உங்களுக்குப் பிடித்த பொழுது போக்குகள் என்னென்ன ?

பானுமதி வெங்கடேஸ்வரன்: 

'இங்கே அரசியல் பேசாதீர்கள்' என்று போர்ட் வைக்கும் அளவிற்கு அரசியல் விவாதங்கள் அவ்வளவு ரசாபாசமாக மாறக் காரணம் என்ன?

# விவாதம் என்பது அறிவார்ந்ததாக இருந்தால் பிரச்னை ஏதும் இல்லை.  அது ego சார்ந்து கடுமையாகும் போது , மொழியில் அநாகரிகம் புகுந்து , சில சமயம் பெரும் தரக்குறைவு தலைதூக்குகிறது.

& எந்த விவாதத்தையும் உணர்ச்சிபூர்வமாக அணுகாமல், அறிவுபூர்வமாக அணுகவேண்டும். ஆனால் பெரும்பாலான மக்கள், அரசியல், மதம் சம்பந்தப்பட்ட விஷயங்களை  உணர்ச்சிபூர்வமாக மட்டுமே அணுகுகிறார்கள். அதனால்தான் பிரச்சனை தலை தூக்குகிறது.  

நிறுவனங்களிலும், அமைப்புகளிலும் hierarchy நிலவ காரணம் என்ன?

# ஒவ்வொருவரும் வெவ்வேறு அளவில் திறன் படைத்தவராக இருக்கும்போது - ஒருவர் கண்காணிப்பு செய்து மற்றவர் வேலை பார்க்கும்போது, அது இயல்பானதுதானே.  எல்லாரும் சமம் என்பது சட்டரீதியாக மட்டுமே சரியாக இருக்கும். மற்றபடி உண்மை நிலவரத்தில் மேற்பார்வை செய்பவரும் கீழ்ப்படிந்து நடப்போரும் இருக்கத்தான் இருப்பார்கள்.

& எல்லோருமே தலைவர்கள் என்றால், யார் சொல்வதை யார் கேட்பது என்ற பிரச்சனை எப்போதுமே இருக்கும். சமீபத்து உதாரணம் : இண்டி கூட்டணி. 

நிறுவனங்களிலும் அமைப்புகளிலும் படிநிலை இருந்தால்தான் உற்பத்தி / வெளியீடு சரியாக இருக்கும். நிறுவன தலைவர் அடுத்த ஒரு ஆண்டில் அல்லது அடுத்தடுத்த வருடங்களில், என்ன உற்பத்தி செய்யவேண்டும் என்பதை முடிவு செய்து சொல்லிவிடுவார். அவருக்கு அடுத்த படியில் இருப்பவர்கள் அதை எப்படி உற்பத்தி செய்யவேண்டும், எப்போது, எங்கே, யாரால் உற்பத்தி செய்யப்படவேண்டும் என்பவைகளை வரையறுப்பார்கள். அவர்களின் அடுத்த படியில் உள்ளவர்கள் இன்னும் நுண்ணிய விவரங்களை தொகுப்பார்கள். இப்படி ஒவ்வொரு படியாக கீழே வர வர வேலை சிறு பகுதிகளாக பிரிக்கப்பட்டு கடைசி நிலைக்கு வரும்போது ஒவ்வொரு வேலையும் கனகச்சிதமாக செய்யப்பட்டு குறிப்பிட்ட தரத்தில், குறிப்பிட்ட பொருட்கள் குறிப்பிட்ட நேரத்தில் முடிக்கப்படும். 

படிநிலை இல்லை என்றால், தலைக்குத் தலை நாட்டாமை என்று உருவாகி ஒவ்வொருவர் ஒவ்வொரு திசையில் இழுக்க ஆரம்பிப்பார்கள். உற்பத்தி = 0 என்று ஆகிவிடும். 

