இனிய புத்தாண்டு - மைசூர்பா - நெல்லைத்தமிழன் ரெஸிபி

 

மைசூர்பா – நெல்லைத்தமிழன்

வீட்டில் பல இனிப்பு வகைகளைச் செய்யும் பழக்கம் உள்ளவன் நான்.  எல்லா நேரங்களிலும் சரியாக வரும் என்று சொல்ல முடியாது. நினைத்த அளவு சரியாக வராமலும் போய்விடும். சில நேரங்களில், ஹஸ்பண்ட் மெனெக்கெட்டுச் சொல்லும் ஆலோசனைகளை, ‘எனக்கு எல்லாம் தெரியும், நான் பார்த்துக்கொள்கிறேன்’ என்று சொல்லிவிட்டுச் சொதப்பியிருக்கிறேன். மெதுவா, நீ சொன்ன ஐடியா சரிதான் என்று சொல்லுவேன் (உடனே அல்ல….சில பல மணி நேரங்கள் அல்லது நாட்கள் கழித்து). எல்லாமே கற்றுக்கொள்வதில் ஒரு பகுதிதானே….  பெரும்பாலும் போட்டோக்கள் எடுத்துவிடுவேன். பல சமயங்களில் அனுப்ப விட்டுப்போய்விடும். மாதங்கள் ஆகிவிட்டால் எழுதுவதில் ஆர்வம் இல்லாமல் போய்விடும்.

இந்த வருட ஆரம்பத்தில் முதல் ரெசிப்பியாக என்ன அனுப்பலாம் என்று யோசித்து மிகச் சமீபத்தில் செய்த மைசூர்பாக்கு செய்முறை அனுப்பலாம் என்று நினைத்தேன்.

பெங்களூரில் மனைவியின் வழி உறவினர்கள் நிறையபேர் இருக்கின்றனர். இரண்டு வருடங்களுக்கு முன்பு, கஸின்கள் (ஆண்கள்) சேர்ந்து சமையல் செய்து, எல்லோரையும் (சுமார் 40 பேர்கள், எங்களையும் சேர்த்து) மதிய உணவுக்கு வரவைக்கலாம் என்றொரு யோசனையைச் செயல்படுத்தினார்கள். அப்போது நானும் தேங்காய் பர்பி, அரிசிப் பாயசம் செய்தேன். இரண்டையும் சூப்பராக இருந்து என்று பலரும் (அதாவது இனிப்பு சாப்பிடாதவர்கள் தவிர மற்றவர்கள்) சொன்னார்கள். 

பிறகு இந்த வருடம், இரு வாரங்களுக்கு முன்பு அதே போன்று ஒரு நிகழ்வு நடந்தது. அதில் நான் மைசூர்பாக்கு (பாகு வா இல்லை பாக்கா?), அக்கார அடிசில், மாங்காய் தொக்கு மற்றும் தயிர்சாதம் பண்ணினேன். அக்கார அடிசிலும் மாங்காய் தொக்கும் அனைவருக்கும் பிடித்திருந்தது. என் மாமியாருக்கு அக்கார அடிசில் ரொம்பப் பிடித்திருந்தது (குடும்பத்தில் அவர் அக்கார அடிசில் செய்வதில் எக்ஸ்பர்ட் என்று சொல்வார்களாம்). எனக்கும் ரொம்பவே மனத் திருப்தி.  

ஓர் உண்மை சொல்லியாக வேண்டும். எந்த ஒன்றும் நன்றாக வருவதற்கு ஏதோ ஒரு லக் தேவைப்படுகிறது. அதாவது நம்மை மீறிய ஒரு சக்தி. இதைத்தான் நான் புரிந்துவைத்துள்ளேன். நான் ‘இதில்’ எக்ஸ்பர்ட் என்று சொல்பவர்களை நம்பி, 'சரி, அதைப் பண்ணுங்கள், நான் வந்து சாப்பிடுகிறேன்' என்று சொன்னால், அன்றைக்குப் பார்த்து அது சரியாக வந்திருக்காது.

இன்றைக்கு நான் செய்த மைசூர்பாக் செய்முறையைப் பகிர்கிறேன். இந்த மைசூர்பாக்கை, பெரிய அளவில் செய்வதற்கு முன்னால், வீட்டிற்கு வந்த முக்கிய விருந்தினர்களுக்காகச் சிறிய அளவில் (சுமார் 20 துண்டுகள் வரும்படியாக) செய்தேன். பிறகு, உறவினர்கள் சந்திப்பிற்காக கொஞ்சம் அதிக அளவில் செய்தேன்.

தேவையானவை

கடலை மாவு 1 கப்

நெய் 1 ½ கப்

ஜீனி 1 ¼ கப்

நல்ல நீர் ½  கப்

பட்டர் பேப்பர் வைத்த தட்டு

செய்முறை

பட்டர் பேப்பர் வைத்த தட்டைத் தயாராக வைத்துக்கொள்ளவும். அல்லது எந்தத் தட்டில் மைசூர்பாக்கைக் கொட்டப்போகிறோமோ அந்தத் தட்டில் நெய்யைத் தடவி வைத்துக்கொள்ளவும்.

நெய் உறைந்திருந்தால் சிறிது சூடுபடுத்தி உருக வைத்துக்கொள்ளவும்.

கடலைமாவை ஒரு கடாயில் பச்சை வாசனை போக வறுத்துக்கொள்ளணும். ரொம்ப நன்றாக வறுக்கக் கூடாது. நிறம் மாறிவிடக் கூடாது.

