குறைந்த விலையில் வீடு, ஐரிஸ் டீச்சர், மற்றும் நான் படிச்ச கதை

 

பொருளாதாரத்தில் அடித்தட்டில் இருப்பவர்கள் கண்ணியமான சூழலில் வாழ வழி செய்யும் வகையில் குறைந்த விலை வீடுகளை கட்டித்தரும் வகையில் 'ஹோம்ஸ்டோரி' ‘HomeStory' திட்டத்தைத் துவக்கினார்.  கடந்த இரண்டு ஆண்டுகளாக, ரூ.5 லட்சம் மதிப்பில் வீடுகளை வழங்கக் கூடிய வகையில், குறைந்த விலை வீடுகளுக்கான வடிவமப்பு மற்றும் செயல்முறை அம்சங்களில் இக்குழு கவனம் செலுத்தி வருகிறது. தொழில்நுட்பம் மூலம் இதை சாத்தியமாக்கி வருகின்றனர். மாநில அரசுகள் மற்றும் தொடர்புடையவர்களுடன் இணைந்து செயல்படுகின்றனர். 

“நகரங்களில் அரசிடம் பயன்படுத்தாத நிலம் நிறைய இருக்கிறது. இந்த பயன்படுத்தா நிலத்தை கொண்டு, கண்டைனர் வீடுகளை கட்டுவது எங்கள் திட்டமாகும். இது புலம் பெயர்ந்தோருக்கான வாடகை வீடுகளாக அமையும்,” என்கிறார் தீபக்.

===================== ==============================

ஐரிஸ் டீச்சருக்கு ஐஸ் வைக்க முடியாது! 

ஐரிஸ் - இவர் ஒரு டீச்சர். 

இந்த டீச்சரை வழியில் எங்கும் பார்த்து, 'வணக்கம் டீச்சர்' என்று சொல்லி ஐஸ் வைக்க முடியாது! 

ஏன்? 

வடகிழக்கு மாநிலத்தின் முதல், 'ஏஐ' எனப்படும் செயற்கை நுண்ணறிவு ஆசிரியை, அசாமில் உள்ள தனியார் பள்ளியில் அறிமுகப் படுத்தப்பட்டு உள்ளது(!).

ஏஐ தொழில்நுட்பம் கடந்த சில ஆண்டுகளாக பெரும் வளர்ச்சி அடைந்து வருகிறது. இந்த தொழில்நுட்பம், நாம் கேட்கும் கேள்விகளுக்கு இணையத்தில் இருந்து திரட்டி வைத்திருக்கும் தகவல்களை அலசி ஆராய்ந்து விரிவான பதில் அளிக்கும்.

அரசு துறைகள் முதல் தனியார் நிறுவனங்கள் வரை இந்த தொழில்நுட்பத்தை பயன்படுத்துகின்றனர்.

பள்ளிகளிலும் ஏஐ தொழில்நுட்பம் கொண்ட ரோபோ ஆசிரியர்களை அறிமுகப்படுத்தி வருகின்றனர்.

அந்த வகையில் நிடி ஆயோக்கின் அடல் சிந்தனை ஆய்வகத்துடன் இணைந்து, கல்வி தொழில்நுட்பம் சார்ந்த தனியார் நிறுவனம், 'ஐரிஸ்' என்ற ஏஐ ரோபோவை, அசாமில் உள்ள தனியார் பள்ளியில் அறிமுகப்படுத்தி உள்ளது. குரல் வழியாக கட்டுப்படுத்தும் வகையில் இதை வடிவமைத்துஉள்ளது.

ஐரிஸ் என பெயரிடப்பட்டுள்ள இந்த ரோபோவிடம், மாணவர்கள் ஆர்வமுடன் கேள்விகளை கேட்கின்றனர்.

அதை உள்வாங்கி கொண்டு, அது விரிவான பதில்களை தருகிறது. இதனால் மாணவர்கள் உற்சாகமடைந்துள்ளனர்.

