இல்லாத பொக்கிஷம்

 டெல்லியிலிருந்து  நீண்ட நாட்களுக்குப் பிறகு வந்திருந்த என் ஒன்று விட்ட தங்கை எங்களைக் காண வந்திருந்தாள்.பேசி, சிரித்து, களித்திருந்தபின் 'மாமா வீட்டுக்கு போகலாம், நீங்களும் வாங்க' என்று அழைத்தாள்.  நானும் பாஸும்  தங்கையுடன் கிளம்பினோம்.

ஆஸ்தான ஆட்டோ நம்ப வைத்து கழுத்தறுக்க, உபேர் பக்கம் ஒதுங்கினேன்.  வழக்கத்துக்கு மாறாக அடுத்த நொடியே புக் ஆனது.  படியிறங்க முற்படுகையில் கேன்சலும் ஆனது.  மறுமுயற்சியிலும் உடனே புக் ஆனது.  ராமு (பெயர் மாற்றப்படவில்லை!) வருவதாக பொத்தான் அழுத்தி இருந்தார்.  அன்று எனக்கு ராசிபலன் பார்க்கவில்லை.  அவரும் பார்த்திருக்க மாட்டார்..  சந்திராஷ்டமமோ..  அஷ்டமத்து சனியோ...  விதி சிரிக்கவில்லை.  லேஸாக புன்னகைத்தது.

ஊபரில் பெரும்பாலும் நல்ல ஓட்டுநர்களையே சந்தித்திருக்கிறேன்.  நல்லவரல்லாத என்றால், என் அனுபவத்தில் அதிகபட்சம் இறங்கும்போது கூடுதல் தொகை கேட்பவர்களை சொல்லலாம்.  அதுவும் அபூர்வம்.  ஏறும்போதே, அல்லது  புக் செய்த உடனேயே கால் செய்து ஐம்பது ரூபாய் எக்ஸ்ட்ரா போட்டு கொடுக்கிறீர்களா என்பார்கள், கட் செய்து விடுவேன்.  அதாவது அவர்களை கேன்சல் செய்து விடுவேன்.  பத்து ரூபாய், 15 ரூபாய் என்றால் ஓகே..  அதுவே பெரும்பாலும் ஒத்துக்கொள்ளாமல் கேன்சல் செய்து விடுவேன்.

ஆனால் இந்த சந்தர்ப்பத்தில் நான் சந்தித்த இந்த ராமு மிக மோசமான நடத்தையை வெளிக்காட்டினான்.

அவன் பேசிய பேச்சுகளுக்கு, உபயோகித்த வார்த்தைகளுக்கு, முக்கியமாக அவன் நடத்தைக்கு அவனுக்கு மரியாதை தேவை இல்லை என்று முடிவு செய்துவிட்டேன்.

ஊபர் போட்டதும் வந்தவன், வீட்டுக்கு அருகில் வராமல் தெரு முனையில் நின்று எங்களை அங்கு வர சைகை காட்டினான்.  ரோட் மோசமாக இருக்காம்.  உண்மையில் எங்கள் தெரு மோசமாக இல்லை.  அவன் வந்த வழி மோசமாக இருந்திருக்கலாம்.  மேலும், சென்னையில் சும்மாவே ரோடுகள் மோசம்.  மழை வேறு பெய்தால் என்ன ஆகும் என்று எந்த சென்னைவாசிக்குதான் தெரியாது?

அப்புறம் நான் அழைத்தபடி தெருவின்  உள்ளே வந்தவன் நான் சொன்னபடியே இந்தப் பக்கமாய் கிளம்பினான்.  ரோடும் ஓகேதான், தூரமும் அதைவிட இது ஷார்ட்.

கிளம்பியது முதற்கொண்டே அவன் குரல் முணுமுணுவென்று கேட்டுக்கொண்டே இருந்தது.  சிலர் போனில் பேசியபடியே வருவார்கள்.  அப்படி பேசுகிறானா என்று பார்த்தால், அதுவும் இல்லை.

