நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 21 : நெல்லைத்தமிழன்

 

புஷ்கரில், பிரம்மா கோவில் தரிசனத்திற்குப் பிறகு, ரங்க்ஜி கோவில் மற்றும் ஸ்ரீராம வைகுந்தர் கோவில் தரிசனத்திற்குப் பிறகு அருகே இருந்த ஸ்ரீ வராஹர் கோவிலுக்குச் சென்றோம். கொஞ்சம் ஆள் அரவமற்ற கோவில். ஆனால் மிகப் புராதானமானது.

அங்கும் தரிசனம் செய்து புகைப்படங்கள் எடுத்துக்கொண்டோம்.

ஸ்ரீ வராஹர் கோவில்

ஸ்ரீ வராஹ ஸ்வாமி மூலவர் மற்றும் உற்சவர்.

மிக வித்தியாசமான கருவறை மண்டபம்.

எனக்கென்னவோ பழைய கோவில் தாக்கப்பட்டு அழிவு பட்டதால், மேலே புதிதாக் கூரை அமைத்திருப்பது போலவே தோன்றியது.

கோவிலின் மூலவர் பளிங்கினால் இருந்தாலும், கோவில் மிகப் புராதானமான கோவில்.

அங்கு இருந்த ஸ்ரீ பத்ரிவிஷால் கோவில்.

புஷ்கரின் கடைவீதிகள் 

தங்கியிருந்த இடத்திலிருந்து எல்லாமே நடக்கும் தூரம்தான். இருந்தாலும் வயதானவர்களுக்காக ஆட்டோ உபயோகப்பட்டது. காலாற கடைவீதிகள் வழியாக நடந்தால் ஏரி, பிரம்மா கோவில் மற்றும் பல கோவில்களில் தரிசனம் செய்துவிட முடியும்.

கடைவீதிகளில் எங்கும் கிடைக்கும் பொருட்கள்தாம். இருந்தாலும் புஷ்கர், ராஜஸ்தானுக்கு உரித்தான கலைப் பொருட்களும் விற்பனை செய்கிறார்கள்.

சீக்கியர்களுக்கான கடை என்று நினைக்கிறேன்.

நாங்கள் தங்கியிருந்த ஹோட்டல்

நாங்கள் ஒரு இரவுதான் (அதிலும் நள்ளிரவு வந்துவிட்டு, மறுநாள் மதியம் கிளம்பிவிட்டோம்) புஷ்கரில் அந்த ஹோட்டலில் தங்கினோம். சௌகரியமாக இருந்தது. ஆனால் தூங்கி ஓய்வெடுக்கத்தான் நேரம் இல்லை. யாத்திரைகளில் சில இடங்களில்தான் இந்த மாதிரி அழகிய தங்குமிடங்கள் அமையும். ஆக்ரா, தில்லி போன்ற இடங்களில் சுமாராகத்தான் அமையும்.

அழகிய அறை. இருந்த குளிருக்கு இன்னும் சில மணி நேரங்கள் தூங்கியிருக்கலாம்.

ஹோட்டலின் உட்புறப் படங்கள்.

ஹோட்டல் சுவற்றில் இருந்த பல ஓவியங்களில் சில

வெளிநாட்டுப் பயணிகளும் நிறைய புஷ்கருக்கு வருகிறார்கள். தங்கியிருந்த ஹோட்டலின் பின்பகுதி, ரிசார்ட் போன்று.

ஹோட்டல் பின்பகுதியில் குதிரை லாயத்தைப் பார்த்தேன். குதிரைக் குட்டிகளும்.

ஹோட்டல் மாடியிலிருந்து புஷ்கரின் அழகிய காட்சிகள்

சுத்தமான சுகாதாரமான உணவு தயாரிக்கும் யாத்திரைக் குழுவினர்.

நன்றாகச் சாப்பிட்ட பிறகு எங்கள் லக்கேஜ்களைத் தயார் செய்தோம்.  இன்றைய உணவு, பூசணி மோர்க்குழம்பு, சர்க்கரை வள்ளிக்கிழங்கு கறி, அவரைக்காய் பருப்புசிலி, சர்க்கரைப் பொங்கல், பகோடா.

உணவிற்குப் பிறகு, யாத்திரைக் குழுவினர் அவர்கள் வேலையை முடித்துக்கொண்டு கிளம்ப 1 மணி நேரமாகும் என்று கூறியதால், முடிந்தவர்கள் புஷ்கர் கடைவீதிகளில் நடந்துகொண்டிருந்தோம். ஆக்ராவில் எங்கள் லக்கேஜ் இறக்கப்படாது, அதனால் ஒரு செட் டிரெஸ் எடுத்துக்கொள்ளும்படிச் சொன்னார்கள். தனிப் பையில் தட்டு டம்ளர், மருந்துகளோடு ஒரு செட் டிரெஸ், குளிப்பதற்குத் தேவையானவற்றையும் எடுத்துக்கொண்டோம்.  எல்லோரும் தயாரானதும், பேருந்தில் எங்கள் லக்கேஜ் ஏற்றப்பட்டது. பிறகு 3 மணிக்கு ஆக்ரா நோக்கிப் பயணப்பட்டோம்.  இடையில் எந்த இடத்தைப் பார்த்தோம் என்பதை வரும் வாரத்தில் பார்க்கலாம். தொடர்ந்து படிக்கும் அனைவருக்கும் நன்றி.

(தொடரும்)