எனவே நிறுவனங்களிலும் அமைப்புகளிலும் படிநிலை (hierarchy) தவிர்க்க இயலாதது 

= = = = = = =

எங்கள் கேள்விகள் : 

1) நண்பர் ஒருவர் தினந்தோறும் என்னுடைய வாட்ஸ் ஆப் எண்ணுக்கு வேறு எந்த தகவலோ அல்லது படமோ இல்லாமல் " Good morning .. " மட்டும் அனுப்பி வருகிறார். நான் பயனில்லாத இந்த வகை செய்திகளுக்கு எந்த முக்கியத்துவமும் அளிப்பதில்லை; பதில் எதுவும் அனுப்புவதில்லை. இந்த வகை ஆட்களுக்கு  என்ன சொல்லி புரியவைப்பது? 

2) உங்களுக்குப் பிடித்த பொழுது போக்குகள் என்னென்ன ? 

3) உங்களுக்கு ஒரு சமையல் செய்முறை நன்கு தெரியும். உதாரணமாக கத்தரிக்காய் கொத்சு என்று வைத்துக்கொள்வோம். அதையே வேறு ஒரு வகையில் வித்தியாசமாக செய்யலாம் என்று நண்பர் ஒருவர் கூறுகிறார் என்றால், நீங்கள் அவர் சொல்வதைக் கேட்டு அதுபோல செய்ய முயற்சி செய்து சோதித்துப் பார்ப்பீர்களா அல்லது 'அவருக்கு என்ன தெரியும்? என்னுடைய செய்முறைதான் சரி என்று உங்கள் வழியை மட்டும்தான் பின்பற்றுவீர்களா? 

= = = = = = = = =

KGG பக்கம் :

JTS படித்த காலத்தில் உடன் படித்தவர்களில் மறக்க முடியாத இன்னொருவர், ஆர் சோலையப்பன். வலிவலத்தில் வீடு. அங்கே அருகில் இருந்த பள்ளியில் எட்டாம் வகுப்பு தேர்ச்சி பெற்று வந்து சேர்ந்த மாணவர். அவருக்கு எங்கள் எல்லோரையும் விட வயது அதிகம். மற்ற மாணவர்கள் அவருடன் அதிகம் நெருங்கிப் பழகியதில்லை. நான் அவரோடு மிகவும் நட்போடு பழகினேன். 

படித்த காலத்திலேயே அவருக்குக் கல்யாணம் ஆகியிருந்தது. (வேறு யாரிடமும் அந்தத் தகவலை சொல்லவேண்டாம் என்று கேட்டுக்கொண்டார். நானும் இன்று வரை அதை யாருக்கும் சொல்லவில்லை.) அவருடைய வீட்டுப் பெரியவர்கள், 'சொந்தம் விட்டுப் போகாமல் இருக்கத்தான் கல்யாணம் செய்து வைத்தோம். ஆனால், நீ படிப்பு முடிக்கின்ற வரை, மனைவியைப் பார்க்கக் கூடாது, பேசக்கூடாது' என்று சொல்லிவிட்டார்களாம். அதனால் இவர் இந்த JTS final year பரீட்சை எழுதி அதில் தேர்ச்சி பெறும்வரை பெரியவர்கள் சொன்ன சொல்லை மீறாமல் இருந்துவந்தார். 

எனக்கு சிறிய வயதிலிருந்தே ஒரு விசித்திரப் பழக்கம் உண்டு. எதையாவது படிக்கும்போதோ அல்லது எழுதும்போதோ - புதிய புத்தகங்கள், புதிய நோட்டுகள் இவற்றின் பக்கங்களின் மூலையிலிருந்து சிறிய முக்கோணப் பகுதியான 3 mm x 3 mm அளவிலான பகுதியைக் கிழித்து, வாயில் போட்டு மென்று கொண்டு இருப்பேன். என்னுடைய இந்தப் பழக்கத்தை தெரிந்துகொண்டவுடன், சோலையப்பன், என்னை 'கழுதமன்' என்று கூப்பிட ஆரம்பித்துவிட்டார்! 

(இப்போ எல்லாம் paper மெல்லுவது இல்லை - மாறாக முந்திரி, திராட்சை, பாதாம் போன்ற ஏதேனும் ஒன்றை வாயில் ஊறவைத்தபடி - படிப்பது, எழுதுவது இவைகளை செய்துகொண்டு இருப்பேன்! இதை எழுதும்போது வாயில் உலர்ந்த கருப்பு திராட்சைப் பழம் இருக்கு!) 

