நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 11 : நெல்லைத்தமிழன்

 

நான் தரிசனம் செய்த கோயில்கள் – நெல்லைத்தமிழன்

ஐந்து துவாரகைகள் யாத்திரை – பகுதி 11

ஸ்ரீ கிருஷ்ணர் தகனம் செய்யப்பட்ட இட த்தையும், பலராமர் இவ்வுலகை விட்டு நீங்கிய இடத்தையும் தரிசனம் செய்த பிறகு, அங்கிருந்து கிளம்பி, திரும்ப வரும் வழியில் சூர்யனார் கோவிலுக்குச் சென்றோம்.

இந்தக் கோவில் மிக மிகப் பழமையானது. சோம்நாத் கோவிலின் காலத்தையது. திரிவேணி சங்கமத்தின் வடக்குப் பகுதில் அமைந்துள்ளது இது. இந்தக் கோவிலில் யானை, சிங்கம், பறவைகள் மற்றும் விலங்குகளுடன் கூடிய கட்டிடங்கள் மனதை மயக்குபவை. இந்தக் கோவிலின் வளாகத்திலேயே ஒரு சிறிய குளம் (தீர்த்தம்) பல படிகள் இறங்கிச் செல்லும்படி அமைந்துள்ளது. துரதிருஷ்டவசமாக இந்தக் கோவிலும் முஸ்லீம் படையெடுப்பால் தாக்கப்பட்டு அழிந்த நிலையில் இருந்த து.  சோம்நாத் கோவிலைப் போல இதனை முழுவதுமாகச் சீரமைக்கவில்லை. அதனால் அந்தப் பழமை இன்னும் தெரிகிறது.

சூர்ய கோவில்

சுவற்றில் உள்ள சுதைச் சிற்பங்கள்.

கோவிலின் உள்ளே உள்ள சூர்ய குண்ட் எனப்படும் தீர்த்தக் கட்டம். இந்த நீரை நாங்கள் தலையில் தெளித்துக்கொண்டோம்.

கோவிலின் பழமை, கட்டிடக் கலையில் தெரிகிறது.

விஷ்ணு, துர்கை என்று பல்வேறுபட்ட சிற்பங்கள்.

சிதைக்கப்படாமல் இருந்திருந்தால் இன்னமும் அழகாகத் தெரிவோம்.

சமுத்திரக் காற்றினால் சிறிது சிதைவுற்ற நிலையில் அழகிய சிற்பங்கள்.

உள்ளே மூலவர் இருக்கும் இடத்தில் இப்படித்தான் இருந்தது. அங்கு இருந்த சூரியனார் சிலை காணாமல் போயிருக்கவேண்டும். அல்லது இன்னொரு வளாகத்தில் நான் பார்த்த சூரியனார் சிலை, இங்கிருந்து சென்றிருக்க வேண்டும். அங்கு அந்தச் சிலை 800 ஆண்டுகளுக்கு முற்பட்டது என்று எழுதியிருந்ததாக நினைவு.

கோவில் வெளிப்புறச் சுவற்றில் இருந்த காலத்தினால் பழுதுபட்ட சிற்பங்கள்.

இந்தக் கோவிலில் தரிசனம் செய்தபிறகு, அருகிலிருந்த ஹிங்லஜ் மாதா குகை எனப்படும் பஞ்சபாண்டவர் குகைக்குச் சென்றோம். நாட்டை விட்டு வெளியேறிய பஞ்சபாண்டவ சகோதர ர்கள் இந்தக் குகையில் சிவனை நோக்கித் தவம் செய்ததாக நம்பப் படுகிறது. அவர்கள் வழிபட்ட ஹிங்லஜ் மாதா (காளி) சன்னிதி இங்கு இருக்கிறது (குகை என்பதால் குனிந்து தவழ்ந்து செல்லவேண்டும்)

ஹிங்க்லஜ் மாதா குகைக் கோவில்.

பஞ்சபாண்டவர் நினைவாக அமைக்கப்பட்ட சிலைகள். 

ஹிங்லஜ் மாதா சன்னிதி.

பாண்டவர்கள் வணங்கிய மாதாவை மனதினால் தியானம் செய்தோம்.

இதன் அருகிலேயே காம்னாத் மஹாதேவர் கோவில் மற்றும் சாரதா பீடம் அமைந்துள்ளது. இந்தக் கோவில் வளாகத்தில் ஒரு சிறிய குளம் இருக்கிறது. மயூரத்வஜ அரசன், இந்தக் குளத்தில் நீராடித் தன் குஷ்ட நோயைப் போக்கிக்கொண்டான் என்று சொல்கிறார்கள். இந்த இட த்தில், சிறிய குகை போன்று கீழே செல்கிறது. அதன் வழியாகச் சென்றால், ஆதிசங்கரர் பல ஆண்டுகள் தவம் செய்த இடம் வருகிறது. இப்போதிருக்கும் வளாகம் 200 ஆண்டுகளுக்கு முன்பு கட்டப்பட்டதாம். 

காம்நாத் மஹாதேவர் கோவில்

குகையின் நுழைவாயில்

ஆதிசங்கரர் தவம் செய்த இடம்.

அதன் அருகில் இருந்த பன்னிரண்டு ஜோதிர்லிங்கங்கள்.

அங்கேயே சரஸ்வதிக்கும் லக்ஷ்மிதேவிக்கும் சிலைகள் அமைத்துள்ளனர்.

ஆதிகுரு சங்கராச்சாரியாருக்காக அமைக்கப்பட்டிருக்கும் சன்னிதி

ஆதிசங்கரர் என்பவர் கேரள மாநிலம் காலடியில் பிறந்து சிறு வயதிலேயே துறவறம் ஏகி, வடநாடுகளில் பயணித்து, இடையில் நிறைய சீடர்கள் அமைந்து, பல கோவில்களை நிர்மாணித்து, பல மடங்களை ஸ்தாபனம் செய்து,  பல கோவில்களில் ஸ்ரீசக்ரம் ஸ்தாபிதம் செய்து, பிறகு பத்ரி நோக்கிச் செல்லும்போது, தன் தாயாருக்குக் கொடுத்த வாக்குப்படி, தாயார் மறையும் காலம் வந்த தும் திரும்பவும் காலடி திரும்பி, தன் தாய்க்குச் செய்யவேண்டிய இறுதிச் சடங்குகளைத் தான் துறவியாக இருந்தபோதும் செய்து, பிறகு பத்ரிநாராயணர் கோவிலுக்குச் சென்று, அதன் பின்புறம் இருக்கும் பாதை வழியாக இமயமலை நோக்கி நடந்து மறைந்தார் என்பது அவரது சரித்திரம்.

இவற்றையெல்லாம் ஒவ்வொன்றாக தரிசனம் செய்த பிறகு, கடைசியாக நாங்கள் செல்லவேண்டிய ராமர் கோவிலுக்குச் சென்றோம்.  இங்குதான் சூரிய கோவிலிலிருந்து எடுக்கப்பட்ட சிலை இருக்கிறது என்று எனக்குத் தோன்றியது.

அந்தப் பகுதியை அடுத்த வாரம் பார்க்கலாமா?

(தொடரும்)