"கிலோமீட்டருக்கு 15 ரூபாயாம்...   ல*&$#@*^@.ள்....எவன் வச்சான் இப்படி...   ரோடாவா இருக்கு..  தே%^#$*&யா...  எவன் அப்பன் வீட்டு காசு...   இவனா ஓட்டறான் வண்டிய..."  இப்படி தொடங்கி இதையே வெவ்வேறு வார்த்தைகளில் கொஞ்சம் சத்தமாக - பின்னால் இருப்பவர்கள் காதில் விழும்படி அல்லது விழவேண்டும் என்றே - திட்டிக்கொண்டே, புலம்பிக் கொண்டே வந்தான்.  இடைவெளியே விடவில்லை.

பின்னால் பாஸும் தங்கையும் பேசிக்கொண்டபோது அவன் குரல் கொஞ்சம் சத்தமாக ஒலித்தது.  அதாவது அவன் பேசுவது அல்லது திட்டி உளறுவது பின்னால் இருப்பவர்களுக்கு கேட்க வேண்டுமாம்.

வார்த்தைக்கு வார்த்தை 'ல' வில் தொடங்கும் வசவும், 'தே' வில் தொடங்கும் 'விளித்தல் விகாரமு'ம்!

இது போதாதென்று இன்னொன்று செய்தான்.  ஸ்டேண்டில் Map பார்த்துக் கொண்டிருந்த தன்னுடைய ஃபோனை கையில் எடுத்தான்.  ஒரு கை விரலால் நம்பர் ஒற்றினான்.  

லைன் கிடைத்தது போலும்..  யார் நம்பரோ...   ஆனால் நம்பராகத்தான் வந்தது.  எடுத்து பேசத்தொடங்கினான்.  அவன் பேசியது அவனுக்காக இல்லை என்று தெரிந்தது.  ஊபர் நிறுவனத்து ஆளிடம் பேசுகிறானாம்!  

கேட்பவன் கேனையா இருந்தா...  வசனம் நினைவுக்கு வந்தது...  போனில் இருந்த எதிர்முனை ஆளிடம் இஷ்டத்துக்கு எகிறினான்.

"கிலோமீட்டருக்கு 15 ரூபாய்னு வச்சிருக்கியே..  யாரைக் கேட்டு வச்சே...  ..  நீ வந்து ஆட்டோ ஓட்டறியா..   ரோடெல்லாம் எவ்வளவு மோசமா இருக்கு...   எத்தனை வாட்டி உன்கிட்ட சொல்லி இருக்கேன்...    ஊராய்யா இது..  (என்னை பிக்கப் செய்த இடம்)  மெயின் ரோட்ல விட்டுடு என்று நீ மேப் போட்டிருந்தா நீ மனுஷன்....இப்ப மட்டும் எதிர்ல வந்தே...   கூறு போட்டுடுவேன்..  அவ்வளவு காண்டுல இருக்கேன்..."  இந்த ரீதியில் நடுல நடுல மானே தேனே சேர்ப்பதுபோல சரளமாக அந்த இரு வசவுகள்...   

அவன் அவ்வளவு கோபக்காரனாம்...  அவ்வளவு வாய்ஸான ஆளாம்...  அதை கஸ்டமருக்கு காட்டுகிறானாம். கஸ்டமர்களை இப்படி குழந்தையாக நினைக்க வேண்டுமென்றால் அவன் போதையில்தான் இருந்திருக்க வேண்டும்.  வாசனையெதுவும் இல்லாததால் கஞ்சா போதையில் இருந்திருக்கக் கூடும்.  அதுதான் தமிழ் நாட்டில் இப்போது சல்லிசாக கிடைக்கிறதே...மது என்றால் கடை தேடி போகவேண்டும்.  கஞ்சாவோ 'மக்களைத் தேடி மருத்துவம்' போல தேடி வரும் போதை.

அடுத்து, எந்த போக்குவரத்து நிறுவனம் இப்படி தொடர்பு கொள்ள ஏதுவாக காத்திருக்கிறது?  அதுவும் ஊபர்?!!  எதிரில் கேட்டுக்கொண்டிருந்தவன் மரக்கட்டையா?  ஊபர் நிறுவனத்து ஆளாயிருந்தால், இவன் பேசிய பேச்சுக்கு  இவன் உரிமத்தை கேன்சல் செய்த கையோடு இவன் இருக்கும் இடம் தேடி வந்து உதைத்திருப்பான்.  ஊபர் தப்புத்தப்பாய் மறுபடி மறுபடி என்னிடம் காசு வாங்கியபோது அவர்களைத் தொடர்புகொள்ள நான் பட்ட பாடு நினைவுக்கு வந்தது.

