ஆர்வக் கோளாறால் வந்த அவஸ்தை

 மகன் திருமணம் முடிந்து குலதெய்வம் கோவிலுக்கு சென்றோம். 

நல்லவேளையாக குலதெய்வம் கோவில் இருக்குமிடம் அருகிலேயேதான் திருமணம் நடந்திருந்தது.

முன்னதாகவே சொல்லி வைத்தால்தான் நம் நேரத்துக்கு அர்ச்சகர் வருவார்.  இல்லாவிட்டால் அவர் இஷ்டப்பட்ட நேரத்துக்கு வந்து நித்ய பூஜை செய்து செல்வார்.எனக்கு மொட்டை போட்டபோது முதல் என் மகன்களுக்கு மொட்டை போட்டது வரை அங்கிருந்த அர்ச்சகர் இப்போது இல்லை.  தற்சமயம் வேறொருவர் பொறுப்பு வகிக்கிறார்.  அதிலும் மிகச் சமீபத்தில் அவரையும் நீக்கி விட்டு வேறொருவரை நியமித்திருப்பதாய்ச் சொன்னார்கள்.  பார்த்ததில்லை.

முதல் நாள் திருமணத்துக்கு வந்திருந்த எங்கள் பழைய அர்ச்சகர் ராமகிருஷ்ணன், மறுநாள் காலை ஏழரை மணிக்கு வரச் சொல்லி இருந்தார்.  அவரே வருவதாகவும், பூஜைப்பொருட்கள் எல்லாம் தானே வாங்கி வந்து விடுவதாய்ச் சொல்லி இருந்தார்.  ஆர்வக்கோளாறு.

அருகிலேயே இருக்கும் சேங்காலிபுரம், குடவாசல் உள்ளிட்ட ஊர்களில் இருக்கும் பழைய நண்பர்கள், புதிய ஃபேஸ்புக் நண்பர்கள் வாயிலாகவும் தொடர்பு கொள்வோம்.  சேங்காலிபுரத்தில் இருந்த எங்கள் உறவினர் மாற்றிக் கொண்டு அவிநாசி சென்று விட்டார்.  அது எங்களுக்கு கொஞ்சம் வசதிக் குறைவு.  திருமணத்துக்கு வந்திருந்த பேஸ்புக் நண்பர்களில் ஒருவரும் நாங்கள் மறுநாள் கோவிலுக்கு வரப்போவதை அறிந்திருந்தார்.  உதவி செய்வதாய் நினைத்துக் கொண்டு அவர் அவருக்குத் தெரிந்த சிவாச்சாரியார் ஒருவரை சொல்லி வைத்து விட்டார்.  ஆர்வக்கோளாறு!

காலை கோவிலை நாங்கள் அடைந்தபோது நாங்கள் பார்த்தது ஒரு புதுமுகம்.  கோவிலைத் திறந்து பூஜை ஏற்பாடுகள் செய்து கொண்டிருக்க, ஊதுபத்தி, மாலை, பூ, பழம், வெற்றிலை என்று எதுவுமே வாங்காமல் சென்றிருந்தோம்.  பாஸ் வரும் வழியிலேயே நாம் கொஞ்சமாவது வாங்கிக்கொண்டு போவோம் என்று சொன்னதையும் அலட்சியப்படுத்தி இருந்தோம். 

 'அதான் ராமகிருஷ்ணன் தானே கொண்டு வருவதாக சொல்லியிருக்காரே....'

இப்போ ராமக்ருஷ்ணனே இல்லையே...  என்ன செய்யலாம்?

புதியவரிடம் பேசும்போது தன் பெயர் ரமேஷ் என்று அறிமுகப்படுத்திக் கொண்டவர், 'நாராயணன் சொல்லி' வந்ததாக குறிப்பிட்டார்.  நாராயணன்!  ஃபேஸ்புக் ப்ரெண்ட்!

வயதில் இளையவரான தெரிந்த அவரிடம் அண்ணன் விவரம் கேட்டு அனத்திக் கொண்டிருந்தார்.  இறுக்கமாகவே காணப்பட்ட அவர் அண்ணன் கேள்விகளால் சட்டென 'இர்க்' ஆனார்!

