுவில் ஓட்டை போடுகிறீர்கள்?" என்றான் மைத்துனன்.  "அப்போதுதானே அதில் எண்ணெய் விட்டு நடுவில் பொன்னிறமாக்க முடியும்? என்றேன்.  "ஏன், நீங்கள் எல்லாம் தோசை நடுவில் ஓட்டை போடமாட்டீர்களா?"  என்றேன்.  "இல்லை" என்றான்.  சிலருக்கு வழக்கமில்லை போலும்!  நாங்கள் சமயங்களில் நடுவில் இடும் துளையோடு, நான்கு பக்கங்களிலும் கூட துளையிட்டு எண்ணெய் விடுவதுண்டு!  மொறுமொறுவென்று கண்ணையும் மனதையும் கவரும்!  சரி, இப்போது ஊத்தப்பங்கள் ரெடி.

மிளகாய்ப்பொடி, மதியான சாம்பார், கொஞ்சம் சட்னி துணை அதற்கு!

வயிறு நிறைந்தது.  இதுவே அதிகம் என்றனர்.  வித்தியாசமாய் இருந்தது என்றனர்.

சந்தோஷம்!

கிறிஸ்துவ நண்பர்கள் அனைவருக்கும் இனிய கிறிஸ்துமஸ் நல் வாழ்த்துகள்.