நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 22 : நெல்லைத்தமிழன்

 

புஷ்கரில், மதிய உணவிற்குப் பிறகு, யாத்திரைக் குழுவினர் அவர்கள் வேலையை முடித்துக்கொண்டு கிளம்ப 1 மணி நேரமாகும் என்று கூறியதால், முடிந்தவர்கள் புஷ்கர் கடைவீதிகளில் நடந்துகொண்டிருந்தோம். ஆக்ராவில் எங்கள் லக்கேஜ் இறக்கப்படாது, அதனால் ஒரு செட் டிரெஸ் எடுத்துக்கொள்ளும்படிச் சொன்னார்கள். தனிப் பையில் தட்டு டம்ளர், மருந்துகளோடு ஒரு செட் டிரெஸ், குளிப்பதற்குத் தேவையானவற்றையும் எடுத்துக்கொண்டோம்.  எல்லோரும் தயாரானதும், பேருந்தில் எங்கள் லக்கேஜ் ஏற்றப்பட்டது. பிறகு 2 ½  மணிக்கு ஆக்ரா நோக்கிப் பயணப்பட்டோம்.  

இதற்கு முந்தைய பயணத்தின்போது 1 ½  மணிக்கே புஷ்கரை விட்டுக் கிளம்பிவிட்டோம். இப்படிச் சில நேரங்களில் சீக்கிரமாகப் போகும்போது, அடுத்த இடத்தைப் பார்க்கவும் புகைப்படம் எடுக்கவும் வெளிச்சம் நன்றாக இருக்கும்.  அதுபோல வேறு இடங்களையும் பார்க்க முடியும். நான் இரண்டு முறை இந்த யாத்திரை சென்றிருப்பதால் சில நேரங்களில் புகைப்படங்களில் வெளிச்ச வித்தியாசத்தைக் காண முடியும்.

கங்க்ரோலி துவாரகை தரிசனத்துடன் பஞ்ச துவாரகா தரிசனம் நிறைவு பெற்றது, ஆனால் யாத்திரை அவற்றோடு ஸ்ரீகிருஷ்ணர் பிறந்த இடம், வளர்ந்த இடம், பிற்காலத்தில் மஹாபாரதப் போர் நடத்திய இடம், ஸ்ரீகிருஷ்ணர் மறைந்த இடம், தகனம் செய்யப்பட்ட இடம் என்று பலவற்றையும் உள்ளடக்கியது.  பஞ்ச துவாரகா கோவில்களின் தரிசனத்திற்கிடையில் சோம்நாத்தில் நாம் ஸ்ரீகிருஷ்ணர் மறைந்த, தகனம் செய்யப்பட்ட இடங்களை தரிசனம் செய்துவிட்டோம். இனி ஸ்ரீகிருஷ்ணர் சம்பந்தமான மற்ற இடங்களை தரிசிக்க இருக்கிறோம். இனி யாத்திரையைத் தொடருவோம்.

புஷ்கரிலிருந்து சுமார் 140 கிமீ தூரமுள்ள ஜெய்பூரை அடைந்தோம். அந்த நகரத்தின் வெளிப்பகுதியில் (10 கிமீ தொலைவில்) உள்ள பிர்லா மந்திர் அருகே பேருந்து நின்றது.  இந்த பிர்லா மந்திரின் பின்னணியில் இருப்பது மோதி Dடூங்க்ரி கோட்டை எனப்படும் முத்துக்களின் மலை என்றழைக்கப்படும் கோட்டை. தூரத்தில் மலைமீது பார்க்க மிக அழகாக இருந்தது. ஆனால் கோட்டைக்குச் செல்வது எங்கள் அஜெண்டாவில் இல்லை.  இந்தக் கோட்டை சிவனின் வீடு என்றும் அழைக்கப்படுகிறது.

நாங்கள் சென்ற பிர்லா மந்திர், இந்தக் கோட்டை இருக்கும் மலையின் பின்னணியைக் கொண்டு அமைந்துள்ளது. இந்த இடத்தை ஜெய்பூர் மன்னர் 1 ரூபாய்க்கு, கோவில் கட்டுவதற்காக பிர்லா குடும்பத்திற்குக் கொடுத்திருக்கிறார்.

கோவிலின் உள்ளே விதானம்

உள்ளே லக்ஷ்மி நாராயணர். படம் எடுக்கக் கூடாதுதான். இருந்தாலும் நினைவுக்காக நான் ஒரு படம் எடுத்தேன். மிக அருமையாக அலங்காரம் செய்திருந்தார்கள்.

