சிறுகதை : உன்னைத் தானே.. -- துரை செல்வராஜூ

 உன்னைத் தானே..

துரை செல்வராஜூ

*** *** *** *** *** ***

' உன்னைத் தானே தஞ்சம் என்று.. '

கைத்தல பேசியை உசுப்பிய தங்கமணி -

" சொல்லு வசந்தி.. " - என்றாள்..

" அக்கா.. ரெண்டு நாளா சின்னவனுக்கு போன் பண்றேன்.. எடுக்கவே இல்லை... போன் ல ஏதும் கோளாறா?.. "

சின்னவன் எனப்படுபவன் கதிரவன்.. 

வசந்தியானவள்  தங்கமணியின் தங்கை.. கொஞ்சம்  துடுக்கானவள்.. திருச்சியில் வசிக்கின்றாள்.. 

அக்காவைப் பார்க்க வேண்டும் என்றால் மயிலாடுதுறை வண்டியையோ திருவாரூர் வண்டியையோ பிடித்து ஒரு மணி நேரத்தில் இங்கு வந்து விடுவாள்.. அதான் ரெட்டை வழி மின் தடம்.. மணிக்கு ஒரு வண்டி ன்னு ஆகி விட்டதே!.. 

அவ்வப்போது கைத்தல பேசியில் கதிரவனோடு பேசுகின்றேன் என்று செவிகளைச் சூடாக்கிக் கொள்வது வழக்கம்..

பெரியவனுக்குப் பிறகு ஒன்றரை வருடத்தில் பிறந்தவன்.. ஞாயிற்றுக் கிழமை பிறந்ததால் கதிரவன் - கதிர்..

குழந்தை பிறந்ததும் தன் கைகளில் ஏந்தியவள் நான்கு வருடங்கள் கழித்துத் தான் இறக்கி விட்டாள்.. அவனை வளர்த்து ஆளாக்கியவள் வசந்தி தான்!..

" சின்னவனுக்கா போன் செஞ்சே?.. "

" ஆமா!.. எங்கே அவன்?.. "

"  கோயிலுக்குப் போயிருக்கான்.. அவந்தான் மாலை போட்டுக்க விரதம் இருக்கானே.. " 

மாலை போட்டுக் கொண்டு விரதம் இருப்பது தான் தெரியும்.. மாலை போட்டுக் கொள்வதற்கே விரதமா!... ஆச்சர்யம்.. ஆனாலும்  அதுதான் முறை..

" மாலையா.. ஐயப்பன் கோயிலுக்கா!.. "

" ஆமா!.."

" அதுக்காக போன் எடுக்கக் கூடாதுன்னு இருக்கா?.. "

" அதுல தேவையில்லாத குப்பை எல்லாம் வருதுன்னு.. தூக்கி ஒரு ஓரமா போட்டுட்டான்!... "

"  இதுக்கு முன்னாலயும் வந்தது குப்பை தானே..  இப்ப மட்டும் என்ன நல்ல புத்தி?.. "

" இனிமேயாவது நல்ல புத்தி இருக்கட்டுமே ன்னு தான்.. "

" நெட்டைக் கழட்டி வீசிட்டு சாதாரணமா வைச்சுக்கணும்..

" வரட்டும்.. சொல்றேன்!.. "

" அதுசரி.. கார்த்திகைக்குத் தான் இன்னும் ரெண்டு நாள் இருக்கே..  அதுக்குள்ள என்ன அவசரம்?.. கண்டதையும் ஆக்கித் தின்னுட்டு அப்பறமா மாலை போட்டுக்க வேண்டியது தானே... " 

" கன்னிச்சாமியா போறதுனால கார்த்திகைக்கு முன்னாலயே சுத்த பத்தமா இருக்கணும் ன்னு.. "

" யார் சொன்னது?.. "

" நம்ம ஊர் வாத்தியார் சாமி.. "

" வாத்யார் சாமி தான் பெரிய ஊருக்குப் போய்ட்டாரே.. "

" வாத்யார் பெரிய ஊருக்குப் போய்ட்டாலும் அவர் மகன் தான் ஏழெட்டு வருசமா  குருசாமியா இருக்காரே.. "

" அவரு சொன்னாராக்கும்.. "

" அவங்க அப்பா மாதிரியே  இவர் கிட்டயும் கடுஞ் சட்டதிட்டம் .. "

" கம்ப்யூட்டர் காலத்துல இருந்துக்கிட்டு இந்த மாதிரியெல்லாம் ஏன் பண்றீங்க..  மால போட்டமா ..  கோய்லுக்குப் போனமா.. சாமியக் கும்பிட்டோமா.. திரும்பி வந்து ஜாலியா இருந்தமா.. ன்னு இல்லாம.. "

" அது அவங்க அவங்க  சம்பிரதாயம்.. வாத்யார் மகனோடயும் தான் ஆறேழு வருசமா  ஜனங்க மலைக்கு போய்ட்டு வர்றாங்களே!.. ". 