இதில்வேறு,  பாஸும், தங்கையும் இவன் சேஷ்டை நாடகங்களை கவனிக்காமல் பேசிக் கொண்டிருந்தது அவன் எரிச்சலைத் தூண்டி இருக்க வேண்டும்.  இவர்கள், அல்லது எங்கள் கவனத்தைக் கவர குரலை தேவையில்லாமல் உசத்திக் கொண்டே போனான்.

பாஸ் மற்றும் தங்கையுடனான பேச்சில் எனக்கு கவனம் செல்லவில்லை.  இவனை எப்படி கையாள்வது என்று யோசனை ஓடியது.  

ஒன்று அங்கேயே ஆட்டோவை நிறுத்தி வேறு ஆட்டோ பிடிக்க வேண்டும்.  இதில் ஒரு  சிரமம், டெஸ்டினேஷனை உடைத்து பாதியில் இறங்கினால் அந்த 'ஆப்' என்ன, எவ்வளவு காட்டும்?  ஊபர் போன்ற நிறுவனங்கள் லேசுப்பட்டவர்கள் இல்லை.  கொள்ளைக்  காரர்கள்.  ஏற்கெனவே இவர்களோடு எனக்கு ஒரு அனுபவம் இருக்கிறதே.....  முழு தொகையும் கொடுக்க வேண்டியதாகி விட்டால்?  அடுத்து, 'ஆப்' தொகையை குறைத்து காட்டினாலும் இந்த கடுகடு கஞ்சா பார்ட்டி என்ன ஸீன் கிரியேட் செய்வானோ, பிரச்னை செய்வானோ...

அடுத்து இங்கேயே இப்போதே கத்தி (இல்லீங்க...  குத்தற கத்தி இல்லை, சத்தம் போடுவது!) விட்டு விடலாமா.. அல்லது இறங்கும்போது ஒரு காட்டு காட்டி விட்டு விடலாமா...

அல்லது எப்போதும்போல இது எதையுமே காதில் வாங்காதது போல, கவனத்தில் கொள்ளாது 'ஆப்'பில் காட்டிய தொகையைக் கொடுத்து விட்டு ஸைலண்ட்டாக நகர்ந்து அவன் வயலென்ட்டை வேஸ்ட் / அலட்சியம்  செய்து கடுப்பேற்றி விடலாமா...

அவனா, போனை வைத்து விட்டும் புலம்பலை தொடர்ந்தான்.  எல்லோரும் A/C ரூமில் சுகமாக இருப்பது போலவும், அவன் மட்டும் உழைக்கும் வர்க்கமாய் கஷ்டப்படுவது போலவும், விடாது அலுத்துப் போகும் அளவு, அரற்றிக் கொண்டே வந்தான்.  எனது ரத்த அழுத்தம் 80 லிருந்து 90, 95, 98, 100 என்று ஏறிக் கொண்டிருந்தது.  சொல்லப்போனால் சமீப காலங்களில் அது மாத்திரை சாப்பிட்டும் 95 லேயே நிலைகொண்டிருக்கிறது!  பின்னால் அமர்ந்திருக்கிறவர்களுக்காகவே அவன் உளறுகிறான் என்பது உ கை நெ க யாய் தெரிந்தது.  கேட்காமல் இருக்கவும் முடியாத சூழல். 

ஒரு நிலையில் 'ஒழிந்து போகிறான் நாய்' என்று விடவும் விட்டு விட்டேன்.  

அப்போது சுகுமாரிடமிருந்து போன் வந்தது.  முதல் நாள் அவருக்கு வாட்ஸாப்பில் ஒரு பார்வேர்ட் அனுப்பி இருந்தேன்.  தாடி வைத்த ஒரு முஸ்லீம் பெரியவர் இந்து கடவுள், இந்து தத்துவம் பற்றி பேசிய வீடியோ அது.

அதைப்பற்றி அவர் விசாரிக்க போட்ட போனை அப்போது சட்டென மண்டையில் ஒரு பொறி தட்ட,  அதை உபயோகித்துக் கொண்டேன்.  ஒரு முயற்சிதானே..  நானும் அதே அளவு செய்வேன் இல்லை?  விளையாடிதான் பார்ப்போமே...

