நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 12 : நெல்லைத்தமிழன்

 

நான் தரிசனம் செய்த கோயில்கள் – நெல்லைத்தமிழன்

ஐந்து துவாரகைகள் யாத்திரை – பகுதி 12

ஆதிசங்கரர் தவம் செய்த குகையைத் தரிசனம் செய்த பிறகு நாங்கள் திரும்பும் வழியில் சோம்நாத் டிரஸ்டினால் நிர்வகிக்கப்படும் ஸ்ரீ ராம் மந்திர் என்ற கோவிலுக்குச் சென்றோம். இது புதிதாகக் கட்டப்பட்ட து. மிகப் பிரம்மாண்டமாகவும் எழிலுடனும் அமைந்திருக்கும் கோவில்.

சோம்நாத் டிரஸ்டினால் நிர்வகிக்கப்படும் ஸ்ரீ ராம் மந்திர்

800 ஆண்டுகள் பழமை வாய்ந்த சூரியக் கடவுளின் சிற்பம்

சூரியதேவர் சிலையின் பக்கத்தில், வராஹமூர்த்தி மற்றும் இன்னொரு சிலையும் இருக்கிறது. இவையெல்லாம் இடிபாடுகளில் கிடைத்தவையாயிருக்கும். இதில் சூரியனுடைய சிலை, சூரியக் கோவிலில் (சூரஜ் மந்திர் என்று அழைக்கப்படுவது) இருந்திருக்கும் என்று தோன்றுகிறது.

ஸ்ரீ ராம் மந்திரின் மூலவர், ஸ்ரீராமர், லக்ஷ்மணர் சீதா மற்றும் அனுமனுடன் காட்சி தருகிறார்.

தனியாக அமைந்திருக்கும் அனுமன் சிலை

கோவிலின் பெரிய மண்டபமும் அங்கிருக்கும் சிற்பங்களும்

கோவில் வளாகத்திலிருந்து பார்த்தால் நதி தெரியும்.

வெளிப்புறச் சுவற்றில் சிற்பங்கள்

வருணதேவர் மற்றும் வாயு தேவர்

அழகிய கட்டிடம் மற்றும் விதானம்.

இந்தக் கோவிலின் மண்டபம் மிகவும் குளிர்ச்சியாக அமைந்திருக்கிறது. சிறிது நேரம் அங்கிருந்து இறைவனைத் தியானித்த பிறகு, ஆட்டோ எங்களை நாங்கள் எங்கள் பைகளை வைத்திருந்த ஸ்ரீ ராமானுஜ கூடத்தில் இறக்கிவிட்டது.

பிறகு அருகில் இருந்த சோம்நாத் கோவிலுக்குச் சென்றோம்.

சோம்நாத் கோவில் என்பது மிகப் பழமையானது. இதனை மஹாபாரதம் மற்றும் பல புராணங்கள் குறிப்பிடுகின்றன. பன்னிரண்டு ஜ்யோதிர் லிங்கங்களுள் ஒன்று. பழமை இலக்கியங்களில் பிரபாஸ தீர்த்தப் பகுதியில் உள்ள ஜ்யோதிர் லிங்கம் என்றே குறிப்பிடப்படுகிறது. சந்திரன் வழிபட்ட தலம் என்பதால் சோமநாதர் என்றழைக்கப்படுகிறார்.

இது, விராவல் துறைமுகத்தின் அருகில் உள்ளது, இங்கிருந்து பாகிஸ்தான் வெகு அருகில் இருக்கிறது.

