வெள்ளையன் என்று ஒரு நரி!

 

நெல்லைத்தமிழன்:

பாடலை ரசிக்க இசை முக்கியமா, பாடல் வரிகள் முக்கியமா இல்லை பாடுபவர் முக்கியமா?  

# பாடல் என்று வந்தால், எல்லாமே முக்கியம்தான்.  என்றாலும் கூட, வாத்திய இசையையும் ரசிக்கிறோம் என்பதால், சொல் பொருள் இவற்றுக்கு இரண்டாம் இடம் என்று சொல்லலாம்.  அப்போது கூட, " அந்த சொல் பொருள் இரண்டும் நினைவுக்கு வருவதால்தான் முழு ரசனை " என்றும் சொல்லலாம் இல்லையா ? இசை, வரிகள், பொருள் இவற்றின் கலவை மட்டும் இல்லாமல் பாடுபவர் உணர்வும் , கேட்பவர் மன நிலையும் சரியான விகிதத்தில் அமைந்தால் தான் பூரண ரசனை.

& இசை அமைத்தவர்,  வரிகள்எழுதியவர், பாடுபவர் எல்லோரையும் விட கேட்பவர்தான் முக்கியம். கேட்பவர் ஔரங்க சீப் என்றால் இசை, பாடல், பாடுபவர் எல்லோருக்கும் கசையடிதான்! 

இந்தவருடம் மாம்பழ விளைச்சல் குறைவாமே! ஏற்கனவே பலாப்பழம் விலை ஏறி வரத்து குறைந்துள்ளதே கவலையாயிருக்கு.

# விளைச்சல் குறைந்தால் என்ன , விலை ஏறினால் என்ன, அந்தந்த சீசனுக்கு மா, பலா என்று ரசிக்கத்தான் செய்கிறோம்.

& மாம்பழம், பலாப்பழம் பற்றி எல்லாம் சரியான நிலை ஜூன் 4 க்குப் பிறகுதான் தெரியும்! (அன்புமணி & ஓ பி எஸ் !) 

பங்கனப்பள்ளி மாங்காய் மாம்பழத்தைவிட எனக்குப் பிடிக்கும். பங்கனப்பள்ளி மாங்காய்கள் விற்பதைப் பார்த்திருக்கிறீர்களா?  மாம்பழமே டிமான்டில் இருக்கும்போது ஏன் கல் வைத்துப் பழுக்க வைத்து ரிஸ்க் எடுக்கிறார்கள்?

# எனக்கு பங்கனபள்ளி காய் பற்றித் தெரியாது. கல் வைத்துப் பழுக்க வைப்பது பற்றி முன்பே பேசி இருக்கிறோம்.  வேகமாக சந்தைக்கு அனுப்ப வேண்டும், கொஞ்சம் முதிராத காயாக இருந்தாலும் பழம் போல ஆக்கி விற்கலாம் என்பதே தூண்டுதல் . சீசனில் முன் வரிசையில் இடம் பிடிக்கும் வேகம். 

& மாம்பழங்களில் மட்டுமே என்ன வெரைட்டி என்று பார்ப்பேன். மாங்காய் என்றால் பார்ப்பது இல்லை. 

நீங்கள் தியேட்டருக்குச் சென்று கடைசியாகப் பார்த்த திரைப்படம் எது?

# பொன்னியின் செல்வன் பாகம் 1.

& எவ்வளவோ வருடங்கள் ஆகிவிட்டன! பத்து வருடங்களுக்கு முன்பு பையன் & பேரனுடன் பெங்களூர் மல்டிப்ளெக்ஸ் தியேட்டர் ஒன்றில் ஏதோ ஒரு 3 D குழந்தைகள் படம் பார்த்தேன் என்று நினைக்கிறேன். படம் பெயர் மறந்துபோய்விட்டது. 

யூடியூப் பார்த்து சமையல் கத்துக்கொள்ளலாம் என்று இளம் தலைமுறை நினைத்தால், பாரம்பர்ய வீட்டுச் சமையல் முறை அடுத்த தலைமுறைகளுக்குத் தொடராமல் போய்விடும் அபாயம் இருக்கிறதே. இந்த யூடியுப் சமையல் முறைகளால் நன்மையா தீமையா?

# யூடியூபிலும் அம்மா பாட்டி சொல்லிக் கொடுத்த பாரம்பரிய சமையலைத்தானே சொல்லுகிறார்கள் ? ஆங்காங்கு சில புதுமைகள் செய்யலாம் என்பதைத் தவிர அடிப்படையில் நமது பாரம்பரிய  சாம்பார், வற்றல் குழம்பு , பிரியாணி, தோசை, ஊத்தப்பம் இது எதுவும் மாறப் போவதில்லை அல்லவா ?