இது குறித்து, அப்பள்ளியின் ஆசிரியை கூறியதாவது:

ஐரிஸ் ஏஐயிடம் பாடத்திட்டத்திற்கு உள்ளேயும், வெளியேயும் இருந்து மாணவர்கள் கேள்விகளை கேட்டனர். எதை பற்றிய கேள்விக்கும் உடனடியாக, உதாரணங்கள் மற்றும் குறிப்புகளுடன் பதிலளித்தது.

இந்த ரோபோ, குரல் வழியாக பதிலளிப்பது மட்டுமின்றி, மாணவர்களுடன் கைகுலுக்குவது போன்ற செய்கைகளையும் செய்யும் என்பதால் மாணவர்கள் மகிழ்ச்சி அடைந்துள்ளனர். இது மாணவர்களுக்கு புதிய கற்றல் அனுபவத்தை வழங்குவதில் ஒரு மைல்கல்லாக விளங்கும்.

இவ்வாறு அவர் கூறினார்.

ஏற்கனவே கேரளாவில் உள்ள ஒரு பள்ளியில் இதுபோன்ற ஏஐ ரோபோ அறிமுகப்படுத்தப்பட்டு உள்ளது.

( அட செயற்கை உருவம் கொடுக்கும்போது, 'தமன்னா போல, பாவனா போல, அனுஷ்கா போல எல்லாம் உருவம் வைத்தால் என்ன' என்று எ பி ஆஸ்தான எழுத்தாளர்கள்  சிலர்  ஆதங்கப் படுகிறார்கள்!) 

= = = = = = = =

நான் படிச்ச கதை (JKC)

அப்பாவின் ஆசை!

 கதையாசிரியர்: பாரதிமணியன்

முன்னுரை 

பாரதி மணி வேறு, பாரதிமணியன் வேறு, சுப்ரபாரதிமணியன் வேறு, என்பதை பாரதிமணியன் பற்றிய விவரங்களை இணையத்தில் தேடியபோது கண்டு கொண்டேன். பார்த்திபன் சுப்பிரமணியன் என்பவரின் புனை பெயரே பாரதிமணியன்  என்று ப்ரதிலிபி ஒரு அறிமுகத்தில் கூறுகிறது. 

ஆக ஆசிரியர் பற்றிய விவரங்கள், மற்றும் படம் இல்லாமலேயே இந்தப் பதிவு வருகிறது. வாசகர்களுக்கு பரிச்சயம் உண்டு என்றால் அது பற்றி கூறலாம். இவருடைய கதைகள்  myvikadan, kalkionline, mangaiyarmalar, மின் நூல்களில் பிரசுரம் ஆகியுள்ளன. கதைகள் மட்டுமல்லாமல் கவிதைகளும் எழுதியுள்ளார். இவர் முகநூல் மற்றும் X தளங்களில் உள்ளார்.

 =======இவருடைய முகநூல் பக்கம்=======

பாரதிமணியன் - Lifecharger2020@gmail.com  (பாரதிமணியன் அவர்களின் மின்னஞ்சல் முகவரி)

இன்றைய கதை “அப்பாவின் ஆசை” sirukathaigal.com தளத்தில் இருந்து எடுக்கப்பட்டது. ‘அப்பா கதைகள்’ வரிசையில் வந்த ஒன்று.   விகடனில் வெளியானது. 

சிறிய கதை. எல்லோருக்கும் சிறு வயதில் இருக்கும் சில தின்பண்ட ஆசைகள் கடைசி காலம் வரை நீடித்து நிற்கும். அந்த ஆசையில் ஒன்றே இக்கதையின் கரு. ஆனால்  சஸ்பென்ஸ் வேறு ஒன்று. அது கதையின் கடைசி பத்தியில். 

அப்பாவின் ஆசை!

 கதையாசிரியர்: பாரதிமணியன்

மாலை நேரத்தில் வருகின்ற மழை, கூடவே ஒரு குளுமையையும் கொண்டு வந்து விடுகிறது. அந்த மழையில் உருவாகும் இதமான சூழலில் மனசும் வயிறும் சேர்ந்து , நாக்குக்கு ருசியாக சூடாக எதையாவது சாப்பிட விரும்பும். 