"இதோ பாருங்கோ...  நான் சின்னப் பையன் இல்லே..  எனக்கு 41 வயசாறது..  ஆயிரம் கும்பாபிஷேகம் பண்ணி இருக்கேன்..மரியாதை கொடுத்து பேசறது நல்லது"

எல்லோருக்குமே சட்டென ஒரு மாதிரி ஆனாலும் அடுத்த வேலையைத் தொடரவேண்டுமே..

பூஜைப்பொருட்கள் ஒன்றுமே இல்லை என்றதும் என் இளையவனை குடவாசலுக்கு அனுப்ப முடிவு செய்து பேசியபோது, ரமேஷ் தானும் சென்று வேண்டியதை வாங்கி வருவதாகக் குறிப்பிட்டார்.  அவர் வண்டியில்தான் இளையவனை அனுப்பப் பேசிக் கொண்டிருந்தோம், லிஸ்ட் போட்டுக் கொண்டிருந்தோம்.  லிஸ்ட்டுக்கும் அவசியமில்லை.  இவரே செல்கிறார் என்று பணம் கொடுத்து அனுப்பி வைத்தோம் -  ஆர்வக்கோளாறு!

ராமகிருஷ்ணன் பற்றி அவரிடம் ஒன்று பேசவில்லை.  நினைவில்லையா, தயக்கமா...  சொல்லத் தெரியவில்லை.  அவர் அப்படி சடபடவென பேசியபின் சொல்லத் தோன்றவில்லை.

இவர்கள் அந்தப் பக்கம் போனதும் இந்தப் பக்கம் ராமகிருஷ்ணன் பூஜை சாமான்களுடன் டிவிஎஸ் 50 ல் வந்து இறங்கினார்.  அப்போது கூட தேள் கொட்டவில்லை.  இவர் ஸ்வாமியிடம் சென்று வேலை ஆரம்பித்த சிறிது நேரத்தில் ரமேஷும் என் இளையவனும் வந்து இறங்கிய போதுதான் தேள் கொட்டியது!  

பேந்த விழித்து, அசடு வழிந்து..  

வண்டியிலிருந்து இறங்கும்போதே நிலைமையை ரமேஷின் கண்கள் அளவெடுத்ததை பார்த்தேன்.

மௌனமாக ரமேஷும் உள்ளே சென்று வேலைகளில் கலந்து கொண்டார்.

ஆனால் மெல்ல மெல்ல பட்டாசு வெடிக்கத் தொடங்கியது..  ராமகிருஷ்ணன் வரும்போது தன்னை அழைத்தது ஏன்?  இது தனக்கொரு இன்சல்ட்..  நான் ராமகிருஷ்ணனை விட அனுபவம் மிக்கவன் வேறு...   இப்படி எல்லாம் பேசிக் கொண்டே இருந்தார்.  அண்ணன் குறுக்கிட்டு கொடுக்க முயன்ற விளக்கங்கள் வீணாயின.  அண்ணனை சும்மா இருக்கும்படி நான் சொன்னதையும் அவரும் கேட்கவில்லை.  பேச்சு வளர்ந்து கொண்டே போனது.  எனக்கு ரமேஷ் பக்கமும் நியாயம் இருப்பதாகத்தான் பட்டது.  எல்லாம் முடிந்து ஓரமாக அமர்ந்ததும் இருவருக்கும் சம அளவு தட்சிணை கொடுத்தாலும் ரமேஷின் ஆதங்கம் அடங்கவே இல்லை.  

"இனியொரு தரம் இப்படி எல்லாம் பண்ணாதீங்கோ" என்று நூறாவது முறையாக சொல்லிக் கொண்டிருந்தார்.

இப்படியாக லேசான மனத்தாங்கலுடன் (எங்களுக்கல்ல!  எங்களுக்கு தர்மசங்கடம்!) நிறைவேற்றி முடிக்கப்பட்டது குலதெய்வ தரிசனம்.

=========================================================================================\

நியூஸ் ரூம் 

பானுமதி வெங்கடேஸ்வரன் 

- விபத்தில் மூளைச்சாவு அடைந்த இளைஞரின் உடல் உறுப்பு தானத்தில் ஏழு பேருக்கு மறுவாழ்வு.

