சிறுகதை : பூ வரைந்த பூ - துரை செல்வராஜூ

 பூ வரைந்த பூ

துரை செல்வராஜூ

*** *** *** *** ***

குடையாய் விரிந்திருந்த பொன்னரளிக்குக் கீழாக ஸ்கூட்டியை நிறுத்தி விட்டு - வீட்டு வாசலின் ஆனா மானாவை அழுத்தினார் சுந்தரம்.. 

அது ' தெய்வமே!.. ' என்றிருந்தது..

எங்கேயோ மின்சாரம் பிடுங்கிக் கொண்டது போலிருக்கின்றது..

' ஏதோ கருத்தரங்கம் ன்னு.. செந்தில் காலையிலயே திருச்சிக்கு புறப்பட்டு போய் விட்டான்.. ஞாயிற்றுக்கிழமை கூட வீடு தங்கற மாதிரியில்லை.. தனியார் வேலைன்னா இப்படித் தான்.. '

யோசித்துக் கொண்டே கதவைத் தட்டவும் காமாட்சியம்மாள் வந்து திறக்கவும் சரியாக இருந்தது..

உச்சந்தலை வழுக்கையில் வியர்வையுடன்  நின்றிருந்த கணவனைக் கண்டதும் ஒரு புறம் சிரிப்பு.. மறு புறம் பரிதவிப்பு..

" வெயில் ல போக வேண்டாம் ன்னு சொன்னா கேட்கணும்.. "

" காலைல காய்கறி வாங்கப் போறது நல்லது தானே... "

" நல்லது தான்..  ஆனா நடந்து போகணும் ராஜா.. நடந்து!.. "

" அதுக்குன்னு என்ன.. ஒன்ரை மைலா?.. "

" என்ன ஒன்ரை மைலா?..  குருஜி  சொன்னது ஞாபகம் இருக்கா?.. " 

"என்ன ஞாபகம் இருக்கா?.. "

" நெதமும் மூனு கிலோ மீட்டர் காலார நடக்கணும் ன்னு.. சொன்னாரா இல்லையா... "

" சொன்னார் தான்... யாரு இல்லை ன்னது!.. "

" அப்போ எதுக்கு சுக்கூட்டி?.. "

அவருக்குத் தெரியுமா..  இந்த மூனு பையையும்  தூக்கிக்கிட்டு ஒன்ரை கிலோ மீட்டர் நடக்குறது எவ்வளவு கஷ்டம் ன்னு?.. "

" இதுக்கு ஒன்னும் குறைச்சல் இல்லை.. "

கணவரின் கையில் இருந்த பைகளை வாங்கிக் கொண்ட காமாட்சியம்மாளிடமிருந்து கேள்வி..

" சொல்லி விட்டதெல்லாம் வாங்கியாச்சா.. சேப்பங் கிழங்கு வாங்குனீங்களா?.. "

" சேப்பங்கிழங்கு மார்க்கெட் லயே இல்லை.. "

" விட்டல் கடை மட்டுந்தான் உங்களுக்கு மார்க்கெட்.. "

" எலுமிச்சம் பழம்?.. "

" வாங்கியிருக்கேன்.. "

" நல்லவேளை.. சாயங்காலம் துர்க்கைக்கு வேணும்.. "

பைகளைத் திறந்து பார்த்த காமாட்சியம்மாளுக்கு அதிர்ச்சி..

" புதினா கொத்தமல்லியக் காணோமே.. மறந்துட்டீங்களா!?.. "

" அது மஞ்சப் பையில தக்காளிக்கு கீழே கிடக்கு ... சொல்லச் சொல்ல  கேக்கலை விட்டல் போட்டுட்டான்..  அக்கா ஒன்னும் கோவிச்சுக்க மாட்டாங்க.. இன்னிக்கு பிரியாணி தானே.. ன்னு சிரிக்கிறான்.. "

" உங்களோட கூட்டு தானே..  அப்படித்தான் இருக்கும்.. இருபது ரூபா புதினா கொத்த மல்லிய ஒரே நாள்ல தீர்த்துக் கட்றதுக்கு நாம என்ன கல்யாண பிரியாணியா செய்யப் போறோம்!..  அதை எல்லாம் விட்டுட்டது விட்டலுக்குத் தெரியாதா?.. "

" ஏன் தெரியாம.. விட்டலுக்குத் தெரியாததும் உண்டா!... '

- என்றவர் பின்கட்டை நோக்கி நடந்தார்.. 

