கேட்டு வாங்கிப் போடும் கதை - ஒரு காதலி ஏவப்படுகிறாள் - எஸ். குமார்

 படத்துக்கேற்ற கதைப் போட்டி.  ரூபாய் ஆயிரம் மதிப்புள்ள தங்கச்சாவி பரிசு பெறும் பெற்ற கதை 

சாவி இதழில் நடைபெற்ற இந்தப் போட்டியில் திரு குமாரின் இந்தக் கதை தங்கச்சாவி பரிசு பெற்றது.  குமார் அவர்கள் படைப்புகள் பல்வேறு பத்திரிகையிலும் வெளியாகி உள்ளன. புத்தகங்களும் வெளியிட்டிருக்கிறார்.  முகநூலில் அவருக்கு நான் நண்பன்.  அவர் முகநூலில் பகிர்ந்த இந்தச் செய்தியைப் பார்த்து அவரிடம் கேட்டு வாங்கிப் போட்ட கதை!

ஒரு காதலி  ஏவப்படுகிறாள் 

எஸ்.  குமார் 

ரிஸப்ஷனிஸ்ட் வித்தியாசமாகச் சிரித்தாள்.

உள்ளே மண்டிக் கிடைக்கும் ஏளனம் ஸ்வர்ணாவுக்குப் புரிந்தது.  ஆனால் அதை அவள் லட்சியம் செய்யவில்லை.  எல்லா ப்ராஸ்ட்யூட்டுகளுக்குப் பின்னாலும் இருக்கும் உருக்கமான கதை அவள் பின்னாலும் இருக்கிறது.

"ஒன் நாட் ஃபோர்ல ஸ்வரூப் இருக்காரா?"

"ஜெஸ்ட் எ மினிட்.,"

விசாரித்தாள்.

சொன்னாள். "---------"  "இருக்கார்"

ஸ்வர்ணா நடந்தாள்.

104 

கதவைத் தட்டினாள்.

"யார்?" - உள்ளேயிருந்து கேள்வி வந்தது.

"ஸ்வர்ணா"

"கம் இன்!" - அழைப்பில் அவசரம்.

உள்ளே போனாள்.

டபுள்காட் காத்திருந்தது.  ஸ்வரூப் படுத்திருந்தான்.

தயாராய்?

கட்டிலில் உட்கார்ந்தாள்.

"ஸ்வர்ணா,  நீ எனக்கொரு உதவி பண்ணனும்."

"அதுதானே என் தொழில்?

"வழக்கமானதில்லே..   திஸ் இஸ் ஸம்திங் டிஃபரண்ட்""

"---------------------------------"

"நீ ஒரு ஆளை காதலிக்கணும்"

"என்ன உளர்றீங்க?" - சிரித்தாள்.

அவன் மௌனமாக இருந்தான்.  அவள் கட்டுப்படுத்த முடியாமல் சிரித்தாள்.

"காதலிக்கறதுக்கு நீங்க ஃபீஸ் தருவீங்க, இல்லையா?"

"ஆமாம்."

"நான் கேள்விப்பட்ட வரை, பழகின வரை நீங்க ஒரு பணக்கார வீட்டுப்பிள்ளை.  ப்ளே பாய்.  ஆனா  இப்போ....  தொழில்ல இறங்கிட்டீங்களா?"

"யூ இடியட்!"

வயிற்றில் குத்தினான்.  துடித்தாள்.  கண்களில் நீர் முட்டிக்கொண்டு வர, மீண்டும் சிரித்தாள்.

"சனியனே,  சிரிக்கறதை நிறுத்து.  பீ ஸீரியஸ்..  நான் கேட்டதுக்கு பதில் சொல்லு.  உன்னால முடியுமா, முடியாதா?"

"எவ்வளவு பணம் தருவிங்க?"

"வழக்கத்தைப் போல இரண்டு மடங்கு."

"ஓகே!"

அவன் தலையணைக்கடியிலிருந்து அந்த ஃபோட்டோவை எடுத்தான்.

அவள் பார்த்தாள்.

நீச்சல் உடையில் நான்கைந்து பேர்..  ஸ்வரூப் இருந்தான்.  பாண்டியன் இருந்தான்.

"நடுவில இருக்கானே!"

"பேர் என்ன?"

விஸ்வ பாரதி.

உட்கார்ந்திருந்தான்.

ஸ்வர்ணா அவன் பக்கத்தில் உட்கார்ந்தாள்.

"எக்ஸ்க்யூஸ் மீ!"

திரும்பினான்.

"...நீங்கதானே விஸ்வ..."

"....பாரதி!"

"...நீச்சல்ல உங்க லாகவும்..  ஐ லைக் இட் வெரி மச்!" 

"நீங்க?"

"ஸ்வர்ணா.  உங்க விசிறி!"

"விசிறி?"

"ஆமாம்."

"அதுதான் நீங்க பக்கத்தில வந்ததும் வெயிலோடு கொடுமை  குறைஞ்ச மாதிரி, கொஞ்சம் குளிர்ச்சியா இருக்கு."

