"திங்க"க்கிழமை :தஞ்சாவூர் நெய் முறுக்கு - துரை செல்வராஜூ ரெஸிப்பி

 தஞ்சாவூர் நெய்முறுக்கு

*** *** *** *** *** *** *** ***

பச்சரிசி ஒரு கிலோ

பொட்டுக் கடலை  500 கி

உளுத்தம் பருப்பு 150 கி

தேங்காய் ஒன்று

எள்/ சீரகம் /ஓமம் 2 தேக்கரண்டி

நெய் 4 ஸ்பூன்

கடலெண்ணெய் தேவையான அளவு

கல் உப்பு சுவைக்கேற்ப

முதலில் பச்சரிசியைக் கழுவி நல்ல வெயிலில் உலர்த்திக்  கொள்ளவும்.. 

பொட்டுக் கடலையை சுத்தம் செய்து வெயிலில் உலர்த்திக் கொள்ளவும்..

உளுத்தம் பருப்பை சிவக்க வறுத்துக் கொள்ளவும்.. எல்லாவற்றையும்  ஒன்றாக அரவை இயந்திரத்தில் அரைத்துக் கொள்ளவும்..

வீட்டு மிக்ஸி என்றால் தனித்தனியாக அரைத்து

 எல்லாவற்றையும் ஒன்றாகச் சேர்த்து சல்லடையில் இட்டு சலித்துக் கொள்ளவும்.. இப்போது மாவு  ஒன்றுடன் ஒன்று சீராகக் கலந்திருக்கும்..

 

அடுத்ததாக இந்த மாவில் - கல் உப்புப் பொடியுடன்  எள், சீரகம்,  ஓமம் – இவற்றில்  ஏதாவதொன்று, அத்துடன் நெய்யும்  சேர்த்து  மாவை நன்கு கலந்து கொள்ளவும்.. 

பின்னர், தேங்காயைத் துருவி தேவையான அளவு தண்ணீர் சேர்த்து மிக்ஸியில் அரைத்து, வடிகட்டி  பால் பிழிந்து கொண்டு தேங்காய்ப் பாலை மாவுடன் சிறிது சிறிதாக சேர்த்து முறுக்கு பிழியும் பதத்திற்கு   பிசைத்துக் கொள்ளவும். 

பின்னர் ஒரு வாணலியில் கடலெண்ணெய் ஊற்றி காய்ந்ததும் பிசைந்து வைத்திருக்கின்ற மாவை முறுக்கு உரலில் இட்டு முறுக்காகப்  பிழிந்து இருபுறமும் வேக விட்டு எடுக்கவும்... 

முறுக்கு சற்று ஆறியதும் காற்றுப் புகாத கலனில் வைத்து அவ்வப்போது எடுத்துத் தின்று இன்புறவும்..

***

பச்சரிசியை - வாங்கி - கழுவி - காய வைத்து - அரைத்து ( ?!? ) - 

எதற்கு இத்தனை இம்சை?..

 

அரிசி மாவை அந்தக் கடையில் வாங்கிக் கொள்ளலாமே என்றால் எங்கள் கைப்பக்குவத்திற்கு கடை மாவுகள் ஒத்து வருவதில்லை.. ஏனெனில் அவை கடை மாவுகள்!..

இதில் ஆப்பச் சோடா, பெருங்காயத் தூள் சேர்க்க வில்லை...   ஆப்பச் சோடா வேண்டவே வேண்டாம்..

பெருங்காயத் தூள் எது தரம் என்று தெரியவில்லை.. உங்களுக்குத் தெரிந்திருப்பின் சேர்த்துக் கொள்ளலாம்..

நன்றி.. மகிழ்ச்சி..

***