சிறுகதை : மௌனத்தின் புன்னகை.. - துரை செல்வராஜூ

 மௌனத்தின் புன்னகை..

துரை செல்வராஜூ 

*** *** *** *** ***

" அம்மா.. அகிலாண்டேஸ்வரி.. எல்லோரும் நல்லாருக்கணும்... "

ஜானகியம்மாள் மனமுருகி நின்றிருக்க - 

' நாநாவித பத்ர புஷ்பாஞ்சலீம் கற்பூர நீராஜனம் ஸமர்ப்பயாமி..

அகிலாண்ட ஈஸ்வரி அம்பிகாயை நமோ நம: .. '

கற்பூரச் சுடருடன் மூலஸ்தானத்தில் இருந்து  வந்த  குருக்கள் குங்குமப் பிரசாதம் வழங்கினார்.. 

ஒரு சாண் அளவு மல்லிகைச் சரத்துடன் எலுமிச்சை அளவுக்கு - அபிஷேக  மஞ்சளையும் கொடுத்தார்.. 

அத்துடன், " நேத்திக்கு சுக்ர வாரம்.. அம்பாளுக்கு அர்த்தஜாம பூஜை ல சாத்தினது.. ரெண்டாவது பெண்ணுக்குத் தைச்சுக் கொடுங்கோ.. சீக்ரமா நல்ல வரன் வருவான்.. " - என்று சொல்லி மஞ்சள் நிற ஜாக்கெட் துணியையும்  கொடுத்தார்..

ஜானகியம்மாளுக்கு மகிழ்ச்சி.. 

" ஸ்வாமி.. இந்தத் துணியில தைக்கிற ஜாக்கெட்டை எந்த நாளும் போட்டுக்கலாமா!.. ஏதும் தோஷம் வந்திடாதே.. "

ஜானகியம்மாளுக்கு இயல்பான சந்தேகம்...

" தாராளமா போட்டுக்கலாம்... அம்பாள் அனுக்ரஹம் பரிபூர்ணம்.. " 

" அடுத்த வெள்ளிக்கிழமை பேத்தி ஜனனியோட ஜென்ம நட்சத்திரம்.. "

" சுகன்யாவோட மகளா.. " 

" ஆமா!.. "

" அடுத்த வெள்ளி... " - விரல் விட்டு எண்ணினார் குருக்கள்..

" சுக்ல பட்ச ம்ருகசீர்ஷம்.. "

" ஆமா!.. "

" குழந்தைக்கு கொஞ்சம் கோபம் வரும்.. இருந்தாலும் மனஸ்  ஸ்படிகம் மாதிரி.. நன்னா படிப்பா..  பிறத்தியார்க்கு ஆலோசனை சொல்லுவா.. நீதி நேர்மை.. ன்னா ரொம்பவும் பிடிக்கும்..  கணக்கு, கம்யூட்டர், தொழில் நுட்பம் எல்லாம்  வசப்படும்.. பெரிய வேலை.. நல்ல வாழ்க்கை கிடைக்கும்.. நல்ல பொண்.. தீர்க்க சுமங்கலியா இருப்பா.. "

ஜானகியம்மாளுக்கு இரட்டிப்பு மகிழ்ச்சி..

" ஜென்ம நட்சத்திரத்தில சுவாமி அம்பாள்க்கு அபிஷேகம் அர்ச்சனை.. மத்யானமா அன்னதானம் செய்யணும்.. அதான் உங்ககிட்ட அபிப்ராயம் கேட்க வந்தேன்... அன்னதான நன்கொடை எவ்வளவு ன்னு தெரிஞ்சா இப்பவே கொடுத்துடுவேன்... "

" அபிஷேக திரவ்யம், வஸ்த்ரம் புஷ்பம் எல்லாம் நான் பார்த்துக்கறேன்.. ப்ரசாதம் என்னென்ன செய்றது ன்னு நீங்க தான் சொல்லணும்.. அப்றமா அமௌண்ட் கொடுத்தா போதும்.. அந்த அன்னதான விஷயம் மட்டும் அங்கே ஆபீஸ்ல கேட்டுக்கோங்க.. இவ்விடத்தே ஒன்னும் சொல்லப்படாது.. " கை காட்டினார் குருக்கள்..