=================================================================================

நியூஸ்ரூம் 

பானுமதி வெங்கடேஸ்வரன் 

- அமெரிக்காவைச் சேர்ந்த 'கார்னிங்' நிறுவனத்தின் கூட்டு நிறுவனமான 'பிக்டெக்' காஞ்சிபுரம் மாவட்டம் பிள்ளைப்பாக்கத்தில் 1003 கோடி ரூபாய் முதலீட்டில் மொபைல் ஃபோன், லாப் டாப்பில் பயன்படுத்தப்படும் கண்ணாடி தயாரிக்கும் தொழிற்சாலையை அமைக்க உள்ளது.

- ஹிமாச்சல பிரதேசத்தின் மண்டியில் உள்ள ஐ.ஐ.டி.யின் ஆதரவுடன் இயங்கும் டெக்னாலஜிஸ்' என்னும் ஸ்டார்ட் அப் நிறுவனம் ஏ.ஐ. எனப்படும் செயற்கை நுண்ணறிவு மற்றும் கம்ப்யூட்டர் விஷன் ஆகிய தொழில்நுட்பங்களின் அடிப்படையில் யோகா மேட் ஒன்றை தயாரித்துள்ளது. இதை நம் செல்ஃபோனோடு இணைத்து பயன்படுத்தும் பொழுது, இந்த யோகா மேட்டில் இருக்கும் சென்சார்கள், பயனாளிகள் செய்யும் தவறை சுட்டிக் காட்டுவதோடு, எவ்வாறு பயிற்சி செய்ய வேண்டும் என்பதையும் கற்றுத்தரும் - நல்ல விஷயம்தான், ஆனால் அனுஷ்கா மாதிரி ஒரு யோகா டீச்சரை மிஸ் பண்ண நேரிடலாம்.

- சிந்த்வாரா, மஹாராஷ்டிரத்தில் பக.ஜ.க.வுக்கு ஓட்டளித்ததால் 'தலாக்', கூறி விவாகரத்து செய்து விட்டதாக கணவர் மீது புகாரளித்திருக்கிறார் இஸ்லாமிய பெண் ஒருவர். 

- சூடான தோசை கேட்டும் கொடுக்காமல், வாடிக்கையாளரை திட்டிய ஹோட்டலுக்கு மாவட்ட குறைதீர் ஆணையம் 7000 ரூபாய் அபராதம் விதித்தது. இதில் வேடிக்கை என்னவென்றால் 2022ல் நடந்த இந்த சம்பவத்திற்கு தீர்ப்பு சூட்டைத் சூடாக வராமல் இப்போதுதான் வந்திருக்கிறது :))

- வாடகைத் தாய் மூலம் குழந்தை பெற்றுக் கொள்ளும் அரசு பெண் ஊழியருக்கு 180 நாட்கள் பேறுகால விடுமுறை அறிவிப்பு. வாடகைத் தாய் மூலம் குழந்தை பெற்றுக் கொள்ளும் பெண், வாடகைத் தாய் இருவரும் அரசு ஊழியராக இருக்கும் பட்சத்தில் இருவருக்கும் 180 நாட்கள் விடுமுறை உண்டு. மேலும் வாடகைத் தாய் மூலம் குழந்தை பெற்றுக் கொள்ளும் பெண்ணின் கணவர் அரசு ஊழியராக இருந்தால், குழந்தை பிறந்த ஆறு மாதத்திற்குள் 15 நாட்கள் வரை அவர் விடுப்பு எடுத்துக் கொள்ளவும் அனுமதி அளிக்கப்படுகிறது. இரண்டு குழந்தைகளுக்கு குறைவாக இருப்பவர்களுக்குதான் இந்த சலுகை.  