- ஏப்ரல் மாதத்தில் சைவ உணவின் தயாரிப்பு செலவு சென்ற ஆண்டோடு ஒப்பிடுகையில் 8% அதிகரித்துள்ளது. அசைவ உணவு தயாரிப்பு செலவு 4% குறைந்துள்ளது. Crisil (கிரிஸில்) அறிக்கை.

- ஜப்பானை பின்னுக்குத் தள்ளி உலகின் நாலாவது பெரிய சூரிய சக்தி உற்பத்தியாளரான இந்தியா.

- ஆந்திர மாநிலம், கிழக்கு கோதாவரி மாவட்டத்தில் உள்ள நல்லஜார்லா என்னும் இடத்தருகே லாரி மீது மினி வேன் மோதி விபத்துக்குள்ளானது. அப்போது மினிவேனிலிருந்து ரூபாய் நோட்டுகள் சிதறின. அதைக்கண்டு அதிர்ச்சி அடைந்த மக்கள் அந்த பகுதியில் இருந்த ரோந்து போலீசிடம் தகவல் தெரிவிக்க, அந்த இடத்திற்கு விரைந்து வந்த போலீசார் சோதனையிட்டதில் மூன்று மூட்டைகளில் கட்டு கட்டாக தகுந்த ஆவணங்கள் இல்லாமல் ஏழு கோடி ரூபாய் ஹைதராபாத்திலிருந்து எடுத்துச் செல்லப்படுவது தெரிந்தது.

- மும்பை காட்கோபர் பகுதியில் வைக்கப் பட்டிருந்த 100 அடி ராட்சத விளம்பர பதாகை திங்கள் கிழமையன்று(13.5.24) வீசிய புழுதிப் புயலால் சரிந்ததில் இதுவரை 14 பேர்கள் உயிரிழந்துள்ளனர், 70க்கும் முற்பட்டவர் படுகாயம்.

================================================================================================

முகநூலில் படித்தது...   இங்கே எடுத்துப் பகிர்வது!

அஷ்டபந்தனகலவை

தெய்வங்களை பீடத்தில் அசையாமல் நிறுத்தும் `அஷ்ட பந்தன கலவைமருந்தி'ல் என்னென்ன சேர்ப்பார்கள்?...

அஷ்டபந்தன கலவை தயாரிப்பதற்குக் கொம்பரக்கு, சுக்கான் தூள், குங்கிலியம், கற்காவி, செம்பஞ்சு, சாதிலிங்கம், தேன்மெழுகு, எருமை வெண்ணெய் ஆகிய எட்டு பொருள்கள் தேவை.

கோயில் எழுப்புவதற்கான இடத்தைத் தேர்வு செய்வதிலிருந்து ஆலயம் எப்படி அமைய வேண்டும் என்பது வரை பல ஆகம விதிமுறைகள் இருக்கின்றன. கோயிலைக் கட்டி முடித்த பிறகு, தெய்வ மூர்த்தங்களைப் பிரதிஷ்டை செய்வார்கள். ஒரு பீடத்தின்மீது தெய்வ மூர்த்தத்தை வைத்து, பீடத்திலிருந்து அகலாமல் இருப்பதற்காக, `அஷ்ட பந்தன மருந்து' சாத்துவார்கள். இந்த அஷ்ட பந்தன மருந்து, தெய்வ மூர்த்தத்தைப் பீடத்துடன் அழுந்தப் பிடித்துக்கொள்ளும். 12 ஆண்டுகளுக்கு ஒருமுறை தெய்வ மூர்த்தங்களுக்கு அஷ்டபந்தனம் சாத்த வேண்டும் என்பது ஆகம நியதி.

`அஷ்டபந்தனம் என்றால் என்ன?’’

''கோயில்களில் அஷ்டபந்தன மருந்தை 12 வருடங்களுக்கு மாற்ற வேண்டும் என்பது ஆகம நியதி. அதன்படி அனைத்து ஆலயங்களிலும் 12 வருடங்களுக்கு ஒருமுறை கண்டிப்பாக அஷ்டபந்தன மகா கும்பாபிஷேகம் செய்ய வேண்டும்.

