நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 09 : நெல்லைத்தமிழன்

 

நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 09

மூலத் துவாரகையிலிருந்து புறப்பட்டு 9 மணி வாக்கில் சுதாமாபுரியை அடைந்தோம். அங்கு குசேலருக்கான கோவில் இருக்கிறது. இதுதான் குசேலர் பிறந்த/வாழ்ந்த இடம் என்று சொல்கின்றனர். அங்கு பெரிய வளாகம் இருக்கிறது. மூலத் துவாரகையை 5 ½ மணிக்குள்ளேயே அடைந்துவிட்டால், சுதாமாபுரியில் 8 ½ மணிக்கு பாலபோகம் கொடுப்பார்கள். மூலத்துவாரகையை அடைவதற்கே 7 ½ மணி ஆகிவிட்டால், அங்கேயே தரிசனத்திற்குப் பிறகு பாலபோகம் சாப்பிட்டுவிடுவோம். கோமதி துவாரகையிலிருந்து புறப்படுவது சில நேரங்களில் தாமதமாகிவிடும் (பால் கிடைக்க நேரமாவது போன்று).

குசேலர் (சுதாமா), சுதாமாபுரி என்று முற்காலத்தில் அழைக்கப்பட்ட போர்பந்தரில் வாழ்ந்தவர். ஸ்ரீகிருஷ்ணரின் பால்ய நண்பர். 12-13ம் நூற்றாண்டைச் சேர்ந்த சிறிய கோவில் இருந்த இடத்தில், அவருக்காக 1900களில் கட்டப்பட்ட பெரிய கோவில்தான் இது.   

குசேலர் கோவில் அமைந்திருக்கும் வளாகத்தின் நுழைவாயில். 

அழகிய குசேலர் கோவில். 

அழகிய தூண்களுடன் கூடிய மண்டபம். கிருஷ்ணர், குசேலருக்கு பாதபூஜை செய்ததை நினைவுபடுத்தும் ஓவியம். 

குசேலர் வாழ்ந்த இடத்தில் அவரது சன்னிதி 

மரங்களுடன் கூடிய அழகிய வளாகம்

போர்பந்தருக்கு வந்துவிட்டு தேசப்பிதா மஹாத்மா காந்தி பிறந்த வீட்டிற்குச் செல்லாமல் இருப்பதா? சுதாமா வளாகத்திலிருந்து கிளம்பி, மிக அருகில் இருந்த காந்தியின் வீட்டிற்கு ஷேர் ஆட்டோவில் சென்றோம். சாதாரண, வியாபாரக் குடும்பத்தில் குஜராத்தில் பிறந்த காந்தி, இந்திய தேசத்தின் விடுதலையில் முக்கியப் பங்காற்றி பிற்காலத்தில் தேசப்பிதா என்ற பெயர் பெறுவார் என்பது யாருக்குத் தெரிந்திருக்கும்?

கோட்டையைப் போன்ற தோற்றமுள்ள இந்த இடத்தில்தான் ஆட்டோ எங்களை இறக்கிவிட்ட து. அங்கிருந்து பொடி நடையாக காந்தி பிறந்த இட த்திற்குச் சென்றோம். இந்தக் கோட்டை போன்ற இட த்தின் முக்கியத்துவம் தெரியவில்லை.

காந்தி பிறந்த வீடு இருக்கும் தெரு. 

காந்தி பிறந்த வீட்டின் அருகில் இருந்த இட த்தையும் அரசு வாங்கி அங்கு கீர்த்தி மந்திர் என்ற பெயரில் காந்தியைப் பற்றிய நினைவுப் படங்கள், ஓவியங்களை வைத்திருக்கிறார்கள். வளாகத்தின் இடது பக்கத்தில்தான் காந்தி பிறந்த வீட்டின் நுழைவாயில் இருக்கிறது.

இந்த அறையில்தான் 1869ல் காந்தியை புத்தலிபாய் பெற்றார் என்று எழுதியிருந்தது. நினைவுக்காக அங்கு நான் ஒரு புகைப்படம் எடுத்துக்கொண்டேன்.

ஸ்வஸ்திகா வரைந்திருக்கும் இடத்தில்தான் காந்தியைப் பெற்றெடுத்தாராம்.

காந்தியின் வீடு ஓரளவு வசதியானவருடைய வீடுபோல் காட்சியளித்தது. பழங்கால வீடு போல, சிறிய ஒடுங்கிய மாடிப்படிகள், மாடியில் ஓரிரண்டு அறைகள் என்று ஒரு கிராமத்து வீட்டை, ஆனால் அழகிய வீட்டை நினைவுபடுத்தியது.

மாடிக்குச் செல்லும் படிகள். மாடியில் உள்ள அறை.

அறையில் இருந்த அழகிய சன்னல்கள். 

முதல் மாடியிலிருந்து கீர்த்தி மந்திரின் வளாகம். 

காந்தி, கஸ்தூரி பாய் இருவருக்குமான நினைவு மண்டபம். அந்தக் காலகட்டத்தில் இருந்த வீட்டுப் பொருட்கள். 

காந்தியின் வீட்டையும் வளாகத்தையும் சுற்றிப் பார்த்துவிட்டு நிறைய புகைப்படங்கள் எடுத்துக்கொண்டோம்.  பிறகு அங்கிருந்து கிளம்பி, மீண்டும் ஷேர் ஆட்டோவில் பயணித்து பேருந்து இருந்த இட த்திற்கு வந்து சேர்ந்தோம்.  சுமார் 2 ½  மணி நேரப் பிரயாணத்திற்குப் பிறகு சோம்நாத் வந்து சேர்ந்தோம்.

அங்கு என்ன என்ன இடங்களைப் பார்த்தோம் என்பதை அடுத்த வாரம் பார்க்கலாம்.

( தொடரும்)