" ஏன்.. ஒரு வாரம் மட்டும் வெரதம் இருந்துட்டு கோய்லுக்குப் போய்ட்டு வர்றவங்க இல்லையா அக்கா?.. "

" நாஞ் சொல்றது விரதம் .. நீ  சொல்றது வெரதம்..  பெய்ற மழையில பச்சைப் பானையை வைக்கிறதுக்கும் சுட்ட  பானையை வைக்கிறதுக்கும் வித்தியாசம் இருக்கில்லே!.. "

தங்கமணியிடம் சிரிப்பு..

" ம்க்கும்.. சிரிப்புக்கு ஒன்னும் குறைச்சல் இல்லை.. ஐயப்பன் கோயில் மாலை போடறதுக்கு அத்தான் ஒன்னும் சொல்லலையா?.. "

" எங் கல்யாணத்தோடத் தான் சாமியாவது  பூதமாவது ன்னு.. ஆடிக்கிட்டு இருந்தாரு..  இப்போ ஆறேழு மாசமா ஒருத்தருக்கும் தெரியாம பஸ் ஏறி அந்த ஊர் கோயிலுக்கும் இந்த ஊர் கோயிலுக்கும் போய்க்கிட்டு இருந்தாரு.. போன வாரத்தில இருந்து உள்ளூர் கோயிலுக்கும் போக ஆரம்பிச்சுட்டாரு.. எந்த விரதத்தையும் விட்டு வைக்கறதில்லை!.. "

 

" அத்தானுக்கு நாடி நரம்பு வெலவெலத்துப் போயிருக்கும்.. "

எதிர் முனையில் வசந்தியின் சிரிப்புச் சத்தம்..

' புருசனைக் குறை சொல்றதாவது?.. ' -   தங்கமணிக்குக்  கோபம் வந்தது..

"  நீ  முதல்ல சிரிக்காம பேசு .. எதுக்காக சின்னவனுக்கு போன் செஞ்சே?.. " 

" ரெண்டு வருசத்துக்கு முன்னாலயே அவனுக்கு  கலியாணம்  ஆகி இருக்கணும்.. "

" ...... " 

- தங்கமணியிடம் மௌனம்..

"  கூடப் படிச்சவன் எல்லாம் கலியாணம் கட்டி புள்ள குட்டியோட இருக்கறப்போ இவன புடிச்சி வெரதம்.. அது இது.. கன்னிச் சாமி கறுப்புச் சாமி ன்னு அனுப்பி வைக்கிறியே.."

" அவனுக்கு கல்யாணம் பண்ணி வைக்கணும் ன்னு எனக்கு மட்டும் ஆசை  இல்லையா.. நல்ல நேரம் கூடி வரணுமே.. நாலு நாளைக்கு முன்னால  ஐயப்ப சாமி கனாவுல வந்து மலைக்கு வா.. ன்னு கூப்புட்டாறாம்... "

" இதென்ன புதுக்கதை!.. ஐயப்ப சாமி கனாவுல வந்து கூப்புட்டாறா?.. "

" சொல்றதைக் கேளு.. பொழுது விடிஞ்சதும் என்கிட்ட சொன்னான்.. நான் உங்க அத்தான கையக் காட்டி விட்டேன்... "

" ஆடு கோழி முட்டை ன்னு வளைச்சி கட்றவர் அத்தான்... வீட்டோட விரதம் இருக்கப் போறதா சொன்னதும்  சாமி ஆடியிருப்பாரே!.. "

" அதான் இப்ப ஆறேழு மாசமா திருந்திட்டார் ன்னு சொல்றேனே.. அதெல்லாம் ரொம்பவும் குறைச்சாச்சு!... "

" அது என்ன ரகசியம் ன்னு தான் சொல்லேன் அக்கா!.. "

