கணுக்காலில் கருப்புக் கயிறு

 சமீப காலங்களில் மத்தியபிரதேஷ் சற்றே அதிக வளர்ச்சி பெற்று விட்டதாக அறியப்பட்டதால் தவிர்க்க முடியாத காரணங்களால் நின்று போயிருந்த நடைப்பயிற்சியை மறுபடி தொடங்கினேன்.

பதினேழு வருடங்களுக்கு முன் என்னுடன் பணிபுரிந்து ஓய்வுபெற்ற என் அதிகாரி ஒருவர் என்னை வந்து சந்தித்தார்.  அவர் தோற்றம் பார்த்ததும், 'என்ன இவ்வளவு குச்சி மாதிரி ஆகிவிட்டார்' என்று ஆச்சர்யமாக இருந்தது.  அவருடன் இணைந்து போட்டோ எடுத்து பின்னர் பார்த்தபோதுதான் (எப்படி இருந்த)  நான் எப்படி இருக்கிறேன் என்றும் தெரிந்தது.  அதுதான் மீண்டும் நடைப்பயிற்சி!

நடைப்பயிற்சியை ஒரு கடமையாக தொடர்ந்து செய்து வருவதில் அடிக்கடி எனக்கு மனத்தடங்கல் ஏற்படும்.  ஒவ்வொரு முறையும் இன்று வேண்டாம், நாளை என்று ஒத்திப்போடுவேன், அபப்டியே தள்ளிக்கொண்டே சென்று விடும்.  அதை மறுபடி தொடங்க ஒரு கொழுப்பு சோதனை முடிவு தேவைப்படலாம்.  இப்போது மத்தியப்பிரதேச வளர்ச்சி!

நடக்க ஆரம்பித்ததும் ஆரம்ப உற்சாகத்தில் ரொம்ப தூரம் நடப்பது என்பது கூடாது என்பது என் முந்தைய அனுவங்களின் வாயிலாக அறிந்து கொண்டது.  தினமும் இவ்வளவு தூரம்தான் நடக்க முடியும் என்கிற அளவுக்குத்தான் தொடங்கி இருக்கிறேன்.  காலை ஒருமுறை, மாலை ஒருமுறை என்று நான் நினைத்ததே நட(க்க)த்த முடியவில்லை!  ஏதாவது ஒரு வேலை என்று மனதுக்குள் காரணம் சொல்லிக் கொள்கிறேன்!  உண்மையில் சோம்பேறித்தனம்தான் காரணம்!

எவ்வளவு தூரம் வேண்டுமானாலும் நடக்கலாம், முழங்கால்கள் ஒழுங்காய் இருந்தால்.  முன்னர் இடது முழங்கால் ரிப்பேராய் இருந்தது.  சமீப காலங்களில் வலது முழங்காலும் ரிப்பேர் ஆகி வலிக்கிறது.  சொல்லப்போனால் இடதை விட வலதுதான் அதிகம் வலிக்கிறது.  முட்டியின் இரண்டு பக்கங்களிலும் ஒரு கம்பியை சொருகி வைத்தது போல நீட்டினால் மடக்க முடியாமல், மடக்கினால் நீட்ட முடியாமல் வலிக்கும்!

ஒன்றரை வருடங்கள் இடைவெளியில் சென்றதால் முன்னர், அதாவது சென்ற நடைப் பயிற்சியில் நான் சந்தித்த செல்லங்கள், நான் குறிப்பிட்டிருந்த இரண்டு செல்லங்களில்  ஒன்று தள்ளி நின்று அன்பாராட்டும் (அன்பு + பாராட்டும்) செல்லம் குனிந்து ஆராய்ந்தாலும், நெருங்கி வந்து பழகிய மற்றொன்று கண்டுக்காமல் கடந்தது.  அதன் மறதி எனக்கு அதிர்ச்சி அளித்தது...   ச்சே...  இப்படி சொல்வதெல்லாம் ரொம்ப ஓவர்...   ஆச்சரியமளித்தது என்று சொல்லலாம்.  இரண்டு மூன்று நாட்கள் இப்படியே கடந்தாலும் ஒரு நாள் ஓரமாக அமர்ந்திருந்த அது, என்னை புருவங்களை உயர்த்திப் பார்த்தது.  என்னையே பார்த்தது - தாண்டிச் சென்றும் அதன் பார்வை தொடர்ந்தது.  மறுநாள் சற்று தூரத்தில் நின்று முகத்தைக் குனிந்து மோப்பம் பிடித்துக் கன்பியூஸ் ஆனது.  மறுநாள் வாலை ஆட்டிக் கொண்டு பக்கம் வந்து விட்டது!  