உலக உயிர்களெல்லாம் நலமாக இருக்க வேண்டுமென்றால், மூல தெய்வ மூர்த்தம், தனது ஆதார பீடத்தில் ஆடாமல் அசையாமல் இருக்க வேண்டும். அப்படி இருந்தால்தான் உலகத்துக்கும் உலகில் வாழும் மக்களுக்கும் சிறப்பு. மூலவ மூர்த்தி தொடங்கி, எல்லா தெய்வங்களின் திருமேனிகளும் பீடத்திலிருந்து அசையாமல் இருக்க வேண்டும் என்பதற்காக இந்த அஷ்டபந்தன மூலிகை மருந்தைச் சாத்துகிறார்கள்.

அஷ்டபந்தனம் தயாரிப்பதற்காகவே ப்ரியமாக தமிழில் ஒரு வெண்பா பாடப்பட்டுள்ளது.

'கொம்பரக்குச் சுக்கான்தூள் குங்கிலியம் கற்காவி

செம்பஞ்சு சாதிலிங்கம் தேன்மெழுகு - தம்பழுது

நீக்கி எருமைவெண் ணெய்கட்டி நன்கிடித்து

ஆக்கல் அட்டபந்தனம் ஆம்'

இந்த மூலிகை மருந்து பல நாள்களானாலும் கெடாத வகையில் தயாரிக்கப்படும். அஷ்டபந்தன கலவை தயாரிப்பதற்குக் கொம்பரக்கு, சுக்கான் தூள், குங்கிலியம், கற்காவி, செம்பஞ்சு, சாதிலிங்கம், தேன்மெழுகு, எருமை வெண்ணெய் ஆகிய எட்டு பொருள்கள் தேவை.

இந்த எட்டுப் பொருள்களைச் சேர்த்து, உரலில் இட்டு இடிக்க வேண்டும். கொம்பரக்கு தொடங்கி ஒவ்வொரு பொருளாக உரலில் இட்டு இடிக்க வேண்டும். இடிக்கும்போது எருமை வெண்ணெயை சிறிது சிறிதாகச் சேர்த்து இடிக்க வேண்டும். அஷ்டபந்தன மருந்து கெட்டியாக கல்லு போலவும் இருக்கக் கூடாது. குழைவாகவும் இருக்கக் கூடாது. இரண்டுக்கும் இடைப்பட்ட ஒரு பதமான நிலையில் இருக்க வேண்டும். இப்படி இருந்தால்தான் ஆதாரப்பீடத்தில் இருக்கும் இறைவனின் திருமேனியை நிலைநிறுத்த வசதியாக இருக்கும்.

இந்த மூலிகை மருந்துகளைக் கலந்து இடிப்பதற்கான பாத்திரங்கள், உரல், உலக்கை ஆகியவை மிகவும் தூய்மையாக இருக்க வேண்டும். இந்தப் பொருள்களை எந்தெந்த அளவு சேர்க்க வேண்டும், எவ்வளவு நேரம் இடிக்க வேண்டும் என்பதற்குக் கால அளவுகள் உண்டு. அஷ்டபந்தனம் தயாரிப்பவர்களின் வாக்கு, மனம், செயல் இவையாவும் இறைச் சிந்தனையிலேயே நிலைத்திருக்க வேண்டும் என்பது மிகவும் முக்கியம்.

இந்த மருந்தை 100 ஆண்டுகள் வரை கெடாதவாறு தயாரிக்க முடியும். ஆனாலும், 12 ஆண்டுகளுக்கு ஒருமுறை புதிதாகத் தயாரித்து, தெய்வ மூர்த்தங்களுக்கும் பீடத்துக்கும் இடையில் சாத்தி, கும்பாபிஷேகம் செய்வதென்பது நடைமுறையில் இப்போது வழக்கமாகியுள்ளது.

தகவல்:திரு.அருணாசலம் ஆச்சாரி,அன்னூர்

#ப்யாரீப்ரியன்

========================================================================

மறுபடியும் இன்னும் கொஞ்சம் கி வா ஜ ...

பல்லாண்டுகளுக்கு முன் சென்னை வீனஸ் காலனியில் நடந்த வாரியாரின் புராணச் சொற்பொழிவின் இடையே ஒரு நாள் வாரியார் எழுதிய நூல் ஒன்றை வானதி பதிப்பகத்தினர் வெளியிட்டனர்.