" சரி.. பிரசாதமா சர்க்கரைப் பொங்கலும் புளியோதரையும் 

ஓரோரு படி.. சுண்டலும் செஞ்சுடுங்கோ.. மற்றதெல்லாம் எப்பவும் செய்றதைப் போல!.. "

" அப்படியா.. சரி.. வெள்ளிக் கிழமை ஒம்பதரைக்கெல்லாம் வந்துடுங்க.. துர்காம்பிகா ராகு கால அபிஷேகமும் தரிசனம் செய்திடலாம்... வியாழக்கிழமை சாயந்தரமா ஒரு வார்த்தை சொல்லி ஞாபகம் பண்ணிடுங்கோ..  "

" நல்லது.. இதை கைச் செலவுக்கு வச்சிக்குங்க.. " - என்றபடி இரண்டாயிரம் ரூபாயைக் கொடுத்து விட்டு குருக்கள் கை காட்டிய அலுவலகத்தை நெருங்கினார் ஜானகியம்மாள்..

" அதெல்லாம் சரிதான்... " 

குனிந்தபடி கைப்பேசியில்  பேசிக் கொண்டிருந்த இளைஞன் நிமிர்ந்து பார்த்து - " உட்காருங்கம்மா!.. "  என்றான்..

" சரி.. சரி.. நான் அப்புறமா பேசறேன்.. நீ தொந்தரவு செய்யாம இரு.. நீங்க சொல்லுங்கம்மா!.." 

" அன்னதானத்துக்கு பணம் கொடுக்கணும்.. "

" எந்த தேதியில ம்மா?.. "

" வர்ற வெள்ளிக்கிழமை.. "

" சரி.. இங்கே ஷெட்யூல்படி அம்பது பேருக்கு அன்னதானம் .. ஆனா எக்ஸ்ட்ரா பதினைஞ்சு நம்பர் வரும்.. "

" அது பிரச்னை இல்லை.. எவ்வளவு பணம்.. ன்னு சொல்லுங்க.. என்னென்ன பரிமாறுவீங்க!.. "

" அன்னதான நன்கொடை ரெண்டாயிரம் ரூபாய்..  இன்னைய வெலைவாசி உங்களுக்கே தெரியும்.  இது கம்மி தான்.. "

" கூடுதலா வந்தா நான் கொடுத்துடறேனே.. "

" வேண்டாம்.. வேண்டாம்.. ரெண்டாயிரம் மட்டும்.. அது கூட  பாத்திரம் கழுவுறவங்களுக்காக ஐநூறு  சேர்த்துக் கொடுத்துடுங்க.. கூடுதல் செலவு ங்கறது காய்கறி ல தான் வரும் .. அப்படி  வந்தால் நாங்க கோயில் திட்டத்தில இருந்து எடுத்துக்குவோம்... வேற என்னமோ கேட்டீங்களே!.. "

சற்று யோசித்தான் அந்த இளைஞன்..

 " ம்ம்.. பொன்னி அரிசி சாதம், கோஸ் பொரியல்,  உருளைக் கிழங்கு மசாலா, சாம்பார், ரசம் மோர், அப்பளம் - அவ்வளவு தான்.. இந்த சுற்று வட்டார அன்னதானத்தில் அப்பளம் போடறது எங்க கோயில்ல தான்.. "

' அப்பளம் போடறது ஒரு பெருமையா.. ஈஸ்வரா!.. '  - நினைத்துக் கொண்ட ஜானகியம்மாளின் அடுத்த கேள்வி..

" பாயசம்?.. "

" இதுவரைக்கும் இல்லை..பாயசம் செய்றதுக்கு இங்கே எக்ஸ்ட்ரா பாத்திரங்களும்  கிடையாது.. "

"  இனிப்பு?.. "

"  உங்க இஷ்டம்.. நீங்க வாங்கிக் கொடுத்துடுங்க!.. "

" அப்போ சரி.. நான் லட்டு வாங்கி வந்துடறேன்.. "

" ஒரு நிமிஷம்... எதுவா இருந்தாலும் கொடுக்கிறத சந்நிதியில வச்சி கொடுத்துடுங்க.. இங்கே பந்தியில வேணாம்.. அப்புறம் அதுவே பழக்கமா ஆயிடும்..  "

" சரி.. இந்தாங்க அமௌண்ட்.. வவுச்சர் கொடுப்பீங்க தானே.. "

ஜானகியம்மாள் கையில் பணத்தை எடுத்தாள்..