ஆனால் குழந்தை அழாமல் பார்த்துக் கொண்ட செல்லமோ,(நினைவிருக்கிறதா என்ன?!) முதல் நாளே என் அருகில் வந்து பாதம் முகர்ந்து அடையாளம் கண்டு வாலாட்டிக் கொண்டே மேலே மேலே குதித்தது.   இது போன்ற சம்பவங்களால் சிலர் கலவரம் அடையக்கூடும்.  எனக்கு அது அடையாளம் கண்டு கொண்டது என்பது புரிந்ததால், பேசிக்கொண்டே அதன் நெற்றியை தடவி விட்டு நடந்து கொண்டே இருந்தேன்.

எல்லை பிரச்சனை வைத்திருக்கும் குழு ஒன்று குழுவாகவே ஏன் அருகில் வந்து முகர்ந்தபடி கடந்து சென்றது.  

நாம் தாண்டியதும் திரும்பிப் பார்க்கக் கூடாது.  நம் பின்னால் நாம் அறியாமல் (!) சற்று பின்னே வந்து 'நண்பனா, பகைவனா...  மூக்கினால் அறியலாம்' என்று சட்டம் கமலஹாசனைப் போல மனதுக்குள் பாடிக் கொண்டு ஆராயும்.  நம் ரத்தத்தில் பதட்டம் இருந்தாலும் அது நம்மை நம் வியர்வையின் வாசனையில்' எச்சரிக்கைக்குரிய நபர்' என்று குறித்துக் கொள்ளும் சாத்யக் கூறு இருக்கிறது!

இவை மறுநாள் முதல் என்னை தங்கள் பழைய கடப்பாளன் (கடந்து செல்பவன்) நண்பன்தான் என்பதை புரிந்து கொண்டு பிரச்னையின்றி தாண்டிச் செல்ல அப்ரூவ் செய்தன.

ஒரு புதிய செல்லம் ஐந்து குட்டிகள் போட்டிருக்க, அவை ஒவ்வொரு நாளும் நான் தாண்டும்போது கேட் கதவின் இடுக்கு வழியே வெளியே ஓடிவந்து மொலுமொலுவென என் காலை சுற்றி வந்து, எங்கே அதன் கழுத்தில் காலை வைத்து விடுவேனோ என்கிற பயத்தில்  நடக்க விடாமல் செய்து அவற்றைத் தூக்கிக் கொஞ்சச் செய்தன.   முதல் முறை அதன் தாய் அருகே வந்து என்னை கவலையுடன் பார்த்தது.  அடுத்தடுத்த நாள் அமர்ந்த இடத்திலேயே தலைதூக்கி பார்த்து விட்டு தூக்கத்தை கன்டின்யு செய்தது! 

மொபைலில் ஆப் ஒன்றை இன்ஸ்டால் செய்து தினசரி எவ்வளவு தூரம் நடக்கிறோம், எத்தனை கிலோமீட்டர், எத்தனை ஸ்டெப்ஸ் என்பதெல்லாம் பார்க்கும் வழக்கம் 2021 ல் என் மாமாவே (கொரோனாவில் மறைந்தவர்) செய்திருக்கிறார்.  ஆனால் என் எதிரே நடந்து வரும் பலர் கையில் மொபைலை வைத்துக் கொண்டு அதையே பார்த்தபடி நடந்து வருகின்றனர்.  இந்த App பைதான் பார்க்கிறார்களா, இல்லை வேறு ஏதாவதா என்பதை கணிக்க முடியவில்லை.  என் அண்ணன் மகன் கம்பெனியில் ஒரு வாரத்துக்குள் இவ்வளவு தூரம் நடக்கவேண்டும் என்று டாஸ்க் கொடுத்திருந்தார்கள்.  அதைக் கேள்விப்பட்டதிலிருந்துதான் இவர்கள் கம்பெனியிலும் அப்படி கொடுத்திருப்பார்களோ என்கிற சந்தேகம் வந்தது. 

