வெள்ளி வீடியோ : நூறுகோடி பெண்கள் உண்டு உன் போல் யாரும் இல்லையே

விஜய் - சிம்ரன் நடிப்பில், எழில் இயக்கத்தில் எஸ் ஏ ராஜ்குமார் இசையில் 1999 ம் வருடம் வெளிவந்த திரைப்படம் 'துள்ளாத மனமும் துள்ளும்'.

அந்த இயக்குனருக்கு அது அறிமுகப்படமாம்.  ஆர் பி சௌத்திரியின் தயாரிப்பில் வெளியான திரைப்படம்.  நன்றாக ஓடியதாக நினைவு.

இந்தத் திரைப்படத்தில் எல்லாப் பாடல்களுமே சூப்பர் ஹிட்.  ஏனோ எனக்கு உன்னிகிருஷ்ணன் பாடும் திரைஇசைப் பாடல்கள் பிடிப்பதில்லை.  இதில் ஹரிஹரன் குரலில் இரண்டு பாடல்கள் எனக்குப் பிடிக்கும்.  ஒன்று 'தொட தொட எனவே' பாடல்.  

இன்னொன்று இன்று பகிரப்படும் பாடல் "இருபதுகோடி நிலவுகள் சேர்ந்து" பாடல்.

'பூவே உனக்காக', 'காதலுக்கு மரியாதை' போன்ற படங்களில் நடித்த பிறகு விஜயின் கிராஃப் ஏறிக்கொண்டே வந்த நேரத்தில் வெளியான திரைப்படம். அப்போதைய கனவுக்கன்னி சிம்ரன் கதாநாயகி.  விஜய் இப்போது நடிக்கும் படங்களில் ஒரு வட்டத்துக்குள் சிக்கிக்கொண்டு விட்டார்.  சிம்ரன் இரண்டாவது ரௌண்ட் வரத் தொடங்கியிருக்கிறார் என்றாலும் கதாநாயகியாய் அல்ல!

திரைக்கதையும் சற்றே சுவாரஸ்யமான ஒன்றாய் இருந்தது.  வைரமுத்து பாடல்.  ஹரிஹரன் ஒரு சுவாரஸ்யமான பாடகர்.  அவரின் குரலில் நிறைய நல்ல பாடல்கள் இருக்கின்றன.  முதல்முறை இங்கு ஒரு ஹரிஹரன் பாடல் பகிர்கிறேன் என்றுநினைக்கிறேன்!

இந்தப் பாடலில் என் எதிரே வந்து 'புன்னகை செய்யக் கண்கூசுதோ' வரியில் 'செய்யக் கண் கூசுதோ' என்கின்ற இடத்தில் ஒரு ஸ்பெஷல் வளைவு கொடுப்பார்.

இருபது கோடி நிலவுகள் கூடி பெண்மை ஆனதோ  - என் 

எதிரே வந்து புன்னகை செய்யக் கண் கூசுதோ 

குழைகின்ற தங்கங்கள் கன்னங்கள் ஆகாதோ 

நெளிகின்ற வில் ரெண்டு புருவங்கள் ஆகாதோ 

நூறுகோடி பெண்கள் உண்டு உன்போல் யாரும் இல்லையே 

ஆனால் கன்னி உந்தன் கண்கள் கண்கள் மட்டும் காணவில்லையே 

ஓஹோ...  ஓ...ஹோ...

தங்கமான கூந்தல் தாழ்ந்து வந்ததென்ன - வந்து 

உந்தன் பாதம் கண்டு வணக்கம் சொல்லவோ 

தேன்மிதக்கும் உதடு சேர்ந்திருப்பதென்ன 

ஒன்றை ஒன்று முத்தம் இட்டு இன்பம் கொள்ளவோ 

மானிடப் பிறவி என்னடி மதிப்பு 

உன் கால்விரல் நகமாய் இருப்பது சிறப்பு 

நூறுகோடி பெண்கள் உண்டு உன்போல் யாரும் இல்லையே 

ஆனால் கன்னி உந்தன் கண்கள் கண்கள் மட்டும் காணவில்லையே 

ஓஹோ...  ஓ...ஹோ...

ஜூலை மாதம் பூக்கும் கொன்றைப் பூக்கள் போல

சேலை கொண்ட பெண்ணின் அங்கம் தோற்றம் காட்டுதே 

தாஜ்மஹாலின் வண்ணம் மாறக்கூடும் பெண்ணே 

மேனி கொண்ட கன்னம் இன்னும் வண்ணம் கூடுதே 

நிறமுள்ள மலர்கள் சோலைக்குப் பெருமை 

நீ உள்ள ஊரில் வசிப்பது பெருமை 

நூறுகோடி பெண்கள் உண்டு உன்போல் யாரும் இல்லையே 

ஆனால் கன்னி உந்தன் கண்கள் கண்கள் மட்டும் காணவில்லையே 

ஓஹோ...  ஓ...ஹோ...