அந்த மாதிரி நேரங்களில், மோகனுக்கு அவனுடைய அப்பா கூட இருக்க நேர்ந்தால், அவர் பேசறதை கேட்கும்போது.. அவனுக்கு ஆச்சர்யமாகவும்… சிலநேரம் வேடிக்கையாகவும் இருக்கும்.

“இந்த மழைக்கு இதமா சூடான டீயும், கூட வெங்காய பக்கோடா… இல்லேன்னா மொறு மொறுன்னு மெதுவடை… சாப்பிட்டா நல்லா இருக்கும். அதுவும் தெரு முனையில, காமாட்சி பாட்டி போடற வாழைக்கா பஜ்ஜியையும்.. உருளை கிழங்கு போண்டாவையும் அடிச்சிக்க முடியாது. உங்க அம்மா சுடற பலகாரத்தில கூட , அப்படி ஒரு ருசிய ஒரு நாளும் நான் அனுபவிச்சதே கிடையாது” என்பார்.

அவ்வப்போது அம்மாவையும் வம்புக்கு இழுக்கிற மாதிரி பேசி விட்டு, இவனை பார்த்து கண் சிமிட்டுவார். அம்மாவும் கோபம் வந்த மாதிரி.. “பேசாம நீங்க காமாட்சி பாட்டியவே கூட்டிட்டு வந்து, சமையல் பண்ண வெச்சுக்கங்க” என்பாள்.

“அடி இவளே, ஒரு பேச்சுக்கு சொன்னேன்டி! அந்த பாட்டி தான் இப்ப இல்லையே. அந்த நிலாவுல வடை சுட போய்டாங்களே.. அவங்க பேரன்தான் இப்ப பலகாரம் போடறான். அவன் கை பக்குவமும் பரவாயில்லே. ஆனா என்ன பண்ணறது. எனக்கு முன்ன மாதிரி சட்டுன்னு எழுந்து தெரு முனைக்கு போய் வாங்கி சாப்பிட முடியாதே.. வயசாயிடுச்சு.. நாலு எட்டு நடந்தாலே மூச்சு வாங்குது ” என்பார்.

மோகனுக்கு நினைவு தெரிந்து.. மழைக் காலம் என்றாலே.. அவர் வேலைக்கு போய்ட்டு திரும்ப வரும்போது, தவறாமல் காமாட்சி பாட்டி கடையில் நின்னு பலகாரம் பார்சல் வாங்கிட்டு வருவார். அவர் ரிட்டயர்டு ஆன பிறகும் கூட, அடிக்கடி அந்த கடைக்கு போயி பலகாரம் வாங்கிட்டு வருவார்.

பிறகு சரியாக நடக்க முடியாமல் போனதும், அவன் அம்மா மெல்ல தடுமாறி நடந்து போய், வாங்கிட்டு வந்து கொடுப்பாங்க. ஒரு சில சமயம் அவனிடம் கூட வாங்கிட்டு வர சொல்லி இருக்கார்.

ஆனால் அவனோ,

“சாரிப்பா… கடைக்கு போக நேரம் இல்லப்பா. நானே ஆபீசில வேலை செய்து முடிக்க முடியாம.. வீட்லேயும் செய்யலாமுன்னு பைல், லேப் டாப் எல்லாம் எடுத்திட்டு வந்திருக்கேன். இப்ப தானே அம்மா டீ போட்டு கொடுத்தாங்க. நான் நாளைக்கு வரும் போது வாங்கிட்டு வரேன்” என்று சொல்லி விட்டு வேலையில் மூழ்கி விடுவான்.

மறுநாள் ஆபீஸ் வேலை முடிந்து வரும் போது அந்த விஷயத்தையே மறந்து விடுவான். விடுமுறை நாட்களில் கூட, அவன் மனைவி குழந்தைகளோடு வெளியே போய் வரும் போது அந்த கடைக்கு அருகில் காரை நிறுத்த முடியாமல், கூட்டமாக இருக்கிறது என்பதால் பலகாரம் வாங்க மனம் இருந்தாலும், இன்னொரு முறை வாங்கிக்கலாம் என்று வந்து விடுவான்.