இந்தக் கோவில் பொது ஆண்டிற்கு முன் 200 ஆண்டுகளுக்கு முன்பே இருந்தாம். கோவிலில் இருந்த அளவற்ற செல்வம், சிவலிங்கம் தரையைத் தொடாமல் அந்தரத்தில் இருந்தது (என்று சொல்கின்றனர்) போன்ற பல சிறப்புகளைப் பெற்றது. கஜினி முகம்மது பதினேழு முறை படையெடுத்து கோவிலைக் கைப்பற்றி பல செல்வங்களை வாரிக்கொண்டு சென்றது, அந்தக் கோவிலைக் காக்க பலர் பலியானது என்று ரத்தச் சரித்திரத்தைத் தன்னகத்தே கொண்டுள்ள இடம் இது.  படையெடுப்புக்குப் பிறகும் கோவில் சீர் செய்யப்பட்டு, மீண்டும் அழிக்கப்பட்டு, என்ற வரலாறைப் பின்னணியில் கொண்ட கோவில் இது. அந்த வடுக்கள் மறைவதற்காக, சர்தார் வல்லபாய் படேல், காந்தியின் சம்மதத்தைப் பெற்று கோவிலை மீண்டும் நிர்மாணித்தார். கோவில் முழுவதுமாக நிர்மாணிக்கப்பட்டு வழிபாட்டுக்கு வந்தபோது, காந்தியின் சகாப்தம் முடிவடைந்திருந்தது.

மிகவும் சென்சிடிவ் ஆன இடம் என்பதாலும், பாகிஸ்தானின் அருகில் இருப்பதாலும், கடுமையான காவல் கண்காணிப்பில் இருக்கிறது கோவில் வளாகம். செல்போன் மற்றும் எதையும் எடுத்துச் செல்ல முடியாது. வளாகத்தின் சிறிது தூரத்திலேயே இவற்றையெல்லாம் விட்டுச் செல்ல இடங்கள் இருக்கின்றன.

நாங்கள் சென்றது நல்ல மதிய நேரம். செருப்பில்லாமல் தட்டுத் தடுமாறி நெடிய பாதை வழியாகச் சென்று கோவில் நுழைவாயிலில் வரிசையில் நின்று, இறைவனைத் தரிசித்தோம். மிகப் பெரிய கருவறை, பெரிய சிவலிங்கம், முழுவதும் தங்கத்தால் அமைக்கப்பட்டு பளீர் என்று ஒளிவீசும் கருவறை. சிவனைத் தரிசித்த அந்தத் தருணங்கள் மிகவும் உணர்வுபூர்வமானது. 

13ம் நூற்றாண்டில், ஹமீர்ஜி கோஹில் என்ற 16 வயது இளைஞர், அலாவுதீன் கில்ஜியின் படையெடுப்பின்போது, சோம்நாத் கோவிலைக் காக்க தன் இன்னுயிரைத் தியாகம் செய்தான். அவனது பெரும் வீரத்தையும் தியாகத்தையும் நினைவுகூறும் வண்ணம், போர் வீரன் போன்ற அவனது சிலையை சோம்நாத் கோவில் செல்லும் வழியில் வைத்திருக்கின்றனர்.

எத்தனையோ பேர் தங்கள் இன்னுயிரைத் தியாகம் செய்து சோம்நாத் கோவிலைக் காக்க முயன்றிருக்கின்றனர், தங்கள் உயிரையும் விட்டிருக்கின்றனர். கஜினி முகம்மது (கzனி என்று அழைக்கின்றனர்), இஸ்லாமிய மதக் கோட்பாட்டை நிலை நிறுத்த, சிலையை வணங்குபவர்களை அழித்து, சிலை வணக்கம் செய்கின்ற கோவில்களை அழித்தான் என்று இஸ்லாமிய ஆசிரியர்கள் கஜினியின் வீரத்தைப் பற்றி எழுதியிருக்கின்றனர் (பெர்ஷியாவில்)

ஹமீர்ஜி நினைத்திருப்பானா? கோவிலைப் பார்த்தவாறே இருக்கும் தன் சிலையைப் பிற்காலத்தில் நிறுவுவார்கள் என்று?

தங்கியிருந்த இடத்திலிருந்து பார்த்தால் சோம்நாத் கோவில் தெரியும்.

சோம்நாத் கோவில்

முழு வளாகத்தையும் அழகுற விளக்கும் படம் (இணையம்)

கடற்கரையை ஒட்டி அமைந்திருக்கும் சோம்நாத் கோவில் பறவைப் பார்வை

கோவில் வளாகத்திற்கு வெளியே வந்துவிட்டால், சுதந்திரமாக வெளிப்பகுதியைச் சுற்றிப் பார்க்கலாம். கடற்கரையும் நீண்ட கடலும் தெரியும். பாகிஸ்தானிலிருந்து படகில் இந்த இடத்தை அடைந்துவிட முடியுமாம்.

