"திங்க"க்கிழமை : பாம்பே சட்னி - பானுமதி வெங்கடேஸ்வரன் ரெஸிப்பி

 

பாம்பே சட்னி

தேவையான பொருள்கள்:

கடலை மாவு.       - 1 கப்

வெங்காயம்.        - 2

தக்காளி.               - 2

பச்சை மிளகாய்  - 4

வேக வைத்த உருளைக் கிழங்கு - 2

 உப்பு.                     - 2 டீ ஸ்பூன்

மஞ்சள் தூள்.       - 1/4 டீ ஸ்பூன்

தாளிக்க.                - எண்ணெய், கடுகு, சீரகம்.

செய்முறை:

கடலை மாவை மூன்று அல்லது நான்கு கப் நீர் சேர்த்து கட்டியில்லாமல் கரைத்து வைத்துக் கொள்ளவும். 

வெங்காயத்தை நீளமாக, மெல்லியதாக, தக்காளி, ப.மிளகாயை சிறியதாக நறுக்கி வைத்துக் கொள்ளவும்.

வெந்த உருளைக் கிழங்குகளை தோல் உரித்து மீடியம் சைஸ் துண்டுகளாக நறுக்கி வைத்துக் கொள்ளவும்.

ஒரு வாணலியை அடுப்பில் வைத்து சிறிதளவு எண்ணெய் ஊற்றி காய்ந்ததும் கொஞ்சம் கடுகு, சீரகம் (இவற்றோடு தேவையானால் சிவப்பு மிளகாய் சேர்த்துக் கொள்ளலாம்). தாளித்து முதலில் வெங்காயம், பச்சை மிளகாய் இவைகளை வதக்கிக் கொள்ளவும். அவை நன்கு வதங்கியதும் தக்காளியை சேர்த்து வதக்கவும். 

பின்னர் அடுப்பை சிம்மில் வைத்து விட்டு கரைத்து வைத்திருக்கும் கடலை மாவு கரைசலை சேர்த்து, உப்பு மற்றும்  உருளைக் கிழங்குத் துண்டுகளை சேர்த்து கட்டித் தட்டாமல் கிளறவும். கடலை மாவு வெந்த பிறகு கெட்டியாகும். தேவையென்றால் தண்ணீர் சேர்த்துக் கொள்ளலாம். கொத்தமல்லி தழையை பொடிப்பொடியாக நறுக்கி  சேர்த்து இறக்கி விடவும்.

சுவையான செய்வதற்கு எளிய இந்த பாம்பே சட்னி, சப்பாத்தி, பூரி போன்றவைகளுக்கு பொருத்தமான சைட் டிஷ்.