ஏதாவது ஒரு சமயம் அதிசயமாக வாங்கி கொண்டு வந்து கொடுப்பான். கொடுத்து விட்டு அறிவுரை வேறு சொல்லுவான். “என்னப்பா.. அப்படி ஒரு கூட்டம்.! என்ன ஆயில் யூஸ் பண்ணறாங்க.. சுத்தமாக செய்யறாங்களான்னு தெரியல..” என்பான்.

ஆனால் வேறு பெரிய ஸ்வீட் ஸ்டால்களில் இருந்து மிக்ஸர், சிப்ஸ்.. என்றெல்லாம் வாங்கி கொண்டு வந்து கொடுப்பான். அவர் அதை விரும்பி சாப்பிட மாட்டார். கொஞ்சமாக எடுத்துக்கொண்டு போதும் என்று சொல்லி விடுவார்.

ஒருநாள் ஏதோ வேலை விஷயமாக டென்ஷனில் இருக்கும் போது, அம்மா தடுமாறி நடந்து போய்… அந்த கடையில் இருந்து பஜ்ஜி வாங்கி கொண்டு வந்து கொடுப்பதை பார்த்து விட்டு.. சத்தம் போட்டான் “ஏம்மா… அவரு தான், இந்த வயசுலயும் காரசாரமா சாப்பிட ஆசை படறார். நீங்களும் நடக்க முடியாம நடந்து போய் வாங்கி குடுக்கறீங்க”

“நீ ஏம்பா… டென்ஷன் ஆறே! அவரு என்ன தினமுமா கேட்கிறார். ஏதோ மழை நேரத்தில் தான் ஆசைபட்டு கேட்கிறார். இப்படி ஒவ்வொருத்தர் மனசுக்குள்ளயும் ஏதாவது ஒரு ஆசை இருக்கும்பா! உன் அப்பாவுக்கு இப்படி ஒரு ஆசை.”

அவன் சமாதானம் ஆகாமல் , முகத்தை உர்ரென்று வைத்திருப்பதை பார்த்துவிட்டு, “அவருடைய சின்ன வயசில இந்த பலகாரம் வாங்கி சாப்பிட கூட வழியில்லாமல், ரொம்ப ஏழ்மையில இருந்திருக்கார்பா. நீயும் நானும் வயிறார சாப்பிடணுமுன்னு.. பல நாள் சாப்பிடாம, அங்க ஒரு டீ வடை மட்டும் சாப்பிட்டுட்டு, இராத்திரி பகலா வேலை வேலைனு ஓடுவார். ஒவ்வொரு வீட்டிலே, சில ஆம்பளங்க குடிபழக்கத்துக்கு அடிமையாகி குடும்பத்தையும் சேர்த்து கஷ்ட படுத்துறாங்க. இது ஒன்னும்… அது மாதிரி மோசமான ஆசை இல்லையே” என்று அம்மா சொல்லவும்…

“என்னமோ பண்ணுங்க” என்று சத்தமாக பேசி விட்டு, மோகன் பெட்ரூம் போய் கதவை படாரென்று சாத்திக்கொண்டான்.

அதற்கு பிறகு அவனுடைய அப்பா, அந்த பலகாரம் பற்றி வீட்டில் பேசவேயில்லை.

இன்றும் மாலை நேரத்தில், மழை விட்டு விட்டு பெய்து கொண்டிருந்தது. வழக்கம் போல மோகன், அவன் மனைவி கொடுத்த டீயை ருசித்துக் கொண்டு, ஆபீஸ் வேலையை வீட்டில் செய்து கொண்டு இருந்தான். அப்போது ..அவனுடைய மகன் முகேஷ் தயங்கி தயங்கி அவனிடம் வந்து நின்றான். மோகனும் மெல்ல அவனை நிமிர்ந்து பார்த்தான்.

“அப்பா… எனக்கு தெரு முனை கடையில் இருந்து வாழைக்கா பஜ்ஜி சாப்பிட வாங்கி தரீங்களா ” என்று கேட்டான்.

உடனே மோகன் அதிர்ச்சியாகி ஆச்சர்யமாக மகனை பார்த்தான்.