ஒரு சோகம் என்ன தெரியுமா?  தாண்டி வரும் வழியில் மூன்று இடங்களில் சுடச்சுட வடை போட்டுக் கொண்டிருப்பார்கள்.  ஒரு துறவியின் மனநிலையோடு அனோஸ்மியா வந்தவன்போல் அதைக் கடந்து வரும் சிரமம் இருக்கிறது பாருங்கள்..   வார்த்தைகளில் வடிக்க முடியாத சோகம்!  என்ன வாசனை என்கிறீர்கள்?  எண்ணெயில் பொரிந்து பொன்னிறத்தில் செவசெவ என்று தட்டில் விழும் வடைகளை பார்ப்பது..  இல்லை, பார்க்காமலேயே கடக்க வேண்டும்.

நேற்று நடக்கையில் முன்னால் சென்ற ஒரு நடுத்தர வயதுக்காரர் இடது கணுக்காலில் ஒரு கருப்புக் கயிறு கட்டியிருந்தார்.  ஏனோ?  என்ன காரணமாயிருக்கும்?

கொஞ்ச தூரம் நடப்பதற்குள்ளாகவே முழங்கால்கள் வலிக்க ஆரம்பித்து விடுகின்றன.  அதை பாராட்டாமல் நடக்கவேண்டும் என்று வாட்ஸாப் டாக்டர்கள் சொல்லியதைக் கேட்டேன்.  எனவே  முடிந்தவரை தொடர முடிவு!

"அப்பா...  நீ இளையராஜா ரசிகன்தானே?  நடக்கும்போதும் அவர் பாட்டுதான் கேட்பியா?"  நடுவில் ஒரு நாள் பெரியவன் கேட்டான்.

"ஆமாம்..  அப்பாவுக்கு மெலடிதான் பிடிக்கும்..."  சின்னவன் சேர்ந்திசைத்தான்.

"போங்கடா...   உங்களுக்கு தெரியாதா?  நான் ஹெட்ஃபோனே யூஸ் பண்ண மாட்டேன்..  அப்புறம்ல பாட்டு கேக்க..."

"கேக்காதன்னுதான் நாங்களும் சொல்றோம்....  இளையராஜா பாட்டு கேட்டுகிட்டு நடந்தா மெலடின்னு ஸ்லோவாதான் நடப்பே..  ரஹ்மான், அனிருத் பாட்டு கேட்டுகிட்டு நடந்தா வேகமா உற்சாகமா நடப்பே..."

"ஆமாமாம்...   பைத்தியம் பிடிச்சாப்போல ஓடவேண்டியதுதான்!  நான்தான் பாட்டு கேட்டுகிட்டு நடக்க மாட்டேனே....  ஆனால் ஒன்னு...  இருக்கற முழங்கால் வலிக்கு இளையராஜா பாட்டுதான் பெஸ்ட்"

========================================================================================

சமீபத்தில் மறைந்த பாடகி உமாராமணன் அளித்த பழைய பேட்டி ஒன்று...

பின்னணி பாடகி உமராமணன் குறித்து அவர் கொடுத்த பேட்டியில் இருந்து

-

கணவர்கிட்ட வாங்கின முதல் சம்பளம்... 30 ரூபாய்!” சிங்கர் உமா ரமணன்.

