நான் தரிசனம் செய்த கோவில்கள் :: நெல்லைத்தமிழன்

 

அஹோபில நவ நரசிம்ஹர் யாத்திரை– பகுதி 7

பார்க்கவ நரசிம்ஹர் (6)

வேதாத்ரி மலையில், கீழ் அஹோபில ஆலயத்திலிருந்து இரண்டு கிமீ தொலைவில், நல்லமலைக்காடுகளின் அடர்ந்த மரம் செடி கொடிகளுக்கு நடுவே கரடுமுரடான பாதையில் பயணம் செய்து, சிறு குன்றின் உச்சியில் இருக்கும் பார்க்கவ நரசிம்மர் ஆலயத்துக்குச் செல்ல லாம். (சுமார் 150 படிகள் இருக்கலாம்). ஆலயத்தின் பக்கவாட்டில் பார்க்கவ தீர்த்தம் என்ற திருக்குளம் இருக்கிறது. இந்தத் தடாகம் வற்றியதே கிடையாதாம். பார்க்கவ ராமர் என்று அறியப்பட்ட பரசுராமர் இந்த க்ஷேத்திரத்துக்கு வந்து, நாராயணன் தன் தசாவதாரத் தோற்றங்களிலும் ஒருசேர இந்த த் தலத்தில் அவருக்குக் காட்சியளித்தார். நரசிம்மர், இங்கு ஹிரண்யனை மடியில் கிட த்தி வயிற்றைக் கிழிக்கும் நிலையில் காணப்படுகிறார்.  (இங்குள்ள மூலவருக்கும் ஜ்வாலா நரசிம்மர் ஆலயத்தின் மூலவருக்கும் ஒரு வித்தியாசம் உண்டு. ஹிரண்யனை மடியில் கிட த்தியிருக்கும் விதம், இடம் மாறி அமைந்திருக்கிறது. அதுவும் தவிர பார்க்கவ நரசிம்மரின் சிற்பத் தோரணத்தில், தசாவதாரங்களும் செதுக்கப்பட்டிருக்கின்றன)

யோகாநந்த நரசிம்ஹர் (7)

வேதாத்ரி மலைத்தொடரிலேயே அமைந்துள்ளது யோக நரசிம்மரின் ஆலயம்.  இந்த எளிமையான ஆலயத்தில் யோக முத்திரை தரித்து நரசிம்மர் காட்சியளிக்கிறார். நரசிம்மர் தென் திசை நோக்கி சங்கு சக்கரத்தோடு காட்சியளிக்கிறார். கீழ்க்கரங்கள் இரு கால்களிலும் யோக முத்திரை பதித்திருக்கின்றன.

சத்ரவட நரசிம்ஹர் (8)

எட்டாவது நரசிம்மர், சத்ரவட நரசிம்மர். கருடாத்ரி மலையில், கீழ் அஹோபில ஆலயத்துக்கு அருகில் கிழக்குத் திசையில் அமைந்திருக்கிறது சத்ரவட நரசிம்மரின் ஆலயம். ஆறுகால் மண்டபம் அமைந்துள்ள ஆலயம் இது. அஹோபில நரசிம்மர்களிலேயே மிகவும் சுந்தர ரூபத்துடன் காணப்படுபவர் சத்ரவட நரசிம்மர். குடை போன்ற ஆலமரத்தடியில் வீற்றிருந்த நிலையில் காட்சிதருகிறார். (வடம்-ஆலமரம், சத்ர-குடை). மேற்கரங்கள் இரண்டிலும் சங்கு சக்ரத்துடன், வலது கீழ்க்கரம் அபயஹஸ்தமாகவும் இடது கீழ்க்கரம் இடது தொடையில் தாளம் போடுவதுபோல அமைந்திருக்கிறது. 

பாவன நரசிம்ஹர் (9)

ஒன்பதாவது நரசிம்மர் ஆலயம், பாவன நரசிம்மர், கருடாத்ரி மலையின் அடர்ந்த காட்டுப் பகுதியில் பவன நதிக்கரையில் அமைந்துள்ளது. இந்த ஆலயத்துக்குச் செல்லும் பாதை மிக் கடினமானது. அடர்ந்த வனப் பகுதியில் கல்லும் குழிகளும் இடையில் ஓடும் நீரோடைகளுமான பாதையில் சுமார் 15 கிமீ தூரம் பயணம் செய்யவேண்டும். டிராக்டரில் சென்றால், வண்டி குலுங்கும் குலுக்கலில், உடலில் உள்ள எலும்புகள் எல்லாம் கழன்று விழுகிறதோ என்று எண்ணவைக்கும். ஜீப்பில் சென்றாலும் கடினமாகவே இருக்கும்.

இந்த மலைத்தொடரில், செஞ்சு என்றழைக்கப்பட்ட மலைவாழ் மக்கள் மட்டுமே வசித்துவந்திருக்கின்றனர். அவர்களிலிருந்து செஞ்சு லட்சுமி என்ற பெண்ணை, நாராயணன், நரசிம்ம ரூபத்தில் வந்து திருமணம் புரிந்துகொண்தாக ஐதீகம். ஆதிசேஷன் குடைபிடிக்க, வீற்றிருக்கும் கோலத்தில் லக்ஷ்மி நரசிம்மராக க் காட்சி தருகிறார். இந்தக் கோவிலின் அருகிலேயே மலைப்பகுதியில், செஞ்சு லட்சுமி இருந்த குகை ஒன்றும் இருக்கிறது.

பாவனி நதிக்கரையில் அமைந்திருப்பதால் பாவன நரசிம்மர் என்று அழைக்கப்படுகிறார். நரசிம்மருடன் தாயார் இருக்கிறார். நரசிம்மருக்கு இடது புறத்தில் குழலூதும் கண்ணனின் விக்கிரஹமும் காணப்படுகிறது. இந்தக் கோவில் மிக உயர்ந்த க்ஷேத்திரமாகக் கருதப்படுகிறது. இந்த நரசிம்மரை வணங்கினால் அறிந்தும் அறியாமலும் செய்த பாவங்கள் தொலைந்து முக்தி கிட்டும் என்று நம்பப்படுகிறது.

இந்த ஒன்பது நரசிம்மர் கோவில்களையும் தரிசனம் செய்வதுதான் அஹோபில யாத்திரையின் நோக்கம்.  அஹோபிலம் நவ நரசிம்ஹர் கோவில்களைப் பற்றியும் இந்த இரு வாரங்களில் அறிந்திருப்பீர்கள். இப்போது நம் யாத்திரையைத் தொடரலாம்.