கிராமத்தில் விடுமுறை வாழ்க்கை

 

பானுமதி வெங்கடேஸ்வரன்: 

ஜோசியர்களின் 'சந்திராஷ்டமம், ஏழரை சனி, அஷ்டமத்து சனி போன்ற பயமுறுத்தல்கள்,

விஞ்ஞானிகள், வல்லுனர்களின் பூமி வெப்பமடைகிறது, இன்னும் ஐம்பது வருடத்தில் சென்னை இருக்காது,etc.

மருத்துவர்களின் உங்கள் சர்க்கரை அளவு அதிகமாக இருக்கிறது, கிட்னி பாதிக்கப்படலாம், போன்ற பயமுறுத்தல்களில் எதற்கு அதிகமாக முக்கியத்துவம் கொடுப்பீர்கள். இப்போது வாட்ஸாப்பில் வேறு பலவித அச்சுறுத்தல்கள்.

# ஜோதிடர்கள், மருத்துவர்கள் சொல்பவை என்னை பாதிப்பதில்லை.  ஜோதிடத்தில் நம்பிக்கை இல்லை.  மருத்துவர்கள் சொல்பவற்றுக்கு வைத்தியமும் அவர்களே சொல்வார்கள். (செயல்படுத்துவது நமது இஷ்டம்.)  மற்றபடி அறிவியல் வல்லுனர்கள் சொல்பவையும், உலக நடப்புகளும் என்னை பெரும் கவலைக்கு உள்ளாக்குவது உண்மை. இப்படி அதீதமாக கவலை கொள்ளாமல் இருக்கப் பழகி வருகிறேன்.

$ நம்மை நம் ஆயுள் தாண்டி எதுவும் செய்யப்போவது இல்லை என்பதால் 2047 க்குப்பின் வருவன பற்றி சிந்திப்பதில்லை.

மருத்துவர்கள் நாடி வந்தவர்களை ஆயுள் சnதாதார்களாக ஆக்குவது எதிர் பார்க்கக் கூடியது.

கூ டிய வரை இயற்கை வளங்கள் அழியாமல் இருக்க வேண்டும் என்ற முடிவில் roof top solar power, e vehicle enru உபயோகிக்கிறோம் 

மாடியில் செடி வளர்க்கிறோம்

Earth day தவிர மற்ற நாட்களிலும் மின்சிக்கனம் கடைப்பிடிக்கிறோம். 

& எதற்குமே அதிகம் அலட்டிக்கொள்வதில்லை. இவ்வளவு வருட வாழ்க்கையில் எவ்வளவோ மேடு பள்ளங்கள், வலிகள், பயம், சந்தோஷம் எல்லாம் பார்த்தாயிற்று. இனி 'எது வந்தாலும் ஏற்றுக்கொண்டால் துணிவே துணையாய் மாறும்' என்ற நம்பிக்கை. 

= = = = = = = =

எங்கள் கேள்விகள் :

1) எந்த வறுவல் உங்களுக்குப் பிடிக்கும் ? 

அ ) வாழைக்காய் 

ஆ) உருளக்கிழங்கு 

இ) சர்க்கரை வள்ளிக்கிழங்கு 

ஈ) மரவள்ளிக் கிழங்கு 

உ ) வேறு ஏதாவது ? 

2) வறுவலுக்கு உப்பு மட்டும் போட்டால் பிடிக்குமா - அல்லது காரமும் வேண்டுமா? அல்லது உப்பு / காரம் எதுவும் வேண்டாமா ? 

3) சப்பாத்திக்குச் சரியான ஸைட் டிஷ் எது? 

=  = = = = = = 

KGG பக்கம் : 

விடுமுறை கால அனுபவங்கள் தொடர்கின்றன. 

ரயிலில் திருவாரூர் சென்று இறங்கி, பிறகு பஸ் பிடித்து - அல்லது கிராமத்திலிருந்து சித்தப்பா அனுப்பிய மாட்டு வண்டி வந்திருந்தால், அதில் ஏறி, கிராமத்திற்கு வந்து சேருவோம். 

( இங்கே கொடுக்கப்பட்டுள்ளது எங்கள் கிராமத்தின் கோவிலில் - நாங்கள் அனைவரும் பெரு முயற்சி செய்து புனருத்தாரானம் செய்த கோவில் - மே நான்காம் தேதி நடைபெற உள்ள திருமஞ்சனம் பத்திரிக்கை. ) 

வாகன பிரயாணங்கள் முடிந்துவிட்டது என்றால், அதற்குப்பின் கிராமத்தில் சில சந்தோஷங்கள் உண்டு. 