“ 'உங்களை ரொம்பவே மிஸ் பண்றோம். முன்பு மாதிரி சினிமா சார்ந்த உங்க பங்களிப்பு அதிகமாகணும்'னு ரசிகர்கள் பலரும் கேட்கிறாங்க. நானும் கணவரும் சினிமாவில் வொர்க் பண்ண எப்பயுமே தயார்தான்" - புன்னகையுடன் பேச ஆரம்பிக்கிறார் உமா ரமணன். 80, 90-களில் பின்னணிப் பாடகியாக சினிமாவிலும் தன் கணவர் ரமணனுடன் இணைந்து மேடைக் கச்சேரிகளிலும் கலக்கியவர்.

“சின்ன வயசுலேருந்து இசை ஆர்வமுண்டு. காலேஜ் கல்ச்சுரல் நிகழ்ச்சிகள்ல பாடி நிறைய பரிசு வாங்குவேன். எம்.ஏ முடிச்ச பிறகு, ஏர்ஹோஸ்டஸாக ஆசைப்பட்டேன்.

1972-ல் ஒருநாள் ரமணனைச் சந்திச்சப்போ, தன்னோட 'மியூசியானோ' இசைக்குழுவுல பாடக்கேட்டார். நானும் பாடினேன். 30 ரூபாய் சம்பளம் கொடுத்தார். அந்த நினைவுகள் எல்லாம் மனசுல பசுமையா பதிஞ்சிருக்குது.

தொடர்ந்து நாலு வருஷம் அவரின் இசைக்குழுவுல தனியாகவும் அவரோடு சேர்ந்தும் நிறைய கச்சேரிகள்ல பாடினேன். திடீர்னு ஒருநாள், `நாம ரெண்டு பேரும் கல்யாணம் செய்துக்கலாமா'னு கேட்டார். நானும் சம்மதம் சொல்ல, நண்பர்களான நாங்க 1976-ல் தம்பதியானோம்.

80, 90-கள்ல நாங்க ரொம்ப பிஸியா கச்சேரிகள் செய்தோம். ஒரே நாள்ல பல கச்சேரிகள் செய்த அனுபவமும் உண்டு. அந்தச் சமயத்துல எங்களுக்குப் பெரிய ரசிகர்கள் பட்டாளம் இருந்துச்சு. ரொம்ப பிஸியாவும் சந்தோஷமாவும் வொர்க் பண்ணிட்டிருந்தோம். இதுவரை 6,000-க்கும் அதிகமான கச்சேரிகள் செய்திருக்கிறோம்.

மேடைக் கச்சேரிகள்ல மட்டுமே பாடிட்டிருந்த நான், கணவரின் இசையமைப்பில் வெளியான 'நீரோட்டம்' படத்தில் பின்னணிப் பாடகியா அறிமுகமானேன். பிறகு, பல இசையமைப்பாளர்கள்கிட்டேருந்து பாடுறதுக்கு நிறைய வாய்ப்புகள் வந்துச்சு.

இளையராஜா சார் மியூசிக்ல 'இன்னும் சில பக்கங்கள்' படத்துல முதல்ல பாடினாலும், 'நிழல்கள்' பட 'பூங்கதவே தாழ்திறவாய்' பாட்டுதான் பெரிய ரீச் கொடுத்துச்சு. தொடர்ந்து ராஜா சார் மியூசிக்ல பல நூறு பாடல்களைப் பாடினேன்.

'ஆகாய வெண்நிலாவே', 'நீ பாதி நான் பாதி', 'பூபாளம் இசைக்கும்', 'ஆனந்த ராகம்'னு ராஜா மியூசிக்ல பாடின நிறைய பாடல்கள் சூப்பர் ஹிட்டாச்சு. அதனால அந்தக் காலத்துல 'ஹிட் லிஸ்ட் சிங்கர்'னு எனக்குப் பெயர் வெச்சுட்டாங்க. 'பூங்கதவே தாழ்திறவாய்', 'கண்ணும் கண்ணும்தான் (திருப்பாச்சி)' பாடல்கள் என் ஃபேவரைட்.

