புதன் 190731 : பிடித்த பண்டிகை எது?

சென்ற வாரக் கருத்துக் களஞ்சியத்தில், கட்டிடத்திற்கு அடிக்கப்படும் வர்ணம் பற்றியும், கால் வலி, சில்லென்ற தரையில் நடக்கும் பிரச்னை பற்றிய கருத்துகள் பெரும்பான்மை பெற்றிருந்தன. 

கருத்துகள் உரைத்த அனைவருக்கும் நன்றி. 

பதிவில் கேள்விகள் கேட்க எல்லோரும் மறந்துவிட்ட போதிலும், வாட்ஸ் அப் கேள்விகள் கேட்கப்பட்டிருந்தன. அவைகளை பார்ப்போம். 






நெல்லைத்தமிழன்: 

1. நாம் எதைத் தேடி கோவிலுக்குப் போகிறோம்? அதற்கான நம் முயற்சி என்ன?

# கோயில் சூழல் அமைதி ஆனந்தம் எனச்  செல்வோர் பலர்.  போகிற வழிக்குப் புண்ணியம் அல்லது செய்த பாவம் கழியும் என்று போவோரும் உண்டு. சிற்பச் சிறப்பு, வரலாற்று முக்கியத்துவம் இவற்றுடன் எதிர்மறை எண்ண அலை ஏதுமில்லாத மகிழ்ச்சி இவை காரணமாகவும் செல்லலாம்.
வெள்ளிக் கிழமை அல்லது விசேஷ நாள் என எந்திரத் தனமாகவும் போகலாம்.

& சிறிய வயதில், சுற்றிலும் குடியிருந்தவர்கள் பக்கத்தில் உள்ள கோயிலுக்கு தினந்தோறும் மாலை சென்று வருவார்கள். பெரும்பாலும் வயதான மாமிகள்தான். அவர்கள் செல்லும்போது சிறுவர்களாகிய எங்களையும் கூப்பிட்டுச் செல்வார்கள். ஒற்றை இலக்க வயதுகளில், அருகில் உள்ள கோயில்களுக்கு சென்று வருவது, பிரகாரம் சுற்றுவது, சுவாமி சந்நிதியில் உள்ள விளக்குக்கு எண்ணெய் கொண்டு சென்று ஊற்றுவது எல்லாம் பழக்கமாகி இருந்தது. மார்கழி மாதங்களில், அதிகாலையில் கோயிலுக்குச் சென்று, பஜனை, பக்திப் பாடல்களை அங்கு பாடுகின்ற கோஷ்டியுடன் சேர்ந்து பாடி, பொங்கல் வாங்கி தின்று வந்தது எல்லாமே கோவில் அனுபவங்கள். 

இரட்டை இலக்க வயது வந்த பிறகு, கோவில்களுக்குச் செல்லுதல் என்பது திருவிழா நாட்களில் மட்டுமே என்று ஆனது. 

வேலை பார்த்த நாட்களில், டூர் போகின்ற நாட்களில் மட்டும், வேற்று ஊர்களில் விசேஷ ஸ்தலங்களுக்குச் செல்வது என்று ஆயிற்று. 

வேலையிலிருந்து ஓய்வு பெற்றபின், ஊரில் அருகே இருக்கும் கோயில்களுக்கு அடிக்கடி சென்று வந்தது உண்டு. 

இப்போது இருக்கும் இடத்திற்கு அருகே பெரிய கோயில்கள் இல்லை. சிறிய அனுமார் கோவில் ஒன்றும், ஸ்ரீராமர் கோவில் ஒன்றும் உள்ளது. மாதம் ஒரு தடவை அங்கே சென்று வருவது உண்டு. 

கோவில் விசிட் என்பது 
சிறிய வயதில் : சந்தோஷம்.
வளர்ந்த வயதில் : ஆர்வம். 
பெரிய வயதில் : மன அமைதி, மன நிம்மதி. 

கோவிலுக்கு செல்வது என்பது மன அமைதிக்காக. நடைப் பயிற்சி + மன நிறைவு. 


2. ஒரு நடிகையை நாம் விரும்புவதின், ரசிப்பதின் காரணம் நம் மனதளவில் உள்ள ஒழுங்கீனமா?

