நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 25 : நெல்லைத்தமிழன்

 

 

தாஜ் மஹலைவிட்டுச் செல்ல இன்னும் மனம் இல்லை. அங்கு நிறைய படங்கள் எடுத்தேன். நான் தாஜ்மஹலுக்கு மூன்று முறை சென்றிருக்கிறேன். இன்னொரு யாத்திரையின் போது, அன்று வெள்ளி என்பதால் விடுமுறை விட்டிருந்தார்கள். சென்றமுறை ஆக்ரா போயிருந்தபோது தாஜ்மஹல் செல்லவில்லை. அங்கு நான் எடுத்த படங்களின் தொடர்ச்சி இந்த வாரமும் வருகிறது.

பொதுவா நாம் வரலாற்றில் அப்போது நடந்த நிகழ்வுகளைப் படித்து தற்போது கோபம் கொள்கிறோம். அந்தக் கோபம் இருப்பதால் பல வரலாற்றுச் சின்னங்களைப் புறக்கணிக்கவும் செய்கிறோம்.  ஆனால் அப்படிக் கோபம் கொள்ளத் தேவையில்லை என்பது என் எண்ணம். ஒவ்வொரு மதத்திற்கும், அரசுக்கும் ஒவ்வொரு முன்னுரிமை உண்டு.  முஸ்லீம் அரசர்கள் எப்போதுமே அழகிய சமாதிகளை எழுப்புவார்கள். தாங்கள் மறைவதற்கு முன்னமே தனக்கான சமாதிக் கட்டிடங்களை எழுப்பிய அரசர்களும் உண்டு. தன் கணவனுடன் தான் புதைக்கப்படவேண்டும் என்று ஆசைப்பட்ட மனைவியும் உண்டு (ஜஹாங்கீரின் மனைவி நூர்ஜஹான் அப்படி லாகூர் அருகில் எழுப்ப ப்பட்ட ஜஹாங்கீரின் சமாதியிலேயே தானும் புதைக்கப்படவேண்டும் என்று ஷாஜஹானிடம் தன் ஆசையைத் தெரிவித்து அனுமதி பெற்றிருந்தார். ஒவ்வொரு சமாதியும் மிக அழகுறக் கட்டப்பட்டுள்ளது. அதன் கட்டிடக் கலையி நேர்த்தியைத்தான் நாம் பார்க்கவேண்டும்.

தாஜ்மஹலின் பக்கவாட்டுத் தோற்றம்

நானும் அங்க போயிருந்தேன்.

 

தாஜ்மஹலின் வலப்புறம் (நாம் அதனைப் பார்த்து நின்றால்) இருக்கும் சிவப்புக் கல்லினால் கட்டப்பட்ட தாஜ்மஹலைப் போன்ற கட்டிடம். வெள்ளைப் பளிங்கினால்தான் தாஜ்மஹலின் கம்பீரம் என்பது தெரிகிறதா?

 

இந்தப் படத்தைப் பார்க்கும்போது, 10ம் வகுப்பில் பள்ளியில் நடந்த NCC ஓவியப் போட்டியில் தாஜ்மஹல் படத்தை வரைந்து முதல் பரிசு வாங்கியது நினைவுக்கு வந்தது (வாட்டர் கலர் பாக்ஸ் பரிசு). அப்போது ஒரு நாள் தாஜ்மஹலை நான் சென்று பார்ப்பேன் என்று கற்பனைகூடச் செய்திருக்க முடியாது.

தாஜ்மஹலின் வெளிச்சுற்றில் என்னைப் புகைப்படம் எடுத்த ரஷ்யப் பெண்

அங்கு அஸர்பைஜான் மற்றும் ரஷ்யப் பகுதியிலிருந்து வந்த நான்கு பேர்கள் தாஜ்மஹலின் பின் புறம் புகைப்படம் எடுத்துக்கொண்டிருந்தனர். அவர்களோடு பேசினேன். பிறகு குழுவில் இருந்த பெண் என்னை தாஜ்மஹலுடன் புகைப்படம் எடுத்தாள்.

சல்லடைகளாக இருக்கும் கதவும், அழகிய குரான் வரிகளும்

தாஜ்மஹலிலிருந்து வளாகத்தின் தெற்கு நுழைவாயிலைப் பார்த்தால் எவ்வளவு நேர்கோட்டில் சீர்படக் கட்டியிருக்கிறார்கள் என்பது தெரியும்.