கணவர் ரமணன், சில படங்கள்ல நடித்தும், இசையமைத்தும், பின்னணிப் பாடல்கள் பலவும் பாடியுமிருக்கிறார். ஆனா, தொகுப்பாளராதான் அவரை எனக்கு ரொம்பப் பிடிக்கும். சன் டி.வி 'சப்த ஸ்வரங்கள்' நிகழ்ச்சியின் தொகுப்பாளரா 10 வருஷங்கள் சிறப்பா பணியாற்றினார். நூற்றுக்கணக்கான சிங்கர்ஸை உருவாக்கினதுல இவரின் பங்கு அதிகம்.

வீட்டில் இருக்கிறப்போ இசை சார்ந்தும், கச்சேரி சமயங்கள்ல மத்த விஷயங்கள் பற்றியும் விவாதிக்க மாட்டோம். வீட்டில் நாங்க இசைப்பயிற்சி எடுத்துக்கிட்டதுமில்லை. ஆன் தி ஸ்பார்ட்லதான் பாடுவோம்.

தம்பதினு சொல்லறதைவிட, நாங்க நல்ல நண்பர்கள். 2000-ம் வருஷத்துக்குப் பிறகு, எங்களுக்கு சினிமா வாய்ப்புகள் குறைஞ்சுடுச்சு. ஆனா, தொடர்ந்து இப்போவரை மேடைக் கச்சேரிகள்ல பாடிட்டிருக்கிறோம். சினிமா வாய்ப்புகள் வந்தால் ஆக்டிவா வொர்க் பண்ண நாங்க தயார். 'வீ ஆர் ஸ்டில் இன் தி ரேஸ்' என்று புன்னகைக்கிறார் உமா ரமணன்.

====================================================================================

30 ஆண்டுகளுக்கு முன்பு இறந்த மகளுக்கு பெற்றோர் நடத்திய 'பேய் திருமணம்'

 

இறந்த மகளுக்கு உயிரிழந்த இளைஞரை மணமகனாக உருவகப்படுத்தி பெற்றோர் நடத்திய வினோத திருமணம் அரங்கேறி உள்ளது. பெங்களூரு, கர்நாடக கடலோர மாவட்டங்களில் வசித்த வரும் துளு மொழி பேசும் மக்கள் வினோத சடங்கு ஒன்றை கடைபிடித்து வருகிறார்கள். அதாவது தங்கள் வீட்டில் உள்ள இளம்பெண் திருமணமாகாமல் இறந்துவிட்டால் அவருக்கு வரன் தேடி திருமணம் செய்து வைத்து அந்த சடங்கை நிறைவேற்றுகிறார்கள். இதில் விசேஷம் என்னவென்றால் அந்த மணமகனும் திருமணம் ஆவதற்கு முன்பே இறந்தவராக இருக்க வேண்டும். தொன்றுதொட்டு அவர்கள் இந்த சடங்கை கடைபிடித்து வருவதாக கூறப்படுகிறது.  திருமணம் ஆகாமல் இறந்த தங்கள் மகளின் ஜாதகம் மற்றும் சாதி, குலம் உள்ளிட்டவைகள், திருமணம் ஆகாமல் உயிரிழந்த வாலிபரின் ஜாதகத்துடன் ஒத்துப்போனால், அந்த வாலிபருக்கு திருமணம் செய்து வைப்பதுபோல் சடங்கை நிறைவேற்றுகிறார்கள். 

இதன்மூலம் தங்களது ஆசை நிறைவேறாமல் ஆவியாய் அலையும் ஆத்மாக்கள் சாந்தி அடையும் என்று துளு மக்களால் நம்பப்படுகிறது. இந்த திருமணத்தை அவர்கள் 'குலேய் (பேய்)என்று அழைக்கிறார்கள். இதுபோல் தட்சிண கன்னடா மாவட்டம் புத்தூர் பகுதியில் ஒரு சம்பவம் நடந்துள்ளது. புத்தூர் பகுதியில் வசித்து வரும் துளு மொழி பேசும் தம்பதிக்கு ஒரு மகள் இருந்தாள். கடந்த 30 ஆண்டுகளுக்கு முன்பு அந்த சிறுமி இறந்துவிட்டாள். 