- மும்பை ஐ.ஐ.டி., மாணவர்கள் கடந்த 31ம் தேதி நடந்த கலை விழாவின்போது, ஹிந்துக்களின் இதிகாசமான ராமாயணத்தை தழுவி, 'ராஹோவன்' என்ற பெயரில் நாடகம் நடத்தப்பட்டது. இந்த நாடகத்தின் வாயிலாக ராமாயணத்தை அவர்கள் கேலி செய்ததாக கூறப்படுகிறது. பெண்ணியத்தை ஊக்குவிக்கும் வகையில் உருவாக்கப்பட்ட சர்ச்சைக்குரிய நாடகக் காட்சிகள் சமூக வலைதளங்களில் பரவியதை அடுத்து, ஐ.ஐ.டி.,யில் பயிலும் ஒரு பிரிவு மாணவர்கள், நாடகத்தை நடத்திய மாணவர்கள் மீது நிர்வாகத்திடம் புகார் அளித்ததை அடுத்து இது தொடர்பான தீவிர விசாரணைக்குப் பின்,ராமாயணத்தை கேலி செய்து நாடகம் நடத்திய மும்பை ஐ.ஐ.டி., மாணவர்கள் நான்கு பேருக்கு, தலா 1.2 லட்சம் ரூபாய் அபராதம் விதிக்கப்பட்டு உள்ளது.  இது, ஒரு செமஸ்டருக்கு மாணவர்கள் கட்ட வேண்டிய கல்விக் கட்டணத்துக்கு சமமாகும். மேலும் நான்கு மாணவர்களுக்கு தலா 40,000 ரூபாய் அபராதம் விதிக்கப்பட்டது. ஜூனியர் மாணவர்களுக்கான விடுதி வசதியும் ரத்து செய்யப்பட்டது. அடுத்த மாதம் 20ம் தேதிக்குள் அபராதம் கட்ட வேண்டும்; இல்லையென்றால் கூடுதல் தண்டனைகள் வழங்கப்படும் என, ஐ.ஐ.டி., நிர்வாகம் சார்பில் அறிவிக்கப்பட்டுள்ளது.   

- பெஷாவர்: பாகிஸ்தானில் முஸ்லிம்களின் புனித நுாலான குரானை அவமதித்த சுற்றுலா பயணி கைதான நிலையில், போலீஸ் நிலையத்திற்குள் புகுந்த ஒரு கும்பல் அவரை சுட்டுக் கொன்றதுடன், பொதுவெளியில் அவரை துாக்கிலிட்ட சம்பவம் அரங்கேறி உள்ளது.

- திருவள்ளூர்:மின்கம்பியில் சிக்கிய பசுவை காப்பாற்ற சென்ற வளர்ப்பு நாயும் பலியான சம்பவம் நெகிழ்ச்சியை ஏற்படுத்தியது. இக்கிராமத்தை சேர்ந்த விவசாயி ஆனந்தன், ஐந்து பசுக்களை வளர்த்து வருகிறார். நாட்டு நாய் ஒன்றும் இவரது வீட்டில் வளர்ந்து வந்தது.  மாடுகளுடன் நட்புடன் நாய் பழகி வந்தது. மாடுகள் தினசரி மேய்ச்சலுக்காக வயல்வெளிக்கு செல்லும் போது நாயும் அவற்றுடன் சென்று திரும்பும்.  நேற்று முன்தினம் இந்த மின்தட பாதையில் இருந்த மின்கம்பி ஒன்று திடீரென அறுந்து பசு ஒன்றின்மேல் விழுந்தது.  மின் தாக்குதலுக்கு உள்ளான பசு, அலறி துடித்தது. அருகில் இருந்த வளர்ப்பு நாய் அதை கண்டு அதிர்ச்சி அடைந்தது. நட்புடன் பழகி வந்த பசு துடிப்பதை கண்டு, உதவிக்கு ஓடியது.  பசுவின் மீது விழுந்து கிடந்த மின்கம்பி தான் பசுவின் வேதனைக்கு காரணம் என உணர்ந்தது போல், அதை வாயால் கவ்வி இழுக்க முயற்சித்தது. ஆனால், மின்தாக்குதலுக்கு உள்ளான நாயும், பசுவும் சம்பவ இடத்திலேயே பலியாகின.

- லக்னோ : பெண் போலீசுடன் திருமணத்தை மீறிய உறவு வைத்திருந்த போலீஸ் டி.எஸ்.பி., ஒருவர், கான்ஸ்டபிளாக பதவி இறக்கப்பட்ட சம்பவம் உத்தர பிரதேசத்தில் நடந்துள்ளது. மொபைல் போன் டவரை வைத்து, அவர் இருப்பிடத்தை அறிந்த போலீசார், ஹோட்டலுக்கு சென்று கிருபா மற்றும் அவருடன் இருந்த பெண் கான்ஸ்டபிளை கையும் களவுமாக பிடித்தனர்.