முழுவதும் பளிங்கினால் ஆன கோவில்

மாலை மயங்கிய நேரம்… வெளிச்சத்தில் ஒளிரும் கோவில்

கோவிலும் கோட்டையும் விளக்கு வெளிச்சத்தில் ஒளிர்கிறது. அது சரி.. பழைய காலத்தில் எதிரிகள், இரவு நேரத்தில் கோட்டையை நன்றாகக் கண்காணிக்க முடியுமே, இரவில் மெதுவாக மேலேறி வரவும் முடியுமே.. எப்படிக் காவல் கண்காணிப்பு இருந்திருக்கும்?

மலைச் சரிவில் அழகிய மலர்கள்

கோவிலுக்கு அழகாக வடிவமைக்கப்பட்ட நடைபாதை. பின்னணியில் கோட்டை.

கோட்டைகளைப் பார்க்கும்போதெல்லாம், அவர்கள் எப்படி குளிக்க, காலைக்கடனுக்கு என்றெல்லாம் திட்ட மிட்டிருப்பார்கள், ஒருவேளை எதிரி வந்தால் அல்லது போர் ஏற்பட்டால் (முற்றுகை போன்று) எப்படித் தங்கள் வாழ்வைத் தற்காத்துக்கொள்ள ஏற்பாடு செய்திருப்பார்கள் என்றெல்லாம் யோசிப்பேன். இவற்றைப் பற்றி நேரம் வரும்போது எழுதுகிறேன். 

பிர்லா மந்திர் தரிசனத்திற்குப் பிறகு, அங்கிருந்து புறப்பட்டு பத்து கிமீ தொலைவில் இருந்த ஜெய்பூர் நகரம் நோக்கிச் சென்றோம். இங்கிருந்து நாங்கள் ஆக்ரா நோக்கிப் பயணப்படப் போகிறோம். சில சமயங்களில் ஜெய்ப்பூர் நகரத்திற்கு சிறிது சீக்கிரம் வந்து சேர்ந்துவிட்டால், அதற்கு ஏற்றபடி ஒரு சில இடங்களைப் பார்க்க வாய்ப்பு கிடைக்கும். ஜெய்ப்பூர் நகரம் சிவப்பு (ரோஸ் மற்றும் ஆரஞ்ச் சேர்ந்த நிறம்) கற்களால் ஆன கட்டிடங்கள் நிறைய உடையது. வீதிகளைப் பார்க்கவே மிக அழகாக த் தெரிந்த து. நாங்கள் ஹவா மஹால் எனப்படும் அரண்மனையைப் பார்த்தோம் (பேருந்தில் செல்லும்போதே). பிறகு ஓரிட த்தில் பேருந்தை நிறுத்திவிட்டு, கலைப்பொருட்கள் விற்கும் மிகப் பெரிய இடத்திற்குச் சென்றோம். இது, யாத்திரைக் குழுவினருக்கு காபி தயார் செய்ய சௌகரியமான இடம்.

ஹவா மஹல் எனப்படும் அரண்மனை

கலைப்பொருட்கள் விற்கும் வளாகத்தில் இருந்த ராஜஸ்தானி ஓவியங்கள்

எப்படி துணிகளில் வண்ணங்களால் உருவங்கள் வரைகிறார்கள் என்பதைக் காண்பித்தார் அங்கிருந்தவர். அங்கு பல்வேறு வகை சீலைகளை விற்பனைக்கு வைத்திருந்தார்கள். நான் எப்போதுமே அத்தகைய இடங்களில் வாங்குவதில்லை. விலை அதிகமாக இருக்கும் என்பதால்.

Semi Precious என்று சொல்லப்படும் பலவகை வண்ணக் கற்களை அங்கு விற்பனைக்கு வைத்திருந்தார்கள். எந்த ராசிக்கு (பிறந்த மாதத்திற்கு) எந்தக் கற்களை உபயோகிக்கணும் என்றும் சொன்னார்கள். (அது சரி.. இந்த மாதிரி கற்களை உபயோகித்து மோதிரம் போட்டுக்கொள்வதால் என்ன பயன் விளைகிறது என்று யாராவது சொல்ல முடியுமா? என்னிடம் மூன்று நான்கு தங்க மோதிரங்கள் இருப்பதுதான் மிச்சம். அப்படி என்னிடம் ஜோசியர் சொல்லாமல் இருந்திருந்தால் தங்க மோதிரங்களில் நான் இன்வெஸ்ட் செய்திருக்க மாட்டேன் அல்லவா?)

மிகுதியை அடுத்த வாரம் பார்க்கலாமா?

 (தொடரும்)