# விரும்புவது ரசிப்பது என்பதன் அடிப்படை கலை அல்லது களை என்ற வரை சரி. அழகை ஆற்றலை ரசிப்பது புரிந்து கொள்ளக் கூடியது. அப்படி இன்றி வேறு கற்பனைகளால் தூண்டப் படுவதும் உண்டு.  அது  ஒழுங்கீனம் ஆகுமா என்பது விவாதத்துக் குரியது. அது பிறழ்வு ஈனமல்ல.

& வெறும் பொழுது போக்குதான் சுவாமி! 

3. நாம் தொடராத ஒன்றை (follow பண்ணாத ஒன்றை) advice என்ற பெயரில் மற்றவர்களுக்கு நம்மால் எப்படிச் சொல்ல முடிகிறது?


$ நான் follow பண்ணாததால் எதுவும் கெட்டுப் போகவில்லை என்பதால் இருக்கும்.

 # நான்தான் நாசமாகிப் போனேன் நீயாவது ...என்றும் அறிவுரை தரலாமே.  

& பெரும்பாலும் நான் மற்றவர்கள் யாருக்கும் advice செய்வதில்லை. suggest செய்வேன். அவர்கள் அதை ஏற்றுக்கொண்டாலும் ஏற்றுக்கொள்ளவில்லை என்றாலும் கவலைப்படமாட்டேன். 


பானுமதி வெங்கடேஸ்வரன்: 

பண்டிகைகள் அணிவகுக்கின்றன. எந்த பண்டிகையை ஆவலோடு எதிர்பார்ப்பீர்கள்? அவ்வளவாக பிடிக்காத பண்டிகை ஏதாவது உண்டா?

$ கொழுக்கட்டை பண்டிகைகளான வரலக்ஷ்மி விரதம், விநாயக சதுர்த்தி இரண்டையும் நான் கொழுக்கட்டை செய்வதில் expert
 பண்டிகைகள் என்றால் கொண்டாட்டம் தான். பிடிக்காதது என்று எதுவும் இல்லை.

# ஆவலோடு எதிர்பார்ப்பது சிறு வயதுடன் போயிற்று. வரலட்சுமி விரதம், பிள்ளையார் சதுர்த்தி, நவராத்திரி, தீபாவளி இப்படி. பனியனைக் கழற்ற வேண்டுவதால் ஆவணி அவிட்டம் அலர்ஜி.
கொழுக்கட்டை தின்போருக்குக் கொண்டாட்டம், செய்பவருக்குத் திண்டாட்டம் எனப் பின்பு விளங்கியது !

& எனக்குப் பிடித்தது என்று பார்த்தால் தீபாவளி என்று சொல்வேன். நமக்கும் சந்தோஷம் சுற்றி இருப்பவர்களுக்கும் சந்தோஷம். வியாபாரிகள், சிறுவர், சிறுமியர், வளர்ந்தவர்கள், சினிமா எடுப்பவர்கள், பார்ப்பவர்கள், ஆன்மீக ஈடுபாடுகொண்டவர்கள்  என்று எல்லோருமே கொண்டாடும் தீபாவளிப் பண்டிகைதான் எனக்குப் பிடித்தது. என்னுடைய அம்மா அப்பாவுக்கும் பிடித்த பண்டிகை அது. 

பிடிக்காத பண்டிகை என்று எதுவும் இல்லை. 

=======================================

P A C தொடர்கிறது. 

" முன் காலத்தில் பலர் (தற்காலத்தில் சிலர் ) உறவினர் / நண்பர்கள் போன்ற மற்றவர்களின் இருப்பிடத்திற்கு சென்றால், ஸ்வீட் / இதர தின்பண்டங்கள் / பூ / பழம் அல்லது அவர்கள் ஊரில் கிடைக்கின்ற சிறப்புப் பொருட்கள் என்று ஏதாவது வாங்கிச் சென்று,  தான் செல்லும் வீட்டில் உள்ள குழந்தைகளுக்கோ அல்லது பெரியவர்களுக்கோ கொடுப்பார்கள். 

