வெள்ளி வீடியோ : தத்துப்பிள்ளை இவனைக் கண்டேன்.. தாய்மை நெஞ்சம் நானும் கொண்டேன்

1990 இல் வெளியான பிளாக்பஸ்டர்  படம் இணைந்த கைகள்.  அருண்பாண்டியன், ராம்கி,  நிரோஷா, ஸ்ரீவித்யா ஆகியோர் நடித்த திரைப்படம்.

அருண்பாண்டியன் தன்னை அமிதாப் போலநினைத்துக் கொள்வாரோ என்று தோன்றும் வண்ணம் நடிப்பார்.  ஊமை விழிகள் படத்தில் ஷோலே அமிதாப்பை இமிடேட் செய்ய முயன்றிருப்பார்.  சிதம்பர ரகசியம் படத்திலும் அப்படியே.

இந்தப் படத்தில் அவர் நடிப்பு சொல்லிக்கொள்ளும் வண்ணம் இருக்கும்.  படம் ஒரு ஆங்கிலப்படத்துக்கு இணையாக எடுக்க முயற்சித்து ஓரளவு வெற்றியும் அடைந்த படம்.  படத்தின் தலைப்பை நியாயப்படுத்தும் காட்சி அந்த நேரத்தில் ரசிகர்களால் பெரிதும் ரசிக்கப்பட்டது.

இந்தப் படத்தில் தீபன் சக்கரவர்த்தி இரண்டு பாடல்கள் பாடி இருக்கிறார்!  கங்கை அமரன் ஒருபாடல்பாடி இருக்கிறார்.

பாடல்களை எழுதியவர் ஆபாவாணன்.  இசை கியான் வர்மா.

உங்களுக்கு நட்பு ராசி எப்படி?   நிறைய நட்புகள் உண்டா?  எனக்கு நட்பு ராசி கம்மி!

எதிரெதிர் துருவங்களாக அறிமுகமாகும் ராம்கியும் அருண்பாண்டியனும் ஒரு முக்கியமான கட்டத்தில் இணைகின்றனர்.  நட்பாகின்றனர்.  அப்போது வரும் பாடல்தான் இது.

ஆரம்ப இசை மிகக் கவர்ச்சி.  ரயில் சத்தத்தோடு வரும் பாடல்கள் என் பாடல் கேட்ட அனுபவத்தில் நன்றாகவே இருக்கும்.  ஹிந்தியில் தோஸ்த் பாடல் கேட்டிருக்கிறீர்களா?  ஆரம்ப இசையைத் தொடர்ந்து வரும் குழல் இசையும் பாடலும் இனிமை.  மிக இனிமை.

எஸ் பி பாலசுப்ரமணியமும் ஜெயச்சந்திரனும் இணைந்து பாடிய ஒரே பாடல் இதுதான் என்று நினைக்கிறேன்.  ரயில் பயணத்தில் ஏதோ ஒரு குழந்தை அழத்தொடங்க, அதற்குத் தாலாட்டு பாடுவது போல அமைந்திருக்கும் பாடல்.  தனியாகவே உணரும் அருண்பாண்டியன் வரிகளுக்கு ராம்கி ஆறுதல் வரிகள் பாடுவதுபோல பாடல். அருண்பாண்டியனின் காதலி அல்லது மனைவி கர்ப்பமாக இருப்பார்.  தனக்கு பிறக்கப்போகும் மகனை நினைத்துப் பாடுவதாக பாடல்.

பாடலிடை வரும் இசையும், இரண்டு பாடகர்களின் குரல் இனிமையும், டியூனும் எல்லாம் அழகாக அமைந்திருக்கும் பாடல்.

பாடலுக்கு இடையே வரும் எஸ் பி பி பாடும் ஆராரோ...  ஆரீராரீ ராராரோ கேட்பதற்கு இனிமை.  காட்சியோடும் ரசிக்கலாம். நெகிழ வைக்கும் காட்சி அமைப்பு.  ஆனால் காட்சி இல்லாமல் பாடலைக் கேட்கும்போது குரல்களின் இனிமையை இன்னும் முழுதாக ரசிக்கலாம்.  பாடல் முடியும்போதும் ரயிலின் ஓசையோடேயே முடியும்.