கட்டிடத்தின் அழகு அருகில் புலப்படுவதில்லை. தூர நின்று பார்க்கும்போதுதான் மிக அழகாகத் தெரிகிறது.

கிழக்கு வாசல். கிழக்குப் பகுதியிலிருந்து எடுத்த படம். வலது புறத்தில்தான் யமுனை ஆறு பாய்கிறது.

அழகிய தாஜ்மஹலை எவ்வளவு தரம் பார்த்தாலும் மனதைக் கொள்ளை கொள்கிறது.  மனைவியுடன் சென்றிருந்தபோது இருவரும் நிறைய படங்களும் காணொளிகளும் எடுத்தோம்.

இணையத்தில் பார்த்த இந்தப் படம் கண்ணைக் கவர்ந்தது. யமுனை நதி ஓடும் பாதையும், அதையொட்டி அமைந்துள்ள தாஜ்மஹலும்

ஆமாம் இவ்வளவு அழகிய தாஜ்மஹலைக் கட்ட எவ்வளவு செலவழித்திருப்பார் ஷாஜஹான்? அப்போதைய மதிப்பில் (கரெக்டா கணக்கு வழக்கு எழுதியிருக்கிறார்) சுமார் 42 லட்சம் ரூபாய் (இப்போதைய மதிப்பில் 80 பில்லியன் ரூபாய். பொழுது போகாதவர்கள் 80க்கு அப்புறம் சைஃபர் போட்டு மகிழ்ந்துகொள்ளலாம்). சரி இதற்குப் பதிலாக மக்களுக்குப் பயனுள்ளதா ஏதேனும் செய்திருக்கலாமே என்றால்….  இந்துக்களுக்கு கோவில் போல, முஸ்லீம்களுக்கு சமாதி என்று சொல்லிக் கடந்துபோய்விட முடியாது. கொடுங்கோலன் என்று சொல்லப்படும் ஔரங்கசீப், தனக்கு 6க்கு 3 அடி நிலம்தான் ஒதுக்கிக்கொண்டார். அதிலும் எந்தக் கட்டிடமும் கட்டிவிடக் கூடாது என்று கட்டளை இட்டுவிட்டே சென்றார்.

இந்த மாதிரி பேட்டரியில் ஓடும் ஆட்டோக்கள் ஆக்ராவில் நிறைய உண்டு. 20-30 ரூபாய் கொடுத்தால் சென்றுவிடலாம்.

அங்கிருந்து தங்குமிடத்தை ஆட்டோவில் அடைந்தோம்.  வட நாட்டில் உள்ள சுற்றுலாத் தலங்களில், ஆறுகளில், புகைப்படம் எடுத்துத் தர நிறைய கலைஞர்கள் உண்டு. 30 ரூபாய்க்கு ஒரு போட்டோ தருவார்கள். அதுபோல தாஜ்மஹலிலும் இருந்தனர். நான் ஒரு சில போட்டோக்கள் எடுத்துக்கொண்டு, நேரமாகிவிட்டதால் பிரிண்டை தங்குமிடத்திற்கே கொண்டுவந்து தரச் சொன்னேன். அவர் கரெக்டாக நாங்கள் தங்குமிட த்திலிருந்து கிளம்புவதற்கு முன்பு பிரிண்டுகளோடு வந்துவிட்டார்.

தங்குமிடத்திற்கு வந்து குளித்து உடை மாற்றிக்கொண்டு சரியாக 10 மணிக்கு உணவுக்கு உட்கார்ந்துவிட்டோம். பாயசத்துடன் கூடிய அருமையான சாப்பாடு. மதியம் 1 மணிக்கு மேல்தான் கோகுலம் நோக்கிக் கிளம்புவோம், அதுவரை எங்காவது சென்றுவிட்டு வருவதானால் செல்லலாம் என்று குழுத் தலைவர் சொன்னார். கொஞ்சம் வெயில் இருந்தாலும், எதிரே இருக்கும் ஆக்ரா கோட்டையைப் பார்க்க நான் சென்றேன். இந்தக் கோட்டையை மூன்று முறை நான் பார்த்திருக்கிறேன். இருந்தாலும் என்னவோ, அந்தக் கோட்டை என்னை மிகவும் கவர்கிறது. இதைப் பற்றி அடுத்த வாரம் பார்க்கலாமா?

 ((தொடரும்)