ஏன் தெரியுமா? " 

என்று சென்ற வாரம் கேட்டிருந்தேன். கருத்து உரைத்திருந்தவர்கள் எல்லோரும் பெரும்பாலும் சரியாக சொல்லியிருந்தீர்கள். 

ஒரு மனிதனின் ஆழ் மனதில், Parent / Adult /Child attitude இருக்கும் என்றும் ஒவ்வொரு சந்தர்ப்பத்தில் ஒவ்வொரு attitude மேலோங்கி இருக்கும் என்று சொல்லப்பட்டது அல்லவா? 

உளநிலை ஆய்வாளர்கள் சொல்லும் ஒரு யோசனை என்ன என்றால், 'ஒவ்வொரு மனிதனுக்கும் உள்ளே ஒளிந்து இருக்கின்ற குழந்தையைக் கண்டுபிடியுங்கள். அந்தக் குழந்தையோடு பேசுங்கள். அதனுடன் பேசுவது, பழகுவது, ஒத்துழைப்பு பெறுவது எல்லாமே எளிது. ' 

நான் சொல்வது சாதாரண, ஆரோக்கிய மனிதர் ஒருவரின் மன நிலை. சிற்சில முரண்பாடுகள் மனதில் அமைந்த மனிதர்களுக்கு இது பொருந்தாது. சிலர் வாழ்க்கையில் சிரிக்கவே மாட்டார்கள். அவர்கள் ஆழ் மனதில் குழந்தை உணர்வு இருக்குமா என்பது சந்தேகமே. 

நாம் வங்கி / தபால் அலுவலகங்கள் போன்று பலர் பணிபுரிகின்ற இடங்களுக்குச் சென்றால் என்ன செய்கிறோம்? ஏதேனும் விவரங்கள் தெரிந்துகொள்ள வேண்டி இருந்தால், அங்கு இருப்பவர்களில் யாரைத் தேர்ந்தெடுத்து நம்முடைய கேள்விகளைக் கேட்கிறோம்? We look for a friendly, smiling face. கடுகடு / வெடுவெடு / சிடுசிடு ஆசாமிகளை ஒதுக்கிவிட்டு, புன்னகை செய்பவரிடம்தான் நம்முடைய சந்தேகங்களைக் / விவரம் அறியவேண்டிய கேள்விகளைக் கேட்கிறோம். 

ஆம். இயல்பான புன்னகையோடு இருக்கும் மனிதர்களின் உள்ளே இருக்கின்ற குழந்தையை எளிதாக இனம் காணலாம். அந்தக் குழந்தையை அணுகும் விதத்தில் அணுகி நம் சந்தேகங்களைக் கேட்டு விவரம் அறிந்துகொள்ளலாம். 

எனக்குத் தெரிந்து வங்கிகள், தபால் அலுவலகங்கள், மருத்துவமனை போன்ற இடங்களில் பணிபுரிகின்ற பெண்கள் பலரும், இயல்பாக பொதுமக்களிடம் இன்முகத்துடன், பரிவுடன்  நடந்துகொள்பவர்களாக இருக்கிறார்கள். 

சென்ற வாரக் கேள்வி பற்றி. 

உறவினர் + நண்பர் வீட்டுக்குச் செல்லும்போது  ஏதேனும் வாங்கிச் சென்றால், அங்கு உள்ளவர்களின் குழந்தை மனநிலை சுலபமாக வெளிப்படும். அவர்களின் குழந்தை attitude மேலோங்கி இருக்கின்ற நேரத்தில், அவர்களுடன் சுமுகமாக உரையாட இயலும். 

It is easier to talk with a child (in a man or woman) and communicate and get things done. 

அடுத்த வாரம் சுமுக உரையாடல்களுக்கு பின்பற்றவேண்டிய சில விவரங்களைப் பார்ப்போம். 

=========================================

இந்த வாரக் கேள்வி : 

(அந்தக் கால / இந்தக் கால ) தமிழ் நடிகைகளில் குழந்தைபோல இனிய புன்னகை தவழும் முகம் கொண்டவர்கள் யார். சீரியஸ் முகம் கொண்டவர்கள் யார் என்று சொல்லுங்கள்.