"ரொம்ப நல்லாப் பேசறீங்களே!"

"ஜாக் ஆஃப் ஆல் ஆர்ட்ஸ்!"

"மாஸ்டரில்லையா?"

"அது தமிழ்வாணன்.  காலமாயிட்டார் !"

அவள், அவனை மொத்தமாகப் பார்த்தாள்.  முக்கால் நிர்வாணத்தில் , உடம்பு 'அதலடிக்' என்றது.

முன்னாலிருந்த நீச்சல்குளம் வெறுமையாக அவன் ஆக்கிரமிப்புக்கு காத்திருந்தது.

ஸ்வர்ணா - "நான் கூட நல்லா ஸ்விம் பண்ணுவேன்.  ஆனா எந்த காம்பெடிஷனிலயும் கலந்து கொண்டதில்லே"

"ஓ!"

"அடுத்து, உங்களுக்கு ஏதாவது காம்பெடிஷன் இருக்கா?"

"இருக்கு, ஒரு முக்கியமான போட்டி!"

"எங்கே?"

"நான்கைந்து பேர்களுக்கு நடுவிலே"

"புரியலையே"

"சீக்கிரம் புரியும்."

"உங்க க்வாலிஃபிகேஷன் என்ன?"

"பி . காம். கோ - ஆப்பரேஷன்"

"கோ - ஆப்பரேஷனா?"

"சரியா படிப்பு வராது.  ஃபிரெண்ட்ஸ் ஒத்துழைப்பில பாஸ் பண்ணேன்."

சிரித்தாள்.

குனிந்து மார்பில் எதையோ தேடினாள்.

அவன் உஷ்ணமானான்.

சமீபகாலமாக சந்திக்க மறுத்து வரும், நெருக்கம் குறைந்த லீனா மனதில் தாபமேற்றினாள்.

யாரோ ஓடிவந்து மீனாக நீரில் செருகிக் கொண்டாள்.

"ஸ்விம் பண்ணுவோமா?" - ஸ்வர்ணா.

  ஸ்விம் பண்ணுவோமா? - மார்பும் கேட்டது.

துடித்தது.  துடித்தான்.

எழுந்தார்கள்.

கைகோர்த்து நடந்தார்கள்.  நீருக்குள் பாய்ந்தார்கள்.

"ஸ்வர்ணா!"

கதவு திறந்தது.  

ஸ்வர்ணா தோன்றினாள்.  

"உள்ளே வாங்க "

போனான்.

"யாருமில்லையா?"

"நாம இருக்கோமே!"

"நம்மைத்தவிர வேற யாருமில்லையா?"

"இல்லை"

"உங்க பேரன்ட்ஸ்?"

"அம்மா காலட்சேபம்  போயிருக்கிறா..  அப்பா ரெக்ரியேஷன் க்ளப்புக்குப் போயிருக்கார்"

"சீட்டாடுவாரா?"

"ஆமாம்.  முதல் தேதி நூறோ, நூத்தம்பதோ கொண்டாந்து கொடுப்பார்.  அப்புறம் ஒவ்வொரு வாரமும்  நூறோ, நூத்தம்பதோ எங்க கிட்டேயிருந்து வாங்கிப்பார்."

"குடுக்கலேன்னா?"

"அடிப்பார்."

ஜாக்கெட்டைக் கழற்றிக் காட்டினாள்.  காயங்கள் தெரியவில்லை.  'தொடு' என்றது. தொட்டுக் கொண்டான்.

"அம்மாவுக்கு கூட நிறைய காயங்கள்."

"அதெல்லாம் நான் பார்க்க மாட்டேன்."

"...சீ !"

அவள் மெதுவாக அவன் மீது பரவினாள்.  கைகளால் பிணித்தாள்.

அவன் பற்குறி பதித்தான்.

சட்டென்று லீனா நினைவுக்கு வர, விலகினான்.

அவள் அவனை விளக்க விடாமல் அணைக்க முயன்றாள்.  முரட்டுத்தனமாக விலகினான்.

"நாளைக்கு ஒரு முக்கியமான போட்டி இருக்கு.  ஹண்ட்ரட் மீட்டர்ஸ் ஃப்ரீ ஸ்டைல்.  வெற்றிப் பரிசு என்ன தெரியுமா?"

"என்ன?"

"பெண்."

"பெண்ணா!"

"ஆமாம்.  பேர் லீனா.  சுமாராத்தான் இருப்பா.  ஆனா வசதியானவ."

"அது யார், பெண்ணைப் பரிசு வச்சி போட்டி நடத்தறது?"

"ஸ்வரூப்னு எனக்கு ஒரு ஃப்ரெண்ட்.  அவனும் நல்லா ஸ்விம் பண்ணுவான்.  அவனும் லீனாவை விரும்பறான்.  லீனா யாரையும் வெளிப்படையா  தேர்வு செய்ய விரும்பலே.  அதனாலதான் இந்த ஸ்விம்மிங் காம்பெடிஷன்.  அவளுக்கே தெரியும் - நான்தான் ஜெயிப்பேன்."