" எங்க போறீங்க?.. "

விரலைக் காட்டினார்..

" தோட்டத்துல உள்ளதுக்குப் போங்க... "

" ஏன்.. இங்கே என்ன ஆச்சு?.. "

"  திருப்புளியும் கையுமா வித்யா உள்ள போயிருக்கு.. "

" எதுக்கு?.. "

" அந்தத் துணி போடற கம்பிக் குழாய் ஸ்குரு கழண்டு போய்க் கிடக்குல்ல... அதை சரியா முறுக்கறதுக்குத் தான்!.. "

" இதையெல்லாம் ஏன் அந்தப் பொண்ணு செய்யுது?.. "

" நான் சொல்றத எல்லாம்  நீங்க கேக்கறீங்களா?.. "

" இல்லையே!.. " - சுந்தரத்திட்ம் சிரிப்பு..

" அப்புறம் என்ன?.. " 

" ஏன் அத்தை.. நானும் உங்க பேச்சைக் கேட்கறது இல்லையா!?.. " 

செல்லக் கோபத்துடன் குளியல் அறையிலிருந்து வெளியில் வந்தாள் வித்யா..

கையில் திருப்புளி..

" இல்லேம்மா.. சும்மா பேசிக்கிட்டோம்.. நீ இந்த வீட்டு மருமகளா வந்து மூனு மாசம் தான ஆவது.. நானும் அவரும்  இப்படித் தான்.. எல்லா சோசியரும் சொல்வாங்க.. ரெண்டு பேருக்கும் ஏழாம் பொருத்தம் ன்னு.. செந்திலும் சரண்யாவும் எப்படித் தான் பொறந்தாங்களோ தெரியலை!.. "

" அது பாட்டுக்கு அது.. இது பாட்டுக்கு இது!.. " - 

வித்யா வாய் விட்டு சிரித்தாள்...

காமாட்சியம்மாளிடம் வெட்கம்  -  " மருமக பொண்ணு  இருக்கறப்போ பேசற பேச்சா இது!?.. "

" இதெல்லாம் ஒரு சந்தோஷம் காமாட்சி.. சந்தோஷம்.. "

" நல்லா வந்திச்சு சந்தோஷம்!.. "

" அதுசரி.. உனக்கேம்மா இந்த வேலை எல்லாம்?.. பிளம்பரை வரச் சொன்னா போச்சு.. " சுந்தரத்தின் கேள்வி..

" அப்படியே வரச் சொல்லிட்டாலும்... " காமாட்சியம்மாளுக்கு முனுக் என்று வந்தது..

" இந்த வேலைக்கெல்லாம் பிளம்பரா?.. ஐநூறு கொடு.. ஆயிரங் கொடு ன்னு நிப்பாங்க.. இருந்த மூனு ஸ்க்ரூவுல ரெண்டு சின்னது.. ரெண்டையும் கழட்டிப் போட்டுட்டு வேற மாத்துனேன்.. இப்போ போய்ப் பாருங்க... "

" இந்த ஸ்குரூ ஆணி சுத்தியல் வேலை எல்லாம் உனக்கு எதுக்கும்மா.. ஒரு சமயம் போல இருக்காது..  இது தெரிஞ்சா சாயங்காலம்  வந்ததும் அவன் தாண்டிக் குதிப்பான்.."

மாமனாரின் அன்பு கண்ட வித்யா மனம் குளிர்ந்து சிரித்தாள்..

" இதெல்லாம் சாதாரணம் மாமா... அப்பாவோட வண்டிய நானே கழட்டி மைனர் ரிப்பேர் பார்த்து அசெம்பிள் பண்ணிடுவேன்!.. "

சுந்தரம் வியப்புடன் பார்த்தார்..