" அது நடைமுறையில இல்லை.. இது தனியார் கோயில்.. இருந்தாலும் அப்பப்போ பெரிய செலவு எல்லாம் இருக்கு.. உங்களுக்கு புரியும் ன்னு நெனைக்கிறேன்..  நாங்க வேற என்னம்மா செய்றது?.. "

ஜானகியம்மாள் அமைதியாக பணத்தை நீட்டினார்கள்..

" ஐம்பது பேர் வந்துடுவாங்க தானே.. சாப்பாடு வீணாகிடாதே... "

" அந்தக் கவலையே வேண்டாம்.. வர்றவங்க எல்லாம் கோயிலைச் சுற்றி இருக்கிற ஆளுங்க தான்.. மணியடிச்ச மாதிரி  வந்துடுவாங்க!.. "

பணத்தை வாங்கிக் கொண்ட இளைஞன் சிரித்தான்..

" நீங்க வேணா மூனு பேர் கலந்துக்கலாம்.. உங்களுக்கு இஷ்டம் ன்னா நீங்களே கூட பரிமாறலாம்.. "

" சரி.. நாங்க மூனு பேர் வர்றோம்.."

" உச்சிக்காலம் முடிஞ்சதும் பந்தி ஆரம்பமாயிடும்..மா!.. "

" சரிப்பா.. நான் போய்ட்டு வர்றேன்!.. "

" வாங்கம்மா!.. "

' இது என்ன அநியாயம்!.. ரசீது கொடுக்கற வழக்கம் இல்லையாமே.. கோயில்ல   சாப்பிடுறாங்க.. கோயிலயும்   சாப்பிடுறாங்க.. அது போய்த் தொலையட்டும்.. நாம கொடுக்கிற அன்னதானத்தில் நாமே வந்து சாப்பிடுறது சரியா?.. அது ஒரு பார்வைக்குத் தான்.. அதுவும் இல்லாம  நாலு பேருக்கு நம்ம கையால சாப்பாடு போடும் புண்ணியம் கிடைக்குதே.. அது ஒன்னு போதும்!.. "

சிந்தனையுடன் ஜானகியம்மாள் வடக்கு பிரகாரத்தில் நடந்த போது - சிறிய சந்நிதிக்குள்  ஸ்ரீதுர்காம்பிகை.. அவளது  திருக்கரத்தில் விசேஷமாக பிரயோகச் சக்கரம்..

துர்க்கை புன்னகைத்துக் கொண்டிருப்பதாகத் தோன்றியது..

அந்தப் புன்னகைக்கு அர்த்தம் தான் புரியவில்லை..

வாங்குகின்ற பணத்துக்கு ரசீது கிடையாது என்ற நடைமுறை  ஜானகியம்மாள் நினைவுக்கு வந்தது..

" நீ பார்த்துக் கொண்டும் கேட்டுக் கொண்டும் தானே இருக்கின்றாய்!.. "

ஜானகியம்மாள் கேள்வியை முன் வைக்க - துர்க்கையின் திருவாய் மலர்ந்தது..

" என்ன செய்ய வேண்டும் என்கிறாய்?.. "

" இந்தத் தவறையெல்லாம் தட்டிக் கேட்கக்கூடாதா?.. "

" யார்?.. "

" நீ தான்!.. "

" நான் தட்டிக் கேட்பதா?.. "

" பின்னே வேறு யார்!.. "

" நீ என்ன வேண்டிக் கொண்டாய்?.. சொல்!.. "

" அம்மா.. அகிலாண்டேஸ்வரி.. எல்லோரும்  நல்லாருக்கணும்!.. "

புன்னகைத்தாள் துர்காம்பிகை..

***