பாராட்டுரை சொல்ல வந்த

கி. வா. ஜ, பதிப்பாளர் வாரியார் சுவாமிகளுக்குப் பொன்னாடையைப் போர்த்தியதும் சிலேடையாக, *'நூல் தந்த வாரியாருக்கு பதிப்பாளர் ஆடை தருகிறார்'* என்றார். அரங்கத்தில் கைதட்டல் எழுந்தது.

அடுத்து இறை வணக்கம் பாடிய சிறுமிக்கு கி. வா.ஜ. ஒரு பேனா பரிசளித்தார். இதைக் கண்ட வாரியார் உடனே தன் பங்குக்கு,

*"நாவால் பாடிய சிறுமியை கி.வா.ஜ. பே_னாவால் கௌரவிக்கிறார்"* என்றதும் மறுபடியும் கைதட்டல் வானைப் பிளந்தது.

____________

ஒரு கடை முதலாளியின் வீட்டில் விருந்து. கி.வா.ஜ-வும் அதில் கலந்துகொண்டார். அனைவரும் உணவு உண்ண அமர்ந்திருக்க, கடையில் வேலை செய்யும் ஒரு பையன் மட்டும் இல்லாதது கண்டு, கி.வா.ஜ. அது பற்றி விசாரித்தார்.

“அவன் கடையைப் பூட்டிவிட்டு வந்து அடுத்த பந்தியில் கலந்துகொள்வான்” என்றார் முதலாளி.

*ஓகோ! கடை சிப்-பந்திக்குக் கடைசிப் பந்தியா?!”* என்று கேட்டார் கி.வா.ஜ.

____________

ஒரு நண்பர் வீட்டுக்கு கி.வா.ஜ. போயிருந்தபோது, நண்பரின் மனைவி விளாம்பழத்தில் வெல்லம் போட்டுப் பிசைந்து, அன்போடு கொண்டு வந்து உபசரித்தார்.

அதை வாங்கி உண்ட கி.வா.ஜ. “மாதுளங்கனி அருமை!” என்று பாராட்டினார்.

“மாதுளங்கனியா! நான் தந்தது விளாம்பழம் அல்லவோ!” என்று அந்த அம்மையார் குழப்பத்துடன் கேட்க,

*“மாது உளம் கனிந்து கொடுத்த கனி என்று சொன்னேன்!”* என்றார் கி.வா.ஜ.

கிவாஜ சிலேடையில் உச்சமான ஒன்று!!

அவரை அதே போல மடக்கிய ஒரு பெண் உண்டு தெரியுமா? -

ஒரு பெண் அவரை தங்கள் கூட்டத்தில் பேச அழைத்தாள்.

கிவாஜ -

*இன்னிக்கு வேணாமே!*

*தொண்டை கம்மியிருக்கு...* என்றார்..

அந்தப் பெண் சொன்னாள் - *பரவால்லை, கம்மல் பிரகாசிக்கவே செய்யும்.

===========================================================================

ஏனோ எல்லோரும் 

கடவுளை 

வெளியேயே 

எதிர்பார்க்கிறார்கள் 

வானத்தில் தெரிவாரா 

வடிவாக இருப்பாரா 

முடிவேதும் சொல்வாரா 

உருவமாக வருவாரா 

அருவமாக நின்று 

குரல் மட்டும் தருவாரா 

முன்னே வந்து நிற்பாரா 

மெச்சினேன் உன் பக்தியை 

என்று 

உச்சி முகர்வாரா 

எந்த உருவில் வருவார் 

நொந்த என் மனதுக்கு 

ஆறுதல் தர 

பெறும் நிலையிலேயே 

இருக்கிறார்கள் - யாரும் 

தரும் நிலையில் இல்லை.

தங்களுக்கான கருணையை 

கடவுளிடம் 

எதிர்பார்த்து 

காத்திருக்கும் மனிதர்கள் 

காட்டுவதேயில்லை 

அதை 

சகமனிதர்களிடம் 

===========================================================================================

அரிய கணங்களில் எடுக்கப்பட்ட புகைப்படங்கள்...

