"திங்க"க்கிழமை : கிடாரங்காய் இனிப்பு ஊறுகாய் - மனோ சாமிநாதன் ரெஸிப்பி

 பொதுவாய் கடாரங்காயில் மிளகாய் மட்டும் சேர்த்து கார ஊறுகாயாக மட்டும் தான் எல்லோரும் போடுவது வழக்கம். வெல்லம் சேர்த்து தயாரிக்கப்படும் இந்த ருசியான ஊறுகாய் செய்யும் விதம் பற்றி என் சினேகிதி ஒருவரின் மூலம் தெரிந்து கொண்டேன். இந்த கடாரங்காய் வெயில் காலத்திலும் சரி, குளிர் காலத்திலும் சரி காய்கறி சந்தையில் கிடைக்கும். அதுவும் தஞ்சையில் நல்ல மஞ்சள் நிறத்திலும் அழகான பச்சை நிறத்திலும் கிடைக்கும். ஊறுகாய் செய்து ஜாடியில் நிரப்பி வைத்தால் ஒரு வருடமானாலும் கெடாது. இனி ஊறுகாய் செய்யும் விதம் பற்றி....

கடாரங்காய் இனிப்பு ஊறுகாய்

மனோ சாமிநாதன் 

தேவை:

கடாரங்காய்-4

மிளகாய் வற்றல்- 3 கப்

வெந்தயம்- 2 ஸ்பூன்

பெருங்காயப்பொடி- 1 ஸ்பூன் அல்லது கட்டிப்பெருங்காயம்- ஒரு பெரிய துண்டு

வெல்லம்- அரை கிலோ

மஞ்சள் தூள்- அரை ஸ்பூன்

நல்லெண்ணை- அரை லிட்டர்

தேவையான கல் உப்பு

செய்முறை:

மிளகாய் வற்றலை சிறிது நல்லெண்ணையில் கை விடாமல் மெதுவான தீயில் வறுத்தெடுக்கவும்.

கட்டிப்பெருங்காயமானால் எண்ணெயில் பொரித்தெடுத்து வைக்கவும். தூள் பெருங்காயமென்றால் ஊறுகாய் செய்யும்போது பொடி வகைகளைச்சேர்க்கும்போது சேர்த்துக்கொள்ளலாம்.

வெந்தயத்தை சில துளிகள் எண்ணெய் விட்டு பொன்னிறமாக வறுத்தெடுக்கவும்.

இவையெல்லாம் நல்ல வெய்யிலில் சில மணி நேரங்கள் காய வைத்து பின்னர் சன்னமாக பொடிக்கவும்.

கடாரங்காய்களை 1  செ.மீ அளவில் துண்டுகளாக அரிந்து விதையெடுத்து வைத்துக்கொள்ளவும்.

வாணலியில் பாதி நல்லெண்ணையை ஊற்றி காய்ந்ததும் கடாரங்காய் துண்டுகளைப்போட்டு மெதுவான தீயில் வதக்கவும்.

மஞ்சள் தூள் உப்பு சேர்த்து மேலும் வதக்கவும்.

காய் வெந்ததும் தூள்களை சேர்த்து வதக்கவும்.

காய் பதமாக வெந்து சுருள வந்ததும் பொடித்த வெல்லத்தை சேர்த்து கிளறவும்.

மீதியுள்ள நல்லெண்ணையையும் ஊற்றி கிளறவும்.

ஊறுகாய் லேகியப்பதமாக சுருள வரும்போது, எண்ணெய் மேலே கசிந்து வரும்போது இறக்கவும்.