அந்தி நேரத்தென்றல் காற்று அள்ளித்தந்த தாலாட்டு 

தங்கமகன் வரவைக் கேட்டு தந்தையுள்ளம் பாடும் பாட்டு

உயிர் கொடுத்த தந்தை இங்கே உருக்கொடுத்த அன்னை அங்கே 

இன்பதுன்பம் எதுவந்தாலும் பங்குகொள்ளும் சொந்தம் எங்கே 

தாலாட்ட அன்னை உண்டு சீராட்ட தந்தையுண்டு 

இன்பதுன்பம் எதுவந்தாலும் பங்குகொள்ள நண்பன் உண்டு  

ஒருதாயின் பிள்ளைபோல உருவான சொந்தம் கொண்டு 

வருங்காலம் யாவும் வெல்ல இணைந்த கைகள் என்றும் உண்டு 

உன்மகனைத் தோளில்கொண்டு  உரிமையோடு பாடுவதென்று 

அந்நாளில் துணையாய் நின்று பங்குகொள்ள நானும் உண்டு 

தத்துப்பிள்ளை இவனைக் கண்டேன் தாய்மை நெஞ்சம் நானும் கொண்டேன்  

பத்துத் திங்கள் முடிந்தபின்னே முத்துப்பிள்ளை அவனைக் காண்பேன் 

உறங்காத கண்ணில் இன்று ஒளி வந்து சேரக் கண்டேன் 

பரிவான நண்பன் தந்த கனிவான தோள்கள் கண்டேன் 

==========================================================

நேயர் விருப்பம் :

சென்ற வாரம் பானு அக்கா நேயர் விருப்பப் பாடலாக பி பி ஸ்ரீனிவாஸ் பாடிய 'தோல்வி நிலையென நினைத்தால்' பாடலைக் கேட்டிருக்கிறார்கள்.  இன்று பிறந்தநாள் கொண்டாடும் பானு அக்காவுக்கு இனிய பிறந்தநாள் வாழ்த்துகளுடன் அவர் விரும்பிக்கேட்ட பாடல்...!

இந்தப்பாடல் இடம்பெற்ற ஊமை விழிகள் படத்தில் பாடல்கள் அனைத்துமே பேசப்பட்டன.

1986இல் வெளியான இந்தப் படத்தில் விஜயகாந்த், ரவிச்சந்திரன், கார்த்திக், சந்திரசேகர் என்று மானாவாரியாக பெரிய நடிகர்கள் நடித்த படம்.

இந்தப் படத்தின் பாடல்களையும் ஆபாவாணனே எழுதி இருக்கவேண்டும்.  மனோஜ்கியானுடன் சேர்த்து அவரும் இசை அமைத்திருக்கிறாராம்.

தன்னம்பிக்கை ஊட்டும் பாடல்.  பாதியிலேயே கொஞ்சம் கொஞ்சமாக வேகம் பெற்று உணர்ச்சி, உணர்வூட்டும் பாடல்.

இந்தப்பாடல் சமீபத்தில் வந்த இஸ்பேட் ராஜா பாடலான "கண்ணம்மா என்னை" பாடலை லேசாயநினைவு படுத்துகிறதோ?  தோல்வி நிலையென பாடலிலிருந்து உருவப்பட்டதுதான் கண்ணம்மா பாடலோ!

தோல்வி நிலையென நினைத்தால் மனிதன் வாழ்வை நினைக்கலாமா?

வாழ்வைச் சுமையென நினைத்து தாயின் கனவை மிதிக்கலாமா?

உரிமை இழந்தோம் உடைமையை இழந்தோம் உணர்வை இழக்கலாமா?

உணர்வைக்கொடுத்து உயிராய் வளர்த்த கனவை மறக்கலாமா 

விடியலுக்கில்லை தூரம் விடியும் மனதில் இன்னும் ஏன் பாரம்?

உன் நெஞ்சம் முழுவதும் ஈரம் இருந்தும் கண்ணிலின்னும் ஏன் ஈரம்?

உரிமை இழந்தோம் உடைமையை இழந்தோம் உணர்வை இழக்கலாமா?

உணர்வைக்கொடுத்து உயிராய் வளர்த்த கனவை மறக்கலாமா 

தோல்வி நிலையென நினைத்தால் மனிதன் வாழ்வை நினைக்கலாமா?

வாழ்வைச் சுமையென நினைத்து தாயின் கனவை மிதிக்கலாமா?

விடியலுக்கில்லை தூரம் விடியும் மனதில் இன்னும் ஏன் பாரம்?

உன் நெஞ்சம் முழுவதும் ஈரம் இருந்தும் கண்ணில் இன்னும் ஏன் ஈரம்?

யுத்தங்கள் தோன்றட்டும் ரத்தங்கள் சிந்தட்டும் பாதை மாறலாமா 

ரத்தத்தின் வெப்பத்தில் அச்சங்கள் வேகட்டும் கொள்கை சாகலாமா 

 உரிமை இழந்தோம் உடமையும் இழந்தோம் உணர்வை இழக்கலாமா 

உணர்வை கொடுத்து உயிராய் வளர்த்த கனவை மறக்கலாமா 

யுத்தங்கள் தோன்றட்டும் ரத்தங்கள் சிந்தட்டும் பாதை மாறலாமா ரத்தத்தின் வெப்பத்தில் அச்சங்கள் வேகட்டும் கொள்கை சாகலாமா