தென்னந்தோப்பு , மாந்தோப்பு எல்லாவற்றுக்கும்  செல்வது. இளநீர், தேங்காய் வழுக்கை, மாங்காய் பறித்துச் சாப்பிடுதல், சித்தப்பாவின் பையன்கள் - அதாவது என்னுடைய ஒன்றுவிட்ட சகோதரர்கள் சொல்லும் பாம்பு (அடித்த) கதைகளைக் கேட்டு பயம் கொள்வது என்று பொழுது போகும். 

அப்பொழுது எங்கள் கிராமத்தில் இருந்தவர்கள், மூன்று சித்தப்பா, சித்திகள், அவர்களின் மகன் மகள்கள், இரண்டு அத்தைகள், அவர்களின் குழந்தைகள், பேரக்குழந்தைகள். 

நானும் அண்ணனும் எப்பொழுதும் அப்பாவின் இரண்டாவது தம்பி (ராமச்சந்திரன்) வீட்டில்தான் தங்குவோம். மற்ற உறவினர்கள் வீடுகள் அருகருகே இருக்கும். அவ்வப்போது அவர்கள் வீட்டிற்குச் சென்று வருவோம். ஆனால் சாப்பிடுவது தூங்குவது எல்லாம் ராமு சித்தப்பா வீட்டில்தான். 

( நாகையில், எங்கள் வீட்டில் எனக்கு என்று ஒரு தட்டு உண்டு. - ஹி ஹி - அலுமினியத் தட்டுதான்! - அதில் கொஞ்சம் சாதம் போட்டு பருப்பு கலந்து - சில சமயம் அதோடு ரசம் கலந்து - சாப்பிடுவேன். பிறகு மோர் சாதம். மற்றபடி குழம்பு பொரியல் எல்லாம் எனக்கு அவ்வளவாகப் பிடிக்காது. ) 

சிறிய வயது என்பதால் எனக்கு சித்தப்பா வீட்டில் சாப்பிடுவது மிகவும் கஷ்டமான விஷயம். அவர்கள் சாப்பிடுவதற்கு அந்தக் காலத்தில் தட்டு உபயோகிப்பது இல்லை. குச்சிகள் குத்தி சேர்க்கப்பட்ட வாழை மட்டை நீண்ட செவ்வக வடிவில் இருக்கும். 

பருப்பு சாதம் கிடையாது. சாதத்தின் மீது சாம்பார் ஊற்றினால் அது சரியாக வாழை மட்டைகளைச் சேர்த்து போடப்பட்டிருக்கும் குச்சிகளின் இணைப்பு  ஓட்டை வழியாக தரைக்கு பாய்ந்து ஓடும். அண்ணன் சாம்பார் ஊற்றிய உடனேயே சேர்த்துப் பிசைந்துவிடுவான் அதனால் அவனுக்கு அந்தப் பிரச்சனை இல்லை.  அதனால், அவனே எனக்கும் சாதம் பிசைந்து வைத்துவிடுவான். ஆனாலும் குழம்பின் காரம் எனக்குப் பிடிக்காது! அதனால் நிறைய மோர் சாதம் மட்டுமே சாப்பிட்டு கிராமத்து நாட்களைக் கடத்தி வந்தேன். சாப்பிட்டு முடித்தபின் அந்த மட்டையை நானே கொண்டுபோய் கொல்லைப்பக்கம் போட்டுவிட்டு, அந்த இடத்திற்கு சற்றுத் தள்ளியுள்ள ஒரு குட்டையில் கை கழுவிக்கொண்டு வரவேண்டும்.  

அந்தத் தண்ணீர்க் குட்டையில் ஓரங்கள் சேறும் சகதியுமாய் கொஞ்சம் வழுக்கும் வகையில் இருக்கும். பயந்துகொண்டே காலை வைத்தால் - இன்னும் அதிகமாக வழுக்கும். அதனால் அண்ணனை கெட்டியாகப் பிடித்துக்கொண்டே தண்ணீரில் இறங்கி கையைக் கழுவிக்கொண்டு அண்ணனுடனேயே திரும்பி வந்துவிடுவேன். 

எங்கு போனாலும் அண்ணனுடனேயே சேர்ந்து போய் வருவேன். அண்ணன் எல்லோருடனும் சகஜமாக நன்றாகப் பேசுவான்.  நான் பெரும்பாலும் மௌனமாக அந்தந்த வீடுகளில் உள்ள புத்தகங்கள் எதையாவது எடுத்து, படம் பார்த்து, எழுத்துக் கூட்டிப் படித்துக்கொண்டிருப்பேன். 

கிராமத்து அனுபவங்கள் இன்னும் நிறைய இருக்கின்றன. பிறகு பார்ப்போம். 

= = = = = = = = =