பின்னர் தலையை திருப்பி அருகிலிருந்த சுவரை பார்த்தான்.

அங்கே மாட்டியிருந்த படத்தில், அமரராகி விட்ட அப்பா… சிரித்தபடி மோகனை பார்த்துக் கொண்டிருந்தார். அவர் வழக்கமாக செய்வது போல… கண்ணடித்து காட்டி சிரித்தது போல் அவனுக்கு தெரிந்தது.

– 07-17-23, My Vikatan

ஊசிக்குறிப்பு

 எனக்கும் மழைக்காலத்தில் பஜ்ஜி சாப்பிட பிடிக்கும். சிறு வயதில் 3ஆம் வகுப்பில் படிக்கும்போது திருச்சியில் குடியிருந்த வீட்டின் அருகில் ஒரு செக்கு இருந்தது.  அந்த செக்கு இருக்கும் காம்பௌண்ட் சுவர் அருகில் ஒரு பாட்டி மாலை வேளைகளில்  வாழைக்காய் பஜ்ஜி சுட்டு விற்பார். காலணா ஒரு பஜ்ஜி (2 பைசா). அதன் மேல் அளவற்ற பிரியம். திருச்சியை விட்டு பிரிந்தபின்  அந்த பாட்டியின் பஜ்ஜி போன்ற ருசியுள்ள பஜ்ஜி வேறு எதுவும் சுவைத்ததில்லை.  இக்கதையைத் தேர்ந்தெடுக்க அதுவும் ஒரு காரணம். ஹி ஹி. 

அதே போன்று என்னுடைய பாஸுக்கு இலந்தைவடை என்றால் மிகவும் பிரியம். பள்ளிக்கூட வாசலில் விற்பதை வாங்கி தின்றது. தற்போது இலந்தை வடை எங்கும் கிடைப்பதில்லை.                                                                                                                                           

பாரதிமணியன்முகநூல் பக்கம்.

பாரதிமணியன்

நட்புக்களே! நான் எழுதிய 'விடுகதை' சிறுகதை. கல்கி ஆன்லைன் இதழில் வெளிவந்துள்ளது. படித்து பார்த்து பகிரவும். நன்றி. கீழே உள்ள இணைப்பை தொட்டு படிக்கலாம். இது முற்றிலும் இலவசம்.

இணைப்பு இங்கே - சிறுகதை - விடுகதை!

-பாரதி மணியன்

ஆபிசிலிருந்து சோர்வாக வீட்டிற்குள் வந்த அப்பா ராகவனை,  வாசல் படியின் உள்ளே நுழைய விடாமல், இரு கை..... (கதையின் தொடக்க வரிகள் இவை. சுட்டி மேலே)

பனங்காய் வண்டி: பாரதிமணியன்

1.     அதிக வட்டி அதிக வட்டி

        முதலீட்டாளர்களுக்கு

         நாமக்கட்டி!

2.     சாதி வாழ்க சாதி வாழ்க

        வாழ வேண்டாமா

        சாதி தலைவர்

3.     மழை நாளில்

        குடையும் தொலையும்

        திருமண வீடு!

4.     வாங்கிய கடனில் விளைந்த நெல்

        கடன்போக மீந்தது

        பெரிய வைக்கோற்போர்!

5.     ஐந்து லிட்டர் கேனில்

        ஏழு லிட்டரும் கொள்ளும்

        ரேசன் கடையில்!

6.     பேருந்தில் பிதுங்கும் கூட்டம்

        நடந்தால் நல்லது

        மாதக்கடைசி!

7.      புது டயர் மாற்ற

         கிடைத்த பழைய டயர்

         பையனுக்குக் கிடைத்த புது வண்டி

8.      எத்தனையோ புத்தகங்கள்

         வாங்க காசில்லை

         சுண்டல் மடித்த காகிதமே சுவை

9.      மின்சாரம் இல்லாத

         புழுக்க ராத்திரி

         படிக்க ஆசை

10.    கிரிவலம்

         உடனடி பலன்

         கால்வலி!

= = = = = = = = =