இந்த நிலையில் அவளுக்கு பேய் திருமணம் செய்து வைக்க குடும்பத்தினர் முடிவு செய்தனர். அதற்காக அவர்கள் செய்தித்தாள் ஒன்றில் பேய் திருமணத்துக்காக இளம்பெண்ணுக்கு வரன் வேண்டும் என்று கேட்டு விளம்பரம் செய்திருந்தனர். அதன்பேரில் அந்த தம்பதியை மணமகன் வீட்டார் அணுகினர். பின்னர் இருவீட்டாரும் பேசி பேய் திருமணம் செய்து வைக்க முடிவு செய்தனர். இந்த திருமணத்தில், மற்ற திருமணங்களைப் போன்றே நிச்சயதார்த்தம் உள்ளிட்ட அனைத்து சடங்குகளும் நடத்தப்பட்டன. ஜவுளியும் எடுக்கப்பட்டது. நேற்று முன்தினம் இருவீட்டாரும் சேர்ந்து பேய் திருமண சடங்கை செய்து முடித்தனர். அப்போது மணப்பெண்ணுக்கான பட்டுப்புடவை, அலங்கார பொருட்கள் மற்றும் மணமகனுக்கான பட்டுவேட்டி, சட்டை உள்ளிட்டவைகளை படைத்து, அதன் மீது மாங்கல்யத்தையும் வைத்து இறந்தவர்களை நினைவுகூர்த்து வழிபட்டனர். இந்த வினோத திருமணத்தைக் காண அங்கு ஏராளமானோர் திரண்டனர். 

இதையடுத்து இரு குடும்பத்தினரும் தங்கள் குடும்பத்தினர் மற்றும் உறவினர்கள் என 50 பேரை மட்டும் அழைத்து திருமண சடங்கையும் முடித்து அவர்களுக்கு விருந்து அளித்தனர். இந்த திருமணம் மூலம் இறந்துபோன தங்களது மகன், மகளின் ஆன்மாக்கள் அமைதி பெறும் என்று அவர்கள் கூறினர். தற்போது இந்த திருமணம் தொடர்பான புகைப்படம புகைப்படமும், வீடியோக்களும் சமூக வலைத்தளங்களில் வைரலாகி பலரையும் வியப்படைய செய்துள்ளது.

=================================================================================

சந்தனக் கடத்தல் வீரப்பன் புத்தகம் படித்துக் கொண்டிருக்கிறேன்.  எரிச்சலூட்டும் இடங்கள் நிறைய உண்டு.  முதல் எரிச்சல் 'அவர்', 'இவர்' என்று வீரப்பன் விளிக்கப்படுவது.  அந்தப் புத்தகத்தின் முதல் பகுதியில் நான் படித்து மனம் நொந்த ஒரு இடம்...  வீரப்பன் நக்கீரன் நிருபரிடம் சொல்கிறான்...

"யானையை அடிச்சா மூச்சு அடங்க, கொறஞ்சது பத்து நிமிஷமாவது ஆகும்.  கடத்தியை அடித்தால் கூட,  அது ஓடற போக்கிலேயே கொஞ்ச தூரம் போய்தான் கீழே விழுந்து சாகும்.  ஒரு சமயத்தில் நான் கிட்டத்தில் போய் பார்க்கும்போது, குண்டடிப்பட்டு கிடக்கும் கடத்தி அதாவது கடமான், யானை எல்லாம் கண்ணீர் விட்டு அழுதிருக்கு.  சில யானையிலிருந்து நான் தந்தத்தை வெட்டிக்கிட்டு கிளம்பற வரைக்கும் சுடு ரத்தம் வந்துகிட்டே இருக்கும்.  