" அது வேறொன்னும் இல்லை...  ஜூன் மாசத்துல ஒருநாள் அவங்க ஆபீஸ் ஆளுங்க நாலு பேர் ஏதோ பணப் பிரச்சனை ல கையும் களவுமா மாட்டிக்கிட்டாங்க.. அதிர்ஷ்டம் என்னன்னா.. மே மாசம் தான் அந்த செக்‌ஷன் ல இருந்து உங்க அத்தான் மாறி இருந்தார்.. "

" நல்லவேளை!.. "

" அன்னைக்கு வந்த நாலு பேர்ல ஒருத்தருக்கு எங்க குல தெய்வத்தோட பேராம்... அவரு திரும்பி போறப்ப ஒரு பார்வை   பார்த்திருக்கார்.. அத்தான் ஆடிப் போய்ட்டாராம்.. "

" ம்ம்.. "

" அன்னிக்கு விடியக் காலை எங் கனவுல முறுக்கு மீசையும்  

வீச்சரிவாளுமா சாமி.. வந்து நிக்குது.. எழுந்திரிச்சி இவர்கிட்ட சொன்னதும் பயந்துட்டார்.. மறுநாள் காலைல எல்லாருமா ஓடுனோம் குல தெய்வம் கோயிலுக்கு!.. " 

" அது எங்கே இருக்கு?.. "

" திருநவேலிக்கிட்ட... "

" அவ்வளவு தூரத்திலயா?.."

" என்னை கல்யாணம் கட்டினப்போ கூட குல தெய்வம் கோயிலுக்கு கூட்டிட்டுப் போகலை.. நாப்பது வருசத்துக்கு அப்புறமா இப்போ தான் வழி தெறந்திருக்கு!.. "

தங்கமணி பரவசத்துடன் சொன்னாள்..

இத்தனையும் நடந்திருக்கே.. என்று - வசந்தியிடம் ஆச்சரியம்..

" அப்போ ஆரம்பிச்சது தான்  இவங்களுக்கு பக்தி!.. இருந்தாலும் கனாவுல இன்னும் சாமி வரலையே ன்னு மனசுக்குள்ளே குறை.. "

 

" இவ்வளவு நடந்திருக்கு.. என் கிட்ட ஒரு வார்த்தை சொல்லலையே!.. "

" உனக்கு தெரிஞ்சிருந்தா  தான்  நீ  ஊர் பூரா டமாரம் போட்டிருப்பியே.. "

" அதுவும் சரி தான்!.. "

" அது இருக்கட்டும்..  நீ எதுக்கு போன் செஞ்சே.. அதச் சொல்லு!.. "

" அதுவா.. எங் கொழுந்தனாரோட பொண்டாட்டி  ஒரு  ஜாதகம்  கொடுத்திருக்காங்க..  போட்டோவும் வந்திருக்கு.. பொண்ணுக்கு இருபத்து நாலு வயசு.. செவப்பு நெறம்.. பேங்க்ல வேலை செய்றா.. ஒரு தம்பி மட்டும்.. சின்னவன வளர்த்த பாசம்.. அவங்கிட்ட முதல் ல சொல்லலாமே ன்னு தான்.. "

" உறவுக்காரப் பொண்ணா?.. "

" ஆமா.. அவங்களுக்கு ஏதோ சொந்தமாம்!.. "

" அப்படியா.. அதெல்லாம் அப்புறம் சொல்லிக்கலாம்.. இப்போ அவன் நல்லபடியா விரதம் இருக்கட்டும்.. "

" என்னமோ அக்கா.. கதிர் நல்லபடியா இருக்கட்டும்.. நான் சும்மா ஏதோ கேலி பண்ணி பேசிட்டேன்.. மனசுல வச்சிக்காம மன்னிச்சுடுங்க.. எந்த மனசு எப்போ மாறும்.. எப்படி மாறும் ன்னு யாருக்குத் தெரியும்?.. ஏதோ கதிருக்கு சீக்கிரம் நல்லது நடந்தா சரி.. கன்னிச்சாமி வந்ததும் சொல்லுக்கா.. நான் அப்புறமா பேசறேன்.. "

" சரி வசந்தி!.. மச்சினரக் கேட்டதாச் சொல்லு.. நாலு நாளைக்கு  இருக்கற மாதிரி பசங்கள அழைச்சிக்கிட்டு வா!..  "