ஹேர்ஸ்டைல் அல்ல... நீர்ஸ்டைல்!

அந்தரத்தில் இருக்கும் கணத்தில் புகைப்படம் எடுப்பது ஒரு திறமை. சமீபத்தில் என் மகன் தான் மணக்கப்போகும் என் (அப்போது வருங்கால) மருமகளுடன் 'ப்ரீவெடிங் ஷூட்' நடத்தியபோது, துணைக்குச் சென்ற என் இளையமகன் தனது செல்போனில் , இருவரும் அந்தரத்தில் இருந்த ஒரு கணத்தை அற்புதமாக படம் பிடித்தான். அது நினைவுக்கு வருகிறது!

===============================================================================================

ஓர் அரிய இலக்கிய பாலம் 

வி ஸ காண்டேகர் அவர்களின் எழுத்துகள் அதிகமாக பரவியது கா ஸ்ரீ ஸ்ரீ அவர்களின் மொழிபெயர்ப்பினால்தான் என்று காண்டேகரே சொல்லி இருக்கிறார்.  ஒரு நேரத்தில் காண்டேகர் எழுத்துகளை மக்கள் தேடித்தேடி விரும்பிப் படித்தார்கள்.  தனது தமிழ் மொழிபெயர்ப்பாளர் கா ஸ்ரீ ஸ்ரீ பற்றி காண்டேகர் சொல்லி இருப்பது.. அவர் மொழி பெயர்க்கும் உரிமையை கொடுத்தது கா ஸ்ரீ ருக்கு மட்டும்தான் என்பதும் குறிப்பிடத்தக்கது.  தமிழ் எழுத்தாளர்கள், நடிகர்கள், கவிஞர்கள் பலரும் இவரின் ரசிகர்கள்.  இவரின் தத்துவ விசாரம் மிகவும் புகழ்பெற்றது.  'காண்டேகர் மணிமொழிகள்'  என்றே ஒரு புத்தகம் வெளிவந்தது.

ஞானபீட விருது பெற்ற யயாதி நாவலின் முன்னுரையில் காண்டேகர் கா ஸ்ரீ ஸ்ரீ பற்றியும் தமிழ் ராசிகள் பற்றியும் சொல்லி இருப்பது கீழே.....

மொழி அமைப்பிலும் இலக்கிய வழக்கிலும் இந்தி, குஜராத்தி முதலியவை தமிழை விட மராட்டிக்கு மிகவும் அருகில் உள்ளவை. ஆனால் ஹிந்தியில் நடக்காத அதிசயத்தை தமிழாக்கம் இயல்பாகவும், சுலபமாகவும் சாதித்துக் காண்பித்தது.  பலப்பல ஆண்டுகளுக்கு முன்பு என் நூல்களை தமிழில் ஆக்க அனுமதி கேட்டு ஒரு கடிதம் வந்தது - தூய மராட்டியிலே!  அதை எழுதியவர் சிறுவயதில் தந்தையின் வேலை நிமித்தமாக பம்பாயில் இருந்ததனால் மராட்டியில் பழக நேர்ந்தது.  பிறகு அவர் மொழி அறிவை தானே நன்கு வளர்த்துக் கொண்டார் எனது இலக்கியத்தை தமிழாக்கி தமிழ் மக்களிடையே எனக்கு நிறைந்த புகழையும் பிரியத்தையும் திரட்டி தந்த அவரே கா ஸ்ரீ ஸ்ரீ .  எந்த மொழியின் அ ஆ இ ஈ கூட எனக்கு தெரியாதோ, அந்த மொழி பேசுவோரின் வீடுகளில் என்னை கொண்டு விட்டார். 