கோவில் மிக அழகுறக் கட்டப்பட்டு உள்ளது. புராதானமான பத்தாம் நூற்றாண்டு வரை இருந்த கோவிலின் சிறப்புகளைப் பல நூல்களில் படிக்கலாம். சாண்டில்யன் நாவல் ஒன்றிலும் படித்த நினைவு.  அதைப்போன்றே சிறப்பாக வடிவமைக்கப்பட்டு கட்டப்பட்டிருக்கிறது சோம்நாத் கோவில்.

தங்க கர்ப்பக்ரஹத்தின் உள்ளே ஜோதிர்லிங்க தரிசனம் (இணையம்)

ஜோதிர்லிங்கம். அங்கு தரிசனம் செய்யும்போது நமக்கு ஏற்படும் உணர்வே தனி. கோவில் ஒரு காலத்தில் எப்படி இருந்தது, படையெடுப்பில் எப்படி அழிக்கப்பட்டது, கோவிலைக் காப்பதற்காக உயிர்த்தியாகம் புரிந்த ஆயிரக்கணக்கானவர் என்று நெடிய வரலாறே மனதில் ஓடியது. நிச்சயம் காண வேண்டிய கோவில்.

இதனைப் பற்றி எழுதும்போது அயோத்தி கோவிலில் தரிசனம் செய்த தருணங்கள் நினைவுக்கு வருகின்றன. கிட்டத்தட்ட சிறைச்சாலை போல ஒற்றை வரிசையில், இரு புறமும் கடும் காவலுடன், நெடிய வரிசையில் சென்று தூரத்தில் இருக்கும் இராமர் சன்னிதியைத் தரிசிக்கவேண்டும், நம் கையில் சில மிட்டாய் பிரசாதம் தருவார்கள். பிறகு நெடிய வழியில் வெளியேற வேண்டும். கையில் ஒன்றுமே எடுத்துச்செல்ல முடியாது. ஆனால் கோவில் பகுதியில் ஏராளமான குரங்குகள் இருக்கும். இதனைப் பற்றி இன்னொரு யாத்திரைத் தொடரில் குறிப்பிடுவேன்.

சோம்நாத் கோவில் வளாகத்தில் நிறைய நடக்கவேண்டும். (கொஞ்சம் வெயில்). தரிசனம். நல்ல செக்யூரிட்டி. அங்கிருந்து வெளியே வந்த பிறகு, வெளிப்பகுதியில் நடந்தால் இந்தக் கோவிலே கடற்கரையை ஒட்டி அமைக்கப்பட்டிருப்பது தெரியும். 

தரிசனம் முடிந்த பிறகு சத்திரத்திற்குத் திரும்பினோம். சத்திரத்தை ஒட்டி இருந்த ஒரு கோவிலில் (ஸ்ரீ லக்ஷ்மி நாராயணர் கோவில்) தீர்த்தம், சடாரி வாங்கிக்கொண்டோம்.

ஸ்ரீ லக்ஷ்மி நாராயணர்  (அஹோபில மட கோவில் என்று தோன்றியது)

எல்லோரும் சோம்நாத் கோவிலைத் தரிசித்து வந்த பிறகு ராமானுஜ கூடத்தில் எங்கள் பையை எடுத்துக்கொண்டு, பேருந்து நிறுத்தப்பட்டிருந்த வளாகத்துக்குச் சென்றோம். அப்போது மணி சுமார் 3 1/2.  அங்கிருந்து எங்கு பிரயாணித்தோம் என்பதை அடுத்த வாரம் பார்க்கலாம்.

குறிப்பு: சோம்நாத் கோவில் பகுதியில் மாத்திரம் பல படங்களை இணையத்திலிருந்து எடுத்து உபயோகித்துள்ளேன். நான் பார்த்த மாதிரி இருந்த படங்களையே எடுத்திருக்கிறேன் 

(தொடரும்)