படித்த காலத்தில் சோலையப்பன் ஹாஸ்டலில் தங்கிப் படித்தார். தினமும் மதிய உணவுக்கு அவர் ஒரு டிஃபன் பாக்ஸில் 4 இட்லி எடுத்து வருவார். ஹாஸ்டல் அருகே உள்ள வீடு ஒன்றில் வயதான பெண்மணி ஒருவர், இட்லி வியாபாரம் செய்பவர். அவருடன் இவருக்கு ஒப்பந்தம் - தினமும் இவருடைய டிஃபன் பாக்ஸில் அந்தப் பெண்மணி நாலு சிறிய இட்லி (ஒவ்வொன்றும் ஓரணா என்று ஞாபகம்) வைத்துக் கொடுத்துவிடுவார். சோலையப்பன் ஒவ்வொரு இட்லியையும் நான்கு துண்டுகளாக - மொத்தம் பதினாறு துண்டுகள் - 16 x 8 = 128 வினாடிகள் - என்று இரண்டரை  நிமிட நேரத்துக்குள் சாப்பிட்டு முடித்துவிடுவார். அதற்குப் பிறகு பாடப் புத்தகத்தை எடுத்து வைத்துக்கொண்டு படிக்க ஆரம்பித்துவிடுவார். பாடத்தில் ஏதேனும் சந்தேகங்கள் இருந்தால் அவ்வப்போது என்னிடம் கேட்பார். 

நான் பெரும்பாலான நாட்களில் மதிய உணவுக்காக வீட்டிலிருந்து டிஃபன் பாக்ஸில் எடுத்துச் சென்றது மோர் அல்லது தயிர் சாதம் & தொட்டுக்கொள்ள ஒரு துண்டு உப்பு நார்த்தங்காய் / வறுத்த மோர் மிளகாய். எனக்கு அந்தக் காலத்தில் இட்லி பிடிக்காது. தோசை / எ மி சாதம் போன்றவை சாப்பிட்டால் பசி அடங்காது என்பதால், மோ  சா / த சாதமே கதி! 

சனிக்கிழமைகளில் அரைநாள் முழுவதும் (காலை எட்டு மணி முதல் பகல் 12 மணி வரை) machineshop வகுப்பு மட்டுமே என்று சொல்லியிருந்தேன் அல்லவா - அப்படி அந்த வகுப்புக்குச் செல்லும்போது - எங்கள் தோட்டத்தில் விளைந்த வேர்க்கடலையை வேகவைத்து நிறைய எடுத்து நிஜார் பைக்குள் நிரப்பி எடுத்துச் செல்வேன். 

அவ்வப்போது யாரும் பார்க்காதபோது ஒரு முழு வேர்க்கடலையை எடுத்து, அதன் தோலை இரண்டாகப் பிளந்து உள்ளே பதுங்கியுள்ள கடலைகளை ஒவ்வொன்றாக எடுத்து வாயில் போட்டுக்கொண்டு ஒவ்வொரு கடலையையும் ஒரு நிமிடம் வாயில் ஊறவைத்து, இரண்டு நிமிடங்கள் நிதானமாக கடித்து சுவைத்து சாப்பிடுவேன். 

பலநாள் திருடன் ஒருநாள் அகப்படவேண்டியதுதானே வழக்கம். 

அது நடந்தது! 

அது எப்படி? அடுத்த வாரம் பார்ப்போம்! 

= = = = = = = = =

அப்பாதுரை உடல்நிலை சரியில்லாத காரணத்தினால், இந்த வாரமும் லீவு. 

= = = = = = = =

வாசகர்கள் தங்கள் வாழ்க்கையில் நடந்த சுவையான, சுவாரஸ்யமான சம்பவங்களை அல்லது தாங்கள் படித்த வித்தியாசமான விஷயங்களை எங்களுக்கு அனுப்பிவைத்தால், அதை புதன் பதிவுகளில் வாசகர் பக்கமாக வெளியிடுகிறோம். 

= = = = = = = =