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

2020 கொரோனா பயமுறுத்தல் வந்த சமயம் எழுதியது...

வேண்டுதல்கள் தேவையில்லை எங்கள்

தேவைகள் யாவும் அறிந்தவன் நீ

மாண்டுபோகா வரம் கேட்கவில்லை மனிதன் 

அது

மாண்புடனே நிகழ மனம் தளர்ந்து மன்றாடி நிற்கின்றான்

அன்பு காட்டுவாய் அரனே எமக்கு விதித்த விதிகளைக் கொஞ்சம் தளர்த்துவாய்.

இரக்கம் காட்டுவாய் இறையே எம்மை

இறுக்கும் கயிறை இதமாய் நீக்குவாய்

எமக்கு வேண்டுவது அனைத்தும் நீ அறிவாய் என்றால் 

நான் வேண்டுவதும் எதுவென அறிந்தே இருப்பாய் ஆண்டவனே 

தேர்வெழுதி பாடம் கற்பதா 

பாடம் கற்று தேர்வெழுதுவதா..

 

எது சரியென்று தெரியவில்லை தற்சமயம் 

சோர்வுகொண்ட எம் மனங்களுக்கு

முன்ஜென்மச் சாபங்களை முற்றாக நீக்கி 

புதிய கணக்கு தொடங்கேன்

பார்க்கலாம் 

இனியாவது மனிதன் 

பாவக்கணக்கைக் குறைக்கிறானா என்று...

***************************************************************************************************************

இணையத்தில் 'வினோத இந்தியா' என்று ஒரு பக்கம்.  அதில் கண்ட படம்.  இந்தத் தெருவில் யார் வீட்டிலாவது மின்பிரச்னை என்றால் தொலைந்தான் அந்த எலெக்ட்ரிஷியன் என்று தோன்றும்.  ஆனால் அவர்கள் என்னவோ திறமை வாய்ந்தவர்களாகத்தான் இருப்பார்கள்.  அவர்கள் அதாவது அந்த இணையப்பக்கம் எடுத்துக் காட்டி இருக்கும் இந்தப் படம் மும்பை ஏரியாவாக இருக்கலாம் என்று தோன்றுகிறது!

################################################################################################################

"வீரப்பன் - வாழ்ந்ததும், வீழ்ந்ததும் புத்தகத்தின் முதல் பாகத்திலிருந்து...

மாதேஸ்வரன் மலையில் குடியிருக்கும் இறைவனின் பெயரும் மாதேஸ்வரன்.  இவர் சிவனின் அவதாரம்.  மாதேஸ்வரனின் பெற்றோர் லிங்காயத்து என்ற சமூகத்தை சேர்ந்தவர்கள். மாதேஸ்வரனின் உறவினர்கள் தமிழகம் கர்நாடக மாநில எல்லைகளில் உள்ள காடுகளில் வாழ்பவர்கள் என்று புராணங்களில் சொல்லப்படுகிறது. இம்மக்கள் காடுகளில் வாழ்ந்தாலும் அசைவம் உண்ண மாட்டார்கள்.  எந்த காரணம் கொண்டும் பச்சை மரங்களை வெட்டவும் மாட்டார்கள்.  காடுகளும் காட்டு விலங்குகளும் குறைவில்லாமல் வாழ வேண்டும். அப்போதுதான் நாடும் நாட்டு மக்களுக்கும் நல்ல மழை கிடைக்கும்.  இது லிங்காயத்து வழிபாட்டை தோற்றுவித்த பசவன்னாவின் கோட்பாடு அதன்படி லிங்காயத்து மக்கள் எல்லோருமே காய்ந்து போன சந்தன மரங்களை மட்டுமே வெட்டி எடுத்து வருவர்...

////////////////////////////////////////////////////////////////////////////////////////////////////////////////////////////////////////////////////////////////////////////////////////

சென்ற வார இடது கால் கயிறு பற்றி ஒரு விளக்கம்.  KGG யதேச்சையாக கிடைத்தது என்று முகநூலிலிருந்து எடுத்து கொடுத்தார்.

கடைசி பாரா...