= = = = = = = = =

KGG பக்கம் :

கிராமத்து அனுபவங்கள்: 

மாலை நேரம் முழுவதும் எங்கள் கிராமத்தின் ஆறு - 'பாண்டவ ஆறு' என்று பெயர் - கோடை காலத்தில் வற்றிப் போய் ஆங்காங்கே ஊற்றுகளோடு இருக்கும் அந்த ஆற்று மணல் பகுதியில் கிராமத்துப் பையன்கள் + எங்களைப் போன்று விடுமுறை காலத்தைக் கழிக்க வரும் பையன்கள் எல்லோரும்  விளையாடுவார்கள். 

ஆற்றுக்குப் பெயர் பாண்டவ ஆறு என்று சொன்னேன். அந்த ஊரின் பண்ணையார் - என்னுடைய தாத்தா சுப்ரமணிய அய்யருக்கு, பாண்டவர்களைப்போல ஐந்து பையன்கள் + இரண்டு பெண்கள். ஐந்து பையன்களில் இரண்டாவதாகப் பிறந்தவர் என் அப்பா (பெண்கள் - அதாவது என்னுடைய அத்தைகள் இருவருமே பையன்கள் எல்லோருக்கும் மூத்தவர்கள்) தாத்தாவின் மூத்த முதல் பெண்ணின் இரண்டாவது பையனின் மூன்றாவது குழந்தை யார் என்றால் என்னுடைய மனைவி ( தலையை சுற்றுகிறது அல்லவா! ) ஆனால் என்னுடைய மனைவியாகப் போகின்ற அந்தப் பெண்ணை நான் எங்கள் கிராமத்தில் பார்த்ததே இல்லை. ஏன் என்றால் - நான் லீவுக்கு நாகையிலிருந்து கிராமத்திற்குச் செல்லும்போதெல்லாம் அவள் அந்த கிராமத்திலிருந்து  லீவுக்கு மதுரை சென்றுவிடுவாள். இன்னும் பார்க்கப் போனால் - அவர்கள் வீட்டில் ஒரே ஒரு பையனை மட்டுமே (மனைவியின் இரண்டாவது அண்ணன்) அந்த நாட்களில் எனக்குத் தெரியும். 

ஆற்று மணலில் விளையாடி முடித்தபின் எல்லோரும் வட்ட வடிவமாக உட்கார்ந்து அந்திப் பொழுது வரை அரட்டைக் கச்சேரி செய்வோம். இருட்டத் தொடங்கியவுடன் எனக்கு பயம் வந்துவிடும். ஆற்றுக்குப் பக்கத்தில் உள்ள அடர்ந்த மரங்களுக்கு அப்பாலிருந்து சில சமயங்கள் நரிகள் ஊளையிடும் சத்தம் கேட்கும். 

ஒரு பையன் சொன்னான் - நரி நமக்கு எதிரே வந்தால் என்ன செய்யும் என்றால் - மணலில் சிறுநீர் கழித்து, அந்த ஈர மணலை தன் முன்னங்கால் கொண்டு எடுத்து, நம்முடைய கண்களைப் பார்த்து வீசுமாம். நம்முடைய கண்ணில் அந்த மணல் பட்டு நம் கண்களை மூடினால் - நரி வந்து நம்மைக் கடித்துவிட்டு ஓடிவிடுமாம். 

இந்தக் கதையைக் கேட்டதும் நான் பயந்துகொண்டே ஓரக் கண்களால் சுற்றுமுற்றும் பார்த்தவண்ணம் இருப்பேன். நரி வருவதைப் பார்த்தால் கண் மண் தெரியாமல்(!) - எழுந்து ஓடத்  தயாராக இருப்பேன். 

என்னுடைய உறவுப் பையன் ஒருவன் ( ஹி ஹி பின் நாட்களில் தெரிந்தது - அவன் என்னுடைய மனைவியின் இரண்டாவது அண்ணன்!) என்னை பயமுறுத்த  இன்னும் ஒரு கதை விடுவான் - அவனுக்கு நரி ஒன்றை நன்றாகத் தெரியுமாம் - அதன் பெயர் வெள்ளையன் என்றும், தான் அழைத்தால் அது எங்கே இருந்தாலும் ஓடி வந்துவிடும் என்றும் சொன்னான். சொன்னவன் சும்மா இல்லாமல் " வெள்ளையா - வெள்ளையா - வெள்ளையா .. " என்று உரத்த குரலில் கத்தினான்! 

எனக்கு பயங்கர(!) பயம்  வந்து அண்ணனை இறுகப் பற்றிக்கொண்டு கண்களை இறுக மூடிக்கொண்டேன்! நல்லவேளை - அந்த நரி வெள்ளையன் காதில் அதன் நண்பன் நாகசுந்தரம் அழைத்தது விழவில்லை என்று நினைக்கிறேன்! 

கல்யாணத்துக்கு அப்புறம் ஒருநாள் நாகசுந்தரத்திடம் 'வெள்ளையன் நரி' பற்றிக் கேட்டதற்கு, சிரித்துக்கொண்டே - தனக்கு அதுபற்றி ஒன்றும் ஞாபகம் இல்லை - என்று சொல்லிவிட்டார்!  

= = = = = = = =