எனக்கும் கூட சில நேரத்தில் இதையெல்லாம் பார்க்கவே பாவமாய் இருக்கும். ஆனா என்ன செய்யறது,  ஒன்னு செத்தாதான் நாலு ஜீவன் வயிறு கழுவ முடியும் என்று எனக்கு வேண்டியதை எடுத்துக்குவேன். மீதியை 

பறவை மற்ற உயிரினங்களுக்கு இரையா விட்டுட்டு வந்துருவேன்."

===================================================================================

பறக்கும் மனிதன்....

**********************************************************************************************************************

இரண்டாம் உலகப் போரில் இந்த யானைக்கும் ஒரு சிறு பங்கு இருக்கிறது!

======================================================================================

என்ன சொல்கிறீர்கள்?...

அரைகுறையாய்ப் பெய்யும்

அல்ப மழை(யா)

அரண்டுபோக வைக்கும்

அசுர மழையா

எதை ரசிக்கிறீர்கள் நீங்கள்?

பாதுகாப்பான இடத்தில் நின்று,

நம்மை பாதிக்காதவரை

எதுவுமே

ரசிக்கும் மழைதான் .... Sep 24 2014

==================================================================================

நியூஸ்ரூம் 

பானுமதி வெங்கடேஸ்வரன் 

- புதிதாக பதிவியேற்றுள்ள மத்திய அமைச்சர்கள் 99 சவீதம் பேர் கோடீஸ்வரர்கள்.

புதிதாக பதவி ஏற்றுக்கொண்ட மத்திய மந்திரிகளின் கல்வி, சொத்து, மற்றும் வழக்கு விவ்ரங்கள் குறித்து ஜனநாயக சீர்திருத்த சங்கம் வெளீட்டுள்ளது.

அதன்படி புதிதாக பதவி ஏற்றுள்ள மத்திய மந்திரிகளில் 11 பேர் ப்ளஸ் டூ வரை படித்துள்ளனர். 57 பேர் பட்டப்படிப்பும், அதற்கு மேலும் படித்துள்ளனர். இவர்களில் 10பேர் சட்டம், பொறியியல், மற்றும் மருத்துவ பட்டதாரிகள். 7 பேர் முனைவர் பட்டம் பெற்றிருக்கிறார்கள், 3 பேர் டிப்ளமோ முடித்துள்ளார்கள்.

28 மந்திரிகள் மீது குற்ற வழக்குகள் உள்ளன. 99 சதவீதம் பேர் கோடீஸ்வரர்களாக உள்ளனர். அவர்களின் சராசரி சொத்து மதிப்பு ரூ.107.94 கோடி இருக்கும்.

ஊரக வளர்ச்சி, மற்றும் தகவல் தொடர்பு இணை மந்திரி டாக்டர் சந்திரசேகர பொம்மசானி ரூ.5705.47 கோடி சொத்துக்களுடன் முதலிடத்தில் உள்ளார். அடுத்த இடத்தில் ஜோதிர் ஆதித்ய சிந்தியா உள்ளார். அவரது சொத்து மதிப்பு ரூ.427.75 கோடி.

கனரக தொழில்துறை மந்திரி எச்.டி.குமாரசாமிக்கு ரூ.217.23 கோடியும், அஸ்வினி வைஷ்ணவுக்கு ரூ.144.12 கோடியும் சொத்துக்கள் உள்ளன.  

- இந்தியாவில் வேகமாக அதிகரித்து வரும் டிஜிடல் பணபரிமாற்றம். 2018ல் 20.4% ஆக இருந்த பணபரிமாற்றம் 2023ல் 58.1.% ஆக உயர்ந்துள்ளதாக குளோபல் டேட்டா என்னும் தரவு ஆய்வு நிறுவனம் அறிவித்துள்ளது.

- கடந்த ஆண்டில் இணைய வழி வணிகம் மூலம் ரூ.30 கோடிக்கு ஆவின் பால், பால் பொருள்கள் விற்று சாதனை.