ஆண், பெண் இருவருமே அணியலாம்.  ஆண்கள் வலது காலிலும் (இங்கே நான் சந்தித்தவர் இடது காலில் அணிந்திருந்தார்) பெண்கள் இடது காலிலும் அணிய வேண்டும்.  முக்கியமாக இளம் பெண்கள் அணிவது மிகச்சிறப்பு.

$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$ 

ஜாதகத்தையே மாற்றும் நடராஜர் கோவில்...  இணையத்திலிருந்து...

சிதம்பரத்தில் உள்ள நடராஜர் கோவில் அதன் உருவாக்கத்திற்காக உலக பிரசித்தி பெற்றது,

ஆனால் தமிழ்நாட்டிலேயே இன்னொரு நடராஜர் கோவில் நம்ப முடியாத அதிசயத்தை, தன்னகத்தே கொண்டுள்ளது என்பது பலருக்கும் தெரியாத ஒன்று.

நடராஜரின் உருவமே பிரபஞ்ச தத்துவத்தை விளக்குவதாகும்,

பல இடங்களில் இந்த நடராஜர் சிலை ஐம்பொன்னால் கல்லாலும் செய்யப்பட்டிருக்கும்

அனால் இங்குள்ள நடராஜர் சிலை செயற்கையாக செய்யப்பட்டதல்ல

பல கோடி சூரிய சக்திகள் கொண்ட அபூர்வ நடராஜர் சிலை கொண்டிருக்கும் கோவில்

திருச்சி மாவட்டத்தில் உள்ளது.

இந்த நடராஜர் சிலை ஆசிய கண்டத்திலேயே இந்தியாவில் தமிழ் நாட்டில் தான் உள்ளது.

இந்த சிலை உளி கொண்டு செதுக்கப்பட்டதல்ல சித்தர்களின் நவலிங்க பூஜையால் சித்தர்கள் வழிபாட்டிற்கு பின் தானாகவே உருவாகிய அற்புதமான சிலை ஆகும்.

இந்த சிலை உருவான பாறை பஞ்சநத பாறை என்று கூறுகிறார்கள்.

இது மிகவும் அபூர்வமான பாறையாகும் 10 லட்சம் பாறை பூமியில் உருவானால் அதில் ஒன்று தான் பஞ்சநாத பாறையாக இருக்கும்.

இந்த கோவிலில் ஒரு முறை பிரதோஷ வழிபாடு செய்தால் ஒரு கோடி புண்ணியம் கிடைக்கும் என்று அகத்தியர் பெருமானார் கூறுகிறார்.

வளர்பிறையில் இங்கு உள்ள தட்சிணாமூர்த்தியை பஞ்சாட்சர மந்திரம் சொல்லி ஜபம் செய்யும்போது பல வகையான தோஷங்கள் நிவர்த்தி ஆகின்றன.

இந்த கோவிலில் பல நோய்களை குணப்படுத்தக்கூடிய பிரம்ம தீர்த்தம் உள்ளது.

இந்த அபூர்வ நடராஜருக்கு சாத்தப்படும் வெட்டி வேரை நீரில் ஊறவைத்து பருகி வர சிறுநீரக கோளாறுகள் அடியோடு குணமாகிறது.

இங்குள்ள கொடி மரம் அருகில் மேல் விதானத்தில் 27 நட்சத்திரம் 15 திதிகள் 12 ராசிகள் 9 கிரஹங்கள் வடிவமைக்கப்பட்டுள்ளது.

இதன் கீழ் நின்று நாம் வழிபடும்போது ஜாதகமே மீண்டும் ஒரு முறை புதிய ஜாதகமாக ஸ்ரிஸ் ஷ்டிக்கப்படுகிறது என்பது காலகாலமாக உள்ள நம்பிக்கை.

இந்த கோவில் திருச்சி மாவட்டம் திருச்சி சென்னை வழியில் உள்ள பாடலூரில் இருந்து 5 கிலோமீட்டர் தூரத்தில் உள்ள ஊட்டத்தூரில் உள்ளது.

ஓம் சிவாய நமஹ

- World Of Divine -

-------------------------------------------------------------------------------------------------------------------------------------------------------------------------

இ இ இ 

இணையத்தில் படித்த இன்னொரு இன்டரஸ்டிங் நியூஸ்..... 

]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]]