" வீட்ல  டூல்ஸ் வாங்கி வெச்சிருக்கோம்.. அப்பா வண்டிக்கு டயர் டியூப் நானே மாத்திடுவேன்..  பிரஷர் ஹோஸ் வச்சு வாட்டர் வாஷ் பண்ணி ஆயில் சேஞ்ச் பண்ணிடுவேன்.. "

காமாட்சியம்மாளுக்கு மூக்கின் மேல் ஆச்சர்யம்..

" நீ அக்கௌண்டன்ஸி தானே படிச்சே.. "

" ஆமாம்!.. "

" இதெல்லாம் செய்வேன்னு சொல்றியே.. எப்படி?.. "

" என் பிரெண்டோட அப்பா டூ வீலர் வொர்க்‌ ஷாப் வெச்சிருக்கார்..  அங்கே போறப்ப எல்லாம் கொஞ்சம் கொஞ்சமா பழகிக்கிட்டேன்.. "

" இந்த விஷயத்தை அப்போ சொல்லலையே!.. "

சுந்தரத்திடம் வியப்பு..

" சொல்ல வேணாம்.. ன்னுட்டாங்க.. "

" ஏன்?.."

" பசங்கள மாதிரி பொண்ண வளர்த்து வெச்சிருக்காங்க.. ஆம்பிளத் தனமா இருக்கும் ன்னு ரிஜக்ட் பண்ணிடுவீங்களோ.. ன்னு பயந்தாங்க.. "

" நல்ல பொண்ணுமா!.. "

" அக்கா வெகுளியா இருந்தா.. பசங்க இல்லாத வீடு ன்னு  நான் தைரியமா தான் வளந்தேன்.. எங்களை எப்படி கரையேத்தறது ன்னு அப்பாவுக்கும் அம்மாவுக்கும் ரொம்பவே கவலை.. ஆனா நல்ல விதமாவே கரையேறிட்டோம்.. "

" பூ வரையும் பூங்கொடியே... " கைத்தல பேசியில் கவிதை..

கைத்தல பேசியைக் கவனித்த வித்யா ஸ்பீக்கரைப் போட்டு விட்டாள்..

" பூங்கொடி பூவையா வரையுது.. அது புல்லட்டையே பிரிச்சு மாட்டுது!.. "

சுந்தரம் நினைத்துக் கொண்டு சிரித்தார்..

" செல்லம் சாப்டாச்சா?.. "

செந்தில் தான்...

" நீங்க?... "

" சாப்டாச்சு.. இருந்தாலும் ஏண்டா வந்தோம் ன்னு இருக்கு.."

" ஏன்?... "

" மீட்டிங் பதினோரு மணிக்கெல்லாம் முடிஞ்சுடுச்சி..  லஞ்சுக்கு அப்பறம் அவனவனும் ஜோடியோட மலைக்கோட்டை முக்கொம்பு ந்னு கிளம்பிட்டானுங்க.. நாந்தான் பாவம்!.. "

" அடடா!.. " - வித்யாவுக்கு ரொம்பவும் பரிதாபம்..

" ஆமா!.. " - அங்கே செந்தில் கண்ணைக் கசக்கிக் கொண்டான்..

" சரி.. நீங்க ஒன்னு பண்ணுங்க.. "

" என்னது?.. "

"  வண்டிய திருப்பிக்கிட்டு தஞ்சாவூர்க்கே வந்துடுங்க!.. "

" வந்து?.. "

" நாம அடுத்த வாரம் கல்லணைக்குப் போவோம்.. "

" அப்பா அம்மா?.. '

"  நாம ரெண்டு பேர்.. ரெண்டு பேர் மட்டும்!.. "

" ஹையா!.. "

சட்டென இணைப்பை துண்டித்த வித்யா பேச முற்படுவதற்குள் -

" சட்டு புட்டுன்னு புறப்படுங்க.. நாங்களும் தனியாப் பேசி ரொம்ப நாளாச்சு!.. " -  என்றார் சுந்தரம்.. காமாட்சியம்மாளிடம் வெட்கம்..

வித்யாவின் சிரிப்பலைகளால் வீடு நிறைந்தது..

***