- மழை வேண்டி கழுதைக்கும், கழுதைக்கும் திருமணம் செய்து வைப்பது போன்ற வேண்டுதல்களை கேள்விப்பட்டிருகிறோம், கம்போடியா, மியான்மர், வியட்நாம் போன்ற தென்கிழக்கு ஆசியா நாடுகளில் கருப்பு பூனைகளை ஊர்வலமாக அழைத்துச் சென்றால் மழை வரும் என்ற வினோதமான நம்பிக்கை நிலவுகிறது.

‘ஹே நியாங் மாவ்’ என்ற பெயரில் நடத்தப்படும் இந்த ஊர்வலத்தில் கருப்பு பூனைகள் மூங்கில் கூடைகளில் வைக்கப்பட்டு, கிராமத்தில் உள்ள ஒவ்வொரு வீட்டிலும் நிறுத்தப்பட்டு, பாரம்பரிய இசை வாசிக்கப்படும். இப்படி செய்தால் மழை வரும் என்று நம்பிக்கை.- வேடிக்கைதான்.

- எதிர்காலத்தில் ஃபோன்களே இருக்காது, நியூராலிங்க் மட்டுமே – எலான் மஸ்க் கணிப்பு.

- புதுடெல்லி: ஆங்கில வழிப் பள்ளிகள் மீதான பெற்றோரின் மோகம் என்பது தற்கொலைக்கு நிகரானது என்று தேசிய கல்வி ஆராய்ச்சி மற்றும் பயிற்சி கவுன்சிலின் (என்சிஇஆர்டி) தலைவர் டி.பி. சக்லானி தெரிவித்துள்ளார்.

"பயிற்சி பெற்ற ஆசிரியர்கள் போதுமான அளவில் இல்லாதபோதிலும், ஆங்கில வழிப் பள்ளிகள் மீதான பெற்றோரின் மோகம் என்பது தற்கொலைக்கு நிகரானது. அரசு பள்ளிகளில் தரமான கல்வி வழங்கப்படுகிறது. ஆங்கிலத்தில் உள்ள பாடங்களை திணிக்கும் பழக்கம் குழந்தைகளிடையே அறிவு இழப்புக்கு வழிவகுக்கிறது. அதோடு, அவர்களின் வேர்கள் மற்றும் கலாச்சாரத்திலிருந்து அவர்களை விலக்குகிறது. என்று அவர் கூறியிருக்கிறார்.

- சென்னையின் இரண்டாவது விமான நிலையம் அமைக்கப்படுவதையொட்டி பரந்தூர் மற்றும் அதன் சுற்றியுள்ள ஊர்களில் ஊர்களில் இடம் கையகப்படுத்தப்படுவதை எதிர்த்து  தோல்வியுற்ற ஏகனாபுரம் மக்கள் ஆந்திராவில் தஞ்சம் அடைய தீர்மானித்துள்ளனர்.  தமிழகத்திற்கு இது தலைகுனிவாக இருக்கும் என்று எதிர்பார்க்கின்றனர்.

- மஹாராஷ்டிராவில் மாமனாரின் 300 கோடி சொத்தை அபகரிக்க வேண்டி நடைப்பயிற்சி செல்லும் வேளையில் ஆளுக்கு ஒரு கோடி ரூபாய் கூலி கொடுத்து இரண்டு ஆட்களை வைத்து மாமனாரைக் கொலை செய்துள்ள பெண் அதிகாரி!

-"நீங்கள் இறந்து விட்டதால் உங்கள் கோரிக்கையை பரிசீலிக்க முடியாது" என்று சம்பந்தப்பட்ட, அகதிகள் முகாமில் உள்ள இலங்கை அகதியிடமே அரசு அதிகாரிகள் கையெழுத்து பெற்ற சம்பவம் சென்னையில்!

- போலீஸ்துறையின் கொடுமைகள் குறித்து மொட்டை கடிதங்கள் எழுதியதாக பணி நீக்கம் செய்யப்பட போலீஸ் கான்ஸ்டபிளை, 23 ஆண்டுகளுக்குப் பின் மறுபடி பணியமர்த்த நீதிமன்றம் உத்தரவிட்டு, ஆறு வார கெடு விதித்துள்ளது!

======================================================================================

பொக்கிஷம் :