இந்த மாவை நன்கு சலித்துக்கொள்ளவும். இதனுடன் எடுத்துக்கொண்ட நெய் அளவில் பாதியை (உருக்கியது) கலந்துகொண்டு, கட்டியில்லாமல் ஸ்மூத்தாக இருக்கும்படி நன்றாகக் கலந்துகொள்ளவும். இது கொஞ்சம் நீர்க்க இருக்கும் தோசைமாவு போன்ற பதத்தில் இருக்கும்.

கடாயில் ஜீனியும் அதில் நீரையும் சேர்த்த பிறகு, அடுப்பை Simல் (மெது தணலில்) வைக்கவும். கரண்டியால் கலக்கிக்கொண்டே இருக்கவேண்டும். இல்லாவிட்டால் ஜீனி அடியில் கரையாமல் தங்கிவிடும், மேலே உள்ள பகுதி மாத்திரம் கொதித்து நமக்குத் தேவையான பதத்துக்கு வரும்.  அதனால் தொடர்ந்து கலக்கவும். ஒரு ஸ்டிரிங் பதத்திற்கு வரணும். 

இப்போது நெய்+கடலைமா கரைத்துவைத்திருப்பதை கடாயில் விட்டு, நன்கு கிளறவேண்டும். அடுப்பு மெது தணலில் இருக்கவேண்டும். கிளறிக்கொண்டே அவ்வப்போது ஒரு கரண்டி நெய்யை விட்டுக் கலக்கவேண்டும். கிளறுவதைத் தொடர்ந்துகொண்டே இருக்கணும். கொஞ்சம் கொஞ்சமாக கலவை கெட்டியாவதை உணரமுடியும்.

நன்கு பொரிந்து ஓரங்களில் ஒட்டாமல் வரும் பதத்தைப் பார்த்துக்கொண்டிருக்க வேண்டும். (இதுக்கு மாத்திரம்தான் அனுபவம் வேண்டும்).  அந்தச் சமயத்தில் அடுப்பை அணைத்துவிட்டு, கலவையை முன்னம் தயார் செய்திருக்கும் தட்டில் கொட்டவேண்டும்.

பத்து நிமிடங்கள் சென்றபிறகு, கத்தியை வைத்து துண்டுகளுக்கான கோடுகள் போட வேண்டும். அரை மணி நேரம் கழித்து முன்பு போட்ட கோடுகளின் வழியே இன்னொரு முறை கத்தியா அழுத்திக் கோடு போட்டால் மைசூர்பாக் தனித்தனியாக வந்துவிடும்.

குறிப்பு

பதம் மிகச் சரியாக வருவதற்குச் சற்று முன்பு தட்டில் கொட்டினால், ஸ்ரீகிருஷ்ணா மைசூர்பா வந்துவிடும்.

பதம் வந்தபிறகு மிகச் சிறிய நேரத்துக்குப் பிறகு தட்டில் கொட்டினால் மைசூர்பாக் கொஞ்சம் கட்டியாக இருக்கும்.

நம் கதை

முதல் தடவை செய்தபோது மிக அருமையாக வந்திருந்தது.  சில நாட்கள் கழித்து மீண்டும் அதிக அளவில் செய்ய ஆரம்பித்தபோது, ஹஸ்பண்ட், இரண்டு பேட்சாகச் செய்யுங்கள் என்றாள். அதெல்லாம் நான் பார்த்துக்கறேன் என்று அலட்சியமாகச் சொல்லிவிட்டேன். இந்தத் தடவை ஜீனி அளவு அதிகம் என்பதாலும் சிறிய கவனச் சிதறலாலும் (அதாவது போட்டோ எடுக்க செல்ஃபோனைத் தேடினேன்), ஜீனியைக் கலக்கிக்கொண்டிருக்கவில்லை. அதனால் ஜீனி அடியில் கொஞ்சம் தங்கிவிட்டது. ஆனால் மேலே பாகு பதம் வந்துவிட்டது. இதற்கு நான் வேறொரு குழிவான கடாயை உபயோகித்ததும் ஒரு காரணம். ஹஸ்பண்ட், என்ன அதற்குள் பாகுபதம் வந்துவிட்ட தா என்று கேட்டபோது, ஆமாம் என்று சொல்லி, உடனே கடலைமா நெய் கலவையைக் கொட்டிவிட்டேன். இதனால் மைசூர்பாக்கில் ஜீனி நெருடல் இருந்தது. இருந்தாலும் மைசூர்பாக்கிற்கான பொருட்கள் சூப்பர் என்பதால், அந்தக் குறை பெரிதாகத் தெரியவில்லை. ரொம்பவே நெய் வாசனையுடன் இருந்தது. என் மனதுக்குத்தான் தெரியும் நான் சொதப்பின விஷயம்.

எங்கள் குலதெய்வம் திருப்பதி ஸ்ரீநிவாசன் அருளால், அனைவருக்கும் இது சிறப்பான ஆங்கிலப் புத்தாண்டாக இருக்கட்டும்.

 = = = = = = = =

எங்கள் Blog 2023 ஆம் ஆண்டு புள்ளி விவரங்கள். 

# நாளுக்கு ஒன்று என்று நாங்கள் வெளியிட்ட மொத்த பதிவுகள் : 365 

ஒரே நாளில் அதிக பட்ச பார்வையாளர்கள் எங்கள் Blog  : 24.11.2023 

அன்று பார்வையாளர்கள் மொத்தம் : 7191 பேர்! 

'திங்க'க்கிழமை சமையல் பதிவுகள் விவரங்கள். 

சமையல் குறிப்புகள் அனுப்பிய எல்லோருக்கும் 

(கடைசியில் உள்ளவரைத் தவிர்த்து!) எங்கள் நன்றி. 

முதலிடத்தைப் பிடித்த துரை செல்வராஜூ அவர்களுக்கு வாழ்த்துகள். 

நாளை : செவ்வாய் பதிவுகள் புள்ளி விவரங்கள். 

= = = = = =