"அப்போ நீங்க என்னை விரும்பலியா?"

"ஸாரி, நீங்க என் விசிறின்னு சொன்னதாலேயும்,   நீங்களா நெருக்கமா பழகினதாலேயும் கொஞ்சம் உணர்ச்சிவசப்பட்டுட்டேன்.  தட்ஸ் ஆல்!"

வெளியேற முயன்றான்.

"உட்காருங்க..  நண்பர்களாகவே இருப்போம்."

அவளுக்கு அவன் மீது அனுதாபம் ஏற்பட்டது.

ஸ்வரூப்புக்காக இந்தக் காரியத்தைச் செய்ய வேண்டுமா?

"நீங்க லீனாவை மனசார விரும்பறீங்களா?  இல்லை, பணத்துக்காக அவளைக் கல்யாணம் பண்ணிக்கப் போறீங்களா?"

"விரும்பறேன்.  ஆனா அவ பணமும் ஒரு முக்கியமான காரணம்"

இது ஒருவகை மோசடி.  பணத்துக்குத் தாலிகட்ட எப்படி அலைகிறான்!

"ட்ரிங்க்ஸ் கொண்டு வரேன்."

உள்ளே சென்றாள்.

ஹார்லிக்ஸ் கலந்தாள்.  ஸ்வரூப் தந்த மாத்திரையையும் கலந்தாள்.  கொண்டு வந்தாள்.

குடித்தான்.

பேசத் துவங்கினார்கள்.

மெல்ல அவன் தலையில் சுமை எற - 

கண்கள் விரிந்துப் பார்க்க - 

உலகம் மங்கலாய் தோன்றி ஜாலங்கள் துவங்க -

அவன் துகிலுரித்து நடனமாட 

இமைகள் கனத்தன.

அவனுக்கு, விடிந்தபோது நேரம் ஒன்பதை நெருங்கியது.

அலறினான்.

ஸ்வர்ணா ஃப்ளாஸ்க்கிலிருந்து காப்பிய ஊற்றினாள்.

"அடிப்பாவி!  என்னை என்ன பண்ணே?  எனக்கு நேரமாயிடுச்சே!"

"என்ன நேரமாயிடுச்சி?  இன்னிக்கு ஸண்டேதானே !"

இன்னிக்குதான் லீனாவுக்கான போட்டி"

"எப்போ?"

இந்நேரம் முடிஞ்சிருக்கும்.  ஸ்வரூப் போட்டியில்லாம ஜெயிச்சிருப்பான்.  இன்னும் உங்க அம்மா வரலியா?"

"------------------"

"இது உங்க வீடா?"

"ஆ...மாம்."

அறைந்தான்.  ----"சொல்லு.  யார் நீ?  இது யார் வீடு?"

மீண்டும் அறைந்தான்.  --"பொய் சொல்லாதே!"

கன்னத்தைத் தடவிக் கொண்டாள்.  --"நான் ஒரு ப்ராஸ்ட்யூட்..."

ஒரு அடி  பின்னால் போனான்.

"ஸ்வரூப்தான் என்னை அனுப்பிச்சார்."

"பாவி,  பணத்துக்காகத்தானே இந்தக் காரியத்தை செஞ்சே?"  உலுக்கினான்.

"ஆமாம், பணத்துக்காக நீ ஒரு பெண்ணை கல்யாணம் செஞ்சுக்கலாம்.  நான் பணத்துக்காக உன்னைத் தடுக்கக் கூடாதா?"

கொஞ்சம் அதிர்ந்தான்.

சொன்னான் - "நான் பணத்துக்காகதான் அவளைக் கல்யாணம் பண்ணிக்க ஆசைப்பட்டேன்.  பணம் எதுக்கு?  நான் சந்தோஷமா வாழறதுக்கு இல்லே.  என் நொண்டித் தங்கைக்கும், படிப்பறிவில்லாத  முரட்டுத் தம்பிகளுக்கு நல்ல வாழ்க்கையை அமைச்சிக் குடுக்கத்தான்!  நான் பணத்துக்காக அவளை விரும்பினாலும், அந்தப் பணத்துக்கு விஸ்வாசமா இருப்பேன்.  ஸ்வரூப் இப்படி இல்லே... உலகத்துல இருக்கிற அத்தனை கெட்ட பழக்கங்களும் அவனுக்கு உண்டு.  நீ ஒரு பெண்ணோட வாழ்க்கையையும் பாழாக்கிட்டே !"

---நொண்டித் தங்கை!

---படிப்பறிவிலலாத தம்பிகள்!

ஸ்வரூப் அப்படி இல்லை!

ஸ்வர்ணா அதிர்ச்சி அடைந்தாள்.  முதன் முதலாக பாவம் செய்ததாக உணர்ந்தாள்.  அழுதாள்.