கா ஸ்ரீ ஸ்ரீ யின் பணி இல்லை என்றால் அடக்கத்துடன் ஒதுங்கி வாழும் இயல்புள்ள என் வாழ்வில் இன்று கிடைத்துள்ள பெரு மகிழ்ச்சியையும் ஆறுதலையும் நான் இழந்து இருப்பேன்.  தமிழாக்கம் வெளிவந்த பின்பு பல மாணவ மாணவியரும் இளைஞரும்,  முதியோரும் எனக்கு கடிதம் எழுதலாயினர்.  இவை ஆங்கிலத்தில் இருக்கும்.  மை டியர் ஃபாதர் என்று ஒரு பெண்ணின் கடிதம் தொடங்கும்.  'ஏதேனும் ஒரு மொழியை கருவியாக கொண்டு மிகத் தொலைவில் சென்று ஒளி கொடுக்கும் மின்சக்தி இலக்கியத்துக்கு உண்டு' என்ற உண்மையை நான் உள்ளூர உணரலானேன். உல்கா, வத்ஸலா, சுலோச்சனா முதலிய கதாநாயகிகளை பற்றி இந்த கடிதங்களில் பல வகைக் கேள்விகள் இருக்கும்.  இந்த கற்பனைக் கன்னியர் என் வீட்டிலேயே வளைய வருவது போலவும், இவர்களின் இன்ப துன்பம் பற்றி அனைத்தையும் நெடுந்தொலைவில் உள்ளவர்களுக்கு சொல்வது எனக்கு எளிது போலவும் இந்த வினாக்கள் எழுப்பியவர்களுக்கு எண்ணம். 

மராட்டிய எழுத்தாளராக எனக்கும், தமிழ் வாசகருக்கும் இடையே உதித்த இந்த அரிய நட்பு, கடிதங்களுடன் நிற்கவில்லை.  கோல்ஹாப்பூர் எங்கிருக்கிறது என்பதை முன்பு அறிந்திராத பலர், என்னை நேரில் காண வந்தனர்.  இங்கு வரும் தமிழர் என்னுடனேயே இருப்பர்.  எங்கள் பேச்சு அனைத்தும் ஆங்கிலத்தில் தான்.  ஆனால் ஒரே நிமிஷத்தில் அவர்கள் எங்களுடன் ஒன்றி விடுவர்.  நட்பை வளர்க்கும் கலையில் மராட்டியர் எவ்வளவு பின்னடைந்து இருக்கிறார்கள் என்ற கசப்பான உண்மை எனக்கு புலப்படும்.  சில ஆண்டுகளுக்கு முந்திய ஒரு நிகழ்ச்சி :  வீட்டை விட்டு வெளி கிளம்ப யாரும் துணியாதபடி அடை மழை காலம்;  மாலை நேரம்.  இந்த முகூர்த்தம் பார்த்து என்னிடம் அன்புள்ள தமிழ் இளைஞன் ஒருவன் வாசலில் வந்து நின்றான். தனியே இல்லை, தன் புதுமண மனைவியுடன்.  என் ஆசியை வேண்டி அவர்கள் வந்திருந்தனர்.  இப்படி தமிழ் வாசகர்களுக்கு என்னிடம் உள்ள அன்பு பலவகை உருவம் கொண்டது.

விசாலமான நமது பாரத நாட்டில் பெருஞ்சாலைகளிலும், ரயில் வழிகளிலும் பாலங்களை கட்டுவதால் மட்டும் ஒற்றுமையை உண்டாக்கிவிட முடியாது. இனம், மாநிலம், பண்பாடு முதலிய பிரிவுகளால் வேறுபட்டுள்ள மாந்தரின் உள்ளங்களை இணைத்து, அவர்களின் உணர்வில் ஒருமையைப் படைக்கும் உறுதியான பாலங்கள் நமக்கு தேவை.  சிறந்த இலக்கிய மொழிபெயர்ப்பாளர் தான் இத்தகைய பாலங்களை அமைக்க வல்லவர்கள்.  தமிழில் கா ஸ்ரீ ஸ்ரீ  எனக்கு இவ்வாறு கிடைத்திருப்பது எனது பெரும் பாக்கியம். 

எழுத்தாளன் என்ற முறையில் என் எல்லை எனக்கு தெரியும்.  ஆயினும்,  நான் மிகப்பெரிய இலக்கிய மகா ரதர்களின் திருவடியில் அமர்ந்து, இலக்கியத்தை பயின்றிருக்கிறேன்.  என் எளிய பாடலை என் பலவீனக் குரலில் இசைக்க முயன்றிருக்கிறேன்.  அந்த நாவலை தமிழகம் நன்கு வரவேற்கும் என்று நம்புகிறேன்